19/12/2017
Qusar rayon Statistika İdarəsinin 1 yanvar 2017-ci il üzrə əhalinin demoqrafik göstəriciləri haqda məlumatı:
01 yanvar 2017-cİ il tarixinə Qusar rayonunun əhalisinin sayı 1,1 min nəfər və yaxud 1,0 faiz artaraq 96,2 min nəfərə çatmışdır. Rayon əhalisinin xüsusi çəkisi Quba – Xaçmaz iqtisadi rayonunun əhalisinin ( Xaçmaz rayonu – 174,8 min nəfər, Quba rayonu – 168,4 min nəfər, Şabran rayonu – 58,0 nəfər, Siyəzən rayonu – 41,4 min nəfər, Qusar rayonu – 96,2 min nəfər, cəmi – 538,8 min nəfər) 17,9 faizini təşkil edir. Hazırda rayonda əhalinin sıxlığı bir kvadrat kilometrə 64 nəfər (Respublika üzrə 113 nəfər, region üzrə 77 nəfər) təşkil edir. Əhalinin 21,2 faizi (20,4 min nəfər) şəhər, 78,8 faizi (75,8 min nəfər) kənd yerlərində yaşayır.
Rayon əhalisinin 50,0 faizini (48,1 min nəfər) kişilər, 50,0 faizini (48,1 min nəfər) qadınlar təşkil edir və hər 1000 kişiyə 1000,0 nəfər qadın düşür. Respublika üzrə bu rəqəm 1005,6, iqtisadı rayon üzrə 986,0, o cümlədən Xaçmaz rayonu üzrə 997,7, Quba rayonu üzrə 969,6, Şabran rayonu üzrə 966,1, Siyəzən rayonu üzrə 1000,0 nəfər təşkil edir.
Qusar rayon əhalisinin 22,8 min nəfəri (23,7 faizi) 0 -14 yaşda, 66,9 min nəfəri (69,5 faizi) 15 – 64 yaşda, 6,5 min nəfəri (6,8 faizi) isə 65 və yuxarı yaşda olanlardır. 14 – 29 yaşda olan gənclər rayon əhalisinin 27,9 faizini (26,9 min nəfər) təşkil edir. Əhalinin ümumi sayına nisbətən 65 və yuxarı yaşda əhalinin xüsusi çəkisi üzrə rəqəm Respublika göstəricisindən 0,4 faiz, iqtisadı rayon göstəricisindən 1,1 faiz çoxdur. 2016-cı il ərzində rayonda 1644 körpə doğulmuşdur ki, onların da 846 nəfərini (51,5 faizi) oğlanlar, 798 nəfərini (48,5 faiz) qızlar təşkil edir. 2015-ci illə müqayisədə 2016-cı ildə əhalinin hər 1000 nəfərinə hesabı ilə doğulanların sayı 19,1-dən 17,2-ə qədər azalmışdır. Doğulanların 181 nəfəri (11,0 faizi) 15-29 yaşda qeydə alınmamış nikahda olan qadınlar tərəfindən doğulmuşdur ki, bunun da 156 nəfəri (86,2 faizi) kənd yerlərinə məxsusdur.
Ötən il rayonda 613 ölüm, 655 nikah və 121 boşanma halları qeydə alınmışdır. 2015-ci ilə nisbətən 2016-cı ildə əhalinin hər 1000 nəfərinə hesabı ilə ölənlərin sayı 7,2-dən 6,4-ə qədər azalmış, nikahların sayı 6,6-dan 6,8-ə qədər, boşanmaların sayı isə 1,2-dən 1,3-ə qədər yüksəlmişdir.
İqtisadi rayon üzrə boşanmaların sayı (əhalinin hər 1000 nəfəri hesabı ilə) ən çox Xaçmaz rayonunda (1,4 faiz) olmuşdur. Qusar rayonunda boşanmaların 38,8 faizi (47-i) şəhər yerinə aiddir. Gənc ailələr tərəfindən ailə münasibətlərinə və ailə məfhumuna ciddi yanaşılmamasının nəticəsidir ki, rayonda boşanma halları yüksək olaraq qalır.
Qusar rayonunda əhalinin ölüm əmsalı Respublika göstəricisindən 0,5 faiz çoxdur, region göstəricisi ilə eynidir. Cari ildə 12 nəfər 1 yaşa qədər körpə vəfat etmiş (onlardan 5-ı oğlan, 7 nəfəri qız) və ya hər 1000 nəfər diri doğulandan 7,5-i ölmüşdür. Bu göstərici respublika göstəricisindən 3,9, region göstəricisindən 5,6 əmsal azdır. 2016-cı ildə ana ölümü faktı (doğuşdan əvvəl və sonra) qeydə alınmamışdır.
Respublika miqyasında olduğu kimi, Qusar rayonunda da ölüm hallarına əsasən qan dövranı sisteminin xəstəlikləri, yenitörəmələr, həzm sisteminin, tənəffüs orqanlarının xəstəlikləri səbəb olur.
2016-cı il ərzində Dövlət Miqrasiya Xidmətinin və Daxili İşlər Nazirliyinin müvafiq qurumları tərəfindən Qusar rayonuna daimi yaşamaq üçün 213 nəfər gələn (69 nəfər şəhər və 144 nəfər kənd yerlərinə) və 98 nəfər (ondan 19 nəfər şəhərdən, 79 nəfəri isə kənddən) rayondan gedən qeydə alınmışdır.
Qusar rayon Statistika İdarəsi
