Qatar visa, all informations

24/09/2023

متوفر تاشيرات العمل للسعودية 15000 ريال ورسوم رخصة الاقامة 1000 ريال فيها سنة... للعلم التاشيرة تطبع عالجواز وليست الكترونية

24/12/2022

اذان الفجر من الحرم المكي.. ربي يوفق كل ساع للخير

08/12/2022

السلام عليكم خاوتي... عرض خاص لمدة اسبوع، فيزا عمل بالتقسيط او دفع كامل كيما تحب
من فضلك اقرى كل منشورات الصفحة قبل قرارك...
بالتقسيط المعلومات كالاتي : تدفع 10 ملاين كي ترسل الباصبور... كي تدخل لقطر تزيد 10 ملاين سنتيم او 1700 ريال بعد شهر تزيد 1000 ريال... في حالة لقيت خدمة وحبيت تدير الايدي يلزم تكمل مبلغ الفيزا كامل... وتزيد مبلغ الايدي بطاقة اقامة لي هو 1700 ريال... اذا لقيت خدمة والشركة الجديدة هي تديرلك بطاقة اقامة وحبيت عدم ممانعة من نقل التاشيرة يلزم تكمل مبلغ الفيزا كامل.... بالتوفيق...
الدفع كامل السعر يكون 21 مليون... هذي فيزا عمل 21 مليون تخليك كي تجي لقطر عندك الحق في العمل... يعني تشريها وتجي هنا تبحث عن عمل...مدة صلاحيتها 3 اشهر واذا حبيت كي توصل لقطر نديرولك بطاقة اقامة تزيد 1700 ريال وتولي مقيم في قطر صلاحيتها سنة قابلة للتجديد...

24/10/2022

غدا ان شاء الله لايف للاجابة على تسائلاتكم كامل... خليو اسئلتكم هنا باش نجاوب عليها ان شاء الله

24/10/2022

13/08/2022

كالعادة استقبال الزبائن علامة مسجلة حصرية من طرفنا... بالتوفيق للجميع

04/08/2022

تم اليوم بحمد الله استقبال زبونين في اول رحلة للخطوط الجوية الجزائرية وتوصيلهم لمقر السكن ااذي تم اكتراءه من طرفهم.. تم حجز تذاكر السفر عن طريقنا ايضا... ربي يوفقهم ويحميهم... دائما مواصل في استقبال زباءني والوقوف بجانبهم... خدماتنا واسعارنا ليس لها مثيل في السوق... بالتوفيق للجميع

02/08/2022

التسجيل في احتراز للزبائن الكرام.. رافقتهم السلام موعد اقلاعهم يوم الخميس ويوم السبت ان شاء الله... بالتوفيق للجميع... خدماتنا ليس لها مثيل... واسعارنا ليس لها منازع

31/07/2022

هذي الصفحة درتها خصيصا للجادين لي حابين يروحو لقطر بفيزا عمل باش نساعدهم بوش نقدر... فبالتالي اي مريض قلب وحاقد، او غبي او ساذج او تافه او سراق او غير جاد او قرعاج من فضلك ما تراسلنيش.. لانو هكا راكم راح تخسروها على ولاد الفاميليا... فبالتالي الجادين فقط لي يراسلوني

26/07/2022

26/07/2022

24/07/2022

السلام عليكم ورحمة الله وبركاته خاوتي
ان شاء الله راكم ملاح وبخير وعلى خير...
اليوم نحكيو ان شاء الله عن تغيير جهة العمل في قطر، كي العادة كل المعلومات عليها لي ما تلقاوهاش في مكان اخر... وربي يوفق ان شاء الله..
اولا: باش نتفاهمو في قطر باش تبدل من شركة لشركة راح تدير طلب تغيير جهة العمل في وزارة العمل... هذا الطلب يلزم يكون مرفوق بالملف الاتي: قيد المنشا تاع شركتك القديمة... الايدي تاعك... قيد المنشا تاع الشركة الجديدة... عرض عمل من الشركة الجديدة... شهادة عدم ممانعة من العمل من الشركة الجديدة... طلب تغيير جهة العمل لي تعمرو على لامبريمي لي راهي كاين صورتو في المنشور واخيرا استقالتك... شهادة عدم الممانعة من الشركة القديمة لم تعد. شرط لكن ديرها في الدوسي افضل
ثانيا: العملية هذي مجانية، اما تديرهالك شركتك الجديدة اما تديرها وحدك بعد ما الشركة يمدولك الاوراق.. او اذا ما حبيتش تتعب تديرها عند اي سيباركافي تاع قطر ب 50 ريال.. او كي تخلى كامل راسلني انا نديرهالك.
ثالثا بعد ما تدفع الملف كامل يجيك بعد يومين هكاك رسالة في الهاتف تقولك بلي طلبك راح تحت الاجراء... ويمدولك كود لتتبع العملية يبدى ب EC... وبعدها تقعد تنتظر
رابعا: بعد تقريبا 20يوم تاتيك في رسالة نصية الموافقة بلي راهم وافقو عليها ويعطوك متى تنتهي فترة الاخطار (notice periode) لي بعد نهايتها تقدر تولي تخدم في الشركة الجديدة عادي... عموما هي راح تكون بشهر واحد... وطبعازبائني نمدلهم واحد لاستيس باش الفترة هذي ما تكونش كبيرة. بعد ما تاتيك الرسالة النصية راح يعطوك كود اخر يبدى ب vp وهذا الكود لي راح تستعملو الشركة الجديدة في تحويل الكفالة ليهم باش تبدى تخدم عندهم.
خامسا: بعد نهاية فترة الاخطار الشركة الجديدة تديرلك عقد عمل جديد وتوقع عليه وتبعثه للتوثيق هي... بعد ما يجي التزثيق تاع العقد... هنا يجب استنفاذ تغيير جهة العمل لي مدوهالك (الكود لي يبدى ب vp( باش يخدمولك بطاقة اقامة جديدة.
اخيرا : الرسوم الرسمية لهذه العملية هي كالاتي : 60 ريال لتوثيق العقد... 2000 ريال لتنفيذ تغيير جهة العمل للنقلة الاولى... 250 ريال رسوم طباعة ايدي جديدة... هذه الرسوم الرسمية لي تديهم وزارة الداخلية.. بعدين كل شركة كيفاش كاين لي هي تخلصلك كلش كاين لي تخلصلك النص بالنص وكاين لي تخلص كلش انت مثلا كيما شركات ليموزين... فبالتالي كاين لي يقولك 2500 كاين 2400 كاين 0 كل واحد كيفاش... والله اعلم
هذي هي كل المعلومات عن تغيير جهة العمل واي استفسار او سؤال رانا هنا في اي وقت... بالتوفيق خاوتي

18/07/2022

في الطريق من اجل استقبال اربعة زبائن ان شاء الله

10/07/2022

السلام عليكم ورحمة الله وبركاته
اليوم ان شاء الله نحكيو على المصاريف في قطر... وديرو في بالكم بلي 1 ريال = 56 دينار هكا باش تعرفو تحسبو واش راح نقوللكم 👇
اولا يلزم نتفاهمو على حاجة وهي انو المعيشة في قطر غالية للغاية اذا كنت تجيب الدراهم من الجزائر وتصرفهم في قطر... وهذا بسبب تدهور العملة تاعنا
ثانيا بخصوص الكراء، اما انو تكري سرير لي سعرو يتراوح بين 600-875 ريال وهذا حسب الفرش الموجود في المنزل اولا وحسب المنطقة ثانيا وحسب عدد الناس في الغرفة ثالثا... عموما الغرفة تكون فيها 3-5 افراد.. والمنزل يكون فيه 6-10 افراد... فبالتالي اذا كنت انسان تحمل الميزيرية شوية فاكري سرير اول شهر افضل... لكن احرص على انو السرير يكون مع ناس تحشم وولاد فاميليا.... الخيار الثاني هو انو تكري غرفة وثمنها بين 1000-1500 وهذا حسب المنزل، المكان، الفرش وعدد السكان في المنزل، عموما تلقى المنزل فيه 3-4 اشخاص وفيه كل وسائل العيش في المنزل، فاذا كنت ميسور شوية الحال وحاب تكون عندك انتيميتي شوية ليلا ونهارا فهذا افضل حل... ثالثا استوديو غير مفروش من 1500-1800 ومفروش من 1800-2800 وهذا حسب المكان... هذا الحل هو افضل حل ل3 من الناس طالعين مع بعض في نفس الوقت، فتتفاهمو على كلش في البداية وتتقاسمو المصاريف راح يجيكم المصروف الشهري للواحد في حدود 1300 وهذا امر ممتاز... وعموما انا مع زبائني ديما نحرص انو نعرفهم ببعضهم البعض باش يطلعو في نفس الوقت وتسهال عليهم الامور..
ثالثا بخصوص الاكل، هنا اذا كنتو تطيبو وكامل ماراحش يستقام الاكل بزاف، في حدود 300-500 ريال شهريا ماكسيموم... خاصة اذا كنتو متفاهمين بيناتكم فحقا ماراحش تصرفو بزاف... انا ننصح اي واحد جاي لقطر يخطيه من اكل الفاست فود وكامل لانو يستقام بزاف( انا شخصيا نص مالي راح في الماكدونالدز) لكن مادام تكون جديد في قطر من دون عمل فاتقشف قد ما تقدر لعزيز.
رابعا، بخصوص التنقل، هناك ثلاث وسائل للتنقل هنا، ميترو، حافلة او سيارات اجرة ( اوبر، كريم، كروة... الخ) ، في لحظة اختياركم السكن اختاروه في مكان بالقرب من الميترو واذا ما لقيتوش ما عليش لكن اختاروه في مكان قريب من metro link station وهي محطات حافلات مكيفة في اغلبها موجودة دائما تاخذ للميترو... فاذا كانت هذي قريبة لمنزلكم مليحة ايضا... سعر المترو 2 ريال للرحلة والخافلة اظن 1 ريال والله اعلم... اما اذا حبستو تديو شيارات الأجرة فاستعملوا كريم فهو الارخس لكن يتعي شوية بسبب عدم كثرة السائقين، اما اذا كنتم ميسورس الحال فليس هناك افضل من اوبر...
خامسا، بخصوص الهاتف، اذا كنتو في منزل مشترك معظمهم فيه انترنت مجاني او بسعر رمزي... اما اذا كنتم في استوديو مشترك ديرو اشتراك نت منزلي ب 200 ريال شهري انترنت تدفق عالي وزيد شريحة هاتف ب50 ريال شهري يسموها شريحة فليكس... لكن النت تاع الهاتف استعملوه في الاساسيات لما تكونو خارج المنزل...
اخيرا: من بين الخدمات لي نقدمها لزبائني انو في حال صاحب المنزل طلب دفع بالشيكات فقط فانا نمد الشيكات لزبائني من اجل تسهيل الامور وهم يعطيوني النقود كاش...
هذا والله اعلم... اي استفسار راني هنا

07/07/2022

السلام عليكم ورحمة الله وبركاته خاوتي
اليوم ان شاء الله نحكيو على العمل في قطر... وباش ننطلقوا على قاعدة صحيحة هنا، يلزم نتفاهمو على حاجة، وهي انو العمل مكاتيب، سوق العمل مش علوم دقيقة، ولا أمر لي يخضع لقوانين وعمليات حسابية... وانما يخضع لمكتوب القادر سبحانو وتعالى...
اولا، في قطر مهما كان عملك فانت راح تتعامل مع ناس بثقافات متعددة، لهجات ولغات متعددة، ديانات متعددة.. فاول حاجة يلزم تكون تنحلى بيها هي اللغة الانجليزية الجيدة، وانفتاح عقلي يخليك تحترم كل الناس... فمن هنا نقول لاي واحد ناقص انجليزية من الافضل انو زيد طور انجليزيتك وبعدين اطلع لقطر.... هذا لا يعني انو لي طلع من دون انجليزية حتما ماراحش يلقى عمل... لا كيما قلتلك الفوق العمل مكاتيب عزيزي وكي يقدرلك تخدم ربي تكون اصم وابكم وتخدم عادي... ولكن اذا كنت بالانجليزية فتسهالك شوية الامور هذا مكان...
ثانيا ... اكثر المجالات لي فيها عمل هنا في قطر هي مجالات الهندسة المدنية، المعمارية، الماركتينغ، الكومرشيال، نظافة وامن صناعي، سائق، نادل، لي يشد لاكاس... هذو. معظمهم اجرهم ينطلق من 5000ريال وطلع الا ممكن لي يشد لاكاس في حدود 3000ريال هكاك والله اعلم.... اما باقي المجالات فمتوفرة عروضها لكن مش كثير كثير... وكيما قلتلكم من قبل... العمل مكاتيب
ثالثا، معظم الشركات لي تبحث على عمال تكون من بين شروطها: موجود في قطر ويحمل اقامة قطرية شارية المفعول وعنده عدم ممانعة من عند شركته الاولى ( هذي الورقة انا نمدها مجانا لزبائني)... وراح نتكلم عليها لاحقا... وباش تعرفو وش راني نحكي يكفيكم انو تدخلو ل mzad qatar, qatar living باش تتاكدو من واش راني نقول.
رابعا، كيما قلت في احد منشوراتي، قطر تاع عمل، لي شايف روحو تاع مشاكل او ما يقدرش يحمل العمل فمن الافضل ما يطلعش لقطر لانو هنا القضاء غير متسامح وتغلط يخبيوك واحد ما يسمع بيك... والله اعلم.
خامسا، لي حب يطلع لقطر يلزم يطلع وهو مقتنع انو الرزاق ربي سبحانو، يدير ربي في قلبه ويطلع وهو مبريباري روحو على انو كيما ممكن ما يلقاش عمل بسرعة كيما ممكن يلقى عمل بسرعة... فالعمل اولا واخيرا مكاتيب.. ولي شاف روحو ايضا ما يحملش السخانة ياخر سفره حتى بعد اوكتوبر...
والله اعلم
اي استفسار اي سؤال راني هنا على عيني وراسي... وربي يوفقكم

05/07/2022

02/07/2022

السلام عليكم ورحمة الله وبركاته...
خاوتي لعزاز ان شاء الله راكم ملاح.... اليوم نحكيو ان شاء الله على بطاقة اقامة، كل شيء عليها باذن الله.
* اولا بطاقة اقامة هي بطاقة الهوية تاع اي شخص مستقر في البلاد وهو مش قطري، يعيطولها عموما QID, وهي بمثابة كارت ديتونتيتي في الجزائر... فيها كل معلومات المقيم كيما راه مبين في الصورة من جهة، وفيها ايضا اسم شركتك او كفيلك من جهة اخرى اظافة الى معلومات باصبورك...
* صلاحية بطاقة الاقامة هي سنة وتجدد اذا كان صاحب الشركة مازال يحتاجك... واذا كان ما يحتاجكش يقولك ابحث على عمل اخر اذا لقيت شركتك الجديدة تجددهالك...
* ما هي شروط بطاقة الاقامة، شروط بطاقة الاقامة الخاصة بالعمل ( لانو كاين بطاقة اقامة ربة بيت مثلا وهي كي تجيب زوحتك) هي انو يلزم تدخل قطر بفيزا عمل ( صافي لي يقولك نبيعلك بطاقة اقامة وانت في الجزائر هذاك كذاب نصاب من لاخر)، ثانيا يلزم كي تدخل لقطر تدير فحص طبي ويكون لائق، وتزيد تدير رفع بصمة وصورة. ثالثا يلزم توقع عقد عمل. ويصبح موثق من وزارة العمل، هذا الثلاثة شروط مستحيل واحد يقدر يقوللكم نديرلكم بطاقة اقامة من دون وحدة من هذو... فهكذا كي تقراو وش راني نقول واحد ما يحطبكم وواحد ما يلعبهالكم.
* الان نجيو للرسوم الرسمية لبطاقة الاقامة، راح نديرلكم حاجة حصرية، ونعطيلكم التفاصيل تاع الرسوم كاملين، هكا واحد ما يقولكم تدير كذا وكذا، نعطيلكم التفصيل الرسمي وانتم دبرو راسكم.... الرسوم الرسمية مقسمة كالتالي: 100 ريال رسوم الفحص الطبي، 60 ريال رسوم توثيق العقد، 1220 ريال رسوم بطاقة الإقامة.... يعني كلش يجي 1380 ريال... اي شخص يقولكم اقل من هاذ الشعر فهو اما ملاك اما نصاب... لانو ماكش لي يحب يخلص من جيبو الا اذا كان ملاك.. فهاذ الرسوم رسمية مستحيل ينقصو... اما عموما شحال يخدموهم الناس، كاين لي يقولك 1500 و 1600 وحتى 1750 ريال... فهنا كل واحد على حساب اذا راه داير خدام ولا زايد الفايدة تاعو.... انا شخصيا نخدمها ب 1600 ريال و 220 ريال هذوك تاع الخدام تاعي لانو ماعندوش شهرية ولانو انا نسوي الامور بسرعة يعني الزبون لما يقولي حاب ندير فحص طبي فنديلو اقرب موعد ويقدرو زبائني ياكدو الكلام هذا او ينفيوه في التعليقات... وربي يوفق.
* تستغرق بطاقة الاقامة في حدود 20-25 يوم عمل منذ دخولك لقطر باش توجدلك اذا بدست الاجراءات مباشرة، بعد ما يتم دفع الرسوم تقدر تتبعها في موقع وزارة الداخلية، راح يبعثوها كي توجد لمكتب الكفيل عبر البريد ، وانا شخصيا توصلني نديها مباشرة لمنزل الزبون... فبالتالي معايا باذن الله الزبون كلش يجيه ساهل.
* الفحص الطبي تقدر تديرو بعد يوم من دخولك إلى قطر ( بعد ما تدخل في السيستام)، تقدر تدسرو وحدو هو ورفع بصمة برك اذا حبيت من دون ما تدير بطاقة اقامة، اذا مثلا حبيت تسجل في الشرطة بالفيزا برك وما عندكش اموال بطاقة اقامة... وهنا راح تدفع من 100-150 حسب لي باعلك الفيزا هي رسومها الرسمية 100 ريال... انا شخصيا نخدمها 150 ريال بسبب سرعة الخدام تاعي في الاستجابة... وكاين وين نحسبها 100 ريال كي تكون امور الزبون تعبانة بزاف.... كيما مؤخرا جاني زبون ماجابش معاه كثير اموال فقلتلو خلص 100 ريال واعطيت الخدام تاعي 50 من جيبي... وربي يوفق
* رفع البصمة والصور باش تديرهم يلزم تدي معاك صورة قيد المنشا تاع الشركة وصورة من بطاقة هوية الكفيل... وهكذا تروح تدير البصمة وتتصور عادي... عموما زبائني انا نديهم يديروها بسيارتي الا اذا الله غالب ماكنتش ديسبونيبل.
ربي يوفقكم ويسهللكم اموركم.. اي استفسار راني هنا سقسيوني في الخاص على العين والراس.. او في التعليقات مش مشكل اطلاقا... ربي يوفقكم ويحميكم ويحققلكم امانيكم.

29/06/2022

السلام عليكم خاوتي... ان شاء الله راكم بخير وفي صحة وعافية.
اليوم راح نحكيو على فيزا عمل، كيفاش تبدى حتى وين تخلاص، كل المعلومات الصحيحة عليها، ونوريلكم ايضا وين ممكن يكذبو عليكم الناس المهابل ومرضى القلوب، وفي النهاية نقوللكم شحال راهي تدير عندي هاذ الفيزا وربي يوفق الجميع.
اولا من اجل معلوماتكم، يلزم تعرفوا انو اي شركة باش تستقدم عامل من خارج قطر يلزم تدير في اول خطوة ما نسميه موافقة استقدام، فلما الوزارة المعنية توافق عليه، الشركة تصبح عندها موافقات استقدام عمال من خارج قطر، التي عموما تكون على الشكل التالي VP2022 متبوعة بستة ارقام.... وهذه هي التي سيتم ادخال معلوماتكم فيها من اجل الحصول على الفيزا... مدة صلاحية هاذه الموافقة ستة اشهر، يمكن للشركة في اي وقت من هذه الستة اشهر استقدام عامل من خارج قطر..
ثانيا هنا في وزارة الداخلية، الفيزا يسمونها سمة بكسر السين، دونك ما تنخلعوش اذا قريتو (طباعة السمة) مثلا... هذه تسمية فقط... والسمة شكلها كما هو موجود في الصورة في هذا المنشور.. رقمها في هاذ العام دائما يبدأ ب 382022 وبعدها ستة ارقام.
ثالثا تحتوي السمة على كل معلومات صاحبها، واسم الشركة المستقدمة + المهنة التي استقدم من اجلها الزبون... كما هو موضح في الصورة. يلزم تشوفو مليح الصورة باش حتى واحد ما يلعبهالكم. صلاحية الفيزا هي 90 يوم ابتداءا من يوم التقديم، يعني ابتداءا من اليوم لي الشركة تدخل اسمكم في الموافقات لي حكيت عليها الفوق... كما هو ملاحظ في الصورة، التقديم كان يوم 21 جوان وصلاحية السمة اذن ستكون لغاية 19 سبتمبر، لماذا 19 سبتمبر وليس 21؟؟؟ ببساطة لانو شهري جويلية واوت فيهما 31 يوم...
رابعا: اي شخص يقوللكم فيزا عامين فهو يكذب عليكم سواءا بقصد او غير قصد، الفيزا كما قلتلكم صلاحيتها ثلاثة اشهر، مقسمة كالاتي: لما نخدملك انا فيزا عندك الحق باش تطلع لقطر في مدة اقصاها تسعين يوم من اليوم لي قدمتلك فيه انا، بعدها لما توصل لقطر يبداولك حساب جديد 90 يوم اخرى لك الحق فيها في العيش في قطر بطريقة قانونية ودون بطاقة اقامة بشكل عادي... فاذا قررت تدير بطاقة اقامة قبل نهاية 90 يوم مليح، واذا ما قررتش تديرها وانتهت 90 يوم فهنا يلزم تخرج من البلاد او تصبح عليك غرامات+ مشاكل للشركة فاتوماتيكيا الشركة تديرلك بلاغ هروب من اجل ان تحمي نفسها هي وبالتالي لن يمكنك هذا من دخول قطر مرة اخرى الا اذا تصالحت مع السلطات المعنية... فنصيحتي لكل واحد اما عزيزي تدير بطاقة اقامة (نحكيو عليها في المنشور المقبل ان شاء الله) اما انو بمجرد تنتهي 3 اشهر تخرج من قطر باش ما تجيبش مشاكل ليك وللشرمة لي استقدماتك، واذا لقيت عمل طبعا راح الامور تسهال لك باذن الله... وربي يوفق
خامسا: اي شخص يقوللكم نديرلكم بطاقة اقامة وانتم في الجزائر فهذا يكذب عليكم... وفي المنشور تاع بطاقة اقامة ان شاء الله راني نقوللكم علاش.
سادسا: فيزا عمل فيها صنفين، اولا فيزا عمل مهنة عليا، اي مثل مدير، مشرف، اداري عام، ماناجار... الخ وهذي الفيزا تسمح لك بعمل رخصة سياقة، وفتح حساب بنكي، وعمل زيارة عائلية لاهلك... الخ. النوع الثاني هو فيزا عمل مهنة عادية او المهن العمالية، وهذي فيزا عمل لا تسمح لك بعمل رخصة سياقة ولا فتح حسابي بنكي.. الخ ، فمثلا لوكان شخص عندو عمل يستنى فيه في قطر لكن شرطو عليه يكون هنا في البلاد، فماكان لاه يزيد دراهم ويدير فيزا عمل مهنة عليا، بل يدير فيزا عمل مهنة عادية ويدخل بيها لقطر وينقل الكفالة لشركته الجديدة. ( سنتكلم ان شاء الله على نقل الكفالة بعد ما نتكلم على بطاقة الاقامة).
سابعا: فيزا عمل تستغرق 5 ايام عمل كادنى مدة باش تكون واجدة ان شاء الله.
ثامناواخيرا: بخصوص سعر فيزا عمل، هذي فيزا عمل 27 مليون تخليك كي تجي لقطر عندك الحق في العمل... يعني تشريها وتجي هنا تبحث عن عمل...مدة صلاحيتها 3 اشهر واذا حبيت كي توصل لقطر نديرولك بطاقة اقامة تزيد 1600 ريال وتولي مقيم في قطر صلاحيتها سنة قابلة للتجديد...، بهته الاسعار نوفر الفيزا ومعها الاستقبال في المطار واي نصيحة في اي وقت، ومعها التسجيل في احتراز ايضا مجانا... وربي يوفقنا باش نسهلو عليكم الامور باذن الله..
بالتوفيق للجميع ونلتقي في منشور اخر ان شاء الله

28/06/2022

السلام عليكم ورحمة الله وبركاته.
قبل ان يبدا اي شخص في اجراءات السفر لاي بلد ما من اجل التغرب.. فيجب عليه ان يطرح السؤال الاتي: لماذا اخترت هذه الوجهة؟ ... فاذا لم يطرح هذا السؤال كان قراره محض حمية جاهلية بحتة... ولن يوفق ابدا في بلوغ المراتب العليا ابدا... وهنا وجب طرح السؤال، لماذا اختار قطر.؟
فلتكن الإجابة بصراحة وباختصار، قطر ليست بلدا سياحيا اطلاقا وهذا لصغر مساحتها وجوها الحار في فصل الصيف ( ماي حتى نهاية سبتمبر) ... فهذين السببين يجعلان من قطر وجهة غير سياحية (رغم البنى التحتية الرهيبة، والمولات المتعددة وكل وسائل الترفيه الجبارة الموجودة هنا) ... ويجعلان منها قبلة لمن اراد العمل وتحصيل المال، فاذا قدر لك اخي العمل في قطر، فستلاحظ في عامك الاول كيف تغيرت حياتك وحياة عائلتك في الجزائر للافضل باذن الله.. صحيح انه في البداية ستواجه بعض الصعوبات، وقد تتعب في ايجاد عمل، او حتى قبل سفرك لقطر.... لكن ان قدر لك عمل جيد في هذا البلد فستحصل على حياة جيدة هنا اولا، وستساهم في تحسين وضع عائلتك في الجزائر.. العمل مكاتيب واقدار، وباخذ الاسباب والتوكل على القهار، باذن الله ستتحسن وضعية كل طالب للعمل هنا...
فكحوصلة لما قلته انفا، قطر هي وجهة شخص مجتهد عامل لا يكل ولا يمل من السعي وراء رزقه، وليست وجهة انسان اراد الراحة والاستجمام... والله ولي التوفيق...
في المنشورات القادمة ان شاء الله سنبدأ خطوة بخطوة لكيفية السفر لدولة قطر من اجل العمل ومحاولة إعطاء كل المعلومات الرسمية والمؤكدة حول كل مواضيع السفر من فيزا وتذاكر وتلقيح واحتراز..... الخ
وربي يوفق الجميع باذن الله

28/06/2022

السلام عليكم ورحمة الله وبركاته... اهلا بكم جميعا... تم افتتاح هذه الصفحة بعد تفكير عميق، ولم اكن لافعل هذا لو لم ارى الكثير من الجزائريين محتارين بسبب كثرة المعلومات المغلوطة من جهة، وبسبب كثرة النصابين وابناء الحرام من جهة اخرى... ساحاول في هذه الصفحة بمنشوراتها المتنوعة ان شاء الله، تبسيط كل المعلومات المتعلقة بالهجرة للعمل في قطر، من البداية الى المراحل المتقدمة... تحت شعار الحقيقة ولا غير الحقيقة... اتمنى من الجميع ان يجدوا ضالتهم هنا... ساحاول كوني مقيم في قطر توفير ارخس الاسعار في سوق الفيزات، بخدمات متنوعة وبمستوى مرموق، باسعار حصرية خاصة بمشتركي الصفحة، وبنصائح نابعة من الواقع المعاش، ومن خبرة سنوات ستكون على المقاس، اعلم ان هذا لن يكون سهلا كوني لدي حياتي الخاصة وعملي اليومي، لكن ساحاول قدر الامكان تخصيص وقت يومي لافادة اخوتي... اسال الله ان يوفق الجميع ويسدد خطاهم ويسهل كل امورهم...
تحياتي