عبده سامى - AbDo SaMy

04/02/2024

تعرف چيبوتي؟

08/01/2024

تغيير شكل السطح
Part 1

07/01/2024

جربت تروح الشلالات الوحيدة في مصر في قلب الصحراء وتتزحلق على الرمال؟

04/01/2024

يوم عادي 🤷

04/01/2024

تنظيف الاستوديو

04/01/2024

فلوج ١

19/12/2023

كلام أغلى من الدهب والله♥️

19/12/2023

محتاجين وقفة مع نفسنا . نحمد ربنا وندعي بدوام نعم الله علينا وستره

17/12/2023

مـ ـاتت قلوب الناس. مـاتت فينا النخوة

🔴⚫️⚪️🟢

16/12/2023

تنظيف مكان

15/12/2023

ازاي تعمل مرجيحه على سطح بيتك

15/12/2023

وَكَانَ الْإِنسَانُ أَكْثَرَ شَيْءٍ جَدَلًا

13/12/2023

تجديد اطارات

14/10/2023

🇵🇸

25/09/2023

الحمد لله ♥️
درع اليوتيوب 100k🥳

05/06/2023

تخيل ان الجمال ده كله موجود في مصر وبالتحديد في بني سويف
اقدم محميه في العالم وواحد من أجمل وأروع الأماكن النادره إللي هتشوفها في حياتك
واللي مش موجود منه غير اتنين بس واحد في امريكا والتاني في مصر
كهف وادي سنور
واللي بيقع علي بعد ٧٠ كيلو متر شرق بني سويف وبيعتبر من أقدم الكهوف وعمره اكتر من ٤٧ مليون سنه
وهو عباره عن حفره تحت سطح الأرض علي شكل هلالي او قوس موجود فيها أغلي وأندر أنواع الرخام في العالم وهو رخام الالباستر
اللي أتكون نتيجه لتفاعلات كيميائية للمياه الجوفيه واختلاطها بالحجر الجيري و نتج عنه اشكال كتيره وجميله من الالباستر وبالوان مختلفه ولامعه
يعني هتشوف هناك تكوينات علي شكل شعاب مرجانية وجذوع اشجار وفواكه زي الكمثري وغيرهم كتير
وبيتم استخدامه في صناعه اواني الزينه والتحف وغيرها من الحاجات القيمه
دا غير ان قدماء المصريين استخدموه في صناعه التماثيل والجعارين والمزهريات
وتم اكتشاف الكهف ده اثناء عمل العمال بالمحاجر عام ١٩٩٢ وهما بيفجروا جزء من محجر ادي لحدوث فتحه كشفت عن الجمال ده كله

04/06/2023

المكان ده موجود فيه اشهر مصايف في مصر وعلي اسمه اتسمي فرع من فروع النيل
واحده من اقدم المدن الساحلية في مصر واللي بتعتبر عاصمه محافظه دمياط
مدينه دمياط واللي بسبب اهميتها الاقتصاديه الكبيره اتعرضت لهجمات كتيره علي مر العصور ودا لانها بتحتوي علي واحد من اقدم واهم الموانئ المصريه وهو ميناء دمياط حاليا
الهجمات دي كانت سبب في دمار المدينه ولكن تم اعاده بناءها في عهد العثمانيين
كمان دمياط بتعتبر من اشهر المدن السياحيه في مصر بسبب امتلاكها لاشهر المصايف المصريه والمنتجعات والشواطئ زي بلطيم وراس البر
مش بس كده دي فيها معالم اثريه متنوعه من عصور مختلفه زي الجوامع واشهرهم مسجد الفتح
اللي بيرجع لعهد سيدنا عمرو بن العاص
ومسجد المعيني اللي تم انشاؤه في عهد الناصر قلاوون ومسجد ابو المعاطي
وطابيه عرابي وهي عباره عن قلعه أنشأها الفرنسيين
كمان من اشهر الحاجات اللي بتميز المدينه هي صناعه الاثاث واللي بيتميز بجوده عاليه جدا عشان كده الاثاث الدمياطي بيتصدر لدول كتير
دا غير النشاط الزراعي في المدينه زي زراعه الجوافه والنخيل ومن اشهر الاماكن في زراعه الجوافه في دمياط هي منطقه كفر البطيخ بالاضافه لاكتر من اتنين مليون نخله موجودين هناك وبتصدر منها لدول كتير زي اليونان والصين

12/03/2023

بسببه انتشر السحر والشعوذه وبقا اول ساحر في التاريخ ورغم انه واحد من اقوي اربع ملوك اتذكروا في القرآن الا ان بعوضه مجرد بعوضه واحده قدرت انها تنهي حياته ورغم كل جاهه وسلطانه محدش قدر يساعده
قصتنا بدات مع النمرود اقوي ملوك بابل في العراق لما ابو الأنبياء سيدنا إبراهيم حذر ه من اللي بيعمله ونصحه بالايمان بالله
لكنه رفض وكمان ادعي الالوهيه وامر الناس بعبادته
و بقا يقتل كل اللي امنوا مع سيدنا ابراهيم
ومن هنا اتفق المؤمنين مع بعض أنهم يكونوا جيش ويحاربوا النمرود
لكن النمرود كان عنده جيش قوي جداعلي عكس جيش المؤمنين اللي كان بسيط وعدده صغير
المفاجاه بقا ان في ساحه المعركه حصلت معجزه وهي انتصار جيش المؤمنين
ودا لان ربنا ارسل جنود من البعوض قضت علي جيش النمرود تماما
ورغم انه قدر يهرب واتخبي في برج بابل الا ان فيه بعوضه قدرت تلحقه وتدخل جوه راسه وعاشت جواها ٤٠ سنه
وكانت اما تتحرك بيجن جنونه ومكانش يهدي غير لمًا يتضرب بالنعال علي راسه
وفي مره من المرات ضرب راسه ضربه قسمها نصين ومات وخرجت منها البعوضه من راسه وكانت في حجم العصفور
كتابه
Azza Samy

05/03/2023

افتتاح مسجد الحاكم بأمر الله بعد الانتهاء من ترميمه وتطويره.💙

يعتبر مسجد "الحاكم بأمر الله" ثاني اكبر جوامع القاهرة اتساعاً بعد مسجد "احمد ابن طولون" ، ورابع أقدم المساجد الجامعية الباقية بمصر ث، وهم( جامع عمرو بن العاص بالفسطاط، وجامع أحمد بن طولون بالقطائع، وجامع الأزهر الشريف بالقاهرة) .

والحقيقة عزيزي القارئ ان المسجد ده أمر بإنشائه الخليفة "العزيز بالله الفاطمي" في سنة 380هـ ، لكن توفي قبل إتمامه.

فاكمل ابنه "الحاكم بأمر الله" بنائه، وفتتحه عام 403هـ، وفي عام 404م أصدر الحاكم "بأمر الله" قراراً بتحويل المسجد إلي "جامع" يُدَرَسْ فيه الفقه والمذهب الشيعي، مثل جامع الأزهر الشريف

المسجد مصمم علي الطراز الفاطمي، ويتخذ شكل المستطيل، ويتكون من صحن أوسط مكشوف، يحيطه أربع أروقة ويعلو واجهته مئذنتين،المميز جدا في المسجد ده هو استخدام الخط الكوفي، الذي يحيط بالجامع، لا يزال آثاره باقية إلى اليوم في ايوان القبلة.

وقد تم استخدام مئذنتيه اثناء وجود الحملة الفرنسيةفي مصر كأبراج للمراقبة، كما تم استخدم رواق قبلته كأول متحف إسلامي بالقاهرة أطلق عليه دار الآثار العربية.

المسجد يحده من الشمال سور القاهرة و"باب الفتوح،" ومن الجنوب منازل حديثة البناء، ومن الناحية الشرقية وكالة " قايتباي"، أما من الناحية الغربية فيطل على شارع "المعز" ، وتبلغ المساحة الكلية لمسجد الحاكم بأمر الله حوالى ١٤ ألف متر مربع.

وتم ترميم المسجد تنفيذًا لتوجيهات الرئيس عبدالفتاح السيسى لتطوير منطقة القاهرة التاريخية،وبلغت تكلفة ترميم المسجد 86 مليون جنية .

ترميم المسجد يقع ضمن مشروع تطوير القاهرة التاريخية، والذي يشمل تطوير مناطق
( مسجد الحاكم، وباب زويلة، وحارة الروم، ودرب اللبانة، والفسطاط، ومسجد الحسين، والأزهر) من أجل القضاء على التشوه العمراني وإعادة إحيائها.💙

22/02/2023

النهارده بالتحديد
شهد العالم فيه اعظم ظاهرة فلكية واللي مابتحصلش غير في مصر بس
وهي
تعامد الشمس علي وجه رمسيس الثاني بقدس الاقدس في معبده الكبير بابو سمبل
الظاهرة دي بتحصل مرتين في السنه
يوم 22اكتوبر
يوم 22فبراير
واللي بيقال انهم ذكرى ميلاده وذكرى تتويجه
وراى تاني بيقول انه
بداية موسم الفيضان والزراعه
وبداية موسم الحصاد
الظاهرة دى قبل كده كانت بتحدث يوم 21اكتوبر و21فبراير
ولكن بعد تقطيع المعبد ونقله عشان ميغرقش بسبب فيضان السد العالي بقت بتحصل يوم 22
واللي اكتشف الظاهرة دى هي الكاتبة وعالمة الاثار اميليا ادواردز سنة 1874

29/01/2023

سواء كنت مسلم ،مسيحي او يهودي فمصر هي موطن الديانات التلاته
وفي واحد من شوارعها هتلاقيهم متجمعين
مجمع الأديان واحد من اجمل الأماكن في مصر واللي هيحسسك كأنك ماشي في شوارع القدس القديمه
المكان بيضم المسجد والكنيسه والمعبد وهتلاقيهم عند حصن اسمه حصن بابليون
هتلاقي هناك تاج الجوامع
مسجد عمرو بن العاص اقدم مسجد في افريقيا واللي بناه عمرو بن العاص في الفسطاط عاصمه مصر في عصره
كمان هتلاقي مجموعه من الكنايس اشهرهم الكنيسه المعلقه واللي تعتبر من اقدم كنايس مصر ولانها مبنيه فوق ابراج الحصن وعلي ارتفاع ١٣ متر عن الأرض اتسمت المعلقه
مش بس كده ده موجود كنيسه ابو سرجه اللي اتبنت فوق المغاره اللي اقامت بيها العائله المقدسة في مصر
وكنايس غيرهم كتير
وجنب الكنيسه المعلقه هتلاقي واحد من اهم واروع المتاحف في مصر وهو المتحف القبطي اللي هياخدك في جوله كده في التاريخ القبطي من القديم للحديث
نيجي بقا لاخر حاجه وهي المعبد اليهودي واللي في الاصل كان كنيسه ولكن الاقباط مروا بازمه ماليه اضطرتهم يبيعوها لليهود اللي حولوها لمعبد واتسمي معبد بن عذرا واللي هتشوف فيه كل مايخص الديانه اليهوديه زي الطقوس والصلوات والشمعدان السداسي ونجمه داوود وغيرهم
الجميل في المكان ده انك مش هتحس انك تايه او مش فاهم حاجه لانه مليان متطوعين ومرشدين هيوضحولك كل كل جزء هناك وبدون اي مقابل
ولو
حد فيكوا زار المكان قبل كده ياريت يكلمنا اكتر

28/01/2023

الشخص ده كان سبب في أكبر مصيبه في تاريخ البشريه
واللي بدل مايفرح انه خد اعفا من الجيش لا ده زعل وولع في الدنيا كلها
غافريلو برينسيب
وده كان طالب صربي وحلمه انه ينضم للجيش الصربي
وفعلا راح قدم ورقه ولكنهم رفضوه لانه كان قصير
ساعتها غضب جدا وحب ان يثبت شجاعته وان مفيش منه اتنين
فاستغل زياره ولي عهد النمسا الارشيدوق فرانز فريدناند وزوجته لمدينه ساراييفو الصربيه وقام باغتيالهم عام ١٩١٤
ومن هنا كانت المصيبه لما النمسا اعلنت الحرب علي صربيا عشان تاخد حقها
فراحت روسيا زعلت من النمسا واعلنت الحرب عليها
وهوووب كل الدول اختلفوا مع بعض واعلنوا الحروب
وقامت الحرب العالميه الأولي واللي استمرت اربع سنين وراح ضحيتها اكثر من ١٧مليون قتيل و٨ مليون مفقود واكثر من ٢مليون جريح ده غير الدمار اللي حصل في العالم كله
كل ده بسبب القصير ده

27/01/2023

27/01/2023

Zed park
زيد زايد عملت عظمه علي أرض مصر
المكان ده مش مجرد حديقه أو مدينه العاب
لا دا عالم تاني خالص مليان تفاصيل كلها مبهجه
أكبر حديقه عالميه مفتوحه علي أرض مصر
واللي متقسمه لأربع أجزاء تلاته منهم مليانين ألعاب للكبار والأطفال والقسم الرابع مطاعم وكافيهات
الألعاب هناك قادره أنها تبهرك وتاخدك لجو تاني خالص اول مره هتعيشه
أشهر الألعاب هناك هي ferries weels واللي هتطلع بيك علي ارتفاع ٥٥متر
انت متخيل المسافه!!
يعني كأنك في طياره ومن فوق هتشوف زايد كلها
اما بقا لو انت شجاع ومبتخافش فجرب تدخل بيت الرعب وده اول بيت رعب حقيقي في مصر
بس لازم تكون قلبك حديد لان اللي هتشوفه هناك عمرك ما هتنساه
كمان هتلاقي هناك حلقات للتزلج علي الجليد واللي هتخليك تستمتع و تحسسك كأنك سافرت اوروبا بالظبط
دا غير ان هناك اكبر واحدث ترامبولين تقدر تتنطط براحتك لما تشبع
والعاب تصادم السيارات اللي هتخليك تحس كأنك في سباق حقيقي
المكان هناك مليان العاب مالهاش اول من اخر زي الكراسي الطايره والسفينه العملاقه وغيرهم كتير عشان كده لازم تروح من اول النهار عشان تلحق تلفه كله وتستمتع بالألعاب كلها
وكمان هناك هتلاقي المطاعم والكافيهات اللي موجود فيه مختلف الاكلات العالميه
والوقت د من السنه عاملين ديكورات تحفه تقدر تتصور هناك براحتك

26/01/2023

تخيل ان في ناس لسه عايشه في الكهوف لحد النهارده؟؟؟
الناس بتعيش فوق الأرض لكن في تونس الوضع اختلف
مدينه مطماطه
المدينه موجوده في دوله تونس وبتعتبر اغرب مدن العالم وده لان البيوت فيها تحت الأرض
المكان كله عباره عن حفره عميقه منحوت حواليها كهوف بيتم استعمالها كسكن وبيكون فيه مجموعه من الغرف اللي بيربط بينهم ممر بيسمي السقيفه
البيوت هناك مدهونه باللون الأبيض عشان يخفف حراره الشمس علي المدينه
المؤرخين مقدروش يحددوا تاريخ المدينه وفضلت مجهوله لأهل تونس لعده قرون
لكن حصلت حاجه خلت المدينه دي توصل للعالميه
وهي ان تم إختيارها لتصوير الفيلم العالمي حرب النجوم عام ١٩٧٠
اللي اظهر المدينه كانها كوكب خيالي مالوش علاقه بالواقع
كل ده خلي المكان يجذب الاف السياح وفتح مجال جديد للعمل لأهل المدينه بعد ماكانوا بيشتغلوا في الزراعه فقط
الحكومه التونسيه أخدت قرار بنقل السكان لمساكن في اماكن عمرانيه جديده ولكن معظم اهل المدينه رفضوا وفضلوا يعيشوا مع تاريخهم وثقافتهم
انت كمان قلنا ايه اكتر مكان مميز عندك حابب نتكلم عنه؟؟

25/01/2023

أنت دومًا تستطيع 💪🏻لأن الله إذا كلف اعان 👌
ولا يكلف الله نفسا الا وسعها☝️