16/06/2024
تعبت يا امى مفيش راحه من يوم ما مشيتى وسيبتينى
وفراقك صعب وماراحمنيش وناره في قلبى بتكوينى
والحزن مصاحبنى مابيسبنيش والدمع قريب من عينى
وحياتى واقفه ومابتمشيش عتمه على شمالى ويمينى
حتى المكان مش زى الأول شكل البيت كئيب اتحول
غيبتى كتير وغيابك طول اقسم بالله واحشتينى
واحشتينى يا امى وكل حاجه واحشتنى فيكى
وحشنى صوتك والكلام اللى في عنيكي
وحشنى حضنك والدفا وانا بين ايديكى
والقعدة جنبك ولمتنا دايما حواليكى
ولما كنتى بتحكيلى حكاية وتقوليلي يا والدى ويا ضنايا
وارد بكلمة يا امايا اللى مقولتهاش بعديكي
طب ازاى اقولها لحد تانى ؟
تقيلة ورافض ينطقها لسانى
ماهى كلمة وشايلة اعظم معانى
وماينفعش تطلع غير ليكي
لان لولاكى ماكنتش جيت
وأول كلامي بأسمك بديت
ومن وقت ما ع الدنيا وعيت
كنت أرمي كل حمولي عليكى
وجودك كان مقويني ودعاكي كان بيحميني
من كرب وضيق ينجيني كنت عايش متطمن بيكي
كنتى الحب اللى ساكن جوفي وكل العالم بالنسبالى
كنتي تبصى في عينى تشوفى قوام تقريها وتعرفي مالي
تحسي بقلقي بتعبي بخوفي وايه اللى شاغلنى وشاغل بالى
وتفضلى جنبى في كل ظروفى وتهتمى اكتر منى بحالى
وأخر مكالمة كانت وياكى كان زايد الوجع جواكى
ساعتها بكيتى وبكتينى معاكى وفاكر كل كلمة قولتيهالى
قولتيلى يومها انا خايفة عليك قطر العمر سريع بيفوت
الغربة سارقاك وبتنهش فيك ومش دريان وسارح في الملكوت
كام مرة يا واد انا اقولها ليك اللى اصغر منك فتحوا بيوت
وانا امنية حياتى انى افرح بيك واشيل عيالك قبل ما اموت
مشيتى فجأة وسيبتينى
وجعتى قلبى وكسرتينى وبعد منك مش عارف أعيش
اقسم بالله واحشتينى😢
رحمه الله عليكى
