https://t.me/htfIjQtl3jZwkxNDhk

BETE PAULE, our office located at piyssa Genete Tsige St. Gorges Church New building located Road transport office building 2nd floor office No. 2, Addis Ababa (2024)

19/06/2023

+ መልአኩ ነው +

ሰዓቱ ሌሊት ነው ፤ እንደ አጋጣሚ ሆኖ በዚያ ሌሊት መላው የቤተሰባችን አባል አምሽቶ እየተጫወተ ነው፡፡ ከዚህ የቤተሰብ ስብስብ መካከል ሳይገኝ የቀረው አንድ በወኅኒ ቤት የታሰረ ወንድማችን ብቻ ነበር፡፡ ድንገት ግን የጊቢው በር በተደጋጋሚ ተንኳኳና ሁላችንም ጨዋታችንን አቋረጥን፡፡ በሌሊት የሚያንኳኳው ማን ነው ?

ሠራተኛችን ሮጣ ሔደች:: ወዲያው ግን በሩን ሳትከፍተው ተመልሳ እየሮጠች መጣች፡፡ በደስታ ሰክራ ‹‹የታሰረው ልጃችን በር ላይ ቆሟል!›› ብላ ተናገረች፡፡ "በድምፁ አወቅኩት!› እያለች ዘለለች፡፡ ከሁኔታዋ የተነሣ ‹አብደሻል እንዴ!?› አላት ቤተሰቡ ሁሉ፡፡

እስዋ ግን በእርግጠኝነት ተናገረች! በቀን የታሰረው ልጅ በሌሊት ተፈቶ መምጣቱ ፈጽሞ ሊታመንን የማይችል ነገር ነው፡፡ ቤተሰቡ ሁሉ የታሰረው ልጅ መጣ ብሎ አላመነም፡፡ ባይሆን የመንግሥት ወታደሮች የቀረነውን ሊወስዱን ይሆን? ማን ሊሆን ይችላል? ብሎ ተብሰለሰለ:: በመጨረሻም የሁሉም ግምት አንድ ነገር ላይ አረፈ:: ሁሉም ሰው በአንድ ድምፅ አንድ ቃል ተናገረ "መልአኩ ነው!"

መልአኩ የሰው ስም አይደለም:: ቤተሰቡ የተስማማው "ደጅ የቆመው የታሰረው ልጃችን ሳይሆን እሱን ለመጠበቅ ከእግዚአብሔር የተሠጠው ጠባቂ መልአኩ ይሆናል›› ብሎ ነበር፡፡ የበሩ መንኳኳት አሁንም ስላልቆመ ቤተሰቡ ግር ብሎ ወጣና ተቻኩሎ በሩን ከፈተ፡፡ በደጅ የቆመው ግን እንደተባለው የታሰረው ልጅ ራሱ ነበር፡፡ ሁሉም ተደሰተ!!!

ይህ ገጠመኝ በአሁን ዘመን የተፈጸመ ነው ብዬ ብናገር ማን ያምነኛል? እውነት በሌሊት የቤታችን በር ሲንኳኳ መልአክ ነው ብለን እንገምታለን? ይህ ቤተሰብ ምን ዓይነት ቤተሰብ ነው?

በብዙዎቻችን አእምሮ ውስጥ መጀመሪያ የሚመጣው ጥርጣሬ ‹ሌባ ሊገባ ይሆን?› የሚል ስለሚሆን ዱላ ፍለጋ እናማትራለን፡፡ ወይ ደግሞ ሌሊቱ ወደ መንጋቱ እየተቃረበ ከሆነ ‹‹የምን መርዶ ሊያረዱኝ ይሆን? የቱ ዘመዴ ሞቶ ይሆን?› የሚል ጭንቀት ይፈጠራል፡፡

‹የሚያንኳኳው የእግዚአብሔርመልአክ ይሆናል› ብሎ የሚጠረጥር ሰው ግን በዚህ ዘመን ለማግኘት ያስቸግራል፡፡ እንዲህ ብሎ ግምቱን የሚናገር ሰው ከቤተሰባችንመካከል ቢገኝ እንኳን እንደ ዕብድ ልንቆጥረው እንችላለን፡፡ ታዲያ ይህን ገጠመኝ ከየት አመጣኸው ትሉኝ ከሆነ መልሱ ከመጽሐፍ ቅዱስ የሚል ነው፡፡

በሐዋርያት ዘመን ሔሮድስ የተባለው ንጉሥ ሐዋርያው ቅዱስ ጴጥሮስን ወኅኒ ቤት ውስጥ ወርውሮት ነበር፡፡ የቀሩት ደቀመዛሙርትና ክርስቲያኖች በዚያ ሰሞን ሲጸልዩ ከርመዋል፡፡ በአንድ ሌሊት በማርቆስ እናት ቤት ውስጥ ተሰብስበው አምሽተው ነበር፡፡ ድንገት የቤቱ በር ሲንኳኳ ሮዴ የምትባል የቤት ሠራተኛ ደጁን ልትከፍት ወጣች፡፡ ማነው ብላ ስትሰማ የቆመው እስረኛው ቅዱስ ጴጥሮስ መሆኑን በድምፁ አወቀች፡፡ ደስታ ግራ ሲያጋባት በሩን መክፈትን ረስታ ወደ ውስጥ ሮጠችና ጴጥሮስ መምጣቱን ተናገረች፡፡ እነርሱ ግን አላመኑአትም፡፡ ጤንነቷን ተጠራጥረው ‹አብደሻል› አሏት፡፡ እርግጠኛ ሆና ተናገረች፡፡ እነርሱ ግን መልሰው ‹‹የቆመው ጴጥሮስ ሳይሆን መልአኩ ነው፡፡›› አሉ፡፡ ይደንቃል የመጀመሪያዎቹ ክርስቲያኖች እንዲህ በር ሲንኳኳ ‹መልአክ ነው› ብለው የሚገምቱ መንፈሳዊያን ነበሩ፡፡ (ሐዋ. 12፡12-15)

ቅዱሳን መላእክት እኛ የሰው ልጆች ከመፈጠራችን ቀድመው የተፈጠሩ ታላቅ ወንድሞቻችን ናቸው፡፡ እንዲያውም ምድርና የሰው ልጅ ሲፈጠር ደስ እያላቸው ‹‹እልል›› ይሉ ነበር፡፡ (ኢዮ. 38፡6) ቅዱሳን መላእክትን እግዚአብሔር ለእንዳንዳችን ጠባቂዎች አድርጎ ሠጥቶናል፡፡ ከክርስቶስ እግር ሥር ቁጭ ብለው የተማሩት ቅዱሳን ሐዋርያት ስለ መላእክት ጠባቂነት ጋር ይህን ያህል እምነት ከነበራቸው እኛም የመላእክቱን ጠባቂነት ማመን ለዚህ ዘመን ክርስቲያኖችም ምን ያህል ይገባን ይሆን? ቅዱሳን መላእክት በክርስትና ሕይወት ለሚኖርሰው ሁሉ የመላእክት ረዳትነት እጅግ አስፈላጊ ነው፡፡ ለሁሉ ብርታት የሆነው ጌታችን ኢየሱስ ክርስቶስ እንኳን በሥጋው ወራት በተያዘባት ምሽት ሲጸልይ ‹‹ከሰማይም መጥቶ የሚያበረታው መልአክ ታየው›› ተብሎ ተጽፏል፡፡ (ሉቃ. 22፡43) ይህም ቀርበው አገለገሉት‹ለከ ኃይል› እያሉ አመሰገኑት ማለት ሲሆን ለእኛም የመላእክት ርዳታ አያስፈልገኝም እንዳንል የሚያስተምረን ነው፡፡

ቅዱሳን መላእክት በምድር የሚሆነውን ያውቃሉ:: (2 ሳሙ 14:20) በበደላችን ስንጸጸት "ኃጢአትህ ተሠረየችልህ" ይላሉ (ኢሳ 6:7) በክፋታችን ጸንተን ከቀጠልን ደግሞ "ይቅር አይሉም" (ዘጸ 23:20)
ስለእኛ በእግዚአብሔር ፊት ቆመው "የማትምራቸው እስከ መቼ ነው?" ብለው ያማልዳሉ:: (ዘካ 1:12)

ባለንበት ዘመን በዓለም ሁሉ በበሽታ የሚሠቃየው ብዙ ነው:: በሕመም ለሚሠቃየው ሁሉ
"መልአክ ቢገኝለት እየራራለት [ለእግዚአብሔር] ፡— ቤዛ አግኝቻለሁና ወደ ጕድጓድ እንዳይወርድ አድነው፡ ቢለው፥ ሥጋው እንደ ሕፃን ሥጋ ይለመልማል፤ ወደ ጕብዝናውም ዘመን ይመለሳል" ኢዮ 33:23-25

ዲያቆን ሄኖክ ኃይሌ
ሰኔ ሚካኤል - 2007 ዓ ም የተጻፈ

18/06/2023

ሰኔ 12 ቅዱስ ሚካኤል ቅድስት አፎምያ ያዳነበት ዕለት
ሰኔ 12 ቀን ቅድስት አፎምያ የቅዱስ ሚካኤልን መታሰቢያ እያዘጋጀች ሳለች ሰይጣን ብርሃናዊ
መልአክ መስሎ መጣ፡፡ የመላእክት አለቃ ቅዱስ ሚካኤል እንደሆነ ገልጾ ሰይጣናዊ ምክሩን
አሰማምሮ አቀረበላት፡፡ አሳቡንም የእግዚአብሔር ፈቃድና አሳብ እንደሆነ አድርጎ ለማሳመን ሞከረ፡፡
ሰይጣን አስቀድሞ ጌታችን መድኀኒታችን ኢየሱስ ክርስቶስን በገዳመ ቆሮንቶስ መጻሕፍትን
እየጠቀሰ እንደተፈታተነው ሁሉ ቅድስት አፎምያንም ለማሳመንም አብርሃምን፣ ይስሐቅን፣
ያዕቆብን፣ ዳዊትን የመሳሳሰሉትን እየጠቀሰ ለማሳመን ቢሞክርም ቅድስት አፎምያ ቅዱስ
ሚካኤል ከሆንክ በትረ መስቀልህ የታለ ብላ የቅዱስ ሚካኤል ስእል ቤቷ ነበረና ቅዱስሚካኤል
ከሆንክ ይህ ያንተ ስእል ነውና ተሳለመው አለችው እሱም ተናዶ ዘሎ አነቃት ያንጊዜ ቅዱስ
ሚካኤል ከሰማያት ወርዶ በበትረ መስቀሉ ቀጥቅጦ በጦሩ ወግቶ ሠይጣንን ድል ነስቶ አፎምያን
ከእደ ሰይጣን አድኗታል እኛንም መላኩ ቅዱስ ሚካኤል ከሰይጣን አሽከላ ይጠብቀን፡፡
እስራኤላውያን በግብፃውያን ለ430 ዓመታት ከተገዙ በኋላ እግዚአብሔር ይቅር አላቸው።ሙሴን
መሪ አድርጎ ነፃ እንዲወጡ አደረገ ታዲያ በጉዞ ላይ ሳሉ ፈርኦን በቁጣ ተከተላቸው ።እግዚአብሔር
መልዓኩን ሚካኤልን ላከው።እርሱም ባሕር ከፍሎ መንገዱን እየመራ ወደ ከነዓን
አገባቸው።በሐዲስ ኪዳንም በአማላጅነቱ የሀጥያትን ባሕር ከፍሎ ያሻግረን። ህዳር12 ባህርን
ከፍሎ እስራኤልን ያሻገረበት ፈርኦንን ከነሰራዊቱ ያሰጠመበት ነው። ዛሬ እኛንም ከጠላት
ዲያቢሎስ አድኖ ዘረኝነትንና ጥላቻን አጥፍቶ ሀገራችንን ሰላም ያድርግልን።
🙏 🙏🙏

18/06/2023

🍂 "የመላእክት አርአያ ያለው" ብሎ ንጽህናውን ቅድስናውን የገለጸው ሰማዕቱ
የዕረፍቱ መታሰቢያ ሰኔ 11

+ ገላውዴዎስ ማለት ‹‹ዕንቈ ጳዝዮን›› ማለት ነው፡፡ የመላእክት አርአያ ያለው ቅዱስ ገላውዴዎስ አባቱ አብጥልዎስ የሮሙ ንጉሥ የኑማርያኖስ ወንድም ነው፡፡ አባቱን የአንጾኪያ ሰዎች እጅግ ይመኩበትና ይወዱት ነበር፡፡ በሕይወት እያለም በጦርነት ድል ሲያደርግ የሚያሳይ ሥዕሉን በከተማው ላይ አሠርተው ያከብሩት ነበር፡፡

🍂 ልጁ ቅዱስ ገላውዴዎስ ግን ሥርዓተ ቤተ ክርስቲያንን እየተማረ አደገ፡፡ የሮሙ ንጉሥም ዜናውን ሰምቶ ሊያየው ወደደና ልጁን እንዲልክለት መልእክት ላከ፡፡ ሄዶ ሲያየውም ንጉሡ ከነሠራዊቱ ወጥቶ በክብር ተቀበለው፡፡

+ ጣዖት አምላኪ የሆኑ የቁዝና የሌሎችም ሀገሮችን ቅዱስ ገላውዲዮስ ድል እያደረጋቸው ጣዖቶቻቸውንም ይሰባብርባቸው ነበር፡፡ ወደ አንጾኪያም በተመለሰ ጊዜ ዲዮቅልጥያኖስ ጌታችንን ክዶ ጣዖት ማምለክ መጀመሩን ባየ ጊዜ እጅግ አዘነ፡፡ ከቅዱስ ፊቅጦርም ጋር ሆነው የመጻሕፍትን ቃል ዕለት ዕለት ያነቡ ነበር፡፡ ሁለቱም ስለ ጌታችን ክብር ሰማዕት ሆነው ደማቸውን ያፈሱ ዘንድ በምክር ተስማሙ፡፡

🍂 ሰይጣንም በሽማግሌ አምሳል ተገልጡ ያዘነላቸው በመምስል ‹‹ልጆቼ ሆይ መልካም ጎልማሶች ናችሁ፣ የነገሥታት ልጆችም ናችሁ፣ እኔ ስለ እናንተ አዝንላችኋለሁ ስለዚህም ከንጉሡ፦ ጋር ተስማምታችሁ አማልክቶቹን እያጠናቸሁ ትእዛዙንም እየፈጸማችሁ ኑሩ፡፡ ነገር ግን ክርስቶስን በቤታችሁ አምልኩት ይህ ዲዮቅልጥያኖስ ግን እጅግ ጨካኝና ኃይለኝ ነው›› እያለ መከራቸው፡፡

🍂 እግዚአብሔርንም ይህን የሚናገራቸው ሰይጣን መሆኑን ገለጸላቸውና ‹‹አንተ የሐሰት አባት ሁልጊዜ የእግዚአብሔርን ሀሳብ ትቃረናለህ›› ብለው በገሠጹት ጊዜ መልኩን ለውጦ ጥቁር ባሪያ ሆነ፡፡ ‹‹እነሆ ከንጉሡ ጋር አጣልቼ ደማችሁን እንዲፈስ አደርገዋለሁ›› ብሎ ወደ ከሃዲው ንጉሥ ወደ ዲዮቅልጥያኖስ ዘንድ ሄዶ ‹‹ፊቅጦርንና ገላውዴዎስን ካልገደልካቸው በአንተ ላይ ይነሱብሃል፣ አንተንም ገድለው መንግሥትህን ይወስዳሉ፣ እነርሱም የመንግሥት ልጆች መሆናቸውን ዕወቅ›› አለው፡፡

🍂 ዲዮቅልጥያኖስም ቅዱስ ገላውዴዎስን አስጠርቶ የአባቱን ሹመት እንደሚሾመው ቃል ከገባለት በኋላ ለጣዖቱ እንሰዋ አዘዘው፡፡ ቅዱስ ገላውዴዎስ ግን በድፍረት ጣዖቱንና ንጉሡን ሰደባቸው፡፡ የቅዱስ ፊቅጦር አባት ኅርማኖስ የተባለው ባለሟሉ ‹‹እንደ ልጄ ዐመፀኛ ነውና ወደ እስክንድርያ ልከነው በዚያ እንዲገድሉት እናድርግ›› ብሎ ዲዮቅልጥያኖስን መከረው፡፡ አሠቃይተው እንዲገድሉትም ከደብዳቤ ጋር አድርገው ወደ እንዴናው ሀገር ገዥ ወደ አርያኖስ ላኩት፡፡

🍂 አርያኖስም ቅዱስ ገላውዲዮስን ባየው ጊዜ በክብር ተቀብሎ ‹‹ጌታዬ ስለምን የንጉሡን ትእዛዝ ትተላለፋለህ?›› እያለ መከረው፡፡ ቅዱስ ገላውዴዎስም ‹‹ንጉሡ ያዘዘህን ትእዛዝ ልትፈጽም እንጂ በነገርህ ልታስተኝ አልተላኩም›› አለው፡፡ ብዙ ጊዜም እያባበለው በተነጋገሩ ሰዓት ንጉሡ እጅግ ተቆጣና በያዘው ጦር ወግቶ ገደለው፡፡

🍂 ምእመናንም ቅዱስ ሥጋውን ወስደው ከቅዱስ ፊቅጦር ጋር በሣጥን አኖሩት፡፡ የቅዱስ ፊቅጦርም እናት ቅድስት ሶፍያ ወደ እንዴና ሀገር መጥታ የሁለቱን ቅዱሳን ሥጋቸውን ወደ አንጾኪያ ወስዳ በክብር አኖችው፡፡
/ ሥንክሳር ዘሰኔ 11 /

የታላቁ ሰማዕት የቅዱስ ገላውዴዎስ ረድኤት በረከቱ ይደርብን፣ በጸሎቱ ይማረን 🙏

ሠዐሊ ቀሲስ አማረ ክብረት እንደሣሉት

15/06/2023

ነቢዩ ቅዱስ ኤልያስ በእሳት ሠረገላ ወደ ሰማይ ከተነጠቀ በኁዋላ የተፈጸመው አንድ ነገር ሁሌም ያስደንቀኛል::
ኤልያስ ካረገ በኁዋላ ሃምሳ ሰዎች ወደ ነቢዩ ኤልያስ ደቀ መዝሙር ወደ ኤልሳዕ መጥተው ነበር::

እነዚህ ሰዎች ጭንቀታቸው ኤልያስ ወደ ላይ ያረገ ቢመስልም ምናልባት ወድቆ ቢሆንስ የሚል ነበር::
የእግዚአብሔር መንፈስ ወደ አንድ ተራራ ወይም ወደ አንድ ሸለቆ ጥሎት ቢሆንስ ብለው አስበው ነበር::
ወደ ኤልሳዕ መጥተው እባክህ እንፈልገው ብለው ለመኑት::

ኤልሳዕ በሰዎቹ ሃሳብ ባይስማማም እርሱ በኤልያስ ስለተተካ ኤልያስን እንድናገኝ አልፈለገም እንዳይሉት አፍሮ እሺ አላቸው:: አምሳ ሰዎች ለሦስት ቀናት ኤልያስን ቢፈልጉትም አላገኙትም:: ኤልሳዕም "አትሒዱ አላልኳችሁም?" አላቸው:: 2ነገ 2:15-18

የሰው ጠባይ እንዲህ ነው:: ወደ ላይ ሲወጣ ያዩትን ጉድጓድ ውስጥ መፈለግ : ከፍ ሲል ያዩትን ዝቅ ሲል ለማየት መመኘት : እግዚአብሔር ያነሣውን ሰው እግዚአብሔር ሲጥለው ለማግኘት መፈለግ አሳዛኙ የሰው ጠባይ ነው:: ሦስት ቀን ሃምሳ ሆነው ኤልያስን የፈለጉትን ኤልያስ ቢያገኙት ኖሮ "አይ ኤልያስ እኛ እኮ ወደ ሰማይ ተነጠቅህ ብለን አምነን ነበር ለካ አንተ እዚህ ወድቀሃል" ብለው ሊመጻደቁ ነበር:: ወደ ላይ ያረጉ ወደታች ሲወድቁ ለማየት ሦስት ቀን ሙሉ መንከራተት ምን ይባላል? የተከበሩ ሲዋረዱ : የተወደዱ ሲጠሉ ማየት የሚፈልጉ ሰዎች ከሃምሳ ሳይበዙ አይቀሩም::

ነቢዩ ኤልሳዕ ግን :- አትሒዱ አላልኳችሁም? ይላል::
ጉድጓድ ለጉድጓድ አትዙሩ:: ኤልያስ አርጎአል!

ዲያቆን ሄኖክ ኃይሌ
ታኅሣሥ 1 2014 ዓ.ም.

14/06/2023

ሰኔ 8 ቀን እንኳን ለእናታችን ለቅድስት ድንግል ማርያም ዓመታዊ መታሰቢያ
በዓል አደረሳችሁ፡፡
❤️በዚች በሰኔ 8 ቀን እመቤታችን ቅድስት ድንግል ማርያም በስደቷ ወቅት ልጇ ከአለት ላይ ውሃ ያፈለቀበት እለት ነው ይህ እንዴት ነው ቢሉ👇
❤️ ልጆች አሳዳጊ የሆነች እናት የምትቀምሰው እህል ብታጣ አንደበቷ ደረቀ፡፡የምታጠጣው ውሃ ብታጣ ጉሮረዋ በውሃጥም በሰለ፡፡
❤️ ጥልቅ የሆነ የውቅያኖስ ባሕር በእፍኙ መስፈር የሚችለው መለኮታዊ ልጅዋ
እንደ ልጆች ውሃ በጠማው ጊዜ
በሽመላ( ዋኖስ)የምትመስለው እመቤታችን ድንግል ማርያም ጽድቅን ከሀገሩ
❤️ ሰው አንድ እንኳን በሌለው ቦታ ሰዎችን ውሃ ለመንኳችው ነገር ግን ትንሽ እንኳን
ሊሰጡኝ አልቻሉም ሰለዚህ ውሃም ላላገኝ የልጄን የወርቅ ጫማ አሰወሰድኩ
አያለች ምርር ብላ አለቀሰች፡፡
❤️ ሕፃኑ ክርስቶስ የእናቱን የድንግል ልቅሶ በሰማ ጊዜ ከእግሯ በታች ያለውን
የአለት ድንጋይ ባርኮ
❤️ ውሃ አመነጨላት ለጥሟም ከዚያችው ውሃ እንድትጠጣ አመለከታት (ያቺ ዕለት
ሰኔ 8 ቀን ነች)፡፡
ያቺንም ውሃ የአካባቢው ሰዎች እንዳይጠጧት መራራ አደረጋት ከሩቅ ሀገር
ለመጡት ግን መድኃኒትና ጣፋጭ አደረጋት፡፡(ሰቆቃወ ድንግል)
❤️ ይቺ ዕለት ከእመቤታችን አበይት በዓላት አንዱ ሆና ቤተክርስቲያናችን አሰባ
እና አክብራ ትውላለች፡፡
ጌታችን ከአለት ላይ ውሃ ከአፈለቀባት ቦታ ከብዙ ጊዜ በኃላ በዚያ ቦታ
❤️ በእመቤታችን ቅድስት ድንግል ማርያም ስም ቤተ ክርስቲያን ተሠርቶ ቅዳሴ ቤቱ
በዚች በሰኔ 8 ቀን የከበረበት መሆኑን፡፡(መድብለ ታሪክ መጽሐፍ ቁጥር 1
ይነግረናል፡፡
❤️ እናታችን እመቤታችን ድንግልማርያም በዚህ ሰአት በሀገራቸው ላይ
ከሀገራቸው ተሰደው በርሀብ በጥም ለሚሰቃዩ አለሁ በያቸው፡፡ ❤️
የድንግል ማርያም አማላጅነት የልጇ ቸርነት ከሁላችን ጋር ይሁን፡፡

14/06/2023

ድንግል ማርያምን ከመውደዳቸው የተነሳ በስዕለ አድህኖዋ ስር እያለቀሱ ይሰግዱ ነበር እመቤታችንም እየተገለጠች ታፅናናቸው ነበር
ለ 57 አመት ከሰው ተለይተው ስለ ክርስቶስ ፍቅር የተጋደሉት አባታችን አቡነ ኪሮስ
*በአባታችን ቃልኪዳን ተማፅነው ልጅን ያላገኙ የሉም
አባታችን አቡነ ኪሮስ በጣም ብዙ ቃልኪዳን ሲኖራቸው ከሁሉም የሚበልጠው ግን መሀን ለተባሉ መውለድ አትችሉም ለተባሉ ልጅን መስጠት ነው በዚህም ልዩ ያደርጋቸዋል አሁንም አምላከ አቡነ ኪሮስ ልጅን ላጡ የተባረኩ ልጅን ይስጡልን ልባችን መሀን ለሆነውም ለእኛም መልካም ልብን ያድሉን ሀገራችንን በቃልኪዳናቸው ይጠብቁልን በረከታቸው ይደርብን

12/06/2023

✝ ከቤተ ጳውሊ የተላከ
ይህን ፆመ ሐዋርያት ( የሰኔ ፆም ) ምክንያት በማድረግ አዲስ የተሰራችው እና በዘንድሮ ዓመት የተመረቀችው ደብረ ምጥማቅ ፃድቃኔ ማርያም ገዳም ለመሳለም እሑድ ሰኔ 18 ቀን የደርሶ መልስ ጉዞ አዘጋጅተናል
✴️ በቀጣይ ከሰኔ 24 ቀን እስከ ሐምሌ 2 ቀን ድረስ ወደ በርሜል ቅዱስ ጊዮርጊስ እና ወደ ምርት ደለጎ ቅድስት ኪዳነ ምህረት ደብር ጉዞ ያዘጋጀን ሲሆን የጉዞ ምዝገባ ጀምረናል ።
✅ በመጨረሻም ልዑል እግዚአብሔር በቸርነቱ በሰላም ያድርሰን እና በዘንድሮ ዓመት ነሐሴ 13 ቀን የሚከበረው የደብረ ታቦር ዓመታዊ ክብረ በዓል ምክንያት በማድረግ ወደ ቅድስት ሀገር ኢየሩሳሌም ቅዱሳት መካናት ለመሳለም ጉዞ አዘጋጅተናል የመሄድ አሳብ ያላችሁ እና እናት አባታችሁን ለመላክ የምትፈልጉ በጊዜ ተመዝገቡ እያልን የምዝገባ ቀነ ገደብ እስከ ሐምሌ 20 ቀን ድረስ ነው ።
✅ ይህን መልእክት እንደደረሶ እርሶ በሚጠቀሙበት በማንኛውም ድህረ ገፅ ላይ ሼር ፤ ሼር ፤ ሼር ያርጉልን አደራ ፤ አደራ ፤ አደራ ።
▶️ ለበለጠ መረጃ ፦ 0963676767/0964020202
ለሙሉ መረጃ ቴሌግራማችንን ይጠቀሙ

12/06/2023

ወር በገባ በ5 የሐዋርያው ቅድስ ጴጥሮስ☞ለሐዋርያው ቅዱስ ጳውሎስ
ወርሐዊ መታሰቢያቸው ነው፡፡
☞ቅዱስ ጴጥሮስ የተወለደው በገሊላ ባሕር ዳር በምትገኘው በቤተ ሳይዳ
ነው፡፡ የአባቱ ስም ዮና ይባላል፡፡
☞ጌታን ከመከተሉ በፊት ከአምስት ዓመት ጀምሮ ያደገው በቅፍርናሆም ከተማ
ሲሆን በጎልማሳነቱ ከወንድሙ ከእንድርያስ ጋር በገሊላ ባሕር ዓሣ አጥማጅ
ነበረ፡፡ ማር16-18
☞ለደቀ መዝሙርነት ሲመረጥ ዕድሜው55 ዓመት እንደነበረ ይነገራል፡፡
☞የመጀመሪያ ስሙ ሰምዖን ሲሆን ጌታችን ጴጥሮስ ብሎታል፡፡ በላቲን ቋንቋ
ዐለት ማለት ነው፡፡
☞የመንግሥተ ሰማያት ቁልፍ ተሰጥቶታል፡፡
☞ቅዱስ ጴጥሮስ በማንኛውም ነገር ፈጣንና ቀልጣፋ እንደነበር ይነገራል፡፡
☞ቅዱስ ጴጥሮስ በፍልስጤም፤ በልዳ፤ በኢዮጴ፤ በቂሳሪያ፤ በገላትያ፤ በሮሜና
በተለያዩ ሀገሮች እየተዘዋወረ አሰተምሮ አሳምኗል፡፡
☞ከአሕዛብ ወገን የነበረ ቆርሌዎስን ከነቤተሰቡ አጥምቋል፡፡(የሐዋ' ሥራ
10፥38)
☞በጥብርያዶስ የጥርጥር ባሕር ጌታ እንዳዳነው(ማቴ14፤22)
☞ማልኮስ ጆሮውን እንደቆረጠው(ዮሐ18፤10
ጌታ በአይሁድ እጅ ተይዞ ሳለ የገባው ቃል አጥፎ ሦስት ጊዜ ጌታን አላውቀውም
ብሎ እንደካደ የማቴዎስ 26-፡ ተጠቅሶል
☞በኀላም ግን በንስሐ በመመለሱ ጌታ ግልገሎቼን አሰማረ፤ ጠቦቶቼን ጠብቅ፣
በጎቼን አሰማረ በማለት አደራ እንደሰጠው በወንጌል ተገልጿል (ዮሐ 21፥15)
☞ሐዋርያው ቅዱስ ጴጥሮስ ንጉሥ ነገሥት ኔሮን ቄሣር ዘመነ መንግሥት
በክርስቲያኖች ላይ ስደትና መከራ በመስቀል ተስቅሎ ግን እን እንደክርስቶስ
ተስቅሎ ሞት የማይገባኝ ስለሆነ ዘቅዝቃችሁ ስቀሉኝ ብሎ በሐምሌ 5
በሰማዕትነት አርፏል፡፡
☞1'2☞ ሐዋርያው ቅዱስ ጳውሎስ
☞ሐዋርያው ቅዱስ ጳውሎስ የተወለደው ጠርሴስ ከተማ ሲሆን ትውልዱ
ከዕብራውያን ከብንያም ነገድ ነው፡፡
☞ጠርሴስ በንግድ ዓለም የታወቀች የኪልቅያ ዋና ከተማ ነበረች፡፡
☞ሮማውያንም በሥራቸው ለሚተዳደሩ ሕዝቦች የሮማ ዜግነት ይሰጡ ሰለነበረ
የቅዱስ ጳውሎስ አባት በዜግነት ሮማዊ ነበር፡፡
☞ቅዱስ ጳውሎስ በ15 ዓመቱ ወደ ኢየሩሳሌም በመመለስ ከገማልያ
የአይሁድን ሕግና ሥርዓት ጠንቅቆ ተምሯል፡፡
☞በ30 ዓመቱም የአይሁድ ሸንጎ አካል ሆኖ ተቆጥሯል፡፡
☞በአይሁድ ሸንጎ አባልነት ለሁለት ዓመታት በሠራበት ወቅት ለኦሪት እምነቱ
ቀናተኛ ፈሪሳዊ በመሆኑ ክርስቲያኖችን በማንኛውም አጋጣሚ ይቃወምና ያሳድድ
ነበር፡፡
☞ቅዱስ እስጢፋኖስ ክርስትናን በማስተማሩ በአይሁድ ሸንጎ ተከሶ ሲቀርብ
የተከራከረውን ቅዱስ ጳውሎስ ነበረ፡፡
☞ኀላም በድንጋይ እስጢፋኖስ ሲወገር የወጋሪዎችን ልብስ ይጠብቅ የነበረው
እርሱ ነው፡፡
☞ቅዱስ ጳውሎስ ክርስቲያኖችን ሊሳድድ ሲሔድ ድንገት ታላቅ ብርሃን መጥቶ
ሳወል ሳወል ለምን ታሳድደኛለህ የሚል ድምፅ ከሰማይ መጣ፡፡
☞ሐዋርያውም ጳውሎስም ጌታ ሆይ አንተ ማነህ ብሎ በጠየቀ ጌዜ
የምታሳድደኝ እኔ የናዝሬቱ ኢየሱስ ነኝ አለው፡፡
☞ቅዱስ ጳውሎስ ከዛ በኃላ በሐናንያ ከተጠመቀና ከተማረ በኃላ አይሁድ ለኦሪት
ሕግ ሲቆረቆር የነበረው አሁን ደግሞ ስለ ወንጌል ሲሰብክ በማየታቸው አይሁድ
ሊገሉት ፈለጉ እሱ ግን ገላትያ፤ ጢሮአዳ፤ ኤፌሶን፤ ቆሮንቶስ፤ልስጥራ እና
ሌሎች ከተማ ወንጌልን በማስተማር ቆየ፡፡
☞በመጨረሻም በክርስቲያኖች ላይ ሞት ታወጆ ስለነበረ ሐዋርያው ቅዱስ
ጳውሎስ ከተማ ተይዞ 2 አመትከ7 ወር በጨለማ ቤት በእስር ከቆየ በኀላ በሮም
ከተማ በኦስትያ መንገድ አንገቱ ተሰይፎ በሐምሌ 5ቀን በሰማዕትነት ዐርፏል፡፡
☞የሐዋርያው ቅዱስ ጳውሎስ እና የቅዱስ ጴጥሮስ የጸሎታቸው በረከት
ከሁላችን ጋር ይሁን፡፡
☞(ከቤተ ክርስቲያን ታሪክ መጽሐፍ የተወሰደ)

10/06/2023

ቅዱሳን ነገሥታት አብርሃ ወአጽብሐ
ወር በገባ በ4 ታስበው ከሚውሉት ቅዱሳን ውስጥ ቅዱሳን ነገስታት አብርሃ ወአጽብሐ+++++++++++
ቅዱሳን ነገሥታት አብርሃ ወአጽብሐ አባታቸው ታዜር እናታቸው ሶፍያ/አህየዋ/ በቅድስና የሚኖሩ እግዚአብሔርን በቅድስና በንጽህና የሚያገለግሉ ነገር ግን ልጅ ያላገኙ መካኖች ነበሩ። ስለሆነም ጌታ ሆይ ደስ የሚያሰኝህ በትእዛዝህም የሚኖር ልጅ ስጠን እያሉ እግዚአብሔርን ይለምኑ ነበር፡፡ከዕለታት አንድ ቀን ስለ እግዚአብሔር ቸርነት ሲነጋገሩ ንግሥት ሶፍያ የሐና እመ ሳሙኤልን ጸሎት በመጥቀስ እሷም እንደ ሐና ሱባዔ ገብታ ፈጣሪዋን
እንድትለምን ንጉሡን ጠየቀችው፤ ንጉሡም ኦ ብእሲቶ ሰናየ ሀለይኪ- አንቺ ሆይ መልካም አስበሻል በማለት በምክሯ ተስማምቶ ሱባዔ ገብታ ፈጣሪዋን በጸሎት እንድትጠይቅ ፈቀደላት፡፡ ንግሥት ሶፍያም የካቲት 18 ቀን ሱባዔ ገብታ
ፈጣሪዋን መለመን ጀመረች፡፡ ከጸሎቷም ጥቂቱ «በኪሩቤል ላይ የምትኖር፣ቀለያትንም (ጥልቅ ባሕርንም) የምትመለከት ጌታዬ ፈጣሪዬ ሆይ አቤቱ ጸሎቴንና ልመናዬን ስማኝ፤ ልቅሶየንም አድምጥ ቸል አትበለኝ» የሚል ነበር፡፡ደጓ ንግሥት ሶፍያ በብዙ ጸሎትና እንባ ሱባዔዋን ለመጨረስ ስትቃረብ፣ አንድ ራእይ ተገለጠላት፤ እርሱም ከተራራ ላይ የተተከለች ረዥም ዛፍ አየች፡፡ ፍሬዋም ጫፍ እስከ ጫፍ የሞላ ነበር፡፡ ጫፎቿም ምድርን የሚሸፍኑ ነበሩ፡፡ አንድ ሰው፣
ብርሃን ለብሶ ብርሃን ተጎናጽፎ፣ በእጁም ትእምርተ መስቀል ያላት የወርቅ ዘንግ ይዞ መጣ፡፡ ሁለት መሰላልም ይዞ ከዛች ዛፍ ግራና ቀኝ አቆማቸው፡፡ ንግሥት ሶፍያ ግን የዚህ ራእይ ምስጢር አልረዳ ቢላት ተጨነቀች፤ምስጢሩን ይገልጽላት
ዘንድም ፈጣሪዋን ለመነች፡፡ የለመኑትን የማይነሳ እግዚአብሔርም የራሱ ባለሟል የሆነውን የመላእክት አለቃ ቅዱስ ሚካኤልን ላከላት፤ መልአኩም ብርሃን ተጎናጽፎ ነበርና ከግርማው የተነሳ የነበርችበት ቦታ ሁሉ ብርሃን ሆነ ፡፡
የመላእክት አለቃ ቅዱስ ሚካኤልም በቀኝዋ ቁሞ ራእይዋን ተረጎመላት ፤እንዲህም አላት፥ «ያየሻት ዛፍ ወንጌል ናት ፤ ዛፍዋ የተተከለችባት ተራራም ኢትዮጵያ ናት፤ የዛፏ ፍሬም ሃይማኖት ነው፤ምድርን ያለበሱ ቅርንጫፎችም መምህራን ናቸው፤ ብርሃን ለብሶ መሰላሎቹን በዛፍዋ ግራና ቀኝ ሲያስቀምጥ ያየሽው ሰውም ሰላማ ከሳቴ ብርሃን ተብሎ የሚጠራው ፍሬምናጦስ ነው፡፡በእጁ የያዛት የወርቅ ዘንግም ጥምቀት ናት፤ እነዚህ ሁለቱ መሰላሎችም ልጆችሽ ናቸው፤ በመሰላሉ የሚወጡ የሚወርዱ ሰዎችም ምእመናን ናቸው፡፡
የሚበሉትም ፍሬ የክርስቶስ ሥጋና ደም ነው» ከዚህም በኋላ ከእርሷ ተሰወረ፡፡በተመሳሳይ ሁኔታም መልአኩ ቅዱስ ሚካኤል ለንጉሡ በራእይ ተገልጾ ፥ «ንጉሥ ሆይ እግዚአብሔር የሰጠህን እነዚህን ዕንቍዎች እንካ ተቀበል» ብሎት ተሰወረ፡፡እግዚአብሔር ይሁን ብሎ የወደደውና የፈቀደው አይቀርምና እግዚአብሔር ንግሥት ሶፍያንና ንጉሥ ታዜርን በበረከት ስለጎበኘ ሶፍያ ጸነሰች፡፡ የጽንሷም ወራት በተፈጸመ ጊዜ ታኅሣሥ 29 ቀን በ 312 ዓ.ም መንታ ልጆችን ወለደች፡፡ሕጻናቱ ከተወለዱበት ቀን ጀምሮ እንደ አዋቂ ሰው በፍቅር ተጠምደው አንዱ ለሌላው በማሰብ ጡት እየያዙ አንደኛው ለሁለተኛው ይሰጣጡ ነበር፡፡ እንደ ሕጻናት ጸባይ አላለቀሱም፡፡ ነገር ግን ይትባረክ እግዚብሔር አምላከ አበዊነ -የአባቶቻችን አምላክ እግዚአብሔር ይመስገን እያሉ ያመሰግኑ ነበር፡፡እንደ ሙሴ ሥርዓትም ወደ ቤተ መቅደስ ወሰዷቸው፤ እግዚአብሔር ተግዳሮትን /ሽሙጥን/ ከእኛ አራቀ ሲሉም ስማቸውን አዝጓጉ ብለው ጠሯቸው፡፡አዝጓጉ እግዚአብሔርን እንዲያገለግሉ በብፅዓት የተወለዱ ስለነበር በተወለዱ በአምስት ዓመታቸው በታላቅ ክብርና ስነ ሥርዓት ወደ ቤተ መቅደስ ገቡ፡፡ኑሯቸውና ዕድገታቸውም በቤተ መቅደስ ሆነ፡፡ መጻሕፍተ ኦሪትንም እየተማሩ አደጉ፡፡
አዝጓጉ በተወለዱ በ 12 ዓመታቸው ፣ ቤተ መቅደስ በገቡ በ 7 ዓመታቸው አባታቸው ንጉሥ ታዜር/ ሠይፈ አርእድ/ አረፈ፡፡ ምንም እንኳ እናታቸው ሶፍያ /አህይዋ/ ለጥቂት ጊዜ መንግሥቱን ስትመራ እንደቆየች ቢታወቅም ፣መንግሥቱን ለዘለቄታው ለሚመራ ማስተላለፍ ግድ ሆነ፡፡ በዚህ ጊዜ ግን ሁለት ዐበይት ችግሮች ተከሰቱ፡፡ እነሱም አንደኛ ልጆቹ የብፅዓት ልጆች በመሆናቸው ቤተ መቅደስ መግባታቸው፣ ሁለተኛ የንጉሥ ልጅ ይሾም ቢባልም ልጆቹ በአንድ
ጊዜ የተወለዱ መንትያዎች በመሆናቸው ለማንኛቸው መስጠት እንደሚቻል አሳሳቢና አስቸጋሪ ጉዳይ መስሎ ነበር፡፡ ነገር ግን ሰው የሚቸገረው እንደራሱ ፈቃድ እየተመራ በራሱ ውሳኔ ሲጓዝ እንጂ በእግዚአብሔር ፈቃድ ሲሆን
መፍትሔው ከእግዚአብሔር በመሆኑ ችግሩ ከባድ አልሆነም ።በዚህ መሠረት ሕዝቡ ሊቀ ካህናቱን ፈቃደ እግዚአብሔርን ጠይቅልን አሉት፡፡ሊቀካህናቱ ወደ ቤተ መቅደስ ገብቶ፥ «የአብርሃም፣ የይስሐቅ፣ የያዕቆብ የአባቶቻችን አምላክ ፈጣሪዬ እግዚአብሔር ሆይ ሙሴን በደብረ ሲና፣ ሳሙኤልን
በቤተ መቅደስ እንደተነጋገርካቸው ጸሎቴንና ልመናዬን ስማኝ ፤ ፊትህንም ከእኔ አትመልስ ፈቃድህን የሚነግረኝን ደገኛውን መልአክህን ላክልኝ» ብሎ ጸለየ፡፡እግዚአብሔርም ልመናውን ሰማና መልአኩ ሚካኤልን ላከለት እንዲህም አለው፥
«እግዚአብሔር እነዚህ ሁለቱን ልጆች አንግሥ፤ ሁለቱንም በአንድ መንበር አስቀምጣቸው ብሎሃል፡፡» ልጆቹ ግን እኛስ ለእግዚአብሔር የብፅዓት ልጆች ሁነን ተሰጥተናልና መንገሥ አይገባንም፤ ሌላ ንጉሥ ፈልጉ አሉ፡፡ ሕዝቡም እጅግ
አዘነ፡፡ነገር ግን ነገሩ ፈቃደ እግዚአብሔር ስለነበር መልአኩ መጥቶ ፥ «በዘመናችሁ ብዙ ሥራ ይሠራ ዘንድ አለውና፣ በእጃችሁም አብያተ ክርስትያናት ይታነጻሉና እሺ በእጄ በሉ፤ የሊቀካህናቱንም ቃል ስሙ» አላቸው፡፡ እነርሱም የእግዚአብሔር ፈቃድ ይሁን አሉ፡፡ ሥርዓተ ንግሥናቸውም በታላቅ ክብርና ሥርዓት ተፈጽሞላቸው ሥመ መንግሥታቸውም ኢዛና እና ሳይዛና ተብሎ ነገሡ ፡፡ በአንድ መንበር ሁለቱም እንደ አንድ ሰው ሁነው ነገሡ ፡፡በሚያስደስትና በሚያስደንቅ ፍቅር ኢትዮጵያን መምራት ጀመሩ፡፡በክፋት የተነሳባቸውን ጠላት አልተበቀሉም፡፡በዘመናቸው ፍትሕ አልተጓደለም ፤ ድሀ አልተበደለም ፤ እንደ ነገሥታት ሥርዓት በቤታቸው በር ዘብ አላቆሙም ፤ በገፊና በተገፊ ይፈርዱ ዘንድ በአደባባይ ይቀመጡ ነበር እንጂ፡፡ ኢትዮጵያ በዘመናቸው የታወቀች ሆነች /የኢዛና አገር
ተብላ/ ዜናቸውም በየአህጉሩ ሁሉ ተሰማ፡፡ በዘመናቸውም አመፀኛ ቀማኛ አልነበረም፡፡ ነገርግን ወጣቶቹ ነገሥታት አንድ ነገር ያስጨንቃቸው ነበር ፤ ይህን ጭንቀታቸውንም ለሊቀካህኑ እንዲህ ብለው ነገሩት ፥ «እኛን የሚያስጨንቀን
ስለመንግሥታችን አይደለም፤ ስለጌታችን ስለ ኢየሱስ ክርስቶስ መወለድ ነው እንጂ፡፡» እርሱም «ጌቶች ይህስ ምስጢር ለእኔም ድንቅ ነው» አላቸው፡፡ ነገር ግን በአልዓሜዳ የመጣ ፍሬምናጦስ የሚባል አንድ ሰው እናንተ የኢትዮጵያ ሰዎች ግዝረትና እምነት አላችሁ ጥምቀትና ቍርባን ግን የላችሁም እያለ ይናገራል አላቸው፡፡እነርሱም ፍሬምናጦስን አስጠርተው ስለነገረ ትስብእቱ ምስጢር
እንዲያስረዳቸው ጠየቁት። እርሱም ነቢያት በመንፈስ ቅዱስ ተቃኝተው/ ተመርተው/ አካላዊ ቃል እግዚአብሔር ወልድ ይወለዳል ካሉበት ጀምሮ የልደቱን፣ የጥምቀቱን፣ የትምህርቱን፣ የስቅለቱን፣ የሞቱን፣ የትንሣኤውንና
የዕርገቱን ምስጢር በሚገባ አስተማራቸው፡፡ ሐዋርያትም በጌታ ተሾመው ዓለምን ዙረው ማስተማራቸውን ተረከላቸው፡፡ እነርሱም ፍሬምናጦስን ይህን ሥርዓት በሀገራችን እንድታስፋፋ አሉት፡፡ እርሱም በወቅቱ ሥልጣነ ክህነት አልነበረውምና ይህን ሥራ ለመሥራት ሥልጣነ ክህነት ያስፈልጋል አላቸው፡፡ነገሥታቱም ወደ እስክንድርያው ፓትርያርክ እርሱን እንዲሾምላቸው እና ሀገራቸውንም ተዘዋውሮ እንዲያስተምርላቸው ደብዳቤ ጽፈው ፣ገጸበረከትም በማስያዝ ፍሬምናጦስን ከብዙ ሊቃውንት ጋር ላኩት፡፡ ቅዱስ አትናቴዎስም ደብዳቤውን ባነበበ ጊዜ እጅግ ተደስቶ ፍሬምናጦስን አቡነ ሰላማ በማለት ሹሞ ወደ ኢትዮጵያ ሰደደው፡፡ ቅዱስ አትናቴዎስ ለአቡነ ሰላማና አብረውት ለነበሩት ሊቃውንት መጻሕፍተ ብሉያትን፣ መጻሕፍተ ሐዲሳትንና የሥርዓተ ቤተ ክርስትያን መጻሕፍትን እንዲሁም ሌሎች ንዋያተ ቅዱሳትን አስይዞ ለነገሥታቱ ደብዳቤ ጽፎ ከብዙ ገጸ በረከት ጋር በታላቅ ክብር ሸኛቸው፡፡
አቡነ ሰላማ ከቅዱስ አትናቴዎስ የተላከውን ደብዳቤ ለነገሥታቱ ካቀረበና የጉዞውን ነገር ሁሉ ካስረዳ በኋላ የማጥመቅ ሥራውን ቀጠለ፡፡ ከሁሉ በፊትም ነገሥታቱ ተጠመቁ ፤ ኢዛና አብርሃ፣ ሳይዛናም አጽብሐ ተባሉ፡፡ ቀጥሎም ሠራዊቱና ሕዝቡ ሁሉ ተጠመቁ፡፡ ሥርዓተ ቍርባንም ድንኳን አስተክለው ተፈጸመላቸው፡፡
አብርሃ ወአጽብሐ በአክሱምና በአካባቢው ሕዝቡን አስተምረው ካጠመቁ በኋላ ጌታችን መድኃኒታችን ኢየሱስ ክርስቶስ ከመላእክት ጋር ተገልጾ በተራራው ላይ /
አሁን መከየደ እግዚእ ተብሎ በሚጠራው ቦታ/ ቆሞ ታያቸውና በዚህ ቦታ ቤተክርስትያን ስሩልኝ አላቸው፡፡ ነገር ግን ቦታው የውኃ መከማቻ ባሕር ስለነበር ከየት እንስራ አሉት፡፡ ጌታችንም ከገነት ትንሽ አፈር አምጥቶ በውኃው ላይ በተነ፡፡ያችም ባሕር እንደ በረሃ ደረቅ ሆነች፤ ጌታችንም ቤተክርስትያኔን ከዚህ ቦታ ሥሩ ብሎ አዝዟቸው ወደ ሰማይ ዐረገ፡፡ነገሥታቱም የቤተ መቅደስ ሥራ ወደ ሚችሉት ወደ ጢሮስ ንጉሥ የኪራምን ልጆች እንዲልክላቸውና እንዲያንጹላቸው ከብዙ ወርቅና ገንዘብ ጭምር ደብዳቤ
ላኩ፡፡ በዛም ወራት የግሪክ ጥበበኞችና የጢሮስ ብልሃተኞች መጡ፡፡የጠቢባኑም ቁጥር ሃያ አራት ነበር፡፡ እነርሱም 12 የግሪክ/ፅርዕ/ጥበበኞች፣ 12 የኪራም የልጅ ልጆች የሆኑ የጢሮስ ብልሃተኞች ነበሩ፡፡ ጠቢባኑም በየምድባቸው
በአንዲት ቦታ የ12 ቤተ መቅደስ መሠረት ጀመሩ፡፡ መሠረቱን ሲያከናውኑ ጌታችን ለነገሥታቱ ታያቸው ፤እነርሱም ባዩት ጊዜ ሰገዱለት፡፡ ይቺ የምታሰሯት ቤተ መቅደስ እንደ ኢየሩሳሌም ያለች ሰማያዊ ናት ብሎም ባርኳቸው ተሰወረ፡፡
ይህ ቤተ መቅደስ ስራው ሁሉ በግሩም ሁኔታ ተከናውኖ ለ600 ዓመታት አገልግሎ ት ሲሰጥ ከቆየ በኋላ በ10ኛው መቶ ክፍለ ዘመን በአንበሳ ውድም ዘመነ መንግሥት እርሱን ድል ነስታ 40 ዓመታት በነገሠችው በዮዲት ጉዲት ተቃጥሏል፡፡ አብርሃና አጽብሐ በመላው ሀገሪቱ እየተዘዋወሩ ሐዋርያዊ አገልግሎታቸውን ከመፈጸማቸው በተጨማሪ 154 አብያተ ክርስትያናትን ያሳነጹ ሲሆን ከእነዚህም 44ቱ አስደናቂ ናቸው፡፡ ባለ44 ምሰሶ ከፍልፍል ድንጋይ የተሰሩ ሲሆኑ ከነዚህም ውስጥ በገልአርታ የሚገኘው ሰው የማይከፍተው ሰው የማይዘጋው የቀመር አርባዕቱ እንስሳ ቤተክርስትያን ይገኝበታል፡፡ እነዚህ ጻድቃን ነገሥታት ሀገሪቱን
ተከፋፍለው በወሎ፣ በሸዋ የየካ ሚካኤል / አዲስ አበባ/ ፣ በከፋ የብሐ ጊዮርጊስን፣ በሰላሌ የዋሻ ሚካኤልን፣ በጎጃም የዲማ ጊዮርጊስን፣ በጎንደር ስማዳ የጃን ሚካኤል ቤተ ክርስትያንን አሳንጸው እየተዘዋወሩ እያገለገሉ እንደነበር ታላቁ አብርሃ በ374 ዓም ጥቅምት 4 ቀን በዕለተ እሑድ ዐረፈና
ተቀበረ፡፡ ወንድሙ አጽብሐ ደግሞ ጥቅምት 4 ቀን 379 ዓም ዐረፈ፡፡ሁለቱም ነገሥታት ልደታቸውም ሆነ ሞታቸው አንድ ቀን ነበር፡፡ ዓመተ ምሕረቱ ግን ይለያያል፡፡ በሞቱም ጊዜ በመቃብራቸው ላይ ቀስተ ደመና ተተክሎ ታይቷል፡፡
እነዚህ ነገሥታት ለሀገራችን ብርሃንን የገለጹ ባለውለታዎቻችን ሲሆኑ የኦሪቱን ሥርዓት በሐዲስ ሥርዓት የለወጡ ቅዱሳን ናቸው፡፡ከሁሉም በላይ ዓለም ዛሬም ድረስ የሚገረምባቸውን የአክሱም ሀውልቶች ያቆሙ ናቸው፤ 33 ሜትር ተኩል ድንጋይን ከየት አመጡት?! እንዴትስ ቀረጹት?!
እንዴትስ ብለው አቆሙት?! ይህ የእግዚያብሔር ተአምር ነው እንጂ፤ እኛስ እጹብ ግሩም ብቻ ብለን እናልፋለን። በኢትዮጵያ ከነገሱ ከጥንት ነገስታት እንደ አብርሃና አጽብሃ በርካታ ታሪክን አኑሮልን ያለፈ ንጉስ የለም ብንል አልተሳሳትንም
የሁሉም ቅዱሳን ነገስታት መሰረትና ምክንያት ናቸውና:: እነዚህ ቅዱሳን የኢትዮጵያን ድንበር አስፍተው ክርስትናን አጽንተው ያስረከቡን ዋኖቻችን ናቸው።ጌታችንም ለእነዚህ ቅዱሳን ነገሥታት ቃል ኪዳን ገብቶላቸዋል፡፡ ዝክራችሁን
የዘከረ፣ ሥማችሁን የጠራ እምርላችኋለሁ፡፡ በስማችሁ ቀዝቃዛ ውኃ ያጠጣ እኔ የሕይወት ውኃ አጠጣዋለሁ፡፡ በስማችሁ ለተራበ እንጀራ ያበላ እኔ የሕይወትን እንጀራ አበላዋለሁ፡፡ በስማችሁ ቤተ ክርስትያን ያሳነጸ በመንግሥተ ሰማያት ቤት እሰጠዋለሁ፡፡ በስማችሁ ማኅሌት የቆመ የመላእክትን ማኅሌት አሰማዋለሁ በማለት ቃል ኪዳን ሰጥቷቸዋል፡፡አምላከ አብርሃ ወአጽብሃ "ድሃ ተበደለ: ፍርድ ተጉዋደለ" የሚል ዳኛ: ሃይማኖቱ የቀና መሪንም ያምጣልን:: የቅዱሳኑን ክብር በእኛ ላይ ያድርግልን።ጸሎታቸው:
በረከታቸውና አማላጅነታቸው ይደርብን።

09/06/2023

ወር በገባ በ2 የታላቁ ቅዱስ አባ ጳውሊ ወርኀዊ መታሰቢያ በዓሉ ነው ።
+ ታላቁ ቅዱስ ጳውሊ +

በቤተ ክርስቲያን አስተምሕሮ "ታላቁ /ዓቢይ/ THE GREAT" የሚል ስም የሚሰጣቸው አባቶች የተለዩ ናቸው:: አንድም እጅግ ብዙ ትሩፋቶችን የሠሩ ናቸው:: በሌላ በኩል ደግሞ በተመሳሳይ ስም ከሚጠሩ ሌሎች ቅዱሳን እንለይበታለን::

ገዳማዊ ሕይወት ጥንቱ ብሉይ ኪዳን ነው:: በቀዳሚነትም በደብር ቅዱስ አካባቢ ይኖሩ የነበሩ ደቂቀ ሴት እንደ ጀመሩት ይታመናል:: ሕይወቱ በጐላ: በተረዳ መንገድ የታየው ግን በታላቁ ጻድቅ ሄኖክ: ከዚያም በቅዱሱ ካህን መልከ ጼዴቅ አማካኝነት ነው::

ቀጥሎም እነ ቅዱስ ኤልያስ ነቢይ: እነ ኤልሳዕ ደቀ መዝሙሩ ኑረውበታል:: በሐዲስ ኪዳን ደግሞ ሙሉ ሕይወቱን በገዳም (በበርሃ) ያሳለፈው መጥምቀ መለኮት ቅዱስ ዮሐንስ ቅድሚያውን ይይዛል::

ለስም አጠራሩ ስግደት ይሁንና መድኃኒታችን ክርስቶስ በገዳመ ቆረንቶስ ለ40 ቀናት በትሕርምት ኑሮ ገዳማዊ ሕይወትን ቀድሷል: አስተምሯል:: በዘመነ ስብከቱም ያድርባት የነበረችው የደብረ ዘይቷ በዓቱ (ኤሌዎን ዋሻ) በራሷ ለዚህ ሕይወት ትልቅ ማሳያ ናት::

ከጌታ ዕርገት በኋላም ክርስቲያኖቹ የዓለም ሁካታ ሲሰለቻቸው: አንድም በንጹሕና በተሸከፈ ልቡና ለፈጣሪያቸው መገዛትን ሲሹ ከከተማ ወጣ እያሉ ይኖሩ እንደ ነበር የታሪክ መዛግብት ያሳያሉ:: አኗኗራቸውም በቡድንም: በነጠላም ሊሆን ይችላል::

ዋናው ነገር ግን በጾምና በጸሎት መትጋታቸው ነው:: ይሕም ሲያያዝ እስከ 3ኛው መቶ ክ/ዘመን ደረሰ:: በዚህ ዘመን ግን አባ ጳውሊ የሚባል ንጹሕ ክርስቲያን ይሕንን ሕይወት ወደ ሌላ ደረጃ ከፍ አደረገው:: ለ80 ዓመታት ሰው ሳያይ ተጋድሎ "የባሕታውያን አባት" ተባለ:: ደንብ ያለው ተባሕትዎም ጀመረ::

ይህ ከሆነ ከ20 ዓመታት በኋላ ደግሞ አባ እንጦንስ የሚባሉ ደግ ክርስቲያን ይህንን ገዳማዊ ሕይወት በሌላ መንገድ አጣፈጡት:: በቅዱስ ሚካኤል አመንኳሽነት ገዳማዊ ሕይወት በምንኩስና ተቃኘ:: ስለዚህም አባ እንጦንስ የመነኮሳት አባት ተባሉ::

እርሳቸውም ሕይወቱን ለማስፋፋት ከተለያዩ አሕጉር ደቀ መዛሙርትን እየተቀበሉ አመንኩሰዋል:: ቅዱሳን የአባ እንጦንስ ልጆችም ወደየ ሃገራቸው ተመልሰው: ሕይወቱን በተግባር አሳይተው ገዳማዊነትን አስፋፍተዋል::

አንድ ቀን ቅዱስ እንጦንስ (የመነኮሳት ሁሉ አባት) እንዲህ ሲል አሰበ:: "በውኑ በበርሃ ለበርካታ ዘመናት በመኖር ከእኔ የሚቀድም (የሚበልጥ) ሰው ይኖር ይሆን?"
ይህንን ሃሳቡን ገና ሳይጨርሰው ቅዱስ ሚካኤል ወደ እርሱ ዘንድ ደረሰ::

"እንጦንስ ሆይ! ከእኔ የሚቀድም የበርሃ ሰው ይኖር ይሆን ብለህ አስበሃል::
*በእርግጥም ከአንተ 20 ዓመታትን ቀድሞ ወደ በርሃ የገባ:
*በቅድስናው ፈጣሪውን ያስደሰተ:
*ዓለም ከነ ክብሯ የእግሩን መረገጫ ያህል እንኳ የማትመጥነው:
*በጸሎቱና በምልጇው ዓለም የምትጠበቅለት:
*ሞገስን የተሞላ አንድ ሰው በበርሃ ስላለ ሒድና ተመልከተው" ብሎት ተሠወረው::

ቅዱስ እንጦንስም ከሰማው ነገር የተነሳ እየተደነቀ ተነሳ:: እርሱ ካለበት በርሃ በራቀ መንገድም ለቀናት ተጉዞ አንድ በዓት (ዋሻ) በር ላይ ደረሰ:: በበሩ አካባቢ የሰውና የአራዊት ኮቴ ተመልክቶ በሩን ጸፋ (ቆፈቆፈ)::
*በውስጥ ያለው አረጋዊ ሰው ግን ትልቅ ድንጋይ ገልብጦ በሩን አጠበቀው:: ለ80 ዓመታት ሰውን አይቶ አያውቅምና ሰይጣን ሊያታልለኝ መጥቷል ብሎ አስቧል:: ቅዱስ እንጦንስ ግን "ኃሠሥኩ እርከብ : ጐድጐድኩ ይትረኃው ሊተ (ማለትም ሽቻለሁና ላግኝ: ደጅ መትቻለሁና ይከፈትልኝ)" ሲል አሰምቶ ተናገረ::

ቅዱሱ ገዳማዊም ሰው መሆኑን ሲያውቅ በሩን ከፈተለትና ወደ ዋሻው አስገባው:: መንፈሳዊ ሰላምታንም ተለዋወጡ:: ሲመሽም ቅዱስ እንጦንስ ሽማግሌውን ገዳማዊ "ስምህ ማን ነው?" ቢለው "ስሜን ካላወክ ለምን መጣህ?" ሲል መለሰለት::

ያን ጊዜ ቅዱስ እንጦንስ ቀና ብሎ ሰማይን ሲመለከት ምሥጢር ተገለጠለትና "ቅዱስ ጳውሊ ሆይ! ከአንተ ጋር ያገናኘኝ ፈጣሪ ይክበር: ይመስገን" ሲል ፈጣሪውን ባረከ:: ቅዱስ ጳውሊም መልሶ (በጸጋ አውቆት) "አባ እንጦንስ ሆይ! እንኳን ደህና መጣህ" አለው:: ሁለቱም ደስ ብሏቸው ፈጣሪያቸውን እያመሰገኑ ተጨዋወቱ::

ቅዱስ ጳውሊ ማን ነው?

ቤተ ክርስቲያን ለሁሉም ዓይነት የቅድስና ሕይወት የመጀመሪያ የምትላቸው አላት:: ለምሳሌ:-
*የመጀመሪያው ሐዋርያ (ቅዱስ እንድርያስ)
*የመጀመሪያው ሰማዕት (ቅዱስ እስጢፋኖስ)
*የመጀመሪያው መነኮስ (ቅዱስ እንጦንስን) እና
*የመጀመሪያውን ባሕታዊ (ገዳማዊ) ቅዱስ ጳውሊን ማንሳት እንችላለን::

ቅዱስ ጳውሊ የተወለደው በሰሜናዊ ግብጽ: በእስክንድርያ ከተማ ሲሆን ዘመኑም 3ኛው መቶ ክ/ዘመን መጀመሪያ ላይ ነው:: ወላጆቹ ባለጸጐች ነበሩ:: ቅዱሱንና ታላቅ ወንድሙን አባ ጴጥሮስን ወልደዋል:: ሁለቱ ክርስቲያን ወንድማማቾች ገና ወጣት ሳሉ ወላጆቻቸው ሞቱባቸው:: ሃዘናቸውን ፈጽመው ሃብት ሲካፈሉ ግን መስማማት አልቻሉም::

ምክንያቱ ደግሞ ትልቁ ጴጥሮስ ደህና ደህናውን እቃ ወስዶ መናኛ መናኛውን ለትንሹ ለጳውሎስ (ጳውሊ) መስጠቱ ነበር:: ስለዚህ ነገር ተካሰው ወደ ፍርድ ቤት ሲሔዱ ግን መንገድ ላይ አንድ ባለጸጋ ሙቶ ደረሱ::

ቆመው ሳሉም ቅዱስ መልአክ ሰው መስሎ ጳውሊን "ይህ ሰው ባለጸጋ ነው:: በገንዘቡ የሰጠውን ፈጣሪ ሲበድልበት ኑሮ እነሆ ተሸኘ:: በሰማይም አስጨናቂ ፍርድ ይጠብቀዋል" ሲል ነገረው::

በዚያች ቅጽበት የወጣቱ ጳውሊ ሐሳብ ተለወጠ:: ወደ ወንድሙ ተመልሶ "ወንድሜ ሆይ! ሁሉ ንብረት ያንተ ይሁን" ብሎት ከአካባቢው ጠፋ:: በመቃብር ሥፍራ ለ3 ቀናት ያለ ምግብ ጸልዮ የእግዚአብሔር መልአክ ሰው ወደ ማይደርስበት በርሃ ወሰደው::

በዚያም ምንጭ ፈለቀችለት:: እየጾመ ይጸልይ: ይሰግድ ገባ:: ሁሌ ማታ ግማሽ ሕብስት ከሰማይ እየወረደለት: ቅዳሜና እሑድ መላእክት እያቆረቡት ለ80 ዓመታት ኖረ:: (አንዳንድ ምንጮች ግን ለ90 ዓመታት ይላሉ) ከቅዱስ እንጦንስ ጋር የተገናኙትም ከዚህ በኋላ ነው::

ከቅዱስ እንጦንስ ጋር በነበራቸው የ2 ቀናት ቆይታም ቅዱስ ጳውሊ ብዙ ትንቢቶችን ተናግሯል:: በዚህች ቀን ሲያርፍም መቃብሩን አናብስቱ ቆፍረዋል::

ቅዱስ እንጦንስም በክብር ቀብሮታል:: 80 ዓመት የለበሳት የዘንባባ ልብሱም ሙት አስነስታለች::

ጻድቅ : ቡሩክ : ቀዳሚው ገዳማዊ : መላእክትን የመሰለና የባሕታውያን ሁሉ አባት ለተባለ ለቅዱስ ጳውሊ ክብር ይገባል!

❤ አባ ለንጊኖስ ❤

ጻድቁ ከኪልቅያ እስከ ሶርያ : ከሶርያ እስከ ግብጽ ድረስ በተጋድሎ የተጓዙ አባት ናቸው:: በ5ኛው መቶ ክ/ዘመን አጋማሽም የደብረ ዝጋግ (ግብጽ : እስክንድርያ) አበ ምኔት ሆነው አገልግለዋል::

ሙታንን አስነስተው : ሃይማኖታቸውን ጠብቀው : ብዙ ተአምራትን ሠርተው በዚህች ቀን ዐርፈዋል:: ከድንቅ ነገራቸው ሰይጣን የእርሳቸውን የምንኩስና ቆብ ዐይቶ ደንግጦ መሸሹን እንጠቅሳለን::
"ኀበ ኢኀሎከ ሶበ ቆብዓከ ርዕየ::
ሰይጣን ተኃፊሮ እፎኑመ ጐየ::" እንዲል:: (አርኬ)

አምላክ በበረከታቸው ይባረከን

23/05/2023

እንደ እግዚአብሔር መልካም ፍቃድ የዕርገትን በዓል ለማክበር ወደ ቅድስት ሀገር ኢየሩሳሌም በመሄድ በዛሬ የመንፈስ ቅዱስ ውላችን ነብዩ ኤልያስ በጉልበቱ ተንበርክኳ የፀለየበት የቀርሜልዮስ ዋሻ እና የመታሰቢያው ቤተ መቅደስ ።✝ እንዲሁም ናዝሬት ከተማ ላይ የሚገኘው የማርያም ምንጭ እና የመታሰቢያው ቤተ መቅደስ እንዲሁም ናዝሬት ከተማ ላይ የሚገኘው አረጋዊ ቅዱስ ዮሴፍ አስቀድሞ ይኖርበት የነበረ መኖርያ ቤት እና የመታሰቢያው ቤተ መቅደስ ።
✝ በመቀጠል መልዕኩ ቅዱስ ገብርኤል ለእመቤታችን ለቅድስት ድንግል ማርያም ያበሰረበት ቦታ እና የመታሰቢያው ቤተ መቅደስ ።
✝ በመጨረሻም ጌታችን አምላካችን መድኃኔታችን ኢየሱስ ክርስቶስ ውሃውን ወደ ወይን ጠጅ የለወጠበት የቃና ዘገሊላ ቦታ እና አስቀድሞ ይኖርበት የነብር የዶኪማስ መኖሪያ ቤት እና የመታሰቢያው ቤተ መቅደስ በመሳለም የዛሬ መርሐ ግብር አጠናቀን ወደ ማረፊያ ሆቴላችን ገብተናል ።
በመቀጠል የዘንድሮ ዓመት የደብረ ታቦር ዓመታዊ ክብረ በዓል ምክንያት በማድረግ የጉዞ ምዝገባ ጀምረናል በጊዜ ተመዝገቡ ።
ከሀገር ውስጥ ጉዞዎች ወደ በርሜል ቅዱስ ጊዮርጊስ እና ወደ ምርት ደለጎ ቅድስት ኪዳነ ምህረት ደብር ጉዞ ያዘጋጀን ሲሆን እንደ እግዚአብሔር መልካም ፈቃድ የበርሜል ቅዱስ ጊዮርጊስ ተአምረኛ ጠበል ጥምቀት በአሁን ሰዓት ላይ ብዙ ተጠማቂና ወረፋ ስለሌለ ጥምቀቱ በየቀኑ ስለሚድርስ የመሄድ አሳብ ያላችሁ ይህን ጊዜ ተጠቀሙበት
✅ ይህን መልእክት እንደደረሶ እርሶ በሚጠቀሙበት በማንኛውም ድህረ ገፅ ላይ ሼር ፤ ሼር ፤ ሼር ያርጉልን አደራ ፤ አደራ ፤ አደራ ።
▶️ ለበለጠ መረጃ ፦ 0963676767/0964020202
ለሙሉ መረጃ ቴሌግራማችንን ይጠቀሙ https://t.me/+fIjQtl3jZwkxNDhk