21/08/2024
რა ვუთხრა ბაბუს?
დაჟანგებულხარ, ძველო სახნისო,
ახლა რაც გტკივა, მე კარგად ვიცი,
გიერთგულებო! - შეგპირდა ბაბუ,
მაგრამ, საბრალომ, გატეხა ფიცი.
რა უნებლიედ დაგტოვა გზაში?!
ნუ იტყვი დაგთმო... ბედის ბრალია,
სწორედ მიტომ, რომ აღარ ხართ ერთად,
ყველა ბილიკი გაუვალია!
მე კი თან დამდევს მისი აჩრდილი,
მუდამ სოფლისკენ გვიხმობს თავისებს,
დღეს უფრო მტკივა, წყვილად ხარები,
უღელს შებმულნი, რომ გაასხვისეს...
მას მერე ბევრმა წყალმა იარა...
იმედით მიმზერ, მე მოვალ როდის?
ვერ შეგპირდები... ვერ გაგიმეტებ,
ფიქრით შეაკვდე უაზრო ლოდინს.
გული კი - გბრალობს და ენანები,
ვაი, თუ მართლა ჟანგმა შეგჭამოს?!
რა ვუთხრა ბაბუს, რით გავახარო,
შრომით მოღლილს რომ გულზე ეამოს?
ვერაფერს ვეტყვი, ტყუილს ვერ ვკადრებ,
დღეს სინამდვილე ცხადზე ცხადია!
დაცარიელდა ყველგან სოფლები,
ისე ვპატრონობთ, მტერს რომ სწადია...
