29/03/2023
#ຖ້ຳນ້ຳລອດເຊບັ້ງໄຟ ແຫລ່ງທ່ອງທ່ຽວ ທີ່ສວຍງາມຍັງຄອຍທ່າການສຳພັດຈາກນັກທ່ອງທ່ຽວ.
-----------------
ແຂວງຄໍາມ່ວນ ເປັນແຂວງທີ່ມີແຫລ່ງທ່ອງທ່ຽວທີ່ສໍາຄັນ ແລະ ງົດງາມຫລາຍແຫ່ງ ໂດຍສະເພາະແຫລ່ງທ່ອງທ່ຽວທາງດ້ານທໍໍາມະຊາດ ທີ່ບໍ່ນ້ອຍໜ້າບັນດາແຂວງໃນທົ່ວປະເທດ ແລະ ກໍ່ແມ່ນທ່າແຮງທີ່ສໍາຄັນທີ່ຈັດຢູ່ໃນໂຄງປະກອບຂອງການພັດທະນາເສດຖະກິດຂອງແຂວງ, ໜຶ່ງໃນນັ້ນແມ່ນສະຖານທີ່ທ່ອງທ່ຽວຖໍ້ານໍ້າລອດເຊບັ້ງໄຟ ເຊິ່ງມີທີ່ຕັ້ງຢູ່ ບ້ານ ໜອງປີງ, ເມືອງບົລະພາ ກໍ່ນັບວ່າເປັນສະຖານທີ່ທ່ອງທ່ຽວທໍາມະຊາດ ທີ່ສວຍງາມ ແລະ ມະຫັດສະຈັນອີກແຫ່ງໜຶ່ງ ເຊິ່ງເປັນທີ່ຮູ້ຈັກ ຂອງນັກທ່ອງທ່ຽວ ທັງພາຍໃນ ແລະ ຕ່າງປະເທດຈໍານວນບໍ່ໜ່ອຍ. ປະຈຸບັນ ທາງອົງການຈັດຕັ້ງລັດ ກໍ່ຄືຂະແໜງການທີ່ກ່ຽວຂ້ອງຂັ້ນ ແຂວງ ແລະ ເມືອງ ໄດ້ສ້າງສິ່ງອໍານວຍຄວາມສະດວກຫຼາຍດ້ານເພື່ອຮອງຮັບນັກທ່ອງທ່ຽວ, ເປັນຕົ້ນພື້ນຖານໂຄງລ່າງທີ່ຈໍາເປັນເຊັ່ນ : ເສັ້ນທາງຄົມມະນາຄົມ ທີ່ສະດວກສະບາຍ ເພື່ອເຮັດໃຫ້ການເຂົ້າເຖິງແຫຼ່ງທ່ອງທ່ຽວມີຄວາມສະດວກດີກວ່າໃນເມື່ອກ່ອນ, ພ້ອມທັງ ສ້າງສະຖານທີ່ພັກເຊົາ ແລະ ປະກອບກິດຈະກໍາການນໍາທ່ຽວຈໍານວນໜຶ່ງ ເພື່ອບໍລິການຮັບໃຊ້ແກ່ນັກທ່ອງທ່ຽວ ໂດຍຮູບແບບການທ່ອງທ່ຽວ ອານຸລັກທໍາມະຊາດ ປະຊາຊົນສ່ວນຮ່ວມ.
ເມື່ອເດີນທາງໄປເຖິ່ງສະຖານທີ່ດັ່ງກ່າວ, ກ່ອນເຂົ້າສູ່ບໍລິເວນທາງເຂົ້າຖໍ້ານໍ້າລອດ ອັນກວ້າງໃຫຍ່ ບັນດານັກທ່ອງທ່ຽວສາມາດເດີນທາງດ້ວຍການຍ່າງ ທີ່ມີໄລຍະທາງປະມານ 800 ແມັດ, ເຊິ່ງໂອບອ້ອມໄປດ້ວຍທັດສະນີຍະພາບລຽບຕາມແຄມຝັ່ງນໍ້າເຊບັ້ງໄຟ ແລະ ຈະມີສາລາພັກຊົມວີວທີວທັດທຳມະຊາດເປັນຈຸດ, ເປັນຍານ ເພື່ອໃຫ້ບັນດາຜູ້ທີ່ມາທ່ຽວໄດ້ພັກຊົມທິວທັດທໍາມະຊາດ ອັນແສນງາມທີ່ມີຫຼາກຫຼາຍສີສັນ ແລະ ຫາດຊາຍຂາວ ເປັນດອນຕາມຝັ່ງນໍ້າເຊບັ້ງໄຟ ທີ່ເຫຼື້ອມຍິບຍັບເມື່ອຕ້ອງກັບແສງແດດ, ໃກ້ກັບບໍລິເວນປາກຖ້ຳຈະມີວັງນ້ຳສີຄາມອັນສວຍງາມມີລັກສະນະເປັນຮູບໂສມຄືກາຫົວໃຈ, ເຊິ່ງຊາວບ້ານໄດ້ອະນຸລັກເປັນວັງສະຫງວນ ເພື່ອເປັນບ່ອນແຜ່ພັນປາ. ແຕ່ຖ້າຕ້ອງການຈະທ່ຽວຊົມພາຍໃນຖໍ້າບັນດານັກທ່ອງທ່ຽວແມ່ນສາມາດຍ່າງເຂົ້າໄປໄດ້ໂດຍທາງເຮືອ ແລະ ກໍ່ຈະໄດ້ພົບເຫັນຄວາມຍິ່ງໃຫຍ່ຂອງຖໍ້າຫີນປູນກໍ່ຄືຄວາມສະຫງ່າງາມຂອງທໍາມະຊາດທີ່ຕົກແຕ່ງດ້ວຍຫີນງອກ, ຫີນຍ້ອຍ ແລະ ຄວາມເຫຼຶ້ອມໃສແວວວາວ. ເມື່ອເຂົ້າໄປເຖິງຈຸດໃດໜຶ່ງ ພາຍໃນຂອງຖໍ້າຈະໄດ້ເຫັນອຸມົງເປັນລັກສະນະຫ້ອງໂຖງທີ່ກວ້າງໃຫຍ່ ຄ້າຍໆຮັງໄຂ່ມັງກອນ. ອັນສ້າງຄວາມງົດງາມໜ້າມະຫັດສະຈັນ ເໝືອນເທວາເສກສັນປັ້ນແຕ່ງ ທີ່ສ້າງຄວາມຕື່ນຕາ ຕື່ນໃຈ ໃນຄວາມງາມຂອງທໍາມະຊາດ ໂດຍສະເພາະແມ່ນຄວາມງົດງາມຂອງ ຮູບຫີນງອກ ຫີນຍ້ອຍ ແລະ ການກໍ່ຕົວຂອງຮູບເສົາຫີນຕ່າງໆ.
ຖ້ຳນ້ຳລອດເຊບັ້ງໄຟ ມີຄວາມຍາວປະມານ 11 ກິໂລແມັດ, ຄວາມກວ້າງ 76 ແມັດ ແລະ ສູງ 56 ແມັດ ເປັນຖ້ຳໜຶ່ງທີ່ໃຫຍ່ທີ່ສຸດ ທີ່ມີແມ່ນ້ຳໄຫຼຜ່ານ. ໃນຈິນຕະນາການປຽບເໝືອນວ່າ “ ແມ່ນ້ຳໄດ້ສູນຫາຍໄປ” ໂດຍໄຫຼລອດຜ່ານອຸມົງທີ່ຍິ່ງໃຫຍ່ໃຕ້ພູເຂົາຫີນປູນຂອງພູຫີນໜາມໜໍ່ ແມ່ນໍ້າມັນໄດ້ໄຫລພົ້ນອອກມາປະກົດໃຫ້ເຫັນອີກຄັ້ງ ເປັນວັງນ້ຳທີ່ກວ້າງໃຫຍ່ໃສສະອາດ ຢູ່ໃກ້ ບ້ານໜອງປີງ.
ສ່ວນການເດີນທາງແມ່ນມີ 2 ເສັ້ນທາງໃຫ້ເລືອກຄື: ເສັ້ນທາງທີ 1 ຈາກຕົວເມືອງທ່າແຂກ ໄປທາງທິດຕາເວັນອອກສ່ຽງໃຕ້ຂອງເມືອງທ່າແຂກ ຕາມເສັ້ນທາງເລກທີ 12 ເມືອງມະຫາໄຊ, ລ້ຽວຂວາໄປຮອດທາງແຍກປ່າໜາມ, ແລ້ວລ້ຽວຊ້າຍຢູ່ປ່າໜາມໄປຮອດຕົວເມືອງບົວລະພາ ລວມໄລຍະທາງ 136 ກິໂລແມັດ ( ເປັນເສັ້ນທາງດິນແດງ).
ເສັ້ນທາງທີ 2 ຈາກຕົວເມືອງທ່າແຂກ ໄປຕາມເສັ້ນທາງເລກທີ 12 ທາງຫລັງຄັງປະມານ 128 ກິ ກິໂລແມັດ(ປູຢາງ), ແລ້ວລ້ຽວຂວາໄປຕາມເສັ້ນທາງດິນແດງປະມານ 40 ກິໂລແມັດກໍ່ມາເຖິງຕົວເມືອງບົວລະພາ ລວມໄລຍະທາງ 156 ກິໂລແມັດ. ສຳລັບໄລຍະທາງຈາກເທສະບານເມືອງບົວລະພາ ໄປ ຮອດບ້ານໜອງປີງ ຈຸດທີ່ຕັ້ງຂອງຖໍ້ານໍ້າລອດເຊບັ້ງໄຟແມ່ນປະມານ 14 ກິໂລແມັດ.
ສໍາລັບກິດຈະກໍາບໍລິການນັກທ່ອງທ່ຽວໃນປະຈຸບັນມີ ກິດຈະກຳພາຍເຮືອໃນຖໍ້າ, ນອນກາງເຕັ້ນ, ເຮືອນນອນໃຫ້ແກ່ນັກທ່ອງທ່ຽວ, ເຮືອນນອນບັງກະໂລ, ສ່ວນການບໍລິການຕ່າງໆ ແມ່ນປະຊາຊົນເປັນຜູ້ໃຫ້ບໍລິການ ແລະ ມີສ່ວນຮ່ວມ. ທ່ານ ບຸດດາ ຫົວໜ້າຫ້ອງການ ຖວທ ເມືອງໄດ້ໃຫ້ສໍາພາດວ່າ: ໃນຕົ້ນປີ 2023 ແມ່ນຈະປັບປຸງ ແລະ ເພີ່ມການບໍລິການ ກິດຈະກຳທາງຍ່າງ, ນອນແຮມຄືນ, ກິດຈະກຳຊົມທີວຖັດວີວທຳມະຊາດ ແລະ ລ່ອງກົງເບັງ.
ເໜືອລ່ອງໃຕ້ລາວ ທ່ອງທ່ຽວ ຈຳກັດ Nuea Long Tai Laos Tour "ສະບາຍດີ"🙏🙏🙏
ສົນໃຈທ່ອງທ່ຽວໄປກັບເໜືອລ່ອງໃຕ້ລາວ ທ່ອງທ່ຽວ ຈຳກັດ Nuea Long Tai Laos Tour
📍📍📍📍ສາມາດຕິດຕໍ່ໄດ້ທີ່:📍📍📍📍
WhatsApp: +856 20 94 122 211
page: ເໜືອລ່ອງໃຕ້ລາວ ທ່ອງທ່ຽວ ຈຳກັດ Nuea Long Tai Laos Tour
Address: ThatLuang tai, Vientiane, Laos
page link: https://facebook.com/100086589889777
