29/01/2023
තමන්ගෙම ව්‍යාපාරයක් කරලා ආදයමක් ගන්න එක මදිකමක් ද❓
පහුගිය දවසක මම තමන්ගෙ 8-5 රැකියාව අත ඇරලා දාලා ඇවිත් ස්වාධීනව තමන්ගෙ business එකක් කරන්න පටන් ගත්තු තරුණයෙක්ගෙ කතාවක් සහ Photo එකක් ඒ තරුණයගෙ අවසරය ඇතුවම මේකෙ පළකළා. ඉතින් පහුවදාම මට ඒ පින්තූරය කතාවත් එක්කම අයින් කරන්න උනා ඒ තරුණයගෙ ඉල්ලීම මත. හේතු Wife, ගෙදර අය, post එක දැකලා තරුණයට බිස්නස් එකත් එපා කරවලා.
ලංකාවෙ බහුතරයකටම තියෙන ප්‍රශ්නය. Wife කැමති නෑ. අම්මා කැමති නෑ. අයියා කැමති නෑ. නෑදෑයො හිනාවෙනවා. යාලුවො හිනාවෙනවා. මිනිස්සු කතා කියනවා. 8-5 වගේ හොද ජොබ් එකක් දාල ඇවිත්, රජයේ රැකියාවක් අත ඇරල මෙහෙම කරන එක එයාලට ලැජ්ජාවක්, මදි කමක්. ඔන්න ඕව තමයි හොද පිළිගත් ආයතනයක අනුන් යටතේ වැඩ නොකර තමන්ගෙ දෙයක් පටන් ගනිද්දි කියන්නෙ.
අලුතෙන් හීනයක් එක්ක තමන්ගෙ කැමැත්තෙන් හැකියාවෙන්, නිදහසේ කරන්න පුලුවන්, තව 10 කට,100කට, 100,000 කට රැකියා නිර්මාණය කරමින් ජාත්‍යන්තර තලයේ McDonald, KFC, Facebook, Tesla, Toyota, Ford, Apple වගේ ව්‍යාපාරයකට හිමිකම් කිව හැකි අති දක්ෂ ව්‍යාපාරිකයෙක් ලංකාවෙන් බිහිවෙන්න ඔන්න මෙන්න තියෙද්දි පටන් ගත්තු තැනම කඩන් වැටෙන්න මෙන්න මේ බහුබූත යල් පැනපු ආකල්ප නිසයි.
තමන්ගෙ දරුවෙක්, සහෝදරයෙක්, සහෝදරියෙක්, අම්මා තාත්තා, යාලුවෙක්,නෑදෑ කෙනෙක්, දන්න කෙනෙක්,තමන්ගෙ ආයතනෙ සේවකයෙක් උනත් පුංචියට ව්‍යාපාරයක් පටන් ගන්නව කියලා කිව්වොත් එයාට උදව් කරන්න. ස්වාධීනව, අවධානමක් අරගෙන මේ වගේ දෙයක් පටන් ගන්න හැමෝටම බෑ. ඒ ආත්ම ශක්තිය අගය කළ යුතුම දෙයක්.
එයාව දිරිමත් කරන්න. ගැණුම්කරුවන් හොයලා දෙන්න. අවශ්‍ය දේවල් ලබා දෙන්න. එයාගෙ භාණ්ඩ සේවා ගණන් අඩු කරලා හෙට්ටු කරන්නෙ නැතුව මිළදී ගන්න. ඔයාලගෙ යාලුවන්ට, සමාජ මාධ්‍ය ජාලා වල ප්‍රසිද්ධ කරන්න. මේක තමයි වෙන්න ඕන වෙනස. අපි අපිම එකිනෙකාට උදව් කරගනිද්දි ලංකාවත් මේ තත්වයෙන් ගොඩ එන්න වැඩි කල් යන්නෙ නෑ.
තමන්ගෙ ව්‍යාපාරයක් පටන් ගන්න ඕනම කෙනෙක් පළවෙනි අඩිය තියන්න ඕන ඉස්සරහට එන ඕනම බාධකයක් ජය ගන්නවා කියන අධිෂ්ඨානයෙන්. ඒක ඔයාගේ ළගම, ආදරණීයම කෙනෙක් වුනත්, කවුරු මොනව කිව්වත් පීඩනය දරන්නම බැරි උනත් තමන්ට තමන් විශ්වාස නම් ඒ ගමන යන්න පටන් ගන්න.
ඔයාගෙ හිතේ හොද නිර්මාණශීලී අදහසක් තියෙනව නම් ඒක පටන් ගන්න මේ තමයි හොදම වෙලාව. රටට නව නිෂ්පාදනයන්, නිපැයුම් කරුවන්, නිර්මාණශීලී අය ඕනෙම කාලයක් මේ.අපි හැමෝම විවිධ දක්ෂතා තියෙන අය. ඒක නිසා පටන් ගත්තු දෙයක් කාගෙ හරි කීමකට, බයකට නම් නවත්තන්න එපා.
කුඩා ව්‍යාපාරයක් කඩන් වැටෙන්න ඊළග හේතුව තමයි, කාගෙවත් උදව් නැතිව තනියම ළගම ඇති රජයේ කාර්‍යාලයෙන් ලියාපදිංචි කරගන්න ගියාම විදින්න වෙන දුක. මේක හැමතැනම නෙවෙයි ඒත් ගොඩක් පළාත් වල වෙන දෙයක්.
▪️තනිපුද්ගල ව්‍යාපාරයක් ලියාපදිංචිය ඉල්ලුම්පත print කරලා ගන්නත් ප්‍රා.ලේ. කාර්යාලයට ම යන්න ඕන. රජයේ වැඩකටයුතු පරිඝණක ගත කරලා syatem දැම්මා නම් ඒක හැමෝටම පහසුයි.ඒක අන්තර්ජාලයෙන්ම තනියම print කරගන්න තිබුණ නම් අපේ වෙලාවත් රජයේ මුදලුත් ඉතිරියි.ඒ විතරක් නෙවේ system දැම්මම අඩු සේවක පිරිසක් නඩත්තු කරන්න වෙන නිසා රජයේ වියදමත් ඉතිරියි.
▪️ඉතින් මේ දවස් වල power cut තිබුණොත් එදාට print out ගන්න බෑ. හැරිලා ගිහින් ආයෙත් දවසක් යන්න ඕන. එතන ගොඩක් කාලේ නාස්ති වෙන්න පුලුවන්.
▪️ඊළගට ග්‍රාම නිළධාරී තුමා ඉන්නෙ දවස් කීපයයි. ඒ දවස වෙනකන් බලන් ඉන්න උනොත් තවත් කාලයක් අපතේ.
▪️අදාළ ව්‍යාපාරයට අදාල වෘත්තීය සුදුසුකම් වලට සහතික අමුණන්න ඕන. ව්‍යාපාරය අලුත්ම නම් කවදාවත් අහල නැති දෙයක් නම්, අදාළ නිලධාරියට ඒක තේරෙන්නෙ නැත්නම් වැඩේ තව ටිකක් අමාරුයි.කුඩා ව්‍යාපාර බොහොමයක් ඉගෙන ගෙන උපාධි එක්ක පටන් ගන්න ඒවා නෙවෙයි. එතනදි ව්‍යාපාර හිමියා අසරණයි. නැත්නම් බොරු සහතිකයක් හදාගෙන ඇවිත් අමුණන්න තමයි වෙන්නෙ. එතකොට ලියාපදිංචි කරනවා.ඉතින් system change වෙන්නෙ කොහොමද බොරුව එතනින්ම පටන් ගත්තම.
▪️ඊට පස්සෙ ස්ථාන පරීක්ෂාවට තව ටික දවසක් යනවා. ඉතින් තාවකාලික පදිංචි ස්ථානය සහ අදාළ ස්ථානය 2ක් නම් ඒ වෙනුවෙන් තවත් දවසක් වෙන් කරගන්න වෙනවා.
ගොඩක් අය තමන්ගෙ ව්‍යාපාර අදහස් අරගෙන පිට රට යන්නෙ එහෙම නැත්නම් වෙන රටවල් වලට විකුණලා දාලා ඉන්නෙ මෙන්න මේ ප්‍රශ්න නිසා. අපේම නොසැලකිල්ල නිසා අපිට අහිමිවෙන අපේම සල්ලි.
ඉහත කිසිවක් කිසිවෙකුට චෝදනා කිරීමක් නෙවේ. නමුත් පුද්ගලිකවම මගේ ව්‍යාපාරය තනිවම ආරම්භ කිරීමේදී මා මූණ දුන් ගැටලු අනුව කිසිවක්ම නොදන්නා කෙනෙක් පවා තනියම මේ කටයුතු ආරම්භ කිරීමේදී අත්විදින්නේ මෙවැනිම තත්වයක් බව අවබෝධ වීමෙන්,මෙම ලිපිය බලන ඕනෑම අයෙකුගේ අතින් සිදුවිය හැකි එම වැරැදි නිවැරදි කිරීමට තබන සටහනක් පමණි.
අප සියල්ලන්ටම මාද ඇතුලුව, අවබෝධයක් තිබිය යුතුයි අප කරන රැකියාවන් ගැන.ක්‍රියාපටිපාටීන් තිබ්බ පළියට අවබෝධයක් නැතුව,පුරුද්දට, කලින් අය කරෙත් මෙහෙමම තමයි කියලා කරන්නන් වාලෙ කරන්නෙ නැතුව අවශ්‍ය අවධානය දීලා ලංකාවෙ කුඩා ව්‍යාපාර ටික උඩට ගන්න උදව්වක් වෙන්න කෙනෙකුට පුලුවන් නම් ඇත්තට ලංකාව මේ අර්බුධයෙන් ගොඩ එන්න කරන ලොකුම උදව්වක් මේ වෙලාවෙ.නැත්නම් අලුත් අදහස් ව්‍යාපාර පටන් ගත්තට වැඩක් නෑ, ඒවා ගෙදරදිම නැත්නම් ලියාපදිංචියෙදිම නැති වෙනවා.
අවබෝධයෙන් කටයුතු කිරීමෙනුත්,සියලු දෙනාටම නැගී සිටීමට උදව් කිරීමෙනුත්, තනි තනිව අප අතින් සිදුවන වැරදි නිවැරදි කර ගැනීමෙනුත් ලංකාව ඉතා ඉක්මනින් ආර්ථික සංවර්ධනය කරා ගමන් කරවන්න ඒ විදියට අපිට පුලුවන්.
කැපවීමෙන් රාජකාරී කරන උත්සාහයෙන් දියුණුවීමට වෙර දරන රාජ්‍ය හෝ පෞද්ගලික අංශ වල හැමෝටම මාගේ ප්‍රණාමය.😊🙏
🖋️වෙරානි ජයසේකර
පුද්ගලික මූල්‍ය උපදේශක/ ජීවන උපදේශක
24/01/2023
(මෙවැනි ලිපි ඔබේ ජංගම දුරකථනයටම ගෙන්වා ගැනීමට පහත Telegram Group එකට එකතු වෙන්න-Comments off කර ඇත.)
සිංහල මාධ්‍යය Group: 👇
https://t.me/personalfinancing_sinhala_lk
English Medium Group:👇
https://t.me/personalfinancing_english_lk
