https://www.facebook.com/104552087980885/

The Roamer, mahawewa, Mahawewa (2025)

01/03/2024

🇱🇰 " වසර දහයකට පෙර ලංකාවේ දෙවනි උසම කඳු මුදුන වෙත " | කිරිගල්පොත්ත ▪️
•••
2014 වන විට " I Love Hiking " ට්‍රෙන්ඩ් එකක් නොවූ අතර Instgram, You Tube වැනි සමාජ මාධ්‍යය මෙතරම් ප්‍රචලිත නොවූ පසුබිමක Hike එකක් නැත්නම් කඳු නැගිල්ලක් සම්බන්ධයෙන් අන්තර්ජාල පරීශීලිනයෙන් වැඩිදුර තොරතුර දැන ගනීමට තිබූ මූලාශ්‍ර වුයේ Lakdasun නැමති වෙබ් පිටුවෙහි ලිපි කියවීම හෝ අත්දැකීම් ලැබූවන් ලියූ Blog ලිපි කියවීම පමණි.

පට්ටිපොල දින 4ක් ගෙවීමට තිබූ අපේ ගමනේ දෙවන දිනය කිරිගල්පොත්ත තරණය කිරීමට තීරණය වූ අතර එය ලංකාවේ දෙවනියට උසම කඳු මුදුන බවත් එහි මුදුන වෙත යන මාර්ගය හෝර්ටන් තැන්න හරහා වැටී ඇති බව පමණක් ඒ වන විට නිශ්චිතව දැන සිටියා කිවහොත් නිවැරදිය.

ගමන ආරම්භ කළ උදෑසන හෝර්ටන් තැන්නේ ප්‍රවේශ ගේට්ටුවෙන්ම ගමන සඳහා ගයිඩ් කෙනෙක් අවශ්‍යය නොවන බව දැන්වූ අපි ඔවුන්ගෙන්ම මාර්ගය අසාගෙන ගමන ආරම්භ කරන ලදී. ගමන තවත් රසවත් කරමින් බාටා දැමූ පාදවලින් මඩ වගුරු සහිත බිම් හරහා ගමන අපහසු වූ බැවින් මුලු ගමනේ කිලෝ මීටර 14 ම නිරුවත් පාද වලින් තරණය කිරීමට අපට සිදු විය.

හෝටන් තැන්නේ කොටියන් ගැන ලොකු අවබෝධටක් නොවු අප, කොටි අඩි, කොටි බෙටි පසු කරමින් අප දැක කලබල වී දුවන ගෝනූන් දෙස බලමින් කෙමෙන් කෙමෙන් කිරිගල්පොත්ත මුදුන වෙත ලඟා වූ අපගේ, පිපාසය හා විඩාව නිවා දැමුවේ, පහළට ගලා බසිමින් මහා ගංගා නිරිමාණය කරන කුඩා දිය පහරවල් සහ දිය කඩිතිය.

කෙසේ හෝ තෘණ බිම් සහ මීදුම් පිරුණු කඳුකර වනාන්තර පසු කරමින් කඳු මුදුනට ලඟා වී කුස ගිනි නිසාවෙන් කෑමට යමක් සෙවූ විට අප සතුව තිබුනේ අග්ගල බෝතලයක් සහ චොකලට් බිස්කට් පැකට්ටුවක් පමණක් බව අදටත් මා හට හොඳ හැටි මතකය. එහෙත් කඳු මුදුනේ මනස්කාන්ත දර්ශනය හේතුවෙන් කුස ගින්නද එතරම් ගැටළුවක් නොවීය.

අප හට නැවත පැමිණිය යුතු වේලාව සම්බන්ධයෙන් ද ලොකු තැකීමක් නොවූ අතර නැවත පැමිණිය යුතු ගමන් මගේ අඩක් පමණ අවසන් වන විටත් හෝර්ටන් තැන්නට මන්දාරම් අඳුර ගලාවිත් තිබුනි. ආසන්න වශයෙන් ප්‍රවේශ ගේට්ටුවට 3km පමණ තිබෙන විටත් ගේට්ටුව දෙසින් මල් වෙඩි 4ක් අහසට නිකුත් කරේ අපට නැවත පැමිණිය යුතු දිශාව සොයා ගැනීමට යැයි අපට සිතුනි.

කෙසේ හෝ රාත්‍රී 7.30 පසු වී නැවත ගමන ආරම්භ කරල ස්ථානය වෙත පැමිණෙන විටත් අප සෙවීමට යාමට පිරිස් සූදානම්ව සිටි අතර එකල හෝර්ටන් තැන්නේ කෞතුකාගාරය වැනි ගොඩනැගිල්ලක විදුලි පහන් දල්වා තිබූ බැවින් එයට ගොඩවුයේ මදක් සීතල නිවා ගැනීමටය. එහිදී අපහට දැකගත හැකි වූයේ මියගිය කොටි හමකට පුලුන් පුරවා සකස් කරන ලද ජීවී කඳුකර කොටියෙකුගේ අනුරුවකි.

සත්‍යවශයෙන්ම, කිලෝ මීටර 14 ක් ගෙවා නැවත පැමිණීමට තිබු පරිසරයේ රජ කරන මාංශ භක්ෂක විලෝපිකයා මෙතරම් ලොකු සතෙකු බව දැන ගැනීමට, එම අනුරුව පෙර දැක තිබුනේ නම් ඇතැම්විට මෙතරම් සුන්දර මතකයන් ඉතිරි කෙරූ කිරිගල්පොත්ත ගමන නොයනු ඇතැයි සිතමින් නැවතත් පට්ටිපොල වෙත අප පිටත් වුනි.

[ සැ.යු - Nokia N8 සහ Samsung Note 3 දුරකථන මගින් වසර 10කට පෙර ගන්නා ලද ඡායාරූප මෙසේ සංස්කරණය කර ඇත. ]

- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎
#𝗧𝗵𝗲𝗥𝗼𝗮𝗺𝗲𝗿𝗦𝗿𝗶𝗟𝗮𝗻𝗸𝗮
•
•
•
•

23/01/2024

• සමහර අත්දැකීම් තියනවා, ජීවිතයේ එක් වරක් හෝ විඳිය යුතු..! 😌
▪️
" අංශක 360 ක දර්ශන පථයක් සහිත කඳු මුදුනක්, කූඩාරමක්, තමන් කැමති පිරිසක්, ගිණි මැලයක්, මීදුම පරයා හිරු නැගෙන උදෑසනක්, පුච්චපු මස් කෑල්ලක් හා දුම් දාන තේ කෝප්පයක් යනු එම අත්දැකීම සුන්දර මෙන්ම රසවත් කරන, වචන බවට හැරවිය හැකි කොටස් පමණි."

එම වචනවල එකතුව වටහා ගැනීමට නම් නිසැකවම ඔබ එය විඳිය යුතුය.
- The.Roamer_
#𝗧𝗵𝗲𝗥𝗼𝗮𝗺𝗲𝗿𝗦𝗿𝗶𝗟𝗮𝗻𝗸𝗮 🇱🇰
•
•
•
•

21/01/2024

🇱🇰 රළු කළු ගලක්, මෙතරම් සියුම් කලා කෘතියක් කරන්නට, ගල් කටුවකටයි, මිටියකටයි පුළුවනිද ??..
📌️ - Thanthirimale Rajamaha Viharaya, Sri Lanka.
#𝗧𝗵𝗲𝗥𝗼𝗮𝗺𝗲𝗿𝗦𝗿𝗶𝗟𝗮𝗻𝗸𝗮
•
•
•
•

09/01/2024

The world can wait... I'm napping. 🌍 💤
" උඹලට පොටෝ ගහන්න හොඳ නන් මට නිදියන්න හොඳ නැද්ද??.. " 🐶
📍 - Queens Hotel, Kandy, Sri Lanka. 🇱🇰
#𝗧𝗵𝗲𝗥𝗼𝗮𝗺𝗲𝗿𝗦𝗿𝗶𝗟𝗮𝗻𝗸𝗮
•
•
•
•

21/12/2023

🐊 කිඹුල් දඩයම | EPIC HUNTING MOMENT OF CROCODILE 🦌

ලෝ ප්‍රකට BBC Earth විසින් මෑතකදී ශ්‍රී ලංකාවේ ගිණිකොනදිග වියළි කලාපීය වනාන්තර ආශ්‍රිතව නිර්මාණය කරන ලද වාර්තාමය කෙටි වීඩියෝවක් වන මෙය ගැට කිඹුලෙකු විසින් උපක්‍රමශීලීව උගුල් සකස් කොට මුවන් දඩයම් කරනා ආකාරය කැමරා කාචයට හසුකොට ගෙන ඇත.

- The.Roamer_
•••

22/09/2021

▪️THE MAGICIAN | ඉන්ද්‍රජාලිකයා. ▪️
" Seeing only once in a lifetime." 🖤
•••
👉 කළු කොටියා නැතිනම් බ්ලැක් පැන්තර් යනු මෑත කාලයේ අප රටේ කතා බහට ලක් වූ, එසේම අවාසනාවන්ත ලෙස මෙම දුර්ලභ සතුන් කිහිපදෙනෙකුටත් මිය යන්නටත් සිදු වුනු, කොටි පවුලට අයත් උප විශේෂයක, ජාන වෙනස්කමක් මගින්, ස්භාවධර්මය නිර්මාණය කරන ලද අපූර්ව සත්වයෙකි.

වනජීවී ඡායාරූපකරණයේදී වුවද ඡායාරූපයට හසු කර ගැනීමට අතිශයින් අසීරු එසේම මෙවැනි අවස්ථාවක් ඉතාමත් විරල වන්නේ මෙම සත්වයන් ඒ තරමටම දුර්ලභ වන නිසාවෙනි.

දින කිහිපයකට ප්‍රථම මෙම ඡායාරූප කිහිපය ඉන්දියාවේ කරන්නාටක ප්‍රාන්තයේ Nagarhole රක්ෂිතයේදී Bharth Kumar Venkatesh නමැති වනජීවී ඡායාරූප ශිල්පියා හසු කරගත් දුර්ලභ කළු කොටියාගේ ඡායාරූප කිහිපයක් වන අතර ඔහු විසින් මෙම සත්වයා The Magician හෙවත් මැජික්කරු නැතිනම් ඉන්ද්‍රජාලිකයා යන අර්ථයෙන් නම් කර තිබුනි. එයට හේතුව ලෙස මෙම සත්වයා ඡායාරූපයට හසු කරගැනීමට ඇති අසීරු බවත් එසේම එම අවස්ථාවේ ඇති විරළ බවත් නිසා යැයි අනුමාන කළ හැක.

පසු ගිය කාල වකවානුව තුළ අප රටේදී මෙම දුර්ලභ සතුන් කිහිපදෙනෙකුට මදු වලට හසුවීමෙන් මිය යෑමට සිදු වුවත් තවමත් මේ සතුන් කිහිපදෙනෙකු හෝ අපගේ වන රක්ෂිතයන් තුළ ආරක්ෂිතව වාසය කරන බව වනජීවී නීරීක්ෂකයන්ගේ මතයයි. එහෙත් එම සතුන්ද මෙසේ හෝ ඡායාරූපයට හසු නොවන තාක් ඔවුන්ගේ නිදහස භුක්ති විඳීමින් ආරක්ෂාකාරීව ජීවත් වනු ඇති බවට නිසැකය.▪️
- The.Roamer_

❎ [ ඡායාරූප හා තොරතුරු සොයා සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎
•••

18/09/2021

🇱🇰 විජය - කුවේණි කතා පුවතේ අවසානය සනිටුහන් වූ "යක්දෙස්සාගල".▪️
•••
👉 ඇතුගල්පුර වටා විහිදෙන අඳාගල කඳු පන්තියේ උසම කඳු මුදුන ලෙස සැළකෙන යක්දෙස්සාගල උසින් ගත් කළ ලංකාවේ සිය වෙනියට උසම කඳු මුදුන ලෙසද සළකනු ලබයි.

විජය - කුවේණි කතා පුවතේ සෝචනීය අවසානය සනිටුහන් කරමින් කුවේණිය විජයගේ පිටුපෑමෙන් ශෝකයට පත්ව මෙම කඳු මුදුනෙන් පැන දිවි තොර කරගත් බවත් යක්ෂ ගෝත්‍රිකයින් කුවේනියගේ විලාපය ඇසෙන මානය තෙක් දෙස් තැබූ බවත් එබැවින් මෙය යක්දෙස්සාගල නම් වන බවත් ජනප්‍රවාද ගත වී ඇත.

කුරුණෑගල සිට ගෝනගම බස් රථයෙන් 16km ක් පමණ ගිය පසු හමුවන සංවැලි මහා විහාරය අසළින් බැස ගත් විට මාර්ගයේ අනෙක් පසින් මෙම කඳු මුදුන තරණය ආරම්භ කළ හැක.

කඳු මුදුන කරා යන ගමන, හෝරා දෙකකට අඩු කාලයක් තුළ සම්පූර්ණ කළ හැකි අතර, ගල්, තෘණ පඳුරු සහිත වියළි පරිසරයක් ඇති හෙයින් සර්පයින්ගෙන් ප්‍රවේශම් විය යුතු බවද මතක් කළ යුතුය. එසේම ගමනට අවශ්‍ය පමණට ජලය ගෙන යාමද අනිවාර්ය වන අතර කඳු මුදූනේ අවු රශ්මියත් වියලි සුළගත් සීඝ්‍රයෙන් ජල අවශ්‍යතාවය වැඩි කරනු ඇත.

කඳු මුදුනේ සිට පැහැදිලි දිනක, ඇතුගල සහ කුරුණෑගල නගරය ඇතුළු අඳාගල, දොලුකන්ද, අලගල්ල, කුරුමිණිගල, ඉබ්බාගල වැනි කඳු මුදුන් පියවි ඇසින් දැක බලාගත හැක. එහෙත් ඉර මුදුන් වන විට කඳු මුදුනේ සිටීම අවු රශ්මියත් සමග යම්තාක් දුරට අපහසු වුවත් කඳු සිසාරා ඇදෙන සුළං රැලි එම විඩාව අඩු කරනු ඇත. එබැවින් මේ ගමන සඳහා උදෑසන හෝ සන්ධ්‍යා කාලය යෝදා ගැනීම වඩා යෝග්‍ය වේ.

කෙසේවෙතත් අවාසනාවකට යටපත් වූ හෙළ ඉතිහාසයේ සාක්ෂි නිහඬව දරාගෙන සිටින යකුන් දෙස් තැබූ ගල, කුවේණියගේ ශාපලත් විලාපය ඇසෙන මානයක වුවත්, සුන්දරත්වයෙන් නම් අගතැම්පත් ඉසව්වක් බව නම් අනිවාරයෙන් කිව යුතුය.▪️
- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎
•••

13/09/2021

▪️" මේ.. ඔබ භාවිතා කළ, මුඛ ආවරණය ද ?? "
• දිනය - 2020.12.01
• වේලාව - පෙ.ව 6.26
• ස්ථානය - නාගරික තෙත් පාරිසරික උද්‍යානය, නාවල.
••••
👉 කොවිඩ් 19 වෛරස ව්‍යාප්තිය හේතුවෙන් මුඛ ආවරණ පැළඳීම අනිවාර්ය වී ඇති අතර මේ වන විට වෛරසයේ ප්‍රබලත්වය සහ ව්‍යාප්තිය නිසා මුඛ ආවරණ යුගලයක් පැළඳීම යෝග්‍ය බව වෛද්‍ය නිර්දේශයයි. එවැනි තත්වයක් මත ඔබ දෛනිකව භාවිතයෙන් ඉවත දමන මුඛ ආවරණයන්ට කුමක් සිදුවේද?

දෛනිකව මුඛ ආවරණ විශාල ප්‍රමාණයක් අපද්‍රව්‍ය ලෙස සාගරයටත්, ජලාශයන් ඇතුලු ජල මූලාශ්‍රයන්ට සහ මහ පොළවට එකතු වන අතර මෙම මුඛ ආවරණ නිපදවීම සඳහා Micro Plastic හෙවත් ක්ශුද්‍ර ප්ලාස්ටික් භාවිතා කරන හෙයින් එය වසර දශක ගණනාවක් ගෙවුනද පරිසරය තුළ ස්භාවිකව දිරාපත් වීමක් සිදු නොවේ. එසේම මෙම මුඛ ආවරණයන්හි ඇති රඳවන පටිදෙක හේතුවෙන් සාගර ජීවීන්ගේ මෙන්ම මෙම ඡායාරූපයේ සඳහන් වන ආකාරයට කුරුල්ලන් ඇතුලු සත්වයින්ගේ පැටලීම හේතුවෙන් එම සතුන්ගේ සාමාන්‍ය චර්යාවන්ට සේම ජීවිතවලටද තර්ජනයක් වී ඇත.

එතැනින් ඔබ්බට ගොස් සැළකිය යුතු ප්‍රධානම කරුණ වන්නේ නවතම සොයාගැනීම් අනුව මෙම ඉවත දමන මුඛ ආවරණයක කොරෝනා වෛරසය ස්ජීවීව දින 7 ක කාලයක් පැවතිය හැකි හෙයින් මෙම අපද්‍රව්‍ය එකතු කරන්නන්ට සේම සතුන්ටද කොරෝනා වෛරසය බෝවීමේ අවදානමක් මෙතුළින් උද්ගත වීමයි. එසේම පසටත් ජල මූලාශ්‍රයන්ටත් පහසුවෙන් කොරෝනා වෛරසය මුසු වීමේ අවධානමක් මෙහි පවතින බව ද කිව යුතුය.

පරිසරයට අවම හානියක් වන අයුරින් මෙම මුඛ ආවරණ විනාශ කරන්නේ කෙසේද යන්න නවීන තාක්ෂණය භාවිතයෙන් දියුණු රටවල් විවිධ ක්‍රමවේදයන් මේ වන විටත් හඳුන්වා දී තිබුනද අනාගතයේ ඇතිවන මෙම පාරිසරික අර්බුදය පිළිබඳව අප රට තුළ කිසිම කථිකාවතක් නොමැති වීම කණගාටුවට කරුණකි.

අනෙකුත් කසළ එකතු කිරීම් වලින් බැහැරව වෙනත් ක්‍රමවේදයන්ට අනුව කාණ්ඩ ගත කර මෙම අපද්‍රව්‍ය එකතු කිරීම, වායුගෝලයට මුදා හරින කාබන් ඩයොක්සයිඩ් ප්‍රමාණය අවම වන අයුරින් තාප උදුන් භාවිතයෙන් අධික උෂ්ණත්වයක් තුළ දහනය කිරීම, නවීණ තාක්ෂණික ක්‍රමවේද අනුව මෙම ක්ෂුද්‍ර ප්ලාස්ටික් ප්‍රතිචක්‍රිකරණය කිරීමට පවා මේ වන විට දියුණු රටවල් වල අවධානය යොමු වී ඇත.

එහෙත් මේවා සිදු නොවන රටක ජීවත් වන අප, පරිසරයට ආදරය කරන මිනිසුන් ලෙස, මේ පිළිබඳ ස්වයං විනයක් ඇති කරගැනීම කාලීන අවශ්‍යතාවයකි.

එහිදී භාවිතයෙන් ඉවත දමන මුඛ ආවරණ ඉවත දැමීමට ප්‍රථම රඳවන පටි යුගලය එක් කොනකින් කපා දැමීමටත්, මේ මුඛ ආවරණ සාමාන්‍ය අපද්‍රව්‍ය සමග මිශ්‍ර නොකිරීමටත් අප වග බලා ගත යුතුය. එසේම පිරිසිදු කර කිහිපවරක් භාවිතා කළ හැකි මුඛ ආවරණ භාවිතයට ගැනීමත් රෙදි මගින් නිෂ්පාදිත මුඛ ආවරණ භාවිතයට ගැනීමත් මෙම පාරිසරික හානිය අවම කරගැනීමට අපට ගත හැකි ක්‍රියාමාර්ග වේ.

මිලියන 20 කට අධික ජනගහනයක් සිටින මේ පුංචි රටේ දෛනික භාවිතයෙන් ඉවත දමන කෙතරම් මුඛ ආවරණ ප්‍රමාණයක් පරිසරයට මුසු වෙනවා ඇත්ද ? මෙය පාලනය නොකළහොත් අනාගතයේදී වසර ගණනාවක් පුරා පොලිතින් මගින් සිදු කළ පරිසර හානියටත්, නැව ගිනි ගැනීම මගින් සිදුවූ සාගර දූෂණයටත් එහා ගිය පාරිසරික අර්බුධයක් නිර්මාණය වීම නොඅනුමානය.
මොහොතක් සිතන්න...
- The.Roamer_

[ මේම ඡායාරූපය ඇගයීම් ගණනාවකට ලක් වූ ඡායාරූපයක් වන අතර එහි හිමිකරු වන රවිසාර ජයමාන්න සොයුරාගේ අවසරය මත පමණක් උපුටා ගැනීම් සිදුවිය යුතුය. ]

මූලාශ්‍ර - 👇

https://www.sciencedirect.com/science/article/pii/S2667010021000184

••••

09/09/2021

🇱🇰 බීච් කෑම්පින් වලට ගැලපෙන - "කිරින්ද" | KIRINDA, SRI LANKA.▪️
•••
👉 කෙමෙන් කෙමෙන් ඝන අඳුර මැඩගෙන අරුණලු වැටීමත් සමග විවිධ වර්ණයන්ගේ අහස් තලය සැරසෙද්දී, වේගයෙන් පැමිණ ගල්පර වල හැපෙන මුහුදු රළේ ශබ්දය ඇති කරන්නේ අමුතු රිද්මයකි. ධීවරයින්ට දිනය අරඹමින් උදෑසන හිරු උදාවත් සමග සුන්දරත්වයෙන් සැරසෙන කිරින්දට ගල්පර සහිත රන්වන් පැහැ වැලි පිරුණු වෙරළ තීරයත්, වෙරළට යාබද කළපුවත්, ධීවර වරායත් ඇතිකරන්නේ මනස්කාන්ත දසුනකි.

ලංකා ඉතිහාසයේ ප්‍රථම වරට වාර්තා වන මුහුද ගොඩ ගැලීමේදී, කැළණි රජ පෙළපතේ කුමාරිකාවක් වූ විහාර මහා දේවිය එම ව්‍යසනය නැවත් වීමට බෝට්ටුවක දමා මුහුදට බිළිදුන් බව සඳහන් වේ. එහිදී කෙසේ හෝ එම බෝට්ටුව ගසාගෙන ගොස් කිරින්ද ග්‍රාමයට ගොඩ ගැසූ බවත් එවකට රුහුණු පුරවරය පාලනය කළ කාවන්තිස්ස රජු හට ඒ බව සැල වී එම කුමාරිකාවගේ සුන්දරත්වය හේතුවෙන් සරණපාවාගත් බවත් මහාවංශය විස්තර කරයි.

විහාරමහා දේවිය ගොඩ බසින ලද තැන යැයි සඳහන් ස්ථානයේ පර්වතයක් මත කිරින්ද මුහුදු මහා විහාරය තනා ඇති අතර එතැන් සිට ක්සිතිජය දක්වා වූ මහා සාගරයත් කිරින්ද වෙරළ තීරයත් නැරඹීමේ හැකියාව පවතී.

තිස්ස නගරයේ සිට 12km කට ආසන්න දුරකින් පිහිටා ඇති මෙම රමණීය වෙරළට යාබද කළපු කොටසේ වන ලැහැබවල් පවතින අතර එය දේශීය මෙන්ම සංචාරක පක්ෂීන්ගේද නිජබිමකි.

සුන්දර වෙරළ තීරයක ඇවිදමින්, මුහුදේ ස්නානය කරමින්, වෙරළේ තැනූ ගිණිමැලයක පහස ලබමින්, පුච්චන ලද මාළු ආහාරයට ගනිමින් බීච් කෑම්ප් එකක අත්දැකීම විඳගැනීමට ප්‍රිය කරන්නෙකුට කිරින්දේ වෙරළත් යාබද කළපු ප්‍රදෙශයත් කදිම තෝතැන්නකි. එහෙත් වෙරළ තීරය ගලපර සහිත වීමත් ජීවිත ගණනාවක් මුහුද විසින් බිලිගෙන තිබීමත් නිසා මුහුදේ ස්නානයේදී අරාක්ෂාකාරී තැනක් පිලිබඳ ධීවරයෙකුගෙන් විමසා සිටීම අනිවාර්ය බවත් තමන්ගේ ආරක්ෂාව පිළිබඳ වරක් නොව දෙවරක් සැලකිලිමත් විය යුතු බවද මතක් කළ යුතුය. ▪️

- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎
•••

05/09/2021

"හාස්‍ය මුසු හොඳම වනජීවී ඡායාරූපය 2021"
[ Comedy Wildlife Photography Award 2021 ]
•••
ලොව පුරා විසිරී සිටින ඡායාරූප ශිල්පීන්ගේ ඡායාරූප 7000 කට අධික ප්‍රමාණයකින් යුත් ඡායාරූප අතුරින් හාස්‍ය රසයෙන් යුත් හොඳම වනජීවී ඡායාරූපය 2021 සඳහා තෝරාගනු ලැබූ අවසාන ඡායාරූප කිහිපය මේ වන විට මාධ්‍යට නිකුත් කර ඇත.

2015 වසරේ සිට වෘතීය ඡායාරූප ශිල්පීන් වන Paul Joynson- Hicks MBE සහ Tom Sullam යන සංවිධායකයින්ගේ අදහසක් පරිදි ආරම්භ වූ මෙම සම්මානය, හාස්‍ය රසය තුළින් වනජීවී සංරක්ෂණය සඳහා ලෝකයාගේ අවධානය ලබා ගැනීමේ අරමුණෙන් නිර්මාණය කර ඇත.

2021 ඔක්තෝම්බර් 22 වෙනි දින මෙම ඡායාරූප අතු‍රින් හොඳම හාස්‍ය රසයෙන් යුත් ඡායාරූපය තෝරා ගැනීමට නියමිත අතර එහි ජයග්‍රහකයා හට කෙන්යාවේ මැසිමාරා වනාන්තරයේ ( Mesi Mara, Kenya ) Alex walker's Serian හි (කෙන්යාවේ ප්‍රචලිත සෆාරි කෑම්ප් එකකි ) සතියක කාලයක් නවාතැන් ගනිමින් සෆාරි චාරිකාවන්හි යෙදීමට අවස්ථාව හිමිවන අතර විශිෂ්ට නිර්මාණකරුවෙකි අතින් නිමවූ සම්මානයක්ද ජයග්‍රහයකයා හට හිමිවනු ඇත.

එසේම මෙම ඡායාරූප අතරින් ප්‍රේක්ෂක මනාපයෙන් "Peoples Choice Award 2021" තෙරීම සඳහා මනාප ලබා දීමට ඔක්තෝම්බර් 10 වෙනිදා වන තෙක් කාලය ලබා දී අතර එහි ජයග්‍රහකයා හට Brand New i pad එකක් ලබාදීමට සංවිධායකින් තීරණය කර ඇත.▪️

ඔබගේ කැමති ඡාරූපය සඳහා ඔබගේ මනාපය පහත Link එකට ගොස් ලබා දිය හැක. .👇👇

https://www.comedywildlifephoto.com/vote-affinity-photo-peoples-choice-award.php

- The.Roamer_
•••

03/09/2021

🇱🇰 ලංකාවේ අවු: 11 ක් වයසැති ගඟනගේ "Lockdown Chicks" ලොවක් අගයති.❤️
••
👉 ලොවපුරා රටවල් 95ක අතිදක්ෂ ඡායාරූප ශිල්පීන්ගේ ඡායාරූප 55000 ක් අතරින්, BBC ආයතනය විසින් සංවිධානය කරනු ලැබූ "වසරේ වනජීවී ඡායාරූප ශිල්පියා 2021" ( BBC Wildlife Photographer of the year 2021 ) තරඟයේ ප්‍රදර්ශන මට්ටමට හා ජූරියේ විශේෂ ඇගයීමට ලක්වීමට ශ්‍රී ලංකාවේ අවු: 11 වයසැති ගඟන වික්‍රමසිංහ නමැති ලාබාල ඡායාරූප ශිල්පියා සමත්ව ඇත.

කොළඹ පිහිටි සිය නිවසේ ගෙවත්තේ ගසක බෙනයක සිටින ගිරා පවුලක් දැක්වෙන "ලොක්ඩවුන් චික්ස්" ( Lockdown Chicks ) නමින් පළකරන ලද ඡායාරූපය මෙසේ තේරීපත්ව ඇත.

මීට අමතරව ශ්‍රී ලාංකික ඡායාරූප ශිල්පිනියක වන බුද්ධිලිනි සොයිසා මහත්මිය විසින් කෙන්යාවේ මෙසි මාරා වනෝද්‍යානයේ ගංගාවක චීටාවන් රැලක් දිය පහරත් සමග පීනා යන අයුරු දැක්වෙන "ග්‍රේට් ස්වීම්" ( A Great Swim ) නමින් පළ කරන ලද ඡායාරූපය ද ජූරියේ විශේෂ පැසසුමට ලක්ව ඇත.

මෙහි අනෙකුත් විශේෂත්වය වන්නේ මීට පෙර මෙවැනි ජයග්‍රහනයක් 2002 වසරේදී රුක්ෂාන් ජයවර්ධන මහතා විසින් ලබා ගෙන ඇති අතර වසර 19කට පසුව මෙසේ ඇගයීමකට පත්වූ දෙවන හා තෙවන ශ්‍රී ලාංකිකයින් මොවුන් දෙදෙනා වීමයි.
- The.Roamer_

BBC Link 👇
https://www.bbc.com/news/science-environment-58398905
•••

01/09/2021

ජීවිතේ විඳින තැන.😍
•••
මීදුම පිරුනු කඳු ගැට්ටක් උඩට ගිහින්, මීදුම පහව ගිහින් දර්ශනය පැහැදිලි වෙනකන් බලන් ඉන්නවා කියන්නේ ජීවිතේ වැඩිම බලාපොරොත්තු දල්වාගෙන සිටින මොහොතක්.

ඒ එතනට එන්න දැරූ සියලු මහන්සියේ ප්‍රතිඵලය ඒ මත තීරණය වෙන හින්දා. ඒ බලාපොරොත්තුවේ දිග පලල දන්නේ ඒ අත්දකීම විඳපු කෙනෙක්ම තමයි. 😊

ඒ වගේ වාසනාවන්ත වූ මොහොතක්. ❤️
- The.Roamer_
•••

28/08/2021

🇱🇰 සිරි ලංකාව | SRI LANKA.
•••••
▪️වර්ග කිලෝමීටර 65610 ක් වූ මේ පුංචි දූපතේ, නරඹන්න, ගවේෂණය කරන්න, සුන්දරත්වය විඳින්න කෙතරම් ස්ථාන පිහිටලා තිබෙනවා ද ?

▪️දූපත පුංචි උනත් මධ්‍යම කඳුකරයේ සිට වෙරළ තීරය දක්වා පැමිණීමේදි මොනතරම් වෙනස් දේශගුණික පරාසයක් අත්විඳීමට හැකියාව තිබෙනවාද ?

▪️කෙතරම් දුරට, කෙතරම් ප්‍රමාණයකට එම සුන්දරත්වය අප අත්විඳ තිබෙනවා ද?

මොහොතක් සිතන්න.. 🙂

" ලංකාවක් සාක්කුවේ දාගෙන, ලංකාව වටේ ඇවිදපු මතක ගොන්නෙන් කිහිපයක් " ❤️
- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎

28/06/2021

🇱🇰 නානු ඔයෙන් කඩා හැලෙන "නානු ඔය ඇල්ල" ▪️
•••••••••
හරිත පැහැයෙන් වර්ණවත් වූ පසුබිමක, පඩි පේළියක් දිගේ ජලය බැසයන ආකාරයෙන් නිමැවුනු, ස්භාවධර්මයේ අපූර්ව නිර්මාණයක් ලෙස කළුගල් පඩි පේළියක් මතින් ගලා බසින නානු ඔය ඇල්ල මවන ඒ ස්භාවික සිත්තම, මන්ස්කාන්ත ය.

නානු ඔය දුම්රිය ස්ථානයේ සිට 1.5km ආසන්න දුරකින් පිහිටා ඇති මෙම දිය ඇල්ල උඩරට දුම්රියේ සංචාරය කරන්නෙකුට ලඟා විය පහසු හා සුන්දරම සංචාරක ස්ථානයකි. උඩරට දුම්රියේ ගමන් කරන විටද මෙම දිය ඇල්ලට ඉහළින් වැටී ඇති යකඩ දුම්රිය පාළම මතින් දුම්රිය ගමන් කළද, දුම්රියේ ගමන් කරන විට මෙහි සුන්දරත්වය රිසි සේ විඳීම අපහසුය. ඒ සඳහා නානු ඔය දුම්රිය ස්ථානයෙන් බැස පා ගමනින් දිය ඇල්ල පිහිටි ස්ථානය වෙත පැමිණිය යුතුය.

උඩරැදල්ල, බඹරකැලේ වැනි ප්‍රදේශ පසු කරමින් ගලා එන නානු ඔය ( ගංඟාව ) මීටර 60 කට ආසන්න උසක සිට පහළට කඩා හැලෙමින් මෙම රමණිය ඇල්ල නිර්මාණය කරන අතර එම ජලය ගාලා ගොස් කොත්මලේ සහ මහවැලි ගංඟා සමග එක් වේ.

නුවරඑළියේ සිට ඔබ මෙම දිය ඇල්ල වෙත පැමිණෙනවා නම් 3km කට ආසන්න දුරක් පේරාදෙනිය-බදුල්ල මාර්ගයේ පැමිණ එතැන් සිට 8km කට ආසන්න දුරක් අවිස්සාවේල්ල-හැටන්-නුවරඑළි මාර්ගයේ පැමිණි විට දිය ඇල්ල අසළටම ලඟා විය හැක.

දින 4ක පට්ටිපොළ සංචාරයේදී දුම්රියෙන් නානු ඔයට පැමිණ, මෙම දිය ඇල්ල නරඹා, දැඩී සීතල නොතකා ජලස්නානය කර ලැබූ මතක ගොන්නේ ඡයාරූප කිහිපයක් මෙහි පළකර ඇති අතර මෙහි සංචාරය කරන ඔබ ප්ලාස්ටික් පොලිතීන් වැනි කැළිකසල බැහැර කිරීම් වලින් තොරව සංචාරය කළ යුතු බව තරයේ මතක තබා ගන්න.
- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎
••••••••••••

15/06/2021

🇱🇰 අතීත පුරාවෘත ගණනාවක නිජබිම - "දොලුකන්ද" ▪️
•••••
රාමා රාවණා යුද්ධයේදී රාවණාගේ පහරකින් තුවාල ලබූ රාමාට, ප්‍රතිකාර සඳහා ඖෂධ ගෙන ඒමට හිමාලය කරා ගිය හනුමාට, ඖෂධ වර්ගය අමතක වීම හේතුවෙන් හිමාල කන්දේ කොටසක් රැගෙන ආ බවත් එම රැගෙන ආ කොටස කොටස් තුනක් ලෙස ලංකාද්වීපයට පතිත වූ බවත් ඒවා රූමස්සල, රිටිගල හා දොලුකන්ද බවත් ජනප්‍රවාද වල සඳහන් වේ. එසේම එහි සත්‍ය අසත්‍යතාවය කෙසේ වෙතත් පුරාණ ඉසිවරයෙකුගේ ඖෂධ උද්‍යානයක් ලෙසද පැරැන්නන් හඳුන්වනු ලබන දොලුකන්ද හිමාල වනයට සම්බන්ධ වනරාජ, නාගරාජ, ගුරුලුරාජ, හිරුරාජ හා ගරුඬරාජ ආදී රාජ පහට අයත් ඖෂධ ශාක වලින් ගහණ වූ වන සංරක්ෂණ කලාපයක් බව වර්තමානයේ තහවරු වී ඇත.

වයඹ පළාතේ කුරුණෑගල දිස්ත්‍රීක්කයේ පිහිටා ඇති දොලුකන්ද වෙත මාර්ග දෙකකින් ලඟාවිය හැක. එහි එක් මාර්ගයක් වන්නේ කුරුණෑගල සිට දඹුල්ල මාර්ගයේ ගොස් මුත්තෙට්ටුගල හංදියෙන් වැල්ලව ගනේවත්ත මාර්ගයෙන් දොලුකන්ද පන්සල වෙත ලඟා වී ඒ හරහා දොලුකන්ද තරණය කිරීමයි. අනෙක් මාර්ගය ලෙස කුරුණෑගල දඹුල්ල මාර්ගයේ ගොස් ඉබ්බාගමුවෙන් හැරී මඩගල්ල මාර්ගයේ ගොස් ගොඩගාල හංදියෙන් බැස මනරම් වෙල්‍ යාය අතරින් දොලුව ගම්මානයට පිවිස දොලුකන්ද තරණය ආරම්භ කළ හැක.

ඔබ විනෝදාංශය ලෙස හෝ රැල්ලට හෝ කවර අකාරයක අත්දැකීම් සහිත කඳු තරණය කරන්නෙකු වුවද දොලුකන්ද මුදුන වෙත යන මාර්ගය සොයා ගැනීම අපහසු නොවූවත් අතරින් පතර වැටී ඇති සතුන් ගමන් ගන්නා මාර්ග නිසා මග වැරදීමට ඉඩකඩ ඇති හෙයින් මග පෙන්වන්නෙකුගේ සහය ලබා ගැනීම ඔබගේ ගමන පහසු කරවනු ඇත.

ගමන ආරම්භක ස්ථානයේ සිට පැය තුනකට ආසන්න කාලයක් තුළ ගල් තලාවල් හා මිදූමෙන් වැසුනු ලඳු කැලෑ පසුකරමින් මුදුන වෙත ලඟා විය හැක. කඳු මුදුනේ දර්ශනය නෙත් මවිත කරවන සුන්දර දසුනක් වන අතර කුරුණෑගල වාරියපොළ ද අනෙක්පසින් ගනේවත්ත, වැල්ලව, දැදුරු ඔය ජලාශය, යක්දෙස්සාගල කන්ද මෙන්ම පැහැදිලි දිනයකදී හලාවත දෙසින් මහ මුහුද ද දර්ශනය වේ.

දොලුකන්ද මුදුනේ රාත්‍රියක් ගත කිරීමට යෝග්‍ය ස්භාවික ගල් ගුහාවක් පිහිටා ඇත. එහෙත් සංවේදී පරිසර කලාපයක් වන හෙයින් පරිසරයට හානියක් නොවන සේ රාත්‍රිය ගත කිරීමට වගබලා ගත යුතුය. මුදුනෙන් මදක් පහලට වන්නට ගමනේ විඩා නිවාගැනීමට මෙන්ම භාවිතයට ජලය ගැනීම සඳහාද පිරිසිදු ජල පහරක් ගලා බසියි. වර්ෂාව ඇති සමයක එය සක්‍රීයව ගලාබසින බව මගපෙන්වන්නාගෙන් අපහට දැනගන්නට ලැබුනි. එසේ නොමැති වුවත් ගුහාව පිටුපස ඇති උල්පතක් මගින් පිරිසිදු ජලය ලබාගත හැකි හෙයින් පහළ සිට ජලය උඩට ගෙන යාමේ අවශ්‍යතාවයක් නොමැත.

ලංකා ඉතිහාසයට අනුව බුද්ධදාස රජ දවස රජ මාලිගයක් දොලුකන්දේ ඉදිකර තිබූ බවත් මෙම කඳු මුදුන ලඟාවීමට අපහසු ගිරි දුර්ගයක් වන හෙයින් බුද්ධදාස රජුගේ ධනයෙන් විශාල කොටසක් මෙහි නිධන්ගත කර ඇති බවත් ඉතිහාසයේ දැක්වේ. ඒ බව සනාථ කිරීමට පුරාවිද්‍යාත්මක සාධකද මෙම භූමිය පුරා විසිරී තිබීම හේතු කොටගෙන නිධන් හොරුන්ගේ ද ප්‍රබල බලපෑමකටද මෙම භූමිය නතුව ඇත.

පෙර සඳහන් කර සේම දොලුකන්ද සංවේදී පරිසර කලාපයක් වන හෙයින් මෙහි සංචාරය කරන ඔබ පා සටහන් පමණක් ඉතිරි කර ප්ලාස්ටික් පොලිතින් වැනි කැළිකසළ බැහැර කිරීම් වලින් තොරව සංචාරය කිරීම මෙම සුන්දර පරිසර පද්ධතිය මතුවටත් ආරක්ෂා කරනු ඇත.
- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎
•••

08/06/2021

වැඩිමහල් දියණිය. ❤🙏
••
- " තාත්තා ඊයේ රෑ පැල් රැකලා, උදේ වැඩ කරලා දැන් නිදි.. පවුලේ මායි මල්ලිලා දෙන්නයි. අම්මා මල්ලිලා දෙන්නත් එක්ක හේනේ වැඩ. වටේම අලි වැටවල් කැඩිලා. තව ටිකකින් අලි ගමට එනවා.. මේ ටික විකුණ ගන්නත් ඕනා. දැන් ගෙදර යන්නත් ඕනා.. "

ඒ ඇයගේ කතාවයි. එහෙත් ඇය නොකියූ කතාව වන්නේ, පුංචි හිතට ආස ඇති දුවලා පැනලා සෙල්ලම් කරන්න, එහෙත් පවුලේ බරෙන් කොටසක් වැඩිමහල් දියණිය වූ ඇයගේ කර මත නොදැනිම පැටවී ඇත. ඒ බර විසින් ඒ පුංචි සිතුවිලි ද යටපත් කර ඇත.

ප්‍රශ්නය නම්, ඉඳලා හිටලා පාරේ යන වාහන වලට එළවලු පලතුරු විකුණූ ඇයගේ මෙන්ම ඇයගේ පවුලේ ජීවිතයත් රටේ පවතින වර්තමාන තත්වයත් සමග කෙබඳු වී ඇත්ද??

මොහොතක් සිතන්න.. අපට මොනාද තියන අඩුපාඩු. 😐
- The.Roamer_
#𝗧𝗵𝗲𝗥𝗼𝗮𝗺𝗲𝗿𝗦𝗿𝗶𝗟𝗮𝗻𝗸𝗮
•
•
•
•

30/05/2021

🇱🇰 කඳු පන්තියකින් වටවුනු "බුදුරුවාගල ජලාශය" | BUDURUWAGALA TANK, WELLAWAYA, SRI LANKA.▪️
•••••••••••••••••••••••••••••••••••
ඌව පළාතේ, මොණරාගල දිස්ත්‍රීක්කයේ පිහිටි වැල්ලවාය නගරයේ සිට තිස්සමාහාරාම මාර්ගයේ කිලෝමීටර හතරකට ආසන්න දුරක් ගිය විට හමුවන බුදුරුවාගල පාසල ඉදිරිපස ඇති අතුරුමාර්ගයේ කිලෝමීටර දෙකකට ආසන්න දුරක් ගමන් කළ විට මෙම මනස්කාන්ත පරිසරය හමුවේ.

එතැන්සිට තවත් කිලෝමිටරයකට ආසන්න දුරක් ගිය විට බුදුරුවාගල පුදබිම වෙත ලඟා විය හැකි අතර එය අපගේ ගමනාන්තය විය. එහෙත් හිරු අවරට යන සැඳෑවක හරිත පැහැයෙන් බැබලෙන කඳු පන්තියකින් වටවුනු සුන්දර ජලාශයක් මැද ඔරු හා පාරු භාවිතයෙන් ධීවර කර්මාන්තයෙ යෙදෙන ගැමියන් පිරිසකගේ දර්ශනය දුටු අප දෙපාරක් නොසිතා එහි මොහොතක් නතර විය.

කෙමෙන් කෙමෙන් අඳුර ලඟා වුවද එම පරිසරයේ නිස්කලංක සුන්දරත්වය අඩුවක් නොමැතිව විඳගැනීමට එය බාධාවක් නොවීය. දවසේ කටයුතු ලහි ලහියේ නිමාකරමින් කුරුලු රංචු එහෙ මෙහෙ යද්දී ඔරු හා පාරු මගින් තමන්ගේ ධීවර දැල් ජලාශයට දමන ගැමීන් එම පරිසරයට එක් කලේ අමුතු සුන්දරත්වයකි.

බුදුරුවාගල බුද්ධ ප්‍රතිමා මෙන්ම මෙම ජලාශයද කුමන රජකෙනෙකු විසින් ඉදිකරන ලද දැයි නිශ්චිත පුරාවිද්‍යාත්මක සාධක මේ වන විටත් සොයාගෙන නොමැති වුවද මෙම ජලාශය අතීත රජදරුවන්ගේ වාරි තාක්ෂණය මොනවට පැහැදිලි කරනු ලබන ප්‍රබල සාධකයකි.

වනයට මායිම් වන ජලාශයේ අනෙක් කෙළවරින් ඇතැම් විට වන අලින් ජල ස්නානය සඳහා ජලාශයට බසින බව ගැමියෙකු සමග කතා බහේදී අප දැනගත් අතර එම දර්ශනය දැකීමට තරම් අපි වාසනාවන්ත නොවීමු.

ජලාශයක් නැත්නම් වැවක් සහිත පරිසරය හිරු බැස යන වෙලාවට මෙතරම් විචිත්‍රවත් දසුනක් දැයි අපගේ නෙත්ද මොහොතකට අදාහාගත නොහැකි වූ අතර ලංකාවේ තවත් මෙවැනි සැඟවුනු සුන්දර ස්ථාන කෙතරම් ඇත්දැයි යන්න අපට සිතුනි. එහෙත් එම ස්ථාන සැඟවී තිබෙන තාක් එහි සුන්දරත්වය මතුවටද රැකෙනු ඇත.

- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎
•••••••••••••••••••••••••••••••••••

26/05/2021

සියලු සත්වයෝ සුවපත් වේවා.. !
රෝ බිය දුරු වේවා. !
ප්‍රීතිමත් වෙසක් සමයක් වේවා. ! 🙏
•
•
•
•
•

24/05/2021

🇱🇰 මධ්‍යම කඳුකරයේ දොරටුව - පට්ටිපොල | PATTIPOLA, SRI LANKA.▪️
••••••••••••••••••••••••••••••••
👉 ලොව පුරා විහිදී ඇති දුම්රිය මාර්ග පද්ධතියේ, දුෂ්කරම දුම්රිය මාර්ග අතරින් පිළිවලින් ලොව හත්වෙනියට දුෂ්කරම දුම්රිය මාර්ගය වන්නේ ශ්‍රී ලංකාවේ උඩරට දුම්රිය මාර්ගයයි. එහි ධාවනය වන දුම්රියක් ලඟාවනු ලබන මුහුදු මට්ටමේ සිට උසින්ම පිහිටි ග්‍රාමය වන්නේ පට්ටිපොල ග්‍රාමයයි.

එසේම මුහුදු මට්ටමේ සිට මීටර් 1891 ක් පමණ උසකින් පිහිටි පට්ටිපොල දුම්රිය ස්ථානය ලංකාවේ උසින්ම පිහිටි දුම්රිය ස්ථානය වන අතර ඔහිය සහ අඹේවෙල දුම්රිය නැවතුම් වලට මැදිව කොළඹ කොටුවේ සිට කිලෝමීටර 224ක් පමණ දුරින් පිහිටා ඇත.

එමෙන්ම ලොව පිහිටා ඇති පළල අඟල් 5.5ක් වූ අමාන දුම්රිය මාර්ගයක් ගමන් ගන්නා උස්ම ස්ථානය නොහොත් Summit Level පිහිටා ඇත්තේද පට්ටිපොළ දුම්රිය ස්ථානය ආශ්‍රතවය. උඩරට දුම්රිය මාර්ගයේ රඹුක්කන සිට බදුල්ල දක්වා ගමන් කිරීමේදී තිබෙන සීඝ්‍ර නැග්මෙහි අවසානය පට්ටිපොළ දුම්රිය ස්ථානය වන අතර එතැන් පටන් බදුල්ල දක්වා ඇත්තේ බැස්මකි.

නුවරඑළිය දිස්ත්‍රීක්කයේ පිහිටා ඇති මෙම සුන්දර ග්‍රාමය ක්ෂණික කාළගුණික විපර්යාස වලට ලක්වන නිසා බොහෝ දිනවල සවස 5 හෝ 5.30 පසුවන විට පරිසරය මීදුමින් වැසී යන අතර කුඩා වැහි පොදක් ඇති කරමින් සැඳෑ අඳුර විසින් මෙම පරිසරය ගිලගනී. සමාන්‍යයෙන් සවස 6 හෝ 7 වන විට 17°C - 16°C තරම් පහළ පරිසර උෂ්ණත්වයකට ලඟා වන පට්ටිපොල, පාන්දර වන විට 10°C ආසන්න උෂ්ණත්වයකට ලඟා වේ. දහවල් කාලයේදී ද අඳුර මුසුවූ හරිත පැහැයෙන් බැබළෙන සුන්දර පරිසරයකින් සමන්විත මෙම ග්‍රාමය, හෝර්ටන් තැන්න ජාතික වනෝද්‍යානයට ආසන්නයේ පිහිටි ග්‍රාමයක් වන හෙයින් එහි ඇති ආවේණික ශාක විශේෂ මෙන්ම සත්ව විශේෂද පට්ටිපොල ආශ්‍රතව දැකිය හැක. ඒ අතර ගෝනා සහ කඳුකර වඳුරා සුලභ වශයෙන් දැකිය හැකි අතර ගම්මුන් පවසන ආකාරයට කඳුකර දිවියාද රාත්‍රී කාලයේදී මෙම පරිසරය ආශ්‍රතව සැරිසරනු ලබයි.

තවමත් නාගරීකරණයේ අඳුරු සෙවනැලි වලට මුහුණ පා නැති මෙම සුන්දර ග්‍රාමය දෙස් විදෙස් සංචාරකයන්ගේ නොමද ආකර්ෂණය දිනා ගැනීමට සමත්ව ඇත්තේ එහි ඇති පාරිසරික සුන්දරත්වය හා එළවලු හා පළතුරු වගාවට මූලිකත්වය දෙමින් ගෙවනු ලබන කෘෂිකාර්මික දිවි පෙවතක් සහිත ග්‍රාමීය පරිසරය නිසාවෙනි. අවස්ථා කිහිපයකදී පට්ටිපොල සංචාරයන් අතර තුර ගන්නා ලද ඡායාරූප එකතුවක් මෙහි දැක්වෙන අතර මෙහි සුන්දරත්වය රැක ගනිමින් කැලි කසළ වලින් තොරව සංචාරය කිරීම ඔබ අප සැමගේ වගකීමක් බව මතක් කළ යුතුය.

- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎
••••••••••••••••••••••••••••••••••••••

18/05/2021

🇱🇰 වළාකුළු දැවටෙන මොණරගල මුදුනේ හිමිදිරියක්. ❤
••••••••••••••••••••••••••••
👉 හවස් යාමයේ පටන්ගෙන නොනවත්වා ඇදහැලුණු වර්ෂාවත්, ඒ සමගම විඳ දරාගැනීමට සිදුවූ අධික සීතල හා කූඩැල්ලන්ගේ පහරකෑම් ඉවසා ගනිමින් ඒ ගෙවා දැමුවේ, තවත් එක් අමිහිරි කඳවරු අත්දැකීමක් බව පළමුව කිව යුතුය.

එහෙත් අරුණළු උදාවත් සමග දැකගත හැකි වූ මනරම් දර්ශනයෙන් තෙතබරිතව හෙම්බත්ව සිටි අප ක්ෂණයෙන් නව පණක් ලැබුවේ එය එතරම් සුන්දර වූ නිසාවෙනි. කොත්මලේ පුරවරය වසාගත් වාළාකුළු තට්ටුවත්, කෙමෙන් කෙමෙන් වැඩි වූ හිරු කිරණත්, මධ්‍යම කඳුකරය සිසාරා රිසි සේ එහේ මෙහේ ගලා ගිය මීදුමත් සහිත පරිසරය, දිව්‍යලෝකයක් සේ දිස් වුනි. එසේම කඳු පාමුල සිට අප හා ගමනට එක් වෙමින් අධික වර්ෂාවත් සීතලත් දරාගනිමින් අප සමගම රැය පහන් කෙරූ, සුනඛ මිතුරාද එම දර්ශනයෙන් මනාව සතුටූ වූවායැයි අපට සිතුනි.

කෙසේවෙතත් මොණරගල නැතිනම් පීකොක් හිල් මුදුනේ ගෙවා දැමූ දුෂ්කර රාත්‍රියකට පසුව උදාවූ එම මනස්කාන්ත හිමිදිරිය, ඕනෑම අමිහිරි අත්දැකීමකින් පසුව සුන්දර අවසානයක් තිබිය හැකි බව අපහට හොඳ හැටි පසක් කරන ලදී. ▪️

[ මොණරගල කඳු මුදුනේ කඳවරු අත්දැකීමේ ඡායාරූප සහිත සවිස්තරාත්මක ලිපියක් ඉදිරියේදී පළකරනු ලැබේ. ]

- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎
•••••••••••••••••••••••••

15/05/2021

🇱🇰 නෙලුම් කොලේ බත් එක. ❤
•••••••••••••••••••••
👉 සමහර ගියපු ගමන් ගැන මතක් කරද්දී, ගමනේ අත්දැකීමට කලින් මතක් වෙන්නේ කාපු බත් එක. හදිස්සියේ සෙට් උනත් ඒ කෑම එක එච්චරට රසයි. 😋
නෙලුම් කොලේට බෙදපු, අලුත කොටපු නාඩු හාල් බතුයි, වැව් මාලු මිරිසට උයලා, යාපනේ අඹ ව්‍යංජනයයි, කලවම් මැල්ලුමයි, හේන් වට්ටක්කා ව්‍යංජනයයි, පරිප්පුයි.. පොටෝ එක ගත්තට පස්සේ බැදපු මිරිස් කරලකුයි, පපඩමකුයි හම්බුනා. 😁
විලව්චිය හරියේ පාර අයිනේ තිබ්බ ලෑලි වලින් හදපු කඩේක අත්තම්මා කෙනෙක් අතින් හදපු කෑම වේලක්. පලු ගහක් යට තිබුන ලී බංකුව උඩ වාඩි වෙලා කාපු කෑම එකේ, ඒ රස තාම මතකයි. 😋❤
- The.Roamer_

13/05/2021

🇱🇰 "ඇල්ල ලඟ වලව්ව" ටෙලි නාට්‍යට දර්ශනතල සැපයූ - හුළුගඟ ඇල්ල | HULUGANGA FALLS.▪️
••••••••••••••••••••••••••••••••
👉 නකල්ස් රක්ෂිතය නැත්නම් දුම්බර කඳු පන්තිය ආශ්‍රත වනපෙත පරිසර සෞන්දර්ය‍ රස විඳීමට රුචියක් දක්වන සැමට කදිම තෝතැන්නකි. කඳුකර වනාන්තර වල පහස විඳිමින් කඳු තරණය සේම දිය ඇලි ගණනාවකගේ සුන්දරත්වය අත්විඳීමට ද මෙහි සංචාරය කරන්නෙකුට අවස්ථාව උදා වේ.

හුළුගඟ ඇල්ල යනු නකල්ස් සීමාවේ හුළුගඟ නගරයේ පිහිටා ඇති මනස්කාන්ත දිය ඇල්ලකි. මහනුවරින් පන්විලට පැමිණ හුළුගඟ හංදිය වෙත ලඟාවීම, මෙම දිය ඇල්ල නැරඹීමට ප්‍රවේශ වීමට ඇති පහසුම මාර්ගයයි. මුලු නගරයටම දිය බිඳු විහිදමින් නගර මධ්‍යයේ කඩා හැලෙන මෙම දිය දහරාව නැරඹීම සඳහා දිය ඇල්ල පාමුලට පැමිණීමට පඩිපෙල් සකස් කර ඇති අතර ඒවා නඩත්තුව සඳහා නරඹන්නෙකුට පුංචි මුදලකට ටිකට් පතක් මිලදී ගැනීමට සිදුවේ.

අසූව දශකයේ ප්‍රචලිත ටෙලි නාට්‍යක් වූ අචාර්‍ය ධර්මසේන පතිරාජයන්ගේ විශිෂ්ට නිර්මාණයක් වන "කන්ද උඩ වලව්ව" ටෙලි නාට්‍යයේ ප්‍රධාන රූගත කිරීම් පසුතල ලෙස මෙහි ඇති සුන්දරත්වය හා පිහිටීම නිසා මෙම දිය ඇල්ල අවට පරිසරය භාවිතා කළ බවද සඳහන් වේ.

උසින් මීටර 65 කට ආසන්න වන මෙම දිය ඇල්ල ලංකාවේ පිහිටි උසින් වැඩිම දිය ඇලි පිලිවලින් 28 වන ස්ථානයේ රැඳී සිටියි. ලංකාවේ පිහිටි බහුතරයක් සුන්දර දිය ඇලි නැරඹීමට තරමක් දුර පාගමනින් යා යුතු නිසා ඒවායේ සුන්දරත්වය බහුතරයක් මග හැර ගත්තද, හුළුගඟ ඇල්ල මාර්ගය අසබඩ පිහිටා ඇති නිසා ඕනෑම අයෙකුට නැරඹීමේ හැකියාවද පවතී. එසේම පොලිතින් ඇතුලු කැලි කසල වලින් තොරව මෙම දිය ඇල්ලේ සුන්දරත්වය විඳීම අප සැමගේ වගකීම බවද මතක් කළ යුතුය.▪️

- The.Roamer_

❎ [ සංචාරක අත්දැකීම් හා ඡායාරූප යෝදා, සකස් කරන ලද ලිපියක් වන හෙයින්, අවසරයකින් තොරව ලිපිය හා ඡායාරූප උපුටා ගැනීම තහනම් ] ❎

👉 Huluganga Falls is a waterfall located at Huluganga Town, about 30 kilometers away from Kandy Town in on the way of Bambarella, in Kandy District in Sri Lanka. Hulu River is originating from the Knuckles Mountain Range. Huluganga Falls is about 75 meters in height. The cascading water sprinkles the villages of Elliyadda and Aratthana, before flowing to the Victoria Reservoir.▪️
•••••••••••••••••••••••••••••

The Roamer