27/04/2024
🆁🅸🆅🅴🆁🆂🆃🅾🅽
රිවර්ස්ටන් යනු මාතලේ දිස්ත්‍රික්කයට අයත් සුන්දර ප්‍රදේශයකි. එය බොහෝ කඳු නගින්නන්ගේ සහ සංචාරකයින්ගේ ප්‍රියතම ගමනාන්ත වලින් එකකි. එසේම එය ලෝක උරුමයක් ලෙසින් හඳුන්වන නකල්ස් කඳුවැටියේ කොටසකි. රිවර්ස්ටන් මාතලේ දිස්ත්‍රික්කය සහ මහනුවර දිස්ත්‍රික්කය අතර පිහිටා ඇත. මෙම ප්‍රදේශයේ කාලගුණය සුලු වෙලාවක් තුළ වෙනස් වන නිසා අපුර්ව සුන්දරත්වයක් පරිසරයට එකතු කරයි. ප්‍රදේශ වැසියන් පවසන්නේ සෑම විනාඩි පහකට වරක් කාලගුණය වෙනස් වන බවයි. කඳු මුදුන් වලාකුළු රේඛාවට වඩා ඉහළින් පිහිටයි.උද්‍ෙයාගිමත් සංචාරකයින්ගේ අවධානය කිසි විටෙකත් ආකර්ෂණය කර ගැනීමට අසමත් නොවන මෙම ප්‍රදේශය දැනට මිනිස් වාසය අඩු ,අපිරිසිදු නොවු කොටසක් ලෙස හැදින්විය හැකිය. සන්සුන් පරිසරය, සීතල සුළඟ, නැවුම් වාතය, හරිත හා මීදුම සමඟ එය ස්වර්ගයේ කොටසක් ලෙස කෙනෙකුට විස්තර කළ හැකිය. එමනිසා, මෙය දේශීය හා විදේශිය සංචාරකයින් යන දෙඅංශයෙන්ම ආකර්ෂණය දිනාගත් ස්ථානයකි.
ඔබ රිවර්ස්ටන් නැරඹීමට යාමට අදහස් කරන්නේ නම්, රිවර්ස්ටන් අවට ඇති පිටවල පතන, කුඩා ලොකාන්තය සහ බඹරකිරි ඇල්ල,සේර ඇල්ල වැනි දිය ඇලි සහ තවත් ස්ථාන බැලීමට අමතක නොකරන්න.
කිලෝමීටර් 12ක් එපිටින් ඇති සේර ඇල්ල ඔබ මඟ හැර නොයා යුතු තවත් ස්ථානයක් වන්නේ ගුහාවක සිට ජලය වැටෙන අයුරු දැකගත හැකි අපූරු අත්දැකීමක් වන බැවිනි.උස මි 15 ක් පමණ වේ.බට දඬු කන්දෙන් ඇරඹී පුවක්පිටිය ඔය සුන්දර සේර ඇල්ල නිර්මාණය කරමින් තෙල්ගමු ඔයට එකතු වි මොරගහකන්ද ජලාශය පෝෂණය කරයි.
තෙල්ගමු ඔයත් ප්‍රධාන පාර ආසන්නයේන් ගලා බසින මනස්කාන්ත ගංගාවකි . නොමිලේ ස්වභාවික මත්ස්‍යය ප්‍රතිකාර සහිත ආරක්ෂිත නාන ප්‍රදේශ කිහිපයක් ඇති නිසා මෙය ප්‍රසිද්ධය. රිවර්ස්ටන් වන සංරක්ෂණ ප්‍රදේශයක පිහිටා ඇති බැවින් මෙම ඇළ දොළවල මසුන් ඇල්ලීම අතිශයින්ම තහනම්ය.
වැද්දා පැණි ඇල්ල ද ඉතා චාමත්කාර දිය ඇල්ලකි. නමුත් විටක චණ්ඩ දිය ඇල්ලකි
වැසි දිනවල දිය නෑම ඉතාම අනතුරු සහගතය. ක්‍ෂණික ජල ගැලීම් ඇතිවිය හැක.
(දැනට වර්ථා වී ඇති මරණ සංඛ්‍යාව 30කි)
තෙල්ගමුව පාලම අසළ- 22 යි.
වැද්දා පැණි ඇල්ල පාලම අසළ - 08 යි.
බඹරකිරි ඇල්ලද සුන්දර වුවද ගැඹුරු ස්ථාන සහිත ඇල්ලකි. එහිද විශාල මරණ සංඛ්‍යාවක් සිදු වී ඇත.(දැනට වර්ථා වී ඇති මරණ සංඛ්‍යාව 40කි)
ඔබත් ආරක්ෂා වී පරිසරයත් ආරක්ෂා කරමින් සුන්දරත්වය විදින්න
වල්පොලමුල්ලද රිවර්ස්ටන් ආසන්නයේ පිහිටා ඇති ලස්සන ගම්මානයකි. ශ්‍රී ලංකාවේ කුඩාම ගම්මාන ලැයිස්තුවේ පළමු ඇති ගම්මානයකි. සමහර දත්ත ආරංචි මාර්ග වලට අනුව, වල්පෙලාමුල්ල මේ වන විට ශ්‍රී ලංකාවේ කුඩාම අතහැර දමා ඇති ගම්මානය මෙන්ම ආසියාවේ ද කුඩාම අතහැර දැමූ ගම්මානය බව පවසයි. මාතලේ රිවර්ස්ටන් යන බොහෝ සංචාරකයින් මාතලේ රිවර්ස්ටන් සහ ඒ අවට ඇවිද ගියත්, මෙම ගම බොහෝ අයට මග හැරී ඇති ස්ථානයකි. එය පිහිටා ඇත්තේ දුම්බර මිටියාවතේ නකල්ස් රක්ෂිතයේ ය.
මාර්ගය: මාතලේ සිට රත්තොට පාරේ ගොස් රිවර්ස්ටන් සහ පිටවලපතන පසු කර ඇටන්වල සුන්දර ගම්මානයට ළඟා වීය හැක. මෙම ගම්මානය හරහා ඉතා දුෂ්කර කැලෑ මාර්ගයකින් ගමන් කිරීමෙන් වල්පොල්මුල්ලට ළඟා විය හැකිය.
මෙම ගමට ප්‍රවාහන පහසුකම් අමාරු ව්‍්‍ම, වල් අලි ,වන ජීවීන්ගෙන් වන ගැටලු හේතුවෙන් මෙහි වෙසෙන සීමිත පවුල් සංඛ්‍යාවද මේ වන විට ගම හැර ගොස් ඇත. ගම පාලූ වීම නිසා වසර ගණනාවක් තිස්සේ වගා නොකරන ලද ඉඩම් හා නිවසක් සහ තවත් නටබුන් කිහිපයක් ඉතිරිව තිබේ.
අපූරු දුම්බර මිටියාවතට මුහුණලා නකල්ස් රක්ෂිත නිම්නයේ පිහිටා ඇති මෙම ගම්මානයේ සුන්දර දසුනක් බොහෝමයක් ඇත.
සමහර මුලාශ්‍ර වලට අනුව වල්පොල්මුල්ල ශ්‍රී ලංකාවේ පමණක් නොව ආසියාවේ කුඩාම ගම්මානය ලේසද හැදින්වේ.
මෙම ප්‍රධාන ස්ථාන හැරුණු විට තවත් ස්ථාන බොහෝමයක් රිවර්ස්ටන් අවට සැගව පවතී.එම ස්ථාන ගැනද ඉදිරියේදී අපගේ facebook පිටුවෙන් තොරතුරු ගෙන එමට බලාපොරොත්තු වෙමු.
ප්‍රවාහන මුලාශ්‍ර - මාතලේ සිට බස් රථයක් දෙවරක් ගමන් කරයි.
රිවර්ස්ටන් සහ ඒ අවට ඇති ස්ථාන නැරැඹීමට පුද්ගලික ප්‍රවාහන මාධ්‍යක් භාවිතා කල හැකිනම් ඔබේ කාලයෙන් උපරිම ප්‍රයෝජනයක් ගත හැකි අතර සියලුම ස්ථාන වලට පහසුවෙන් ගමන් කලහැකි.
නවාතැන් පසුකම්- නවාතැන් පසුකම් හොටෙල් කිහිපයක් ඇත. ඔබ මෙහි යන්නේ දීර්ඝ සති අන්ත වලනම් වෙලාස්න නවාතැන් වෙන්කරවාගන්න. විදුලි බලය නොමැති හොටෙල් කිහිපයක් මේ ප්‍රදේශයේ ඇති බැවින් සියලු විස්තර සොයා බලා වෙන්කරවා ගැනිම් කරන්න.
කැම්පින් කිරිමට කැම්පින් පසුකම් සලසන ස්ථාන කිහිපයක් ඇත.වන සතුන් බහුල බැවින් නොදන්නා ස්ථාන වල කැම්පින් කිරිමෙන් වලකින්න.
