25/06/2024
ගණන් බැරි වුණ හින්දයි
දීප්ත
ඕලෙවල් ෆේල් වෙලා,
ඉස්කෝලෙන් එළියට විසි වුණේ.
මිනිහා චිත්‍රකාරයා වුණත්
වැඩක් වුණේ නැහැ ඉස්කෝලෙට.
“කලාව කන්න ද?”
අහපු රටක් මේක.
යශෝධරා නො හිටින්න,
දීප්තත්
ගමට ම කොටු වෙනවා.
කැලුම්සිරිගේ අම්මා මැරුණේ
ජීවත් වෙන්න ක්‍රමයක් හොයන්න ගිහින්
පිටරට.
මිනියවත් ගේන්න බැරි වුණා
ගෙදරට.
කිතුලගේ තාත්තා මළේ
අලියා ගහලා
පව්!
“දොට්ට පිලට වත් යන්න බැරිව හිටි මනුස්සයා”
කැලුම්සිරිගෙ මස්සිනා,
ඊළඟට කිතුලා,
තව ගොඩක් කොල්ලෝ
ආමි එකට ගියේ
රට රකින්න විතරක් නෙවෙයි,
පවුල රකින්න විදියක් හොයා ගන්න.
ජීවිතේ පටන් ගන්නත් කලින්
උනුත් මැරුණා.
කැලුම්සිරි මහණ වුණේ,
සසර කෙටි කර ගන්න ම නෙවෙයි
ජීවත් වෙන්න ක්‍රමයක් නැති නිසා.
කැලුම්සිරි සිරිරතන හාමුදුරුවෝ වෙලා
කවිබණ කිව්වා.
පන්සල හැදුවා.
අවසානෙට,
පන්සලෙන් යන්න වුණා.
අහිංසක ජගා
අකාලයේ මැරුණා.
බලවතුන්ගේ පිහි පාරෙන්.
නඩුවත් පරාදයි,
දුන්න සාක්කි පිළිගත්තෙ නැති නිසා.
සුලෝ ගමෙන් ගියා
ජගා මැරුණා ම.
ඇයි?
ආදරේ නැති වුණ නිසා,
ජීවත් වෙන්න හරි පාරක් හොයාගන්න.
දම්මිත් ගමෙන් ගියා
කිසි දෙයක් හරි නො ගිය නිසා.
දම්මිගේ ආදරේ දීප්තට තේරුණේ නැද්ද?
නො කියා පෙන්නුවා ඈ සෑහෙන කල්
අවසානෙට වෙන කෙනෙක් බැන්දා.
හීන් අයියත් මළා
වකුගඩු අමාරුවෙන්.
මැරුණමයි දන්නෙ
එහෙම ලෙඩක් තිබුණා කියලා.
දීප්ත ඔලුව උස්සන කොට
යශෝධරා නෑ.
ජීවිතේ කියා දීලා
එයා යන්න ගියා.
දිනනකම් නො ඉඳ ම.
“මට අක්කගෙන් ප්‍රශ්නයක් අහන්න තියෙනවා”
“අහන්න”
“උගත් අය ජීවිතේ හුදෙකලා වෙනව ද?”
ජීවිතේ පාර කියා දෙන්න
හැමෝටම කොහෙන් ද,
යශෝධරාලා?
පතෝලයා හිත හොඳ එකා.
“ඕන යටිබඩක්” කියලා,
ජීවත් වෙන්න
නො කරපු දෙයක් නෑ.
අවසානෙට,
කූරා එක්ක කොහොම හරි
පටන් ගත්තා
මිනී කපන්න.
අවසානෙට,
ගමේ පරණ යාළුවො ටික
ඔක්කොම එකතු වුණේ
කනත්තේ දී.
තණමල්විල විතරක් නෙවෙයි.
හැම ගමක ම
ජීවිත මේ වගේ ම යි.
ගමේ ගොඩක් උන් මැරුණේ
ජීවිත් වෙන්න ගිහින් ම තමයි.
සේකර,
ඇත්තට ම මාත් ඔයාගෙන් අහන්නෙ
“ජීවත් වෙන්න අපට නැද්ද අයිතියක්?”
යාළු,
අපිත් කවදාක හරි එකට එකතු වෙමු.
කනත්තෙදි හරි!
එදාට කතා වෙමු අපි
අපේ කතාවත්.
✍️ ඉත්තකන්දේ චන්දානන්ද
චරිත හා සිදුවීම් 'තණමල්විල කොල්ලෙක්' ටෙලිසිත්තමෙන්.
