03/07/2024
عايز تدور على شغل في ماليزيا يبقى ركز معايا في الكام نقطة دول
👈 ماليزيا فيها تنافسية عالية ... والمجالات اللي مطلوبة فيها مش كبيرة قوي زي الخليج
✋ لكن في شوية معلومات هتساعدك تفهم طبيعة التنافسية دي وايه المتاح ليك أو لغيرك ... ولا تنسى اني هنا هتكلم عن المجالات اللي أنا بعرفها وبالتالي ممكن يكون في مجالات تانية فيها فرص لكن أنا معرفهاش
🤌 معنى كلمة فرصة عمل يعني " إقامة عمل قانونية - مرتب واضح ومتفق عليه - حقوق بسيطة وتتضمن التأمين الطبي ومدة العقد
أي حاجة هتيجي غير كده غالبا هيكون فيها لعب وخصوصا لو كان الكلام على عدم وجود إقامة
📍 أولا هبدأ بالمجالات اللي مفيش فيها فرص
وهي مجالات زي بائع في السوبر ماركت سواق أوبر "وفي ماليزيا اسمه جراب" نقاش سباك كهربائي عامل مسلح عامل في مباني وكافة الأعمال اللي من النوع ده واللي بيقوم بيها أهل البلد ولا تحتاج لخبرة خاصة
هتقولي أنا أعرف ناس شغالة في المعمار وراحت ... هقولك أنا بكلمك عن وضع قانوني تضمن فيه مستحقاتك ويطلع لك إقامة ... وكل ما سبق ذكره في هذا المنشور مفيش فيه إقامة ولا وجودك هيكون قانوني ... والقصص لكاسرى الإقامة محزنة في ماليزيا
👂أضف لده انك بتنافس عمال من دول حالهم زيك لكنها أقرب للثقافة الآسيوية ووجودهم مقنن بواسطة شركات عمالة زي بنجلاديش والنيبال وسيرلانكا والهند وباكستان وأندونيسيا وكمبوديا وغيره
مرتبات أقل قدرة أكبر على التكيف مع وضع البلد بالإضافة ان وجودهم غالبا بيكون بشكل قانوني في أعمالهم .. ففرصة ان حد يجيبك يشغلك في ظل توافر الميزات دي عند غيرك هي أقل بكتير
📍 نيجي بقى للمجالات المطلوبة واللي فيها فرص ... زي
💁المصممين والمبرمجين للتطبيقات والويب والأنيميتور والجيم ديزاينرز والمستشاريين في مجالات الآي تي ومديري المشاريع
💁 العاملين في مجال تنقيح المحتوى لحساب شركات وسيطة مع جوجل وفيس بوك وتيك توك وغيره واللي بيطلبوا ناس باللغة العربية والإنجليزية وممكن الإيطالية والفرنسية والأسبانية
💁 شركات خدمات الإستشارة الهاتفية واللي بتطلب تعيين موظفين ناطقين بالعربية والإنجليزية للتواصل مع العملاء
🫂 طيب ايه المستوى المطلوب؟
الحقيقة لازم تعرف ان منافسيك في هذه الوظائف بيكونوا من أوروبا الشرقية وأوروبا الغربية والصين والهند وباكستان ... وبالتالي محتاج يكون مستواك كويس ... ممكن تلاقي فرص كجينيور بس أنا بحس ان ده أكثر للخريجين اللي درسوا في ماليزيا ولكن لو انت في بلدك وعايز تيجي أعتقد مستوى سينيور مع مهارات كويسة في التواصل هتخلي فرصتك أكبر
✨طيب إزاي تدور على الوظيفة؟
عندك أول حاجة وهو الموقع الأشهر في ماليزيا وهو موقع
https://www.jobstreet.com.my/
تسجل فيه وتبحث عن الفرصة المتاحة ليك ... والتقديم بيكون مباشرة على الوظيفة المتاحة
وممكن برضه تبحث في اللينكد إن
https://linkedin.com/
وطريقة البحث فيه مختلفة لأنك بتحاول توصل لل Talent Recruiters
وتبعت لهم لو عندهم وظائف متاحة وبرضه بتشوف الشركات في ماليزيا اللي فاتحة وظائف وتبعت لها
لو ربنا ييسر لك الحال ووصلت لفرصة كويسة ... ساعتها ممكن تبص على القناة عندي عشان تعرف تفاصيل المعيشة والإقامة والمدارس والحياة عموما وهتلاقي إجابات على أغلب الأسئلة اللي في بالك في الفيديوهات بأمر الله " رابط القناة في أول تعليق"
وان شاء الله تستفيد وبالشير تفيد غيرك ... فالدال على الخير كفاعله
