ပြည်တွင်း ပြည်ပ လေယဉ်လက်မှတ်များ ရေ?
14/10/2024
ကိုယ့်ကလေး အနိုင်ကျင့် မခံရအောင် အိမ်မှာ ဘယ်လို ပြောပြ သင်ကြားပေးမလဲ။ ( စာရှည်ပါတယ်)
(၁) ကလေးကို "NO " ပြောခွင့် ပေးထားပါ။ ( ကလေးကို ငြင်းပယ်ခွင့် ပေးပါ)
အိမ်မှာ လူကြီးတွေကို ကြောက်ပြီး ကိစ္စတော်တော်များများမှာလည်း လူကြီးတွေရဲ့ ဆုံးဖြတ်ချက်အတိုင်း လိုက်နာရတဲ့ ကလေးတွေက ပြင်ပ ပတ်ဝန်းကျင်မှာလည်း မကြိုက်တာကို မကြိုက်ကြောင်း ပြောဖို့ ဝန်လေးကြ၊ ကြောက်တတ်ကြပါတယ်။ ဒီလို ပြောရဲ ဆိုရဲဖို့ဆိုရင် အိမ်မှာကတည်းက လေ့ကျင့်ပေးရပါတယ်။
ဥပမာ - အိမ်လာတဲ့ ကလေးက ကိုယ့်ကလေးရဲ့ အကြိုက်ဆုံး အရုပ်လေးကို ကစားဖို့တောင်းတဲ့အခါ မိဘက အားနာပြီး ပေးလိုက်တာထက် ကိုယ့်ကလေးရဲ့ ဆန္ဒကို အရင်မေးသင့်ပါတယ်။ ကလေးက မပေးချင်ရင် အတင်းပေးတာမျိုး မလုပ်ဘဲ ဧည့်သည်ကလေးကို တခြားအရုပ်လေးနဲ့ အစားထိုးတာပေးတာမျိုး၊ အာရုံလွှဲပေးတာမျိုး လုပ်ပေးသင့်ပါတယ်၊။
💛ဒါက ကိုယ့်ကလေးရဲ့ ဆန္ဒကို အလေးထားပေးရာ ရောက်သလို ကိုယ်မလုပ်ချင်တာကို လိုက်လျောစရာမလိုကြောင်း လေ့ကျင့်ပေးရာလည်း ရောက်ပါတယ်။ 💛
(၂) ကလေးရဲ့ ကိုယ်ပိုင်ပစ္စည်းတွေကို ခွင့်တောင်းပြီးမှ ကိုင်ပါ။
"ငါ့ ကလေး ပစ္စည်းက ငါ့ပစ္စည်းပဲ " ဆိုတဲ့ အတွေးမျိုး မတွေးဘဲ ကလေးဟာလည်း လူသားတစ်ယောက်ပဲမို့ သူ့ရဲ့ ပစ္စည်းတွေ ယူကိုင်တဲ့အခါ ခွင့်တောင်းပါ။ " သားရေ ...ကွန်ပါဘူးဘေးက ပလတ်စတစ်တွေ မေမေ ခွာလို့ရလား။ သား မကြိုက်ရင် မခွာတော့ဘူးနော် " စသဖြင့်၊ " သမီးရဲ့ စာအုပ်ထဲမှာ မေမေ လျှောက်ခြစ်လို့ ရလား" စသဖြင့် မေးပါ။ ကလေးက " နိုး" လို့ ပြောတဲ့အခါ ဇွတ်အတင်း မလုပ်ပါနဲ့။
🔺တချိန်တည်းမှာပဲ " သမီး စာအုပ်ကို သူငယ်ချင်းက ခြစ်တာ မကြိုက်ရင်လည်း မကြိုက်ကြောင်း ပြောရမယ်" လို့ ရှင်းပြပေးပါ။ အိမ်မှာတောင် မပြောရဲတဲ့ ကလေးက အပြင်မှာရော " NO " ပြောရဲပါ့မလားဆိုတာ မိဘတွေ သတိပြုသင့်ပါတယ်။ 🔺
(၃) အစွဲအလမ်း ကြီးတတ်တဲ့ စိတ်ကို လျှော့အောင် လေ့ကျင့်ပေးပါ။ ( ဘယ်လို ကျင့်ပေးရမလဲဆိုတဲ့ နည်းလမ်းတွေကို နောက်တစ်ပိုစ့်မှာ မျှဝေပေးပါမယ်၊)
" ထမင်းဆို မေမေ ကျွေးမှပဲ စားမယ်။ " " ဖေဖေ ချော့မသိပ်ရင် မအိပ်ဘူး" ....တချို့ကလေးတွေက စိတ်အစွဲကြီးတတ်ကြပါတယ်။ ကျောင်းရောက်တော့လည်း သူငယ်ချင်းတစ်ယောက်ဆိုရင် တစ်ယောက်ကိုပဲ အစွဲအလမ်းကြီးတဲ့အခါ အနိုင်ကျင့်ခံရတာမျိုး ဖြစ်လာပါတယ်။
ဥပမာ - " သူချစ်တဲ့ သူငယ်ချင်း ခိုင်းတာ အကုန်လုပ်ပေးတာမျိုး၊ သူငယ်ချင်းက မခေါ်မှာ ကြောက်လို့ အမြဲ အလျှော့ပေးတာမျိုး။
➡️ဘဝမှာ ဘယ်သူငယ်ချင်း ရှိမှ၊ ဘယ်ဝါရှိမှဆိုတာ အရေးမကြီးဘူး။ ဒီသူငယ်ချင်းက သမီးကို မခေါ်ချင်ရင်လည်း တခြား သူငယ်ချင်းတွေ ရှိတယ်...စသဖြင့် ကလေးနားလည်အောင် ပြောပြပေးပါ။ ⬅️
(၄) စိတ်ဓာတ်ကြံ့ခိုင်အောင် သင်ပေးပါ။
ငယ်သေးတဲ့ ကလေးတွေကို ကြောက်စရာကောင်းတဲ့ ပုံပြင်တွေ၊ သရဲအကြောင်းတွေ မပြောပြဘဲ ကလေးရဲ့ စိတ်ဓာတ်ခွန်အားကို မြှင့်တင်ပေးမယ့် ပုံပြင်မျိုးပြောပေးပါ။
သတ္တိရှိတဲ့ ကလေးလေးတွေက ဘယ်လို ပြုမူတဲ့ အကြောင်း၊ " မေမေ့ သားက သတ္တိရှိတဲ့ ကလေးလေးဆိုတော့ သူများကို အနိုင်မကျင့်ဘူးနော်။ သူများ အနိုင်ကျင့်တာလည်း မခံဘူး..."၊ " သမီးက သတ္တိရှိတော့ အနိုင်ကျင့်တတ်တဲ့ ကလေးရဲ့ မျက်လုံးကို သေချာကြည့်ပြီး သမီး မကြိုက်တာကို မကြိုက်ကြောင်း သေချာပြောနော်.." စသဖြင့် ကလေးကို ယုံကြည်ကြောင်း သူ့အတွက် စိတ်ဓာတ်ခွန်အားဖြစ်စေမယ့် စကားမျိုး ပြောပေးပါ။
❌ အိမ်မှာပဲ ကျယ်တဲ့ အိမ်ကျယ် ၊ အပြင်ရောက်ရင် အာပလာ၊ အသုံးမကျဘူး.... ဆိုတဲ့ စကားတွေတော့ မပြောပါနဲ့။ကလေးကို စိတ်အားငယ်စေပြီး ပိုကြောက်တတ်စေလို့ပါ။ ❌
(၅) အမြဲတမ်း သည်းခံဖို့ မသင်ပေးပါနဲ့။
အိမ်မှာ အငယ်လေး ရှိတဲ့ ကလေးတွေ (သို့) နေမကောင်းတဲ့ မွေးချင်းကို အမြဲသည်းခံရတဲ့ ကလေးတွေက တစ်ခုခုဆို ကိုယ်ပဲ သည်းခံရမယ် ဆိုတဲ့ စိတ် စွဲသွားပါတယ်။ ဒီတော့ အပြင် ပတ်ဝန်းကျင်မှာလည်း တစ်ယောက်ယောက်က ကိုယ့်ကို အနိုင်ကျင့်တဲ့အခါ အနိုင်ကျင့်လို့ ကျင့်မှန်း မသိ၊ ဒါက သူပဲ အလျှော့ပေး လိုက်လျောရမယ့် ကိစ္စလို ထင်မှတ်သွားကြပါတော့တယ်။
🔶ကလေးကို သဘောထားသေးသိမ်ဖို့ သင်ခိုင်းတာမျိုး မဟုတ်ဘဲ အမြဲတမ်းသည်းခံစရာ မလိုကြောင်းကိုတော့ ကလေးကို သိပါစေ။ Parenting က အစွန်းမရောက်ဘဲ တကယ်ကို အလယ်အလတ် လမ်းစဉ်နဲ့ သွားနိုင်မှ အဆင်ပြေတာပါ။ ကြိုးတန်းပေါ်မှာ လျှောက်နေသလိုမျိုး ဟန်ချက်ညီမှ ကလေးရော၊ မိဘပါ စိတ်ချမ်းသာရပါမယ်။ 🔶
🔷" မတော်တဆ ထိမိခိုက်မိတာမျိုးဆို သူငယ်ချင်းကို သည်းခံရမယ်။ ဒါပေမဲ့ ထပ်ခါထပ်ခါ တမင်လုပ်နေတာမျိုးဆို ဆရာမကို တိုင်ရမယ်။ ဆရာမကို တိုင်တာလည်း ဆက်လုပ်နေသေးရင်တော့ သားက ပြန်ရိုက်လို့ ရတယ်။ မေမေတို့က သားကို မဆူဘူးနော်။ ဒါက သားအပြစ်မဟုတ်ဘူးလေ..." ဆိုပြီး ကလေးကို နားလည်အောင် သေချာရှင်းပြပါ။ ကလေးတွေက ငယ်ပေမဲ့ နားလည်နိုင်စွမ်းမြင့်ကြလို့ သေချာရှင်းပြထားရင် သူတို့ စိတ်ထဲမှာ စွဲသွားပြီး လက်ခံပါတယ်။ 🔷
🔴 တစ်ချိန်တည်းမှာပဲ " သားကလည်း သူငယ်ချင်းကို အရင် သွားမရိုက်ရဘူး။ သူငယ်ချင်း မကြိုက်တာကို မစရဘူးနော်။ သားက အရင် သွားစလို့ ပြဿနာဖြစ်ရင်တော့ သားမှာ အပြစ်ရှိတယ်" ဆိုတာလည်း ရှင်းပြထားဖို့ လိုပါတယ်။ မဟုတ်ရင် ကိုယ့်ကလေးကလည်း တစ်ခါတလေ အနိုင်ကျင့်တတ်တဲ့ ကလေးမျိုး ဖြစ်သွားတတ်ပါတယ်။
(၆) မျက်လုံးချင်းဆုံပြီး စကားပြောတတ်ပါစေ။
အနိုင်ကျင့်တဲ့ ကလေးတွေက တစ်ခုခုဆို ရှက်သလိုလို၊ ကြောက်သလိုလိုနဲ့ မျက်လုံးချင်းဆုံပြီး စကားမပြောတတ်တဲ့ ကလေးတွေကို ပိုပြီး အနိုင်ကျင့်တတ်ပါတယ်။ "ဒီကလေးကို အနိုင်ကျင့်ရင်တော့ ပြန်မပြောရဲပါဘူး။ ပြန်မလုပ်ရဲပါဘူး"ဆိုတဲ့ အတွေးနဲ့ ရွေးပြီး အနိုင်ကျင့်တတ်ကြပါတယ်။
ဒါကြောင့် ကိုယ့်ကလေးကို ရဲရဲဝင့်ဝင့် စကားပြောတတ်ဖို့၊ မျက်လုံးချင်းဆုံပြီး စကားပြောတတ်ဖို့လည်း လေ့ကျင့်ပေးထားပါ။ ကလေးကို ကိုယ်ခံပညာသင်ပေးထားရင်လည်း ကောင်းပါတယ်။ 🙌
(၇) ပြသနာ တစ်ခုခု ကြုံတဲ့အခါ ရင်ဖွင့်ရဲပါစေ။
မေမေ ဆူမှာ ကြောက်လို့၊ ဖေဖေ ရိုက်မှာ စိုးရိမ်လို့၊ မေမေတို့ စိတ်မကောင်းဖြစ်မှာစိုးလို့....စတဲ့ အကြောင်းပြချက်တွေနဲ့ ကလေးတွေက သူတို့ရဲ့ အဆင်မပြေမှုတချို့ကို မပြောပြဘဲ ကြိတ်ဖြေရှင်းတတ်ကြပါတယ်။ မိဘနဲ့ သားသမီးကြားမှာ ဒီလို ရှက်ကြောက်တာမျိုး မရှိဘဲ ရင်ဖွင့်ရဲဖို့လည်း အားပေးပါ။
🤗ကလေးပြောတာတွေကို အချိန်ပေးပြီး နားထောင်ပေးမယ်။ ကလေးကို ချစ်ခင်ယုံကြည်မှုတွေ ပြပေးမယ်ဆိုရင်တော့ ဒီလို ကိစ္စကို အလိုလို ဖြေရှင်းပြီးသား ဖြစ်သွားပါမယ်။🤗
ဒီလောက်ဆိုရင်တော့ ကိုယ့်ကလေးကို အနိုင်ကျင့်မခံရအောင် ပြောပြတဲ့အခါ အထောက်အကူဖြစ်မယ်လို့ မျှော်လင့်ပါတယ်။ မေမေတွေ ကျင့်သုံးနေတဲ့ နည်းလမ်းကောင်းလေးတွေရှိရင်လည်း တခြားမေမေတွေကို ဝေမျှပေးခဲ့ပါဦးနော်။ 🥳🥳
#အနိုင့်ကျင့်မခံရအောင်ဘယ်လိုပြောပြထားမလဲ။
.....~
