Maye Alinn

15/11/2019

အကောက်တောင်

ပဲခူးတိုင်း၊ ထုံးဘိုမြို့အလွန်၊ ဧရာဝတီတိုင်း၊ ကြံခင်းမြို့ တွင်ရှိသည်။ ထုံးဘိုမြစ်ဆိပ်ကနေ ဧရာဝတီမြစ်အတိုင်း လှေစီးပြီး လွန်ခဲ့သည့် နှစ်ပေါင်း ၂၀၀၀ကျော်လောက်က ရှေးဟောင်း ကျောက်တောင်ထွင်း ဗုဒ္ဓရုပ်ပွားတော်များကို လေ့လာနိုင်မည်။ ၂၅ယောက်ဆန့် စက်လှေစီးလုံးငှားမည်ဆိုလျှင် အသွား၊ အပြန် ၁၅,၀၀၀ ကျပ် ကျသင့်သည်။ ကျောက်တောင်ထွင်း ဆင်းတုတော်ပေါင်း ၃၇၀ ကျန်သေးသည်ဟု ဆိုထားပေမယ့် ကမ်းပါးပြိုကျရာကနေ ဆင်းတုတော်အချို့ မြစ်ထဲ ထပ်မံမျှောပါသွားသေးသည်။

အကောက်တောင်နဘေး၊ ဧရာဝတီမြစ်ရေပြင်ပေါ်ကနေ နေထွက်လာပုံ ရှုခင်းမှာ အကြည့်မလွှဲနိုင်လောက်အောင် လှပလွန်းအားကြီးသည်။ အကောက်တောင်၏ နေထွက်ချိန်ကို မြင်ဖူးပါမှ အကောက်တောင်ရောက်ဖူးသည်ဟု ဆိုနိုင်ပေမည်။

အကောက်တောင်ကို ရှေးတုန်းက ရတနာ၇ပါး စုဝေးရာတောင် ဖြစ်လို့ ရတနာပုဉ္စတောင်လို့ ခေါ်ကြတယ်။ တောင်ရဲ့ မနီးမဝေးမှာ သီရိဘင်္ဂလွန်ဆိုတဲ့ မြို့တစ်မြို့ရှိတယ်။ သီရိဘင်္ဂလွန်မြို့ကို အုပ်စိုးတဲ့မင်းကိုလည်း သီရိဘင်္ဂလွန်မင်းလို့ပဲ ခေါ်ကြပြန်တယ်။ မင်းကြီးမှာ မဟာပုဉ္စန၊ စူဠပုဉ္စန၊ သံပုဉ္စန ဆိုပြီး သားတော်သုံးပါးရှိပါတယ်။ တစ်နေ့မှာ မင်းကြီးက သူရရှိထားတဲ့ ဓာတ်တော်မွေတော်တွေကို သားသုံးယောက်ကို တစ်ဆူစီပေးပြီး စေတီပုထိုး တည်စေခဲ့တယ်။ အိမ်ရှေ့မင်းသားဖြစ်တဲ့ သားတော်အကြီး မဟာဉ္စနမင်းသားဟာ စေတီမှာ ဌာပနာမယ့် ရတနာတွေကို သိန္ဓဝအမည်ရမြင်းပေါ်တင်ပြီး ရတနာပုဉ္စတောင်ပေါ်ကို တက်လာခဲ့တယ်။ အိမ်ရှေ့မင်းသားဟာ တောင်စွန်းမှာ ကျောက်ဖျာလေးချပ်ကို အကာပြုပြီး ဌာပနာထည့်သွင်းစေတယ်။ ဌာပနာ အပေါ်ကနေ ကျောက်ဖျာတစ်ချပ်နဲ့ ပြန်ဖုံးအုပ်စေတယ်။ ပြီးမှ အပေါ်ကနေ ငုံပြီး စေတီတည်လိုက်တယ်။ စေတီဘွဲ့တော်ကိုလည်း ရတနာပုဉ္စစေတီလို့ ပေးစေတယ်။ ရွှေတွေကို မြင်းနဲ့သယ်ခဲ့လို့ ရွှေမြင်းတင်စေတီလို့လည်း လူသိများလာခဲ့တယ်။

ညီအလတ် စူဠပုဉ္စနမင်းသားက သူရရှိတဲ့ ဓာတ်တော်ကို ရတနာပုဉ္စတောင်ရဲ့ တောင်ဘက် တစ်ဖာလုံမှာလည်းကောင်း၊ ညီအငယ် သံပုဉ္စနမင်းသားက ရတနာပုဉ္စတောင်ရဲ့ မြောက်ဘက် တစ်ဖာလုံမှာလည်းကောင်း အသီးသီး စေတီတည်ကြတယ်။ စေတီဘွဲ့တွေကတော့ ရထာပုဉ္စစေတီနဲ့ သကဋာပုဉ္စစေတီ ပါတဲ့။ ညီအလတ်နဲ့ ညီအငယ် တည်ထားတဲ့ စေတီနှစ်ဆူကတော့ သိုက်တူးသမားတွေ ဌာပနာဖောက် ခိုးယူသွားလို့ ပျက်စီးပြိုကျသွားပါပြီ

15/11/2019

ရွှေမျက်မှန်ဘုရား

ရွှေတောင်မြို့တွင် တည်ရှိပြီး မြန်မာနိုင်ငံမှာ မျက်မှန်ပါသည့် တစ်ဆူတည်းသော ရုပ်ပွားတော်ဖြစ်သည်။ ဘုရားပွဲကို နှစ်စဉ် နတ်တော်လဆန်း ၈-ရက်နေ့မှ လပြည့်နေ့ထိ ကျင်းပတတ်သည်။

သရေခေတ္တရာဘုရင် ဒွတ္တပေါင်မင်းကြီးနှင့် မိဖုရားပန်ထွာတို့ဟာ ခြွေရံသင်းပင်းစုံစုံညီညီနဲ့ ရွှေနတ်တောင်စေတီကို ဘုရားဖူးခရီး ထွက်လာခဲ့ကြတယ်။ ရွှေနတ်တောင်စေတီ မရောက်မီ ရွှေတောင်မြို့၊ တည်ကုန်းအရပ်မှာ ခရီးတထောက် နားကြတယ်။ ထိုညမှာပဲ ပန်ထွာမိဖုရားဟာ စခန်းချတဲ့နေရာကနေ အရှေ့မြောက်အရပ်မှာ ရုပ်ပွားတော်တစ်ဆူ ဖူးတွေ့ရကြောင်း အိမ်မက် မြင်မက်တယ်။ မနက်မိုးလင်းတော့ အိမ်မက်အကြောင်း မင်းကြီးကို လျှောက်ထားတော့တယ်။ မင်းကြီးလည်း ပန်ထွာမိဖုရား အိမ်မက်ရတယ်ဆိုတဲ့ နေရာကို လိုက်လံရှာဖွေရာ ယခုရွှေမျက်မှန်ရုပ်ပွားတော်ရှိတဲ့ နေရာနားလောက်မှာ ရောင်ခြည်တော်တွေ မြူးနေတာကို တွေ့ကြရတယ်တဲ့။

မှူးမတ်တွေက ဘုရားတည်ဖို့ နိမိတ်ပြတာပေပဲဆိုပြီး မင်းကြီးကို လျှောက်တင်ကြလေသည်။ ရောင်ခြည်တော်ထွက်တဲ့ နေရာမှာပဲ ဗုဒ္ဓရုပ်ပွားတော်တစ်ဆူ တည်ထားခဲ့ပြီး သရေခေတ္တရာပြည်ကို ပြန်ကြွလာခဲ့ကြတယ်။ သိပ်မကြာခင်မှာပဲ ဒွတ္တပေါင်မင်းရဲ့ မျက်စိနှစ်လုံးကြားက တတိယမျက်လုံးဖြစ်တဲ့ နတ်မျက်စိ ကွယ်ပျောက်လေသည်။ ပရောဟိတ်တွေက ဗေဒင်ကိန်းခမ်း တွက်ချက်တဲ့အခါမှာ နောက်ဆုံးတည်ခဲ့တဲ့ ဆင်းတုတော်မှာ မျက်လုံးတော်ပုံသဏ္ဍာန် မှန်တစ်စုံ လှူဒါန်းရင် နတ်မျက်စိ အလင်းပြန်ရနိုင်ကြောင်း လျှောက်ကြတယ်။ ဒွတ္တပေါင်မင်းလည်း မျက်လုံးတော်သဏ္ဍာန် မှန်တစ်စုံ ကပ်လှူပြီးမှပဲ နတ်မျက်စိ အလင်းပြန်ရတော့တယ်တဲ့။ သည်လိုနဲ့ ရွှေမျက်မှန်ရုပ်ပွားတော် အဖြစ် လူသိများလာခဲ့သည်။

15/11/2019

ရွှေဘုံသာမုနိ

မုနိလေးဆူထဲက တစ်ဆူဖြစ်တဲ့ ရွှေဘုံသာမုနိရုပ်ပွားတော်သည် ပြည်မြို့၊ ပန်းတောင်းမြို့နယ်တွင်ရှိသည်။

ဘီစီ ၆ရာစုလောက်မှာ ဓညဝတီရခိုင်ပြည်ကို အုပ်ချုပ်မင်းလုပ်သူသည် စန္ဒသူရိယမင်းကြီးဖြစ်သည်။ မဇ္စျိမဒေသ (အိန္ဒိယပြည်) မှာ သဗ္ဗညုတမြတ်ဗုဒ္ဓ ပွင့်တော်မူကြောင်း သတင်းကြားသိရုံနဲ့ ဖူးမျှော်လိုတဲ့ ဆန္ဒပြင်းပြသည်။ စန္ဒသူရိယမင်းရဲ့ ညီမတော် ဥဒုမ္ဗရဒေဝီမင်းသမီးက မြတ်ဗုဒ္ဓကို ရည်မှန်းပြီး ခုနှစ်ရက်ပတ်လုံး ဆွမ်း၊ ပန်း၊ ဆီမီး၊ နံ့သာ၊ ပေါက်ပေါက် တို့ကို ကပ်လှူပူဇော်မှုပြုတယ်။

မဟာသက္ကရာဇ် ၁၂၃ခု ကဆုန်လမှာ မြတ်စွာဘုရားသည် ရဟန္တာငါးရာ ခြံရံပြီး ဓညဝတီရခိုင်ပြည်ကို ကြွချီလာခဲ့တယ်။ မင်းကြီးနဲ့တကွ တိုင်းသူပြည်သူတို့ သရဏဂုံတည်ပြီးနောက်မှာတော့ မြတ်စွာဘုရားသည် သာဝတ္ထိပြည်သို့ ပြန်ကြွရန် စီစဉ်သည်။ ထိုအခါ စန္ဒသူရိယမင်းကြီးက ကိုယ်စားကိုးကွယ်နိုင်ရန် ရုပ်ပွားတော် ထုလုပ်ခွင့် တောင်းခံလေသည်။ မြတ်ဗုဒ္ဓမှ ခွင့်ပြုသဖြင့် မင်းနှင့်တကွ ပြည်သူအပေါင်း ရွှေငွေရတနာတွေ စုဆောင်းကြရာ ၆၅တင်း ရရှိလေသည်။ မဟာမုနိရုပ်ပွားတော်ကို သွန်းလုပ်တဲ့အခါ မြတ်စွာဘုရားကိုယ်တိုင် ရုပ်ပွားတော်ကို ရင်ငွေ့တော် (ခုနှစ်လက်အုပ်) ခုနှစ်ကြိမ် ထည့်သွင်းပေးတယ်။ မဟာမုနိရုပ်ပွားတော် သွန်းလုပ်ပြီးနောက် ရွှေ၊ ငွေ၊ ကြေး၊ ရတနာတို့ ကျန်နေသေးသဖြင့် နောက်ထပ် ရုပ်ပွားတော် သုံးဆူ ထပ်မံသွန်းလုပ်လေသည်။ မုနိလေးဆူ၏ ဉာဏ်တော်မှာ အစဉ်လိုက် ကြီးရာမှာ ငယ်သွားဟန် ထုလုပ်ထားသည်။

ပထမ မဟာမုနိမှာ ကိုးပေလေးလက်မခွဲ၊ ဒုတိယ ရှင်ကျော်မုနိမှာ ခြောက်ပေရှစ်လက်မ၊ တတိယ ရွှေဘုံသာမုနိမှာ ငါးပေလေးလက်မ၊ စတုတ္ထ မာရ်အောင်မြင်မုနိမှာ သုံးပေကိုးလက်မ အသီးသီး ရှိကြသည်။

မုနိလေးဆူရဲ့ ထူးခြားချက်မှာ -

၁။ မြတ်စွာဘုရား ရှေ့တော်မှောက်မှာ သွန်းလုပ်ခြင်း။

၂။ အရွယ်အစား မှတပါး မျက်နှာပုံသဏ္ဍာန် တစ်ထပ်တည်း တူခြင်း။

၃။ မျက်နှာတော်အား သေချာအာရုံပြုပြီး ဖူးပါက ပြုံးသွားဟန် ပေါ်လွင်ခြင်း။ တို့ ဖြစ်ကြသည်။

ကုန်းဘောင်မင်းဆက် ၆ဆက်မြောက် ဗဒုံမင်းလက်ထက်မှာ မုနိလေးဆူသည် တစ်နေရာဆီ တကွဲတပြား ဖြစ်သွားခဲ့သည်။ မဟာမုနိရုပ်ရှင်တော်မှာ မန္တလေးမြို့တွင် လည်းကောင်း၊ ရှင်ကျော်မုနိမှာ ဓညဝတီရခိုင်တွင် လည်းကောင်း၊ ရွှေဘုံသာမုနိမှာ ပြည်မြို့တွင် လည်းကောင်း၊ မာရ်အောင်မြင်မုနိမှာ ဇလွန်မြို့တွင် လည်းကောင်း အသီးသီး သီတင်းသုံးလျှက် ရှိသည်ကို ဖူးမျှော်နိုင်သည်။

ရွှေဘုံသာမုနိစေတီရှိ မူလ ဌာပနာပိတ်ကျောက်ဖျာကြီး ၂ချပ်

ခြင်္သေ့ဦးခေါင်း

ရွှေဘုံသာမုနိစေတီ ဈေးရှိ သနပ်ခါးသည်

ရွှေဘုံသာမုနိစေတီ ဈေးတန်း

15/11/2019

ပြည်ရွှေဆံတော်ဘုရားသမိုင်း အကျဉ်း.............

မြန်မာနိုင်ငံတွင် "ရွှေဆံတော်" ဟု ဘွဲ့ချီလျက် ထင်ရှားသည့် ဘုရားစေတီသုံးဆူ ရှိပါသည်။ ပြည်မြို့တွင် တစ်ဆူ၊ တောင်ငူမြို့တွင် တစ်ဆူ၊ တွံတေးမြို့တွင် တစ်ဆူ ဖြစ်ပါသည်။ မြန်မာနိုင်ငံမြေလတ် ဒေသ ပဲခူးတိုင်း၊ ပြည်မြို့၏ အရှေ့ပိုင်း ဆင်စုရပ်မြောက်ဘက်၌ သုဒဿနမည်သော တောင်ကုန်းငယ်တွင် တည်ရှိသော ရွှေဆံတော်ဘုရားကို မြသိတင် (မြသီးတင်) ဘုရားဟုလည်း ရှေးကခေါ်တွင်ခဲ့သည်။
ပြည် ရွှေဆံတောင်ရှင်ဘုရားတွင် ကကုသန်ဘုရားရှင်၏ ဒုကုဋ်တော်၊ ကောဏဂုံဘုရားရှင်၏ အံသကိုဋ် သင်္ကန်းတော်၊ ကောဏဂုံဘုရားရှင်၏ ခါးပန်းတော်၊ ဂေါတမဘုရားရှင်၏ အံတော်လေးဆူနှင့် နီသီဒိုင်တို့ကို ဌာပနာထားသည်။
ဂေါတမဘုရားရှင်သည် ရှစ်ဝါမြောက်တွင် မြန်မာပြည်သို့ ဒေသစာရီကြွချီတော်မူရာ ဤအရပ်၌ ပုဂံပြည်ကြီးဖြစ်လတ္တံ့၊ ဤအရပ်၌ သရေခေတ္တရာ (ပျူ) မြို့ (ယခု သရေခေတ္တရာပြည်မြို့) ဖြစ်လတ္တံ့ စသည်ဖြင့် ဗျာဒိတ်ပေးခဲ့ပါသည်။ ယင်းသို့ ကြွချီတော်မူစဉ် ဧရာပထ နဂါးမင်းက လူအပေါင်းတို့ ကိုးကွယ်ရစိမ့်သောငှါ ဆံတော်ဓာတ်ကို ပေးသနားရန် လျှောက်ထားသည်။ ဘုရားရှင်သည် နဂါးမင်းအား မပေးဘဲ သုဝဏ္ဏဘုမ္မိအရပ်သို့ ကုန်သွယ်သွားနေသော အစ္စိက- ဖလ္လိက ကုန်သည် ညီနောင်တို့အား ပေးမည်ဟု မိန့်ကြားကာ လကျာ်လက်တော်ဖြင့် ဦးခေါင်းတော်ကို သုံးသပ်လေသော် ဆံတော်လေးဆူပါလာသည်။ ယင်းဆံတော်တို့ကို နဂါးမင်း ဆက်သည့် မြကြုတ်၌် ထည့်၍ "ကိုးကွယ်ထိုက်သူ ဖူးတွေ့ကာ သာသနာတည်မည့် အရပ်၌ စေတီတည်ထား ကိုးကွယ်စေသတည်း" ဟု မိန်တော်မူလျှင် မြကြုတ်သည် လက်ဝါးတော်မှ ပျံတက်၍ ထန်းခုနှစ်ဆင့်မြင့်သောအရပ်၌် ရောင်ခြည်တော်မြူးကာ ဝါးပဒေသာ၌ ရပ်နားလေသည်။
သုဝဏ္ဏဘုမ္မိမှ ပြန်လာသော အစ္စိက- ဖလ္လိက ညီနောင်လည်း ဧရာဝတီမြစ်ကြောင်းကို ဆန်တက်ကာ ဆံတော်ကြုတ်တည်ရာသို့ ရောက်လျှင် ရွှေရောင်တဝင်းဝင်းနှင့် တွေ့မြင်ရ၍ ကြည့်ကြသည်။ ရတနာမြကြုတ်နှင့်တကွ ဆံတော်လေးဆူကို ဖောင်ပေါ်သို့ ပင်ခဲ့ပြီးနောက် မြင့်မြတ်ရာ ကုန်းမြေကိုရှာသော် ယခုရွှေဆံတော်ဘုရားတည်ရာ သုဒဿနကုန်းကိုတွေ့သဖြင့် ရတနာမြေကြုတ်နှင့် ဆံတော်လေးဆူကို ရွှေအုပ်ခုနှစ်ချပ်ရံကာ ဌာပနာ၍ စေတီတည်သည်။
သာသနာနှစ်- ၁၀၁ ခုနှစ်တွင် ဒွတ္တပေါင်မင်းကြီး နန်းတက်သော် သုဒဿနကုန်း၌ ဘုရားရှင်၏ ဆံတော်လေးဆူ ဌပနာ၍ စေတီတည်ထားကြောင်း ကြားသိတော်မူ၍ သုဒဿနကုန်းကို ရှာဖွေစေသည်။ ချုံနွယ်ပိတ်ပေါင်းတို့ဖြင့် ဖုံးအုပ်နေသော စေတီတော်ကို ဖူးတွေ့ရသော် အတောင် ၈၀ ရှိသော ဓာတ်တော်တိုက် တံခါးနံရံကို ဖွင့်တော်မူ၍ ဆက်လက်တူးဖော်သော် ရှေးဘုရားသုံးဆူ၏ ပရိဘောဂထည့်ရာ ရွှေကျောင်းဆောင် သုံးခုနှင့် ဂေါတမဘုရား၏ ဆံတော်လေးဆူ ဖူးတွေ့ရပြီးနောက် စေတီကို ထပ်မံပြုပြင် တည်ထားသည်။
သက္ကရာဇာ် ၄၅၀ ပြည့်တွင် ပုဂံပြည် အလောင်းစည်သူမင်းသည် စေတီတော်ကို ထပ်မံပြုပြင် တည်ဆောက်တော်မူသည်။ ထို့နောက် "ပြည်မင်း မျက်နှာရှည်" လက်ထက် စေတီတော်ကို သံတောင် ၂၈ တောင်၊ နှစ်မိုက်အထိ ထပ်ပွားတည်ကာ ရွှေထီးကိုးဆင့် တည်ဆောက်တော်မူသည်။ ထို့နောက် "သားတော် မျက်နှာပု" မင်းလက် စေတီတော်၏ အနောက်မြောက်ထောင့်တွင် ချောက်ကြီးရှိသဖြင့် ကုန်းတော်ကို ချဲ့ထွင်ခဲ့ပါသည်။
စေတီတော်ကို အမြင့်သံတောင် ၅၈ တောင် စေတီရံသုံးဆင့်နှင့် စည်းခုံစေတီကြီးတည်တော်မူသည်။ ရွှေထီးကိုးဆင့် မြသီးရောင်ဆံတော်ဖူးတင်တော်မူ၍ "မြသီးတင်ဘုရား" ဟု သမုတ်တော်မူသည်။
ဤသို့အားဖြင့် ရွှေဆံတော်ဘုရားကို ဘုရင်အဆက်ဆက်နှင့် မြို့စားအဆက်ဆက် ပြုပြင်ထပ်ပွား တည်ထားခဲ့ရာ ယခုအခြေသို့ ဆိုက်ရောက်ခဲ့သည်။
ထို့ကြောင့် စာဆိုကျော် နဝဒေကြီးက "တောင်ထက် တောင်မြတ်၊ တောင်ကျော်ထွဋ်၌၊ လူနတ်များရှင်၊ မြသီးတင်နှင့်၊ ရှေ့ယွန်းနားဝယ်၊ တရားဘုန်းခေါင်၊ ဒွတ္တပေါင်ဟု၊ ပြည်ထောင်များရှင်၊ တည်ထားခဲ့ မှတ်သည်။ ရွှေထီးရွှေတိုင်၊ ရွှေစိုင်တခဲ၊ ရဲရဲထွန်းပြောင်၊ ကိုယ်တော်ရောင်ဖြင့်၊ ကျွန်းလုံးကျော်သည်၊ မည်တော်ဆုတောင်း ပြည့်တကား" ဟု စပ်ဆိုခဲ့ခြင်းဖြစ်သည်။
ပြည်ရွှေဆံတော်ဘုရားတွင် နှစ်စဉ် တန်ဆောင်မုန်းလဆန်း (၈) ရက်မှ တန်ဆောင်မုန်းလပြည့်နေ့အထိ ဘရားပွဲ ကျင်းပကြသည်။ မြန်မာပြည်မြေလတ်ဒေသ ဖြစ်သဖြင့် အထက်မြန်မာပြည် အောက်မြန်မာပြည် အနယ်နယ် အရပ်ရပ်မှ ဘုရားဖူးများနှင့် နေ့စဉ်စည်ကားသော တန်ခိုးကြီးဘုရားတစ်ဆူ ဖြစ်သည်။

15/11/2019

မြို့ရဲ့အရှေ့ဘက်(၅)မိုင်ခန့်အကွာမှာတည်ရှိပြီး ကျယ်ဝန်းတဲ့မြို့ဟောင်းရာတွေ၊ မြို့ဟောင်းထဲကျေးရွာတွေ၊ ဗိသုကာနဲ့အနုပညာလက်ရာတွေ၊ ပျူမြို့ပြပညာတွေကိုဖော်ပြနေတဲ့ မြို့ရိုး၊ကျုံး၊မြို့ဝင်ပေါက်တွေ၊ ပျူတို့ရဲ့ အဆင့်အတန်းမြင့်မားတဲ့ ယဉ်ကျေးမှုပြယုဂ်တွေနဲ့ စိတ်ဝင်စားဖွယ်လေ့လာလည်ပတ်စရာကောင်းလှပါတယယ်။

ပျူမြို့ဟောင်းတွေထဲမှာသရေခေတ္တရာအပြင် ဟန်လင်း၊ဗိသာနိုးပျူမြို့ဟောင်းတွေလည်းရှိပြီး မြန်မာ့သမိုင်းတွေ၊ကျောက်စာတွေ၊ ပါးစပ်ရာဇဝင်တွေနဲ့ ထင်ရှားအရေးပါလှပါတယ်။ ဟန်လင်းမှာ ခေတ်သစ်ရွှေဘိုမြို့ရဲ့အရှေ့တောင်ဘက် ၁၃ ကီလိုမီတာအကွာ မူးမြစ်ဝှမ်းအနီးမှာတည်ရှိပြီး ဗိဿနိုးမှာတောင်တွင်းကြီးမြို့အနောက်ဘက် ၁၈ ကီလိုမီတာအကွာမှာတည်ရှိနေတာဖြစ်ပါတယ်။ ဒီပျူမြို့ဟောင်းသုံးမြို့မှာ ထူးခြားပြီးတကမ္ဘာလုံးနဲ့သက်ဆိုင်တဲ့တန်ဖိုးတွေဖော်ဆောင်နေမှုကြောင့်ကမ္ဘာ့အမွေအနှစ်အဖြစ်သတ်မှတ်ခံထားရတဲ့သမိုင်းဝင်ရှေးဟောင်းနယ်မြေတွေဖြစ်ပါတယ်။

သရေခေတ္တရာပျူမြို့ဟောင်း မှာ ဒွတ္တပေါင်မင်းကြီးအုပ်စိုးခဲ့တဲ့ နယ်မြေဖြစ်သလို ဒွတ္တပေါင်မင်းကြီးနဲ့ဗိဿနိုးပန်ထွာဘုရင်မတို့ရဲ့သမိုင်းမှတ်တမ်းတွေကလည်း အခုထိရှိနေတဲ့အတွက်သရေခေတ္တရာမြို့ဟောင်းကိုလှည့်လည်ပြီးလေ့လာကြည့်ရှုရတာဟာအရမ်းစိတ်ဝင်စားဖို့ကောင်းပါတယ်။သရေခေတ္တရာပျူမြို့ဟောင်းမှာမြို့ဝင်ပေါက်(၉)ပေါက်နဲ့အတူဂူဘုရား(၅)ဆူ၊ စေတီ(၄)ဆူ၊ ကုန်း(၄)ကုန်း၊ ကျောက်ချပ်ရုံ(၂) ရုံ၊ ပျုတိုက်(၅)တိုက်၊ နန်းတော်ရာ၊ ပြတိုက်၊ ရဟန္တာကန်နဲ့ ဗိဿနိုးမိဖုရားသင်္ချိုင်းတို့ရှိပါတယ်။ တစ်နေကုန်အချိန်ပေးလည်ပတ်နိုင်ရင် ပျူမြို့ဟောင်းတစ်ခုလုံးအနှံ့ရောက်ရှိနိုင်ပါတယ်။ ကျွန်မတို့ကတော့ ရန်ကုန်-ပြည်ကိုနေ့ချင်းပြန်လာရောက်ခဲ့ကြတာဖြစ်တဲ့အတွက် နန်းတော်ရာဝင်ပေါက်၊ ဘဲဘဲဂူဘုရား၊လေးမျက်နှာဂူဘုရား၊ ဗိဿနိုးမိဖုရားသင်္ချိုင်း၊ ရဟန္တာတံခါးပေါက်၊ ရဟန္တာဂူ၊ ရဟန္တာကန်၊ ဘောဘောကြီးစေတီ၊လုလင်ကျော်တံခါးဝနဲ့ နဂါးတွန့်မြို့ဝင်ပေါက်တို့ကိုသာရောက်ခဲ့ပါတယ်။

နဂါးတွန့်မြို့ဝင်ပေါက်

နဂါးတွန့်မြို့ဝင်ပေါက်မှာ ပျူမြို့ဟောင်းအဖြစ်မှတ်ကျောက်စိုက်ထူထားတဲ့နေရာဖြစ်ပြီး သရေခေတ္တရာမြို့ဟောင်းရဲ့အနောက်မြောက်ဘက်ပိုင်းမှာတည်ရှိပါတယ်။ ၁၉၇၀-၁၉၇၁ခုနှစ် ဘဏ္ဍာရေးနှစ်မှာတူးဖော်ခဲ့တာဖြစ်ပြီး သူ့ရဲ့အရှေ့ဘက်ကပ်လျှက်မှာ အုတ်မြို့ရိုးရှိနေပါတယ်။ အုတ်မြို့ရိုးဟောင်းကို ဗြိတိသျှကိုလိုနီခေတ်တုန်းက ပြည်-ပေါက်ခေါင်းကားလမ်းအဖြစ်အသုံးပြုခဲ့ကြတာဟာ အခုထိဖြစ်ပါတယ်။ နဂါးတစ်ကောင်တွန့်လိမ်နေသလို ပုံစံရှိနေပြီး မြို့ရိုးရဲ့အဝင်လက်ဝဲဘက် အုတ်ရိုးလက်တံမှာတစ်ဆစ်ချိုးကွေ့ထားပါတယ်။ လက်ယာဘက်အုတ်ရိုးလက်တံမှာ ခပ်ပြေပြေကွေ့ထားပြီးမြို့ရိုးအတွင်းဘက်ကိုသွယ်တန်းနေပါတယ်။ မြို့ရိုးအတွင်းဘက်ကိုရောက်တဲ့အခါ လက်တံနှစ်ခုကိုယှဉ်လျှက်တွေ့ရပါတယ်။ နဂါးတွန့်မြို့ဝင်ပါက်ရဲ့ထူးခြားချက်မှာ အနောက်မြောက်ထောင့်မှာ အတွန့်ဖြစ်နေပါတယ်။

နန်းတော်ရာဝင်ပေါက်

နန်းတော်ရာဝင်ပေါက်မှာ ရွှေနန်းဦးဘုရားရဲ့တောင်ဘက်မှာတည်ရှိနေတာပါ။ ၂၀၀၉-၂၀၁၀ခုနှစ်မှာ တူးဖော်သုတေသနပြုလုပ်ခဲ့ကြပြီး အုတ်ရိုးတန်းမှာ အလျား (၁၇.၃)မီတာ၊ အနံ(၇)မီတာ၊အမြင့်(၂.၆)မီတာရှိပြီးအရှေ့ဘက်နန်းတော်ရာမြို့ရိုးရဲ့ဝင်ပေါက်တံခါးဖြစ်ကြောင်းသိရှိရပါတယ်။ နန်းတော်ရာဝင်ပေါက်မှာ ပျူခေတ်လယ်(အေဒီ ၆-၇)ရာစုက တည်ဆောက်ခဲ့တဲ့အဆောက်အအုံဖြစ်ကြောင်းလေ့လာသိရှိရပါတယ်။

ဘဲဘဲဂူဘုရား

ဘဲဘဲဂူဘုရားမှာ သရေခေတ္တရာပျူခေတ် အေဒီ ၄ရာစုမှ ၉ရာစုထဲ တည်ထားခဲ့တဲ့ဂူဘုရားတစ်ဆူဖြစ်ပါတယ်။ သရေခေတ္တရာမြို့ဟောင်းရဲ့တောင်ဘက်၊ဘောဘောကြီးစေတီရဲ့အရှေ့ဘက်အနီးမှာတည်ရှိပါတယ်။ အရှေ့ဘက်ကိုမျက်နှာမူဆောက်ထားပြီး အလျား(၁၇)ပေ၊ အနံ(၁၆)ပေရှိတဲ့လေးထောင့်အုတ်ဂူ ဘုရားငယ်တစ်ဆူဖြစ်ပါတယ်။ လှိုဏ်ဂူထဲမှာ ဘူမိဖဿမုဒြာဟန်ထိုင်တော်မူရုပ်ပွားတော်ဆင်းတုတစ်ဆူနဲ့ရှိးခိုးနေတဲ့သာဝကနှစ်ပါးတို့ကို ကျောက်ပြားချပ်ပေါ်ထုလုပ်ထားရှိပြီးအောက်ခြေမှာ ပျူစာများရေးသားထားတာကိုလေ့လာတွေ့ရှိရပါတယ်။

လေးမျက်နှာဂူဘုရား

သရေခေတ္တရာပျူခေတ် အေဒီ ၄ရာစုမှ ၉ရာစုထဲ တည်ထားခဲ့တဲ့ ဂူဘုရားတစ်ဆူဖြစ်ပါတယ်။ သရေခေတ္တရာမြို့ဟောင်းမှာတွေ့ရတဲ့ဂူဘုရားတွေထဲ မုခ်လေးမုခ်ပါရှိတဲ့ တစ်ဆူတည်းသောဂူဘုရားဖြစ်ပါတယ်။ ဘဲဘဲဂူဘုရားအနီးမှာတည်ရှိတဲ့အတွက် ဘဲဘဲဂူဘုရားကိုဖူးရင်း တစ်ဆက်တည်း လေးမျက်နှာဂူဘုရားကိုဝင်ဖူးလို့အဆင်ပြေသလို ဗိဿနိုးမိဖုရားသင်္ချိုင်းကိုလည်းဝင်ရောက်လေ့လာလို့ရသွားပါတယ်။

ဗိဿနိုးမိဖုရားသင်္ချိုင်း

ဗိဿနိုးမိဖုရားသင်္ချိုင်းမှာ သရေခေတ္တရာမြို့ဟောင်းရဲ့အပြင်ဘက်၊တောင်ဘက်ခြမ်းမှာတည်ရှိပါတယ်။ လေးမျက်နှာဘုရားရဲ့ကိုက်(၃၀၀)ခန့်အကွာမှာတည်ရှိပြီး ၁၉၆၇-၁၉၆၈ခုနှစ်မှာတူးဖော်ခဲ့ကြကြောင်းသိရှိရပါတယ်။ တူးဖော်ကြတဲ့အခါ ကျောက်အရိုးအိုးကြီး(၆)လုံးကိုတစ်တန်းကို (၃)လုံးစီနဲ့အရှေ့အနောက်စီတန်းလို့တွေ့ရှိခဲ့တယ်လို့လေ့လာသိရှိရပါတယ်။ ကျောက်အရိုးအိုးတွေမှာ ပျမ်းမျပတ်လည်(၂.၄)မီတာနဲ့အမြင့် (၀.၈၄)မီတာရှိကြောင်းဖော်ပြထားကြပြီး လျှာထိုးအံကျပါကျောက်ခွေတွေနဲ့ဆက်စပ်ပြုလုပ်ထားကြောင်းဖော်ပြထားတာကိုလေ့လာသိရှိခဲ့ရပါတယ်။ ဗိဿနိုးမြို့ဟောင်းအနီးတည်ရှိနေခဲ့တဲ့အတွက် ဗိဿနိုးမိဖုရားနဲ့ဆွေတော်မျိုးတော်တို့ရဲ့သင်္ချိုင်းရာတစ်ခုဖြစ်မယ်လို့ယူဆကြောင်းဖော်ပြထားကြပါတယ်။

ဘောဘောကြီးစေတီ

ဘောဘောကြီးစေတီမှာ သရေခေတ္တရာမြို့ဟောင်းရဲ့အထင်ကရစေတီကြီးတစ်ဆူဖြစ်ပြီး ထူပါ(ခေါ်)စေတီအမျိုးအစားဖြစ်ပါတယ်။ ဒွတ္တဘောင်မင်းကြီးတည်ထားခဲ့တဲ့ ကောင်းမှုတော်စေတီတော်(၉)ဆူထဲမှာ တစ်ဆူအပါအဝင်ဖြစ်ပါတယ်။ ဉာဏ်တော်အမြင့်(၁၅၃)ပေရှိပြီး ၁၉၀၇ ခုနှစ်စပြီးနှစ်စဉ်ပြုပြင်ထိန်းသိမ်းတဲ့လုပ်ငန်းကိုဆောင်ရွက်ခဲ့ကြပါတယ်။ မှန်နန်းရာဇဝင်ဖော်ပြချက်အရ ဘောဘောကြီးစေတီထဲမှဓာတ်တော်၊ဌာပနာတော်တွေကိုအနော်ရထာမင်းကြီးကပင့်ဆောင်ပြီးပုဂံမြို့တော်ရှိ ရွှေဆံတော်ဘုရားမှာ ဌာပနာခဲ့ကြောင်းသိရှိခဲ့ရပါတယ်။

ရဟန္တာတံခါးပေါက်

ရဟန္တာတံခါးပေါက်မှာ သရေခေတ္တရာမြို့ဟောင်းရဲ့တောင်ဘက်မှာတည်ရှိပြီးမြို့ရိုးအနောက်ဘက်ခြမ်းနဲ့တောင်ဘက်ခြမ်းကို ဆက်စပ်ပေးတဲ့မြို့ဝင်ပေါက်တစ်ခုဖြစ်ပါတယ်။ ၂၀၀၇-၂၀၀၈ ဘဏ္ဍာရေးနှစ်မှာတူးဖော်ခဲ့ပြီး မြို့ရိုးလက်တံတွေမှာ တစ်ဘက်ကို အရှည်(၇၆.၂၀)မီတာခန့်ရှိတယ်လို့ခန့်မှန်းထားကြပါတယ်။ မြို့ဝင်ပေါက်လက်တံနှစ်ဖက်မှာ တောင်မြို့ရိုးရဲ့တစ်ဘက်တစ်ချက်စီမှမြောက်ဘက်ကို တံတောင်ဆစ်ချိုးကွေ့ဝိုက်လျှက်ရှိနေပြီး ထိပ်ဝမှာကျယ်ပြီး အတွင်းဘက်ကို ဖြည်းဖြည်းချင်းကျဉ်းမြောင်းသွားပါတယ်။

ရဟန္တာဂူဘုရား

ရဟန္တာဂူဘုရားမှာ သရေခေတ္တရာမြို့ဟောင်းရဲ့အနောက်တောင်ဘက်မှာတည်ရှိပါတယ်။ ဂူဘုရားအတွင်း အနောက်ဘက်နံရံရှိ သဲကျောက်ပြားတစ်ချပ်ပေါ်မှာထုဆစ်ထားတဲ့ ဘူမိဖဿမုဒြာဟန်ထိုင်တော်မူရုပ်ပွားတော်ဆင်းတု(၇)ဆူရှိပါတယ်။ အရင်က (၈)ဆူရှိပေမယ့် တစ်ဆူမှာ ပျက်စီးသွားခဲ့တဲ့အတွက် အခုလက်ရှိမှာ (၇)ဆူကိုသာ ဖူးမြော်ခွင့်ရကြပါတယ်။ ၁၉၆၃ ခုနှစ်မှ ၂၀၀၂ခုနှစ်အထိ စဉ်ဆက်မပြတ် ပြန်လည်တည်ဆောက်ထားတဲ့အဆောက်အအုံဖြစ်ကြောင်းသိရှိရပါတယ်။

ရဟန္တာကန်

ရဟန္တာကန်မှာ ဒွတ္တပေါင်မင်းကြီးတည်ဆောက်ခဲ့တဲ့ကန်(၉)ကန်မှာ တစ်ကန်အပါအဝင်ဖြစ်ပါတယ်။ ရဟန္တာကန်မှာ ရဟန္တာဂူဘုရားရဲ့တောင်ဘက်အနီးမှာတည်ရှိပါတယ်။ ကန်ဘောင်ရိုးပေါ်မှာ ပျက်စီးယိုယွင်းနေပြီဖြစ်တဲ့ အုတ်ခုံဟောင်းတွေကိုတွေ့ရပါတယ်။ အဲဒီအုတ်ခုံဟောင်းတွေမှာ ပျူခေတ်အုတ်ချပ်ကြီးတွေနဲ့ပြုလုပ်ထားတာဖြစ်ပြီး ရှေးခတ်က ရဟန္တာအရှင်သူမြတ်တွေရေသန့်စင်တဲ့ဌာနလို့ယူဆရကြောင်းဖော်ပြထားပါတယ်။

ရန်ကုန်-ပြည်ကို ဘတ်စ်ကားတွေနဲ့သွားမယ်ဆိုရင် ကားခမှာ ၈၀၀၀ ကျော်ရှိပြီး အချိန် ၆နာရီခန့်ကြာပေမယ့် နေ့ချင်းပြန်သွားလို့ရတဲ့ခရီးမျိုးဖြစ်ပါတယ်။ တစ်ညအိပ်ခရီးအနေနဲ့သွားနိုင်ခဲ့ရင်တော့ ပိုလို့သက်သောင့်သက်သာဖြစ်စေသလို သရေခေတ္တရာတစ်မြို့လုံးအနှံ့လည်ပတ်နိုင်မှာဖြစ်ပါတယ်။ မိသားစုလိုက်၊သူငယ်ချင်းလိုက် ကားလေးတစ်စီးငှားပြီးသွားနိုင်ရင် ပိုအဆင်ပြေစေတယ်လို့အကြံပြုချင်ပါတယ်။ သရေခေတ္တရာပျူမြို့ဟောင်းကိုလည်ပတ်နိုင်ဖို့ သုံးဘီတက္ကစီတွေငှားလို့ရသလို သရေခေတ္တရာတစ်မြို့လုံးအနှံ့လည်နိုင်ဖို့ ၂၀၀၀၀ ကျော် ၃၀၀၀၀ဝန်းကျင်ရှိကြောင်း ခရီးသွားအချင်းချင်းမေးမြန်းရင်းသိရှိခဲ့ရပါတယ်။ သရေခေတ္တရာမြို့ဟောင်းထဲလည်ပတ်စရာနေရာတွေမှာ တစ်နေရာနဲ့တစ်နေရာကို တော်တော်အလှမ်းဝေးလွန်းတဲ့အတွက် အုပ်စုလိုက်ကားနဲ့သွားမှ သင့်တော်တယ်လို့ပြောချင်ပါတယ်။ တောလမ်းထဲ လျောက်ပတ်လှည့်လည်ရတဲ့ခရီးဖြစ်တာမို့ နှစ်ဦးချင်းဆိုင်ကယ်နဲ့သွားလာတာမျိုးကိုရှောင်သင့်ကြောင်းအကြံပြုချင်ပါတယ်။

သရေခေတ္တရာပျူမြို့ဟောင်းကိုလာရောက်လည်ပတ်ရင်း သီရိခေတ္တရာပြတိုက်ကိုဝင်ရောက်လေ့လာလို့ရပါသေးတယ်။ သီရိခေတ္တရာပြတိုက်မှာ အင်္ဂါနေ့မှ တနင်္ဂနွေနေ့အထိ နံနက် ၀၉ း ၃၀ နာရီမှ ညနေ ၁၆ း ၃၀ နာရီထိဖွင့်ပြီးတနင်္လာနေ့နဲ့ အစိုးရရုံးပိတ်ရက်တွေမှာ ပိတ်ပါတယ်။

28/10/2019

Facebookသုံးစွဲသူများအကောင့်Settings ရှူပ်ထွေးလို့
မပြုပြင်တက်သူများအတွက်ပါ
ပြင်ဆင်လိုအပ်နိုင်မယ့်လင့်အနည်းငယ်ကို
တင်ပေးလိုက်ပါတယ်။

Nickname : အလွယ်တကူရေးရန်သွားပါ - https://m.facebook.com/profile/edit/info/nicknames/?ref=bookmarks

မွေးနေ့အလွယ်တကူပြောင်းရန်သွားပါ -
https://m.facebook.com/profile/edit/infotab/section/forms/?section=basic-info&cb=1529159262&ref=bookmarks

ဘာသာစကားအလွယ်ကူပြောင်းသုံးရန်သွားပါ -
https://m.facebook.com/language.php?n=%2Fhome.php

နာမည်အလွယ်တကူပြောင်းရန်သွားပါ - https://www.facebook.com/settings?tab=account§ion=username&view

Mailအသစ်ပြောင်းရန်သွားပါ -
https://m.facebook.com/settings/email/

ရက်ပေါင်း၆၀စောင့်နာမည်အားပြောင်းရန်သွားပါ - https://m.facebook.com/help/contact/1417759018475333?_rdr

Passwordအလွယ်တကူပြောင်းရန်သွားပါ - https://m.facebook.com/settings/security/password/

ကိုယ်အကောင့်တစ်ခြားသူဝင်ရင်သိနိုင်ရန်သွားပါ - https://m.facebook.com/login_alerts/settings/?source=security_settings_page

Login Appsများအလွယ်တကူဖျက်ရန်သွားပါ - https://m.facebook.com/settings/apps/tabbed/

မိမိသူငယ်ချင်းများကိုမမြင်အောင်ထားရန်သွားပါ - https://m.facebook.com/privacy/touch/basic/

တစ်ခြားသူမိမိပိုစ့်များမမြင်အောင်ထားရန်သွားပါ - https://m.facebook.com/privacy/touch/masher/

သူငယ်ချင်းပိတ်နည်း - https://m.facebook.com/privacy/touch/basic/

မျက်နှာမှတ်မိခြင်းဖွင့်ရန်ပိတ်ရန်သွားပါ - https://m.facebook.com/privacy/touch/facerec/

Tag အလယ်တကူပိတ်ရန်သွားပါ - https://m.facebook.com/privacy/touch/timeline_and_tagging/

Followingအလွယ်တကူဖွင့်ရန်သွားပါ - https://m.facebook.com/settings/subscribe/

Blockပြန်ဖြေရန်သွားပါ - https://m.facebook.com/privacy/touch/block/

Mail စာများပိတ်ရန်သွားပါ - https://m.facebook.com/settings/notifications/email/

Text sms ထိန်းချုပ်ရန်သွားပါ - https://m.facebook.com/settings/sms/

See Firstအလွယ်တကူလုပ်ရန်သွားပါ - https://m.facebook.com/feed_preferences/see_first/

Unfollowingအလွယ်တကူလုပ်ရန်သွားပါ - https://m.facebook.com/feed_preferences/following/…

Unfollowingပြန်ဖြုတ်ပေးရန်သွားပါ -
https://m.facebook.com/feed_preferences/following/

အကောင့်အပြီးဖျက်ရန်သွားပါ - https://m.facebook.com/help/delete_account/

မိမိအချက်အလတ်များ ပြန်ယူနိုင်ရန်သွားပါ - https://m.facebook.com/settings?tab=your_facebook_information&_rdr

သူငယ်ချင်းလက်မခံသူများကိုဖြုတ်ရန်သွားပါ - https://m.facebook.com/friends/center/requests/outgoing/?fb_ref=fbm&ref=bookmarks

Support helpနေရာသို့အလွယ်တကူရှာရန်သွားပါ - https://m.facebook.com/support/?ref=m_help_center2

အလုပ်အကိုင်အလွယ်တကူထည့်သွင်းရန်သွားပါ -
https://m.facebook.com/profile/edit/infotab/section/forms/

အားလုံးပဲ အဆင်ပြေကြပါစေ။
travel & tour🤩🤩🤩

18/10/2019

10/10/2019

#ဖခင်တစ်ယောက်ရဲ့မေတ္တာ