18/08/2023
लैङ्गिक तथा यौनजन्य हिंसा मुक्त समाज निर्माणका लागि अपिल
एकद्वार संकट व्यवस्थापन केन्द्र /One-stop Crisis Management Center (OCMC)
एकल महिला, अपाङ्गता भएका महिला, बालबालिका, ज्येष्ठ नागरिक महिलाहरु लैङ्गिक तथा यौनजन्य हिंसामा परेका घटना सार्वजनिक हुने गरेका छन् । आफन्त कोही नभएका (सहयोगापेक्षी) शारीरिक तथा मानसिक रुपमा अशक्त महिला र बालबालिका जोखिममा पर्ने गरेको घटना र तथ्याङ्कले देखाउँछ । लोभ लालचमा पारेर बालबालिका र महिला ओसारपसार र बेचविखनमा पारेपछि उनीहरु शारीरिक र मानसिक हिंसामा बाँचिरहेका छन् । कति घटना दृश्य छन् कति अदृश्य । देखिए पनि नदेखिए पनि यी सामाजिक अपराध हुन् ।
प्राकृतिक तथा मानवीय संकटका समयमा यी बर्ग यौन दुव्र्यवहारमा पर्ने गरेको विगत घटनाहरुले देखाउँछन् । एचआइभी तथा एड्सबाट संक्रमित र यौनिक अल्पसङ्ख्यकहरु यसप्रकारका घटनाका दृष्टिले जोखिममा छन् ।
यस्ता घटनामा स्वास्थ्य तथा कानुनी उपचार, सुरक्षा, आश्रय र पुनस्र्थापनाका लागि एकद्वार संकट व्यवस्थापन केन्द्र ( OCMC) हरुले काम गरिरहेका छन् । ती केन्द्रको कामलाई थप प्रभावकारी बनाउन काठमाडौँ महानगरपालिकाले एकीकृत कार्यक्रम सञ्चालन गर्ने योजना बनाएको छ ।
महानगरपालिका सामाजिक न्यायमा आधारित सामाजिक विकास र उत्थानका क्रियाकलाप सञ्चालन गर्न प्रतिवद्ध छ ।
अहिलेसम्मको अभ्यास हेर्दा, पीडित तथा प्रभावितहरु अस्पतालमा उपचारका क्रममा गएपछि आकस्मिक तथा बहिरङ्गकक्ष पठाएपछि बल्ल केन्द्रमा पुग्ने गरेका छन् । प्रहरीबाट पठाइएका पीडित र प्रभावित पनि धेरै छन् । आफैँ केन्द्रमा जानेको संख्या न्यून छ ।
यसप्रकारको हिंसामा परेका व्यक्तिहरुले प्रहरी वा अस्पतालमा आकस्मिक वा वहिरङ्ग सेवामा जानु पर्दैन । सिधै ओसीएमसीमा गएर स्वास्थ्यकर्मीसँग आफ्ना समस्या भनेपछि स्वास्थ्य र कानुनी उपचार तथा अन्य प्रशासनिक काम त्यहीँबाट हुन्छ । पीडित वा प्रभावितका सबै विवरण गोप्य रहन्छन् । यो सेवा थाहा नभएर अहिलेसम्म मानिसहरु प्रहरी र अस्पतालका विभिन्न कक्षमा पुगिरहेका छन् । कुरा नबुझेर घुमिरहेका छन् । पीडामाथि थप पीडा बोध गरेर उपचार गरिरहेका छन् । आफूलाई सम्हालिरहेका छन् ।
धेरैजसो विद्यालयका छात्राहरु शिक्षक र आफूभन्दा माथिल्ला कक्षाका विद्यार्थीबाट, परिवार, नाताभित्र, आफन्त र चिनेजानेकाबाट पीडित भएका छन् । संख्या हेर्दा परोपकार स्त्री तथा प्रसुति रोग अस्पतालमा धेरै छन् । गएको बर्ष कान्ति बाल अस्पतालबाट ६५ जनाले सेवा पाए भने प्रसुति रोग अस्पतालबाट ४०३ जनाले सेवा लिए ।
हिंसामा पर्नु आफैँमा गहिरो चोट हो । यो चोट व्यवस्थापन गर्न सरकारले उपलब्ध गराएको सेवाका बारेमा जानकारी लिनोस् । चोटमाथि चोट नथप्नोस् ।
यो जानकारीसँगै सम्पूर्ण नागरिकहरुमा हिंसा नभएको सद्भावयुक्त समाज निर्माणमा योगदान दिन आग्रह गर्न चाहन्छौ ।
