06/09/2024
E te Kiingi
Ka tangi mai oo uri, ka tangi wiwini
Ka tangi mai oo uri, ka tangi wawana
Teenei hoki te manawa ka ueue, teenei hoki te manawa ka pore.
E ko taku manawa raa ka hooake moohou, te manawa nui o rangi.
I runga i te koomingo o te tau o te ate.
He aha raa teenei e tau nei ki taku uma?
He kai naa te aroha, ka momotu te manawa.
He aha rawa a aituaa? Hei raru moo te iwi.
Tuu ana te raa ka heitia mai he karere
He karere e kawea ana he rongopai, he oranga-ngaakau
E whakauu tonu ai te taahuna aa tara o Pootatau,
Kei te Kiingi o te Kotahitanga; te Kiingi o te Huumaarie; te Kiingi o te Hurihanganui, e moe.
E moe ki te rua kooiwi o te ope o te rua Matariki, o too tuututu kaurewa kua whetuurangitia
Waiho mai maatou ngaa urupaa o raatou maa hei whakatinana ake too tongikura ‘Kia Maaori i te ao, i te poo, i te poo, i te ao.’
Ko te aweawe o te rangi ki a koutou, ko te aweawe o te whenua ki a maatou…
Kua maatao too ahurewa tapu, e taku kiingi.
I too ngarohanga ake, ka rewa ake te urupounamu
Maa wai raa e taurima te mahau taarearea a Maaui Tikitiki a Taranga?
Maa wai raa too ahurewa tapu e whakamahana, a haere ake nei?
E kauria ana too iwi Maaori ngaa wai o harapuka, ngaa ngaru o ahurangi, ngaa tai o haurokuroku
He aha raa kei tua o te pae o Huakipoouri?
Raa te haeta, taakina mai te ripa te tara ki Tauhara!
Kua kitea, kua tohua ko wai rā hei whakakapi
Kua p**a tonu i te rere o Rangiaatea,
Hoki mai ai ki te waikarori, ki te waikangatu
Ki te waitukukiri, pipia ai e te puna wai o te awa tipua o Waikato.
E ko koe, Nga wai hono i te po.
Kei te puhi maareikura o Te Whare Kaahui Ariki,
Ka riro maa te katonga wai o too awa tipua hei pure te kaikinintanga o te whatumanawa
Teenei raa te whakahau ake i ngaa tai o aroha
I ngaa wai whakatere taniwha o te motu, kia honoa atu ki a koe, hei taituaraa moou.
He tai timu, he tai pari, he tai ope, hei tairoa, he tainui…
E te Kuini Nga wai hono i te poo
E ai ki te matakite, kia kotahi raa anoo te Kuiini.
Ko te mahara ia, ko too haakui tonu teeraa. He kootuku rerenga tahi.
Manohi anoo raa, i matakitehia atu kia kotahi pea te momo o te kuiini.
Te momo o too tipuna kuia, o Te Arikinui Te Aatairangi Kaahu.
E waiatahia ana, e koorerotia ana, e kauanuanutia ana koe e ngaai horetiitii, e ngaai horetaataa.
Kia kotahi te momo o te kuiini, ko too momo tonu. He ata koe naana. E rua, e rua.
Te muurau o te tini, te wenerau o te mano.
Maau ngaa wai e kauria, maau ngaa wai e hono…
Ngaa wai o te mana motuhake
Me ngaa wai o te kotahitanga
Kauria ake te kauhanganui, e rangi.
Unuhia ake too parekawakawa, kuhuna too karauna manatunga, hei tikitiki moo too maahunga.
E eke ai te koorero: ‘moou taiata, mooku taiahiahi.’
Moou e Kiingi Tuuheitia Pootatau Te Wherowhero Te Tuawhitu, a taiata
Moou e Nga wai hono i te oo Te Tuawaru, a taiahiahi…
Kia herea mai te kawau korokii
Kei taku kuuaka, he kuuaka maarangaranga
Kotahi manu tau atu ki te taahuna, tau atu, tau atu, tau atu
E te wahine toa, maranga mai raa
Hapaingia too iwi ki te toonuitanga e.
