19/08/2023
Makagagahum ug dalaygong Amahan, daghang salamat sa mapuangoron mong gugma kanamo makapoyo unta kami sa imong walay katapusang gingharian, pinaagi ni cristo imong anak among Ginoo, amen
AGOSTO 20, 2023- DOMINGO
IKAKAWHAAN NGA DOMINGO SA ORDINARYONG PANAHON
(Green)
Unsa ba gayud kaha ang mga pag-ampo nga paminawon sa Dios? Usahay sige ta ug ampo alang sa usa ka hangyo apan mura man lang ug wala kita gipaminaw sa Ginoo. Usahay pod kausa ra nato ka luhoran, pagka-ugma gidungog na dayun niya ang atong mga hangyo. Unsa ba gayud ang angay nga batunan sa usa ka pag-ampo? Unsaon ba gayud nato pag-ampo?
Ang Ebanghelyo adunay gisulti bahin niini. Ang una mao ang atong paglahutay o perseverance diha sa pag-ampo. Patalinghugi ninyo ang pag-ampo sa usa ka babaye:
• Sa baynte ka tuig ang panuigon: “Lord, I want the best man.”
• Sa baynte singko: “Lord, I want a good man.”
• Sa traynta: “Lord, I want any man.”
• Sa kwarenta y singko : “Lord la na mannn.”
Sigurado ko nga naluoy gayud ang Ginoo kaniya! apan mao kini ang buot sa Ginoo samtang kita nag-ampo. Gusto niya nga “kuti-kutihon” nato siya! “Ask and you will receive. Seek and you shall find. Knock and the door will be opened!” Usahay kita ra usab ang dunay sayop kay kulang kita sa pasensiya. Dali ra kaayu kitang mapul-an. Gusto dayun ta nga hatagan sa atong gusto. Ang tan-aw nato sa Ginoo murag vendo machine nga kon butangan nimog kwarta kinahanglan dunay mogawas nga softdrink. Apan adunay kaugalingong oras ang Ginoo nga kasagaran dili motakdo sa atong orasan.
Ikaduha mao ang pagpaubos. Ang babaye nga taga Canaan sa atong Ebanghelyo nagpaubos sa atubangan ni Jesus. Gitawag siya nga “iro” nga walay katungod nga makigsalo sa kan-anan sa iyang Ginoo apan mitubag ang babaye nga bisan ang mga iro makakaon man sa mga momho nga nangahulog sa lamesa. Sa tumang pagpa-ubos gidawat niya kini ug nagpaka-uyamot siya sa iyang kaugalingon. Mao nga nahibulong pag-ayo si Jesus kaniya ug gihatag ang iyang gipangayo. Ug ang ikatulo mao ang pagtoo nga bunga sa malahutayong paghulat ug pagpaubos. Ang ingon niining matanga sa pagtoo ang magdala kanato sa pagtugyan sa atong kaugalingon sa kabubut-on sa Ginoo. “Matuman ang imong pagbuot dinhi sa yuta maingon sa langit…” Ingon ba niini ang atong mga pag-ampo? Susihon nato ang atong mga kaugalingon sa matag higayon nga moluhod kita sa Iyang atubangan.
Aduna koy usa ka text nga nadawat nga ingon niini ang gisulti bahin sa pag-ampo: “My child I hear your prayers. If I answer them, it is because I am increasing your faith. If I delay them, it is because I am increasing your patience, endurance and perseverance. If I do not answer them, wait… I have something better for you… The best is always for you.
Pasiuna
Mga igsoon ko diha ni Cristo:
Gibati ba ninyo nga kabahin niining balay sa Dios?
Inyo ba kining puloy-anan diin dawaton ninyo ang tanan sa walay pagpili sa bulok sa ilang pagkatawo? Gihiusa kita sa Dios dinhi ug gusto niya nga mobati kita nga kabahin niining maong balay uban kaniya. Dinhi giandam niya ang bangkete sa iyang Anak. Ug sa samang higayon gusto niya nga magpakabana kita nga kining maong balay ug bangkete mahimong tagboanan sa tanang katawhan kay siya ang Amahan sa tanan ug ang iyang Anak mao ang paglaom sa tanan.
Unang Pagbasa Is 56: 1, 6-7
Ang mga langyaw dili na mga dumuduong. Ang mga Judio ug mga pagano pareho nga gitawag sa pagpuyo diha sa balay sa Dios. Ang tanang gustong magpasakop sa kasabotan dili na mga dumuduong sa Dios ug sa iyang katawhan.
ANG PAGBASA GIKAN SA BASAHON NI PROPETA ISAIAS (Is. 56:1, 6-7)
Nag-ingon ang GINOO sa iyang katawhan, “Sunda ang hustisya ug buhata ang matarong, kay sa dili madugay luwason ko na kamo, ug ipaila ko ang akong katarong.
“Ang mga langyaw nga miduol sa GINOO aron pag-alagad kaniya, ug nagtamod sa Adlawng Igpapahulay ug nagtuman sa iyang mga sugo panad-on ko sa balaan kong bukid, ug lipayon ko sila didto sa akong Templo. Ang ilang mga halad-sinunug ug mga halad-inihaw dawaton ko didto sa akong halaran; kay ang akong Templo nganlan mag balay-alampoanan alang sa tanang katawhan.
ANG PULONG SA GINOO.
SALAMAT SA DIOS.
SALMO RESPONSORYO
(Ps. 67.2-3, 5, 6, 8
T. O Dios, magadayeg unta kanimo ang tanang mga nasod.
Kaluy-an unta kita sa Dios ug bendisyonan niya; ipadan-ag unta kanato ang iyang nawong. Mahibaw-an unta ang imong dalan dinhi sa yuta; diha sa tanang mga nasod ang imong kaluwasan.
T. O Dios, magadayeg unta kanimo ang tanang mga nasod.
Maglipay unta ang mga nasod ug magsadya tungod kay nagamando ka sa kanasuran diha sa katarong; ang mga nasod dinhi sa yuta imong agakon.
T. O Dios, magadayeg unta kanimo ang tanang mga nasod.
Daygon unta ikaw sa katawhan, O Dios; ang tanang kalungsuran magdayeg unta kanimo. Panalanginan unta kita sa Dios, ug ang tanang kautlanan sa yuta mahadlok unta kaniya.
T. O Dios, magadayeg unta kanimo ang tanang mga nasod.
Ikaduhang Pagbasa Rom. 11: 13-15, 29-32
Ang kaluoy sa Dios gitagana alang sa tanan. Kadaghanan sa mga Judio wala modawat ni Cristo nga mao ang manunubos. Mao kini ang kahigayonan sa Simbahan sa pagsangyaw dayon sa maayong Balita ngadto sa mga pagano. Apan gusto sa Dios nga maluwas ang tanan, mga Judio ug mga pagano.
ANG PAGBASA GIKAN SA SULAT NI SAN PABLO NGADTO SA TAGA-ROMA (Rom. 11:13-15, 29-32)
Karon, bahin kaninyong mga dili Judio: ipasigarbo ko ang akong bulohaton ingon nga apostol ako sa mga dili Judio, aron masina ang akong isigka-Judio ug maluwas ko ang pipila kanila. Kon sa dihang gisalikway sila, ang kalibutan napasig-uli ngadto sa Dios, unsa pa kaha kon dawaton sila? Kinabuhi alang sa mga patay!
Kay dili gayod mag-usab-usab ang Dios sa iyang hunahuna labot sa iyang pilion ug panalanginan. Kamong mga dili Judio misupil sa Dios kaniadto, apan karon gikaluy-an kamo sa Dios tungod kay misupil man ang mga Judio. Sa maong pagkaagi, tungod sa kaluoy nga nadawat ninyo, ang mga Judio misupil sa Dios aron sila usab makadawat sa kaluoy sa Dios. Kay gihimo sa Dios ang tanang mga tawo nga masupilon aron ikapakita niya ang iyang kaluoy kanilang tanan.
ANG PULONG SA GINOO.
SALAMAT SA DIOS.
ALELUYA (Mt. 4:23)
T. Aleluya.
Si Jesus nagwali sa Maayong Balita bahin sa paghari sa Dios ug nag-ayo sa mga masakiton.
T. Aleluya.
ANG PAGBASA GIKAN SA EBANGHELYO SUMALA NI SAN MATEO (Mt. 15:21-28)
Mibiya si Jesus niadtong dapita ug miadto sa kayutaan duol sa mga siyudad sa Tiro ug sa Sidon. Usa ka babaye nga taga-Canaan, nga nagpuyo niadtong dapita, miduol kaniya ug mituwaw, “Sir, Anak ni David, kaloy-i intawon ako! Ang anak kong babaye giyawaan ug nag-antus pag-ayo.”
Apan wala motubag si Jesus. Miduol ang iyang mga tinun-an kaniya ug miingon, “Papahawaa siya kay nagsunodsunod siya kanato ug saba kaayo!”
Unya mitubag si Jesus, “Gipadala ako ngadto lamang sa nawalang mga karnero sa nasod sa Israel.”
Apan miduol ang babaye ug miluhod sa atubangan ni Jesus. “Sir, tabangi intawon ako!” miingon siya.
Si Jesus mitubag, “Dili maayo nga kuhaon ang kalan-on sa mga anak ug ipakaon sa mga iro.”
Ang babaye mitubag, “Tinuod kana, Sir, apan bisan gani ang mga iro makakaon man sa mga mumho nga mahulog gikan sa lamesa sa agalon.”
Ug si Jesus mitubag kaniya, “Inday, pagkadako sa imong pagsalig! Matuman ang imong gihangyo.” Ug niadto dayong gutloa naayo ang iyang anak.
ANG EBANGHELYO SA GINOO.
DAYGON IKAW, O CRISTO
The Creed is said.
KATILINGBANONG PAG-AMPO
P: Ang atong Ginoong Dios sa kanunay nagdasig kanato sa pag-ila ug pagsinati sa Iyang presensiya diha sa atong nagkalainlaing buluhaton. Uban sa Balaang Espiritu Santo mangamuyo kita Kaniya sa pag-ingon: GINOO, PATALINGHUGI KAMI.
a.) Nga ang atong Santo Papa, mga kaobispohan, kaparian, ug mga relihiyoso magmapadayonon sa ilang pag-alagad sa Simbahan ug sa katawhan sa Dios sa tibuok kalibutan. Mag-ampo kita sa Ginoo.
b.) Nga ang atong mga pangulo sa nagkalainlaing kanasuran maglantaw unta sa kaayohan sa tanang katawhan ilabina gayud niadtong mga kabos ug naglisod tungod sa kapit-os sa ilang kinabuhi. Mag-ampo kita sa Ginoo.
c.) Nga ang mga nag-antus sa nagkalainlaing balatian nga tungod niini sila halos makabsan na sa paglaum nga tagaan unta sila sa Dios sa grasya sa kalig-on ug kaayohan aron makapadayon sila sa pagpakabuhi niining kalibutan. Mag-ampo kita sa Ginoo.
d.) Nga kitang tanan nga nagkatigom dinhi nga unta maila nato ang Ginoo pinaagi sa atong pagpadayag sa atong pagtoo diha sa pulong ug buhat. Mag-ampo kita sa Ginoo.
P: Langitnong Amahan, sayod ka sa tanan namong mga paningkamot. Himoa nga ang among mga buhat ug pagkinabuhi mahisubay sumala sa imong kabubut-on. Kini among gipangayo pinaagi ni Cristo, among Ginoo. Amen.
