14/01/2024
💠 فقرة حكاية من مدينتنا / الزاوية البكرية (السبعة رڨود)
و انت هابط من الكياس الرابط بين باب سعدون و سيدي عبد السلام و داخل على زناقي و أنهجة المدينة و نهج بن عثمان.. تعرضك زاوية في نهج تاريخي كبير تتسمى باالزاوية البكرية تعرفت بإسم "السبعة رقود" (النيام السبعة)
زاوية في الأصل على ملك عائلة "البكري" الي عطات لجامع الزيتونة قبل عدد كبير من الأيمة على مدى زوز قرون.. أصغرهم (حاج العارفين البكري) كيما يسميوه..
بعدها انقطعت سلالة البكري وقتلي توفى ٱخر عنقود من العائلة إسمو البشير البكري كان مزارع و واحد من أثرياء العاصمة في الوقت هذاكا، وتعرف زادة بكونو مناضل شرس سنوات الاستعمار..
في 2016 وقع ترميم الزاوية هاذي من طرف جمعية صيانة المدينة و إلي جزأ منها ولى روضة أطفال البلاصة إلي في حد ذاتها موجود فيها مخطوطات نادرة برشا تحاكي تاريخ المدينة العربي (بخط الرقعة)
نتفكر وأحنا صغار كيف نبداو ماشين للمدرسة كنا نخافو قبل ما ندخلو للصباط (القوس) إلي يهزنا بعدها ديراكت للباب التيلاني لمدرسة سيدي العلوي إلي قرينا فيها و كبرنا..
قوس بطول 10 مترو ظلام، و في فترة الصغر ركبوهالنا عائلاتنا في مخاخنا و سمعونا برشا قصص على "السبعة رڨود" تحت القوس هذاكا.. و إلي هوما في الحقيقة قبورات لأفراد من عائلة البكري مدفونين في نفس الزاوية..
عاد وقتها كانت تقلي أمي كي توصل للقوس لازمك تمشي تزرب و تدخل للمدرسة فيسع باش ما يخرجلكش واحد من السبعة رڨود..
كي كبرت بعدها عرفت الي أنا واحد من السبعة الرقود، كنت راقد على وذنيا و نسمع في الكلام...
💠 فقرة حكاية من مدينتنا
