01/11/2023
[٢٤/١٠, ١:١١ م] سعيد كروبي:
⭕️تجربة اسمرا ⭕️
1. الإجراءات
اذن خروج من كسلا 20 الف + كرت خدمة وطنية شامله بشيل يومك كلو من الصباح لي 3ظ
اذا م عندك كرت خدمة وطنية او خلو طرف من المعبر بترجع .
اجراء السفارات بختلف من كل سفارة مثلا زيارة شخصية للسعودية 165 دولار للبصمة يوم كامل 10ص لي 4 عصر ..
2.تراحيل
من مدني لي كسلا 20500ج
من كسلا لي المعبر تكسي 40000ج
من المعبر لي تسني 40 دقيقة بص مجاني
من تسني لي اسمرا 100 نقفة من 4ص لي 3 ظ
من اسمرا لي جدة 390 دولار.
3 .سكن
تسني ح تبيت فيها يوم او يومين حتى تقدر تحصل تزكرة بص اسمرا
غرفة 4 سرير 120 نقفة حمام مشترك
اسمرا السكن فيها متعدد حسب الامكانية
1.شقة غرفة او غرفتين وصالة + منافع 5000 الف لمدة 15 يوم
2 .فندق الغرفة 500 نقفة لليوم حمام داخلي + وجبة +واي فاي
3.غرفة سريرين اليوم 300 نقفة حمام داخلي
4.غرفة سرير واحد حمام مشترك 100 نقفة
5.سكن مشترك السرير بي 80 نقفة .
4. الاعاشة
الخيارات كتيرة في مطاعم سودانية طلب فول مصلح 35 نقفة
الافضل تشيل معاك زوادة " جبنة سايحة .. مربى ..طنية ..اندومي .. سخان كهرباء ..شاي بن سكر .. كدا بتخفف التكلفة ..
ملاحظات مهمة
1.موية مافي ح تشتري من المطاعم "القارورة 5 نقفة " مياه مفلترة او مياه معدنية باكج 6 قطع 160 نقفة
2. م تاكل لحمة لانه ذبحهم م حلال
3. كهرباء مافي عشان م تتفاجاة طول النهار قاطعه بتجي بالليل وبتقطع 5 صباحا
4. اتصالات مافي .. انترنت تدخل كافي نت تأجر بالساعه 15 نقفة .. غير واتساب م بففتح معاك حاجه ..
والتحاويل الماليه صعبة لذلك يستحسن مرتب اوضاعك المالية
تكلفة الفرد م يقارب 3000 نقفة + تزكرة الطيران تكون معاك بالدولار
5. درجة الحرارة منخفضة لازم يكون معاك ملابس برد
6. مافي مواصلات داخليه إلا تكسي المشاوير القريبة كلها كداري
7. بلد منظمة وامنة قليل من يتكلم الانجليزية ولا يعرفون العربية.
3k$
[٢٤/١٠, ٢:٥٨ م] سعيد كروبي: الناس المسافرين لي اسمرا عاوز اوريكم نصايح من تجربتي للسفر
١. لو ما عندك تاشيره لي دولة تانيه ما بتاخد تأشيرة لي اسمرا ( لو عاوز تجي اسمرا سياحة ارجع ما تتعب روحك).
٢. في فحص امني في جوازات كسلا من السبت لي الخميس بياخد معاك زي ٤ ساعات ورسومو ١٥٤٠٠ جنيه (لازم تعملو عشان تعبر الحدود السودانيه.
٣. في المعبر الاريتري لازم تكون معاك صورة ورقية من تأشيرة الدوله العاوز تمشي ليها. بياخدوها منك والجواز وتنتظر ساعه بيندهو اسمك وتستلم الجواز مؤشر لي مدة شهر فقط.
٤. حتلقى انك بتتعامل بي اذدراء وبي حبة استفزاز بي كلام ناس عندهم فينا راي كسودانيين اننا ناس زبالة وما منظمين (ارخي جسمك واستحمل).
٥. البص من المعبر لي تسني بيجي الساعه ٤ ونص وبيتحرك الساعه ٦ مساء( مجاني). الطريق بياخد حوالي ٢٥ دقيقه لي تسني.
٦. وصلت تسني بالسلامه بتلقط شلكه بعد صعوبه بتقدر تقول للناس انا وصلت وتطمنهم. اول شي يا عزيزي تعملو بعد تنزل وتحجز في فندق تمشي تعمل اخطار المبيت في قسم الشرطه عشان تقدر تدخل الفندق (لو ما عملتو ناس الفندق ما بخلوك تبيت).
٧. في تسني الفنادق كتيره فيها بي ٤٠ وفيها بي ٤٠٠ (الاسر حتحتاجو تنزلو في فنادق كويسه لانو في حبة بهدلة).
٨. ما حتلقى حجز يا انسان. ما حتلقى حجز طوالي لي اسمرا، السودانيين كتيرين في تسني وبتحتاج تتاخر يوم على الاقل عشان تقدر تحجز في البص، البص بي ١٠٠ نقفه والبصات بتتحرك بدري شديد والعربات كذلك لحدي ٧ صباحا أقصاه (لو بتنوم شيل شيلتك).
٩. لو مستعجل في عربات بوكس من تسني لي كرن بي ٢٥٠ لي ٣٠٠ انت وحنكك ومنها بتاخد تاكسي بي ٢٠٠ نقفه لي اسمرا، في تذاكر بص سوق اسود لي اسمرا بي ٢٥٠ لي ٣٠٠ برضو انت وحنكك (تذكرة بص حمراء ما تشتريها انصحك عشان ما تندم ويجيك غضروف).
١٠. المشوار بياخد من ١٠ لي ١٢ ساعه، شارع كلو جبال ومناظر ظابطه. لكن اكتر من ٢٥ تفتيش في الطريق (خلي جوازك وتأشيرتك قريبات).
١١. اسمرا ظابطه بس شيل معاك سويتر اهم شي.
١٢. لو عاوز تشتري نقفه، اشتري من كسلا اخير ليك كل ما تمشي لي قدام السعر بزيد. البلد ما رخيصه زي ما بقولو ليكم الناس، شيلو معاكم مبالغ مناسبه عشان ما تتصيعو. لو احتجت تفك في اسمرا بتلقى عادي بس اسال بوروك (الدولار بين ١٦٠ لي ١٦٥).
أخيرا ودا الأهم:
الارترين اشكال والوان، في الحدود حقارين، في تسني مستهبلين وغشاشين، في اسمرا راقين ومتحضرين.
[٢٤/١٠, ٢:٥٨ م] سعيد كروبي: " تفاصيل الزيارة الشخصية و العائلية و تكاليف الطريق من كسلا حتى اسمرا عموما "
شروط الزيارة الشخصية في اسمرا :
١- صورة من جواز المسافر
٢- صورة تأشيرة دخول و خروج إريتريا
٣- صور فوتوغرافية خلفية بيضاء (٢)
٤- صور بطاقة الأحوال المرسل(صورة من هوية السعودي)
٥- مستند الزيارة الشخصية
شروط الزيارة العائلية:-
١- مستند الزيارة
٢- صورة اقامة المرسل
٣- صورة جواز المسافر
٤- صورة تأشيرة دخول و خروج إريتريا
٥- صور فوتوغرافية خلفية بيضاء (٢).
رسوم الوكالة في اسمرا (شاملة رسوم السفارة) :-
١- أقل من عمر ٤٠ سنة ( ١٦٥ دولار ) او ما يعادلها بالريال او النقفة
٢- أكبر من عمر ٤٠ سنة ( ٢٠٠ دولار ) او ما يعادلها بالريال او النقفة .
بداية الرحلة :-
اولا : عليك التوجه لمدينة كسلا واستخراج تصريح سفر لدولة إريتريا من جوازات كسلا سعر التصريح ( ١٥٤٠٠ جنيه ) زمن الاستخراج من ساعة ل ٤ ساعة تزيد و تنقص حسب الازدحام .
تانية : التوجه لسوق هيكوتا في كسلا لشراء النقفة (العملة الارترية) .سعرها متقلب جدا سعر اليوم ١ نقفة = ٦٢ جنيه سوداني .
ثالثا : تذهب الى المعبر الحدودي الذي يبعد من كسلا مسافة ٣٠ دقيقة يُفضل القيام صباحا من كسلا لأسباب سأذكرها لاحقا سعر التكسي من كسلا للجوازات الارترية من ٢٠ - ٣٠ الف حسب اتفاقك مع صاحب التكسي .
الجوازات الارترية:-
لما تصل الجوازات الارترية يتم تسليمهم صورة من مستند الزيارة و جواز السفر ولابد ان تكون قد احضرت اكثر من صورة للمستند و الجواز من كسلا لان الجوازات الارترية لاتوجد فيها طابعات .
قبل الساعة ٩ صباحا يتم تسليمك الجواز مؤشرة ولا توجد أي رسوم للتاشيرة الارترية بالنسبة للجواز السوداني ، بعدها مباشرة يتم نقلكم إلى مدينة تسني عبر بصات حكومية مجانية ، ويتم تقديمكم وجبات مجانية عند وصولكم لمدينة تسني و التي تبعد ساعة من المعبر .
مدينة تسني :-
مجرد وصولك لمدينة تسني يجيب ان تتوجه نحو مكاتب حجز تذاكر بصات اسمرا لليوم التاني صباحا حتى لا تنتهي التذاكر ، تجنبا للمبيت يومين في تسني لهذا السبب عليك التحرك باكرا من كسلا .
سعر تذكرة البص تسني - اسمرا ١٠٠ نقفة تعادل( ٦٢٠٠ جنيه )
هناك ايضا و سائل نقل خاصة مثل التكسي او البكس متوفرة في اي وقت سعرها من ٣٠٠ - ٤٠٠ نقفة .
بعد ان تحسم امر وسيلة النقل إلى اسمرا توجه إلى أقرب مركز شرطة للحصول على اذن إقامة في فندق و هذا الإجراء ساهل ولا ياخد وقت ولا توجد عليه رسوم، وهذا الإجراءات في مدينة تسني فقط .
سعر الفنادق في تسني من ١٠٠ - ٢٥٠ نقفة افضل فندق هو فندق (كوستينا ) كما توجد سراير ب ٤٠ نقفة لليوم .
البص الحكومي يتحرك الساعة ٤ صباحا من تسني و يصل الساعة ٢ ظهرا او ٣ و أحيانا الساعة ٤ مساء حسب سرعة البص .
اسمرا :-
لما تصل اسمرا عليك البحث عن الفنادق الشاغرة اغلبها متواجد في شارع الحرية (الاسم الآخر للشارع باللغة المحلية harnet .St ) قريب جدا من مكان و صول بصات تسني. يمكنك المشي بدون الحاجة للتكسي اذا لم يكن لديك امتعة ثقيلة .
متوسط سعر الفنادق لليوم الواحد ٢٥٠ - ٤٠٠ نقفة ، السعر يختلف حسب خدمة الفندق ، افضل الفنادق زادت الخدمات المتوسطة و الجيدة (فندق الخرطوم ، فندق نيالا ، فندق كابرو ، فندق كريستال الخ ....) .
كما توفر كثير من الفنادق اجار سراير و سعر اليوم من ٨٠ - ١٢٠ نقفة
و أيضا غرف فردية سعرها من ١٢٠ - ٢٥٠ نقفة .
الصرف في اسمرا :-
متوسط سعر مصاريف اليوم من اكل و شرب و انترنت من ١٠٠ - ١٨٠ نقفة يزيد و ينقص من شخص لآخر.
أسعار الوجبات العادية مثل الفول و الأكل البلدي عموما من ١٨ - ٣٥ نقفة
أسعار وجبات اللحوم و المندي من ٨٠ - ١٢٠ نقفة
سعر المياه المعدنية غالي جدا يختلف من مكان لآخر و ارخص مكان سوق ميركاتو شارع الحرية ، و الأفضل أن تشرب مياه عادية لتقليل الصرف .
النقفة تعادل = ٦٢ جنيه سوداني
الدولار = ١٦ نقفة
الريال = ٤ نقفة
واخيرا :-
إريتريا بلد آمنة و شعبها راقي جدا ومحب للسودانين أي شخص سافر إريتريا بيعرف هذا التعامل الطيب .
《اي زول عايز خدمة او استفسار اخر اتفضل في اي وقت 》.
تمنياتي لكم بالتوفيق 🤍
