04/03/2024
الروندوني ولا الكامبينغ..
غرام.. حاجة بنينة.. متنجمش توصفها.. ريحة الحشيش و الشجر و التراب.. النسمة الخفيفة عالوجه.. و حتى ريح الشتاء القوي لي ميخليكش ترقد الليل.. ألوان الطبيعة، اﻷخضر و اﻷزرق و البني و غيرها.. أصوات الريح و العصافر و الصوت لي تسمعوا كي تعفس بساقيك على أوراق الشجر الشايحة.. أشكال الصخر منحوتات تخدمت على ملايين السنين ، ألوانها و أشكالها و أنواعها المختلفة تفتح في ذهنك ألف سؤال و سؤال ، تخليك تتأمل في الكون و في الوجود...
من ناحية أخرى الرفقة لي تزيد في الخرجة الشطر بالكلمة الحلوة الي تسمعها و النكتة الضامرة ، بمدة اليد الي تعاون.. الروح الخفيفة و التلقائية الراقية..
التحدي هو جوهر هالغرام ، يخليك تتحدى روحك و تثبتلها انك شخص قوي تحدد أهدافك و تسعى باش توصللها مهما كانت العراقيل..
فيبالك الي التجوال و الرياضات الجبلية بصفة عامة تحميك و تشفيك من برشا أمراض نفسية و جسدية ، تبدلك حياتك إذا مارستها بالشكل الصحيح..
تعلم كيفاش تكون متجول محترف ، إحترم أساس هالغرام ؛ التنظيم ، النظافة ، اﻹحترام ، روح المجموعة ، السلوك السوي ، اﻹنضباط ، و إحترام الوقت و المواعيد..
هذا غرامنا لي يخرجنا مالروتين اليومي، الخدمة ، القراية ، المشاكل و الستراس ينسينا في اﻷمور السلبية و يخلينا نرميوا وراء ظهرنا الدنيا و مشاغلها و همها و نعيشوا مع رواحنا و لرواحنا و نشوفوا الدنيا من زاوية أخرى ، زاوية أحلى برشا مللي نعيشوا فيها و تفرضت علينا 🇹🇳
