29/11/2024
جارتنا تفيق الخمسة ، تعجن الكسرة و تبدل حوايجها و تخرج للشارع الرئيسي تستنى كميون الخدامة تركب مع 20 مرا و تشد الطريق للسانية : ينحّو في الخوخ ، من الستّة .. تبدا الدنيا تسخن ، و الغبرة خارجة من اعواد الخوخ غبرة توكل : الوجه يحمار ، العرق يجبد و الشّمس تلهب .. تتعبى ڨاجوات الخوخ ، غلّة حمرا ، كعبة ورا كعبة ورا كعبة ، ڨاجو وراء ڨاجو ، تتعبى الكماين بالخوخ ، و النساء كلمة لا ، الريڨ مُرّ لايث ، الشّفايف يابسة ، العينين تاعبة حزينة .. ماضي ساعة ونص .. يرجعلهم الكميون .. يركبوا و الشّيفور يوصّي و يعاود «ما تقعدوش ما تقعدوش » يوصي فيهم خاطر نسى ما كبّش فيها سطل ماء باش يبقوا واقفين و هكاكة الكميون يهزّ اكثر ، كيف يقعدو يخسر خمسة ستة بلايص و البلاصة بثلاثة الاف ..
يخرج بيهم الكميون و يصبّهم في الحومة ..
تهبط جارتنا و تمشي تزرب تفارص .. تشعل النّار و تجيب الغنّاي و تخرّج العجينة الي عجنتها الفجر و تحضّر الكسرة و تستنى الحرفاء ، جيرانها و معارف بعاد .. الكسرة بخمسمية ..
عشرين كسرة بعشرة الاف .. وتدخل تحضر الفطور ... مرڨة بطاطا كذابة ما فيهاش حتي سلك دجاج ... و تسايس باش ما تعملش حس.... غطاء كسرونة يطيح .. يخرج الراجل ، كان راقد ملطوخ عينيه حُمر .. و يصيح «عميت ؟» .. كلمة لا .. ما تجاوبوش و تخزر للمرڨة و تحرك فيها و تذوق على ملح على حروره مش ناقصه تڨنڨين ...
يعاود يعيّط : الفروخ متاعك ما خلّونيش نوخذ غمضة .. نا رقدت و انت جيت بحسّك ..
تجاوبو : هاني عشرلاف فوق الفريجيدار ، كي تخرج تسهر جيب فيدك بخمسلاف سميد و الباقي خليه عندك ..
يحطهم في جيبو ..
يحضر الفطور يفطر يشعل سيقارو ، و يخرج ..
يشد طاولة و يبدا يرامي لعقاب اللّيل .. اربعة اطراح رامي ، يعطي للقهواجي العشرة الاف يرجعلو خمسلاف .. يشري بيهم سميد من العطار و يروح ...
يلقى مرتو راقدة يفيّقها. «فز سخنلي العشاء خ نوكل فم و نرقد » ..... 💔😒
منقول
