H&M Trips (2024)

24/12/2021

من احسن الخرجات الي عملناها كيف لعادة اني و صاحبي حكيم وجماعة صحابنا اخرين في chalet طيارة يعمل الكيف في الحمامات و عدينا ليلة مزيانة 😃 حبيت نشاركم شوية تصاور و انشاء الله تعجبكم البلاصة 😍 خليونا اراءكم 😃

20/10/2021

المرة هذي تجيكم بفرصة لاكتشاف تركيا 🇹🇷🇹🇷🇹🇷
14 بلاصة باش نزوروها مابعضنا...من 29 نوفمبر حتى 06 ديسمبر 7 ايام بلياليهم في قروب صغير اما بجو كبير 🥳 خاليو العام هذا يوفى بذكريات حلو معانا و هيا نسافرو مبعضنا 🔥 اكثر تفاصيل على البرنامج كلمونا على 933 764 55

27/06/2020

البلاصة مشينالها قبل ❤
لكن هالمرة رجعنالها بنفس جديد و مع قروب جديد.
أقصى شمال تونس وين الوقت يتبدل و التاليفونات الكل تتزاد ساعة على توقيتها العادي و الشبكة تقريبا منعدمة، في بقعة يصعب الوصول ليها خاصة بالكراهب الصغار .
المنطقة شبه معزولة و مايجيش البالك، كانك اول مرة تجيها، الي فمة مغارة تحت ساقيك تحل عالبحر و تهبطلها بدروج لوح قديمة لكنها شادة روحها بين الحجر تاع الجرف .
المرة هذي نظمنا خرجة في 10 من ناس و كنا ماشين لمرسى ذويبة أما على خاطر الطقس تبدل و ولى ريح و البحر هاج حولنا لكاب حمام باش نحميو رواحنا في المغارة و نعديو ليلتنا فيها برغم الي حتى هي مستوى الماء فيها قدم بحكم المد البحري.
كل شئ كان على فريق التنظيم ،المتريال ،الماكلة ، و حتى من القهاوي و التاي .. حبينا نعملو كامب دو ليكس للناس الي جات معنا ، هزينا كراسي و طواول و الخيم و معون التاطيب و كل شئ.
استغلينا شوية وقت القايلة باش عمنا فيه و بردنا حالتنا و اول العشية بدينا في حوست الكوجينا الي تكفل بيها شاف "خليل" و حضرنا أبن ماكلة تنجم تذوقها طايبة على نار الحطب بمواصفات عالية و تصنيف ممتاز، في نفس الوقت هذا كان علينا انو نخلقو جو للناس الي جات معانا و عرفناهم اكثر على بعضهم و كانت فرصة ليهم باش يتعلمو نصبان الخيمة و تركيحها بحكم كانت اول مرة ليهم.
حضرنا الديكور و اخترنا بلاصة العشاء برغم من ضيق المكان الي كان فيه الماء يقدم ويعلى كل شوية ، لكن مصعبش علينا نقدمو حاجة مزيانا في اضواء رومنسية و جو عالمي على صوت الموجة ، الناس الكل تاكل و تتبنن في العشاء و تستمتع باللحظة في منظر ياسر مزيان وقت الشفق الأحمر، و بعد العشاء القهاوي كانت حاضرة و الغلة تحطت و الموسيقة خدمت و طرح اونو مع المجموعة حلّى السهرية.
الجو كان عائلي و المجموعة تأقلمت مع المكان و تخرطو على بعضهم ، و في اول بوادر الصباح قمنا و حضرنا العصيدة العربي و فطور الصباح الي كان في لمة على أنغام فيروز الصباح 😍 الهدوء و النسمة ميتشراوش بالفلوس .. القعدة حلات و الضحكة علات و لكن ساعة الرحيل دقة و وقت لمان المتريال و تنظيف البقعة جاء.
عدينا ليلة من اروع الليلي و احلاها و كنا محميين و مطمانين على خاطر ابن الجهة "وليد" كان معانا و سهرية كاملة يتفقد فينا و في كراهبنا الي كانت في مسؤوليتو كيما قال هوا.
كل هذا الوصف لا يعادل احساس المغامرة و اللحظة الي تعيشها بين احضان الطبيعة و كيف ماتراو التصاور و روعتهم بعدسة خويا "حكيم" و صديقنا الفنان "محمد" باش نقربوكم اكثر للجو الي عملناه .
احنا غرامنا كبير و في كل مرة نزيدو في الدوزة.
تابعونا او شاركونا متعة اكتشاف بلايص جديدة و عيشو معنا المغامرة مع الهاش اند آم .😁
.

29/05/2020

360° shoots in Turkey

13/04/2020

We miss you Cappadocia

06/04/2020

توحشناك يا تونس 🇹🇳🇹🇳
video : Hakim Ben Kamla
voice over : Captain Meher

02/03/2020

عسلامة les voyageurs ،غبنا عليكم مديدة طويلة شوية اما مرجعنالكمش ايدينا فارغة جينا وجبنا معنا حكاية جديدة حبينا نشاركوكم هالمرة سفرتنا لتركيا و نحكيلكم على جوها و نخليكم تعيشو كل احداثها و تفاصيلها. هالمرة جيناكم من رحلة ياسر مزيانة في اول تجربة لينا لبرة من تونس بعد ما دورنها الكل من الشمال للجنوب قررنا تكون اول وجهاتنا الجمهورية التركية، دولة العثمانيين.
البداية كانت في اتخاذ اول قرار الي هو باش نمشيو وحدنا و مش عن طريق اجونس و عملنا les Réservations الكل بالانترنات Billets و Hotel و باستعمال carte technologique ال Voyage متكلفلناش برشا. و نضمنا برنامجنا من قبل كل نهار شنوة باش نعملو فيه بالضبط باش منخسروش الوقت غادي.
الرحلة كانت على الخطوط التونسية من تونس قرطاج لمطار اسطنبول و قعدنا جمعة كاملة درنا في المولات (venizia mall, mall of Istanbul,Decathlon) وركبنا في البطو مشينا côté asiatique لشارع المظلات في ( ) و شوفنا برج الفتاة من ( ) وين هكالقعدة العربي قدام البحر و في coté européenne منحكلكمش على شارع الستقلال ( ) و الحركة الي فيه وقداه معبي و كلو بوتيكات و حوانت في اخرو شارع ضويق يطل على ( ) بلاصة كلوها jeunes في الليل و تسهر لاخر وقت و تعمل برشا تصاور قدامها يقعدو في البال اما محلاها السهرة في ( ) وين تصورو مع جسر البوسفور و ننصحكم باش تجربو الووفل بنين برشا برغم كيف نتفكر الماكلة الحق معجبتناش برشا لكن عليكم بالمركات العالمية كيما (Burgerking ,KFC) تلقاوهم رخاص و فيهم ماتختارو ... اما لازمكم تجربو كسكروت الحوت و les moules في ( ) بنين و يشبع.
و ماغير مانحكيلكم على سوق فاتيح و السوق المصري و الحلويات الي في ثنيتكم و باش تلقاوهم قدامكم في كل بلاصة و اكيد لازمكم تجربو تذوقوهم الكل .
في مدينة اسطنبول مالازموش تضيعو حتى دقيقة خاطر بخلاف الي حكيتهولكم الكل و الجوامع و المتاحف و القهاوي الي لازم تزوروهم مازال عندكم برشا بلايص اخرى... كما بلاصة وواو كل شي فيها باللون البيض و تطلعلكم الأدرينالين باش تجرب التزحليق على الثلج و الطلوع للقمة بالتليفيريك اما اعرفو شكون يهزكم خاطر الاجنسات برشا اما مش لكلهم باهين و في الطريق تنجوا تشوفو برشا حاجات كيما مصنع الحلقوم و المربا اما مننصحكمش تشريو منهم خاطر اغلى مالسوق . مغامرتنا ماوقفتش غادي و قصينا vol interne و مشينا ل ( )غادي بلحق عشنا جو اخر و بالرغم الي مشوفناش برشا مناطيد بحكم عمال الطقس اما عدينا ليلا والا في الأحلام خاصة في hôtel مزيان ياسر و شفنا مناظر اخرى مختلفة على مستانسن بيه و طلعنا لجبل( ) و ركبنا عالحصنة و درنا في ( ) وقد منوصفلكم الهدوء و الهوا مصفاه متصدقوش .
24 ساعة تعداو روعة و رجعنا لاسطنبول بالطيارة التركية وكملنا استكشافنا للانهج و لشوارع المدينة و عشنا المغامرة في ( ) جزيرة الأمراء الي مشينالها بالبطو و شوفنا برشا جزر و مناطق حلوة في ثنيتنا و عملنا دورة بالبساكل في الجزيرة الي نعتبرها جزيرة العشاق للمناظر الي فيها و الزينة و الرياض الي يرتح البال.
الجمعة تعدات فيسع لكن عملنا فيها برشا جو و عشنا مبعضنا ايامات ميتنساوش و حفضنا برشا تفصيل و تصاور في البال و كان اهم حاجة عتمدناها هي جمع المعلومات من كل حد مشا قبلنا و عن طريق الانترنات و نحب نقلكم الي تركيا متخوفش و ناسها باهين و يعاونوك و المواصلات العمومية فيها مطورة ياسر و باسوام رخيصة تتنقل كيما تحب. في الاخر نقولكم راكم متستحقوش اجونس باش تعمل هذا الكل على قد ماتستحقو اصحاب مقربعين معاكم.
Hakim Ben Kamla Hamza Mhadbi Malik Trabelsi Captain Meher

28/09/2019

"الزريبة العليا" رحلة التجوال في القرية المهجورة ❤

26/09/2019

باش نحكيولكم شوية على بلاصة تبنات من القرن 17 و مزالت محافظة على طابعها المعماري البربري بالرغم من كونها ولات قرية شبه مهجورة توا.
القرية هذه اسمها ‘الزريبة العليا’،(ولاية زغوان) الي كيفها كيما تكرونة و جرادو مبنين في قمة هضبة عالية بشكل استراتيجي وتحكي حكاية حضارة كاملة بقات مرسومة في الحيوط و مكتوبة على الحجر .
في وسط القرية هذه نلقاو زاوية سيدي عبد القادر الجيلاني ، الزاوية هذه كانت كتاب يتعلموا فيه الصغيرات القرآن و اللي بقات معروفة و متميزة بالهندسة المعمارية متعها.
الزريبة العليا بلاصة تحكي تاريخ قديم و وجهة للناس الي تحب تعرف كيفاش اجدادنا كانو يعيشو وشنوة خلاولنا وراهم اما خسارة بقعة كيفها تتلاشة بسبب العوامل المناخية و مرور الوقت مغيرما تترمم و تتحسن باش تبقى رمز من رموز بلادنا و موروث لأولادنا.

23/09/2019

لحضة صعودنا إلى القمة بتقنية °360

22/09/2019

360 درجة باش توصل لدار سالمة 😁

21/09/2019

H&M trips is your eyes to the world ❤
.

19/09/2019

من قلب الطبيعة و باحساس كبير و غرام اكبر حبينا نشاركوكم معنا في متعة هالمنظر المزيان بعد زيارتنا لدار سالمة .. 🇹🇳
دار سالمة هي عبارة على مجموعة من ديار الضيافة (maisons d'hôtes) مبنية فوق جبل صغير و طل على سد (براج المصري) الي هو في حد ذاتو بلاصة تاع تخييم معروفة في بوعرقوب.
البلايص هذي مشينالها وعدينا فيها وقت يعمل الكيف بلاصة تحس فيها بالهدوء و راحة البال بعيد على جوجمة المدينة و حس الكراهب و ضغط الخدمة .
عجبتنا ياسر فكرة المشروع و الستيل الي تبناو بيه البيوت و المطعم و القهوة في غاية الإتقان و كلهم باللوح و تحس روحك في بلاصة من جنوب اسيا الشرقية خاصة في الاطلالة الي من اعلى الجبل حاجة فوق الخيال.
❤
https://www.facebook.com/dar.selma.9

05/09/2019

مش بعيد برشا على أقصى نقطة شمالية متقدمة في القارة الإفريقية (رأس انجلة) ، نلقاو وحدة من أجمل الكابات في ولاية بنزرت و الي هي "كاب حمام".
"كاب حمام" وجهة سياحية من أروع ما ثمة في البلاد تونسية بالرغم الي الوصول ليها صعيب و لازموا 4×4 و زيد الدروج اللوح الي تحسوا باش يطيح بيك و انت هابط للبحر يخليوك تشك في الي انت ماشي تتفرهد ههه.. لكن اول ما توصل للمغارة و تشوف المنظر الخيالي الي فيها تنسى التعب و تعرف قداش تستاهل بلاصة كيما هذي انك تمشيلها .. المغارة باردة مهما كانت الطقس البرّة سخون و متنجمش تصبر باش تهبط تعوم في بحرها.
احنا نصبنا الخيمة على شط البحر الي في وسط المغارة وبرغم من وجود ناس اخرى معانا محسيناش بالقلق جملة و مهما نوصف مش باش نجم نوصللكم احساس الليلة الي عدناها غادي و محلى العومة في الضلام على ضو القمرة و البحر راكح (اما نصيحة متشعلوش نار كبيرة خاطر تتعبالكم بالدخان).
و الصباح معزها كتفيق على صوت صدى الموجة تضرب في حيوط المغارة و تناديلك باش تعوم وتعمل غطسة مع الحوت الي تراه بين ساقيك كما ترا روحك في المراية.
النهار تعدى فيسع و وقت المرواح جا ... البقعة الي قعدت قلوبنا معلقة بيها و الي نعتبروها احسن بلاصة لصيف السنا تلقى شكون لاهي بنظافتها و يعسلك على كرهبتك في الليل بمقابل رمزي و ماتخاف من شئ .
الحاصيلو تجربتنا كان فوق الخيال و حاجة ما تتنساش و عرفنا الي بلادنا مليانة بالبلايص المزيانة و كل مرة نعملوا مغامرة تبقالنا في البال و على خاطرنا نحبوكم كل مرة نحكيولكم على بلاصة من تونس باش تعيشوا معانا الرحلة ..
❤

01/09/2019

من "مرسى ذويبة" في أقصى بنزرت جبنالكم ازين تصاور لهالبلاصة الجديدة و الي مش معروفة برشا...اهل المنطقة يسميوها "ذِرْوة" و موجودة بين 'دار الجنة' و "كاف عبّاد' من معتمدية سجنان.
مرسى ذويبة بلاصة مزيانة ياسر تنجم تتمتع فيها بالبحر و المصيد و حتى الكامب فيها يعمل الكيف و البقعة كالم و متخوفش بالرغم الي الطريق متاعها واعر شوية .
احنا من خلال الخرجة هذي حبيناكم تشوفو تونسنا البية في اجمل حلتها و الي فما بقايع مزالت مش معروفة في بلادنا تستحق انكم تزورها.
تنجموا تتفرج في فيديو البلاصة هذي و تتمتعوا بالمنظر: https://m.facebook.com/story.php?story_fbid=112229986819034&id=111018046940228

31/08/2019

مرسى ذويية الجنة المخفية ❤

H&M Trips