23/08/2015
رأس الشيطان
جبال مائية وأودية وكهوف بحرية رائعة
إزاي تروح
لو عندك عربية متينة هـ تكون أحسن من إنك تبقى تحت رحمة سواق أتوبيس، هلكان من السواقة ليل ونهار. ولو مسافر مع مجموعة كبيرة، ممكن تأجروا ميني باص وغالباً ده بـ يكلف حوالي 1000 جنيه للمشوار رايح جاي، مبلغ معقول لأنه هـ يتقسم على مجموعة كبيرة من الأفراد، ممكن كمان تركب أوتوبيس شركة «شرق الدلتا» من موقف «ألماظة» بـ يروح «نويبع» والتذكرة بـ80 جنيه، بس تكون عارف بالظبط هـ تنزل فين على الطريق وتخلي شنطتك معاك لأن «راس شيطان» مالهاش محطة رسمية ولازم تقول للسواق عشان يُقفلك على جنب مكان ما انت عايز.
إتأكد أن معاك إثبات شخصية بطاقة أو جواز سفر وﭭيزا سارية المفعول لو كنت مش مصري عشان نقط التفتيش كتير على الطريق جوة سيناء وممكن يعطلوك لحد ما يتأكدوا من سلامة أوراقك، ممكن توصل إنهم يرَجّْعوك مكان ما جيت!
ممكن تركب طيارة لمطار شرم الشيخ وتنزل تركب أوتوبيس لمدة 3 ساعات بس كده إحنا مش موفّرين وقت قوي فـ مش مستاهلة تكاليف.
تقعد فين
الفكرة كلها في موضوع الخيم المنصوبة على الرمل، يا إما كوخ على تل أو كشك على البحر على طول، الإختيارين مريحين والأماكن كلها نضيفة، الأكشاك اللي على البحر أرضيتها رمل ناعم بس الأكواخ فيها خصوصية أكتر وأماكن للنوم عالية عن الأرض وليها شبابيك خاصة بيها. الأسعار للمكانين بـ تبدأ من 25 جنيه للليلة أياً كان عدد الأفراد اللي هـ يناموا جوه. الحمامات مشتركة بس نضيفة وفيها مية جارية. ورق الحمام هناك برة الفاتورة لو حابب تاخد معاك من هنا وإنت رايح.
الكهرباء هناك بمولدات وده معناه أن النور هـ يتقطع على نص الليل فـ خد معاك شمع وكشافات وبطاريات كفاية، وتبقى فكرة كويسة لو خدت مبيد حشري وملايات ومخدات صغيرة أو " Sleeping Bag " أو أي حاجة ما تقدرش تعيش من غيرها. بـ نرشحلك مخيم «عياش كامب» (للإتصال كلم: 0104442147 ) عشان المكان مميز والعاملين فيه متعاونيين ، ده غير أن في صخرة ضخمة على البحر مثالية إنك تقعد عليها وتِعد النجوم، لو حابب. في خيارات تانية للأماكن زي «كاسل بيتش كامب - Castle Beach Camp » ورقمهم: 0127398495 أو «بيترا كامب- Petra Camp » ورقمهم: 0104722001 ودول مشهورين بالأكل اللي بـ يقدموه.
تاكل إيه
الأكل من أمتع الحاجات في الرحلة، الفطار بـ يكون وليمة من البيض والعيش البدوى والفول أو البطاطس والمربى والزبدة وسلطة الفواكه مع شاي أو قهوة كل ده بـ10 جنيه، وطول اليوم ممكن تطلب حاجات، بطاطس محمرة، بيتزا وسندوتشات وعصاير وصودا. بالليل المنيو بـ يكون بدوي برضُه وفي رز وخضار ولحمة أو سمك وفي نظام دفع شبه متفق عليه هناك هو أنه بـ يجمع الفاتورة وتدفع مرة واحدة وأنت ماشي من المكان، فياريت تكون عارف وحاسب انت خدت أيه طول فترة إقامتك، أكلك وشربك في 5 أيام المفروض ما يعدوش 250 جنيه ده لو بـ تاكل كتير كمان، فما تحملش هم الفلوس وإستمتع بالرحلة.
أنشطة
أحلى نشاط تعمله هو الإسترخااااء، الخيم والكراسي اللي على البحر إتعملت عشان كده. خد معاك كتب ومجلات وكوتشينة وطاولة أو أي آلة موسيقية، وخد شيشتك معاك لو عايز تشيش على البحر. لو بـ تزهق من القعدة ممكن تتمشى أو تتسلق التلال الصخرية اللي برة المُخيم، وممكن تاخد مركب وتعمل رحلة بحرية وتستكشف المكان، معظم الناس بـ يناموا بدري وبـ يصحوا بدري عشان يستفيدوا بأطول وقت ممكن في النهار.
تروح إمتى
المُخيمات هناك بـ تفتح عادةً من أول فترة الربيع لحد آخر الخريف والجو بـ يكون رائع في الفترة دي، لو حابب الشط والمية أكتر من أي حاجة تانية روح في شهر يونيو أو يوليو، بس خليك فاكر أن مفيش تكييف وشهور الصيف عموماً حر جداً هناك. زيارة الخريف أحسن كتير بس ياسلام لو مافيش ناموس تبقي مالهاش مثيل.
الناس هناك من ثقافات وجنسيات مختلفة. لِمْ مجموعة ظريفة من أصحابك وروحوا قضوا أجازة في الشمس هناك، ممكن «راس شيطان» تخطف قلبك وتبقى مكانك المفضل للأجازات بعد كده.
