31/10/2022
السلام عليكم ورحمة الله وبركاته .
ناس بزاف حابة تعرف كيفاش يعالجو الملف الخاص بطلب التأشيرة في القنصليات تبع تفهم :
اولا من يقوم بمعالجة الملف هو ضابط القنصل وليس القنصل.
ثانيا القنصل هو من يصادق على التأشيرة او الرفض يعني هو لي يسنيي عليها .
اول حاجة يبدا بيها يضرب طلة خفيفة على الفورميلار يشوف اذا راك متزوج او اعزب معمر كامل او فيه نقص او اخطاء .
ثاني حاجة يشوف تأمين السفر
ثالث حاجة يشوف حجز الفندق و تاريخ الذهاب والاياب + تيلكس الطائرة ويتحقق من التواريخ ويحاول يفهم وين راك رايح وقتاش تروح وقتاش ترجع واش راح دير ويتحقق من صحة الوثائق المقدمة ، اذا مافهمش ديراكت يكوشي على موتيف 2 وبالتالي راك ديت رفض مبدئيا ولكن يكمل يدرس الملف .
ثالث حاجة يشوف شهادة العمل تاعك و شهادة الانتساب للضمان الاجتماعي ويتأكد من صحة الوثائق ، كاين قنصليات يعيطو للمؤسسة لي تخدم فيها ، وكاين لي يدخلو الكود QR،، لي يجي في شهادة الانتساب للضمان الاجتماعي ، اذا لقاك مدرح ولا مسكاني دوسي ديراكت يكوشي على موتيف 12 ويكمل يدرس الملف .
رابع حاجة يشوف ليفيش دوباي وشحال تخلص ويزيد يشوف رولفي دوكومت دينار شحال عندك و يشوف شحال عندك اورو واسكو عندك بطاقة بنكية بالاورو ، ويتحقق من صحة الوثائق ، اذا شك بلي الدراهم ماشي تاعك ولا تڨونفلي الكونت بزاف يعني ماشي منطقي مثلا نت تخلص 5 ملاين شهريا وحاط بلي عندك 4000 اورو معناها يشك بلي راك مسلف الدراهم ماشي تاعك وبالتالي يكوشيلك على رقم 4 واذا لقا الخلصة تاعك ضعيفة و الاورو قليل يعني ماراح يستفادو منك والو يعطيك موتيف 3 ويكمل يدرس الملف .
خامس حاجة يشوف اذا عندك فيزا الثلات سنوات الاخيرة او الرفض ، واذا شك بلي رايح تروح وماترجعش يعطيك موتيف 13 وبالتالي كمل معاك واذا منعت من الروفي في المراحل هادو كامل يزيد عندو زوج خيارات يا إما يقبل ملفك و يعطيك هو التأشيرة ولا يكتب بلي الملف تاعك مقبول ولكن يترك القرار للقنصل ، يعني القنصل يزيد يشوف الدوسي تاعك ويقرر القرار النهائي هادي تصرا في تأشيرات العمل (دافير) ولا الدراسة بزاف .
اذا كان ملفك مقبول ولكن الكوطة ماكانش يعطوك موتيف 10
موتيف 11 و 12 خاص بالتدراح .
هادي هي باختصار واحد مايخرط عليكم ، ترجع على حساب شخصية ضابط القنصل اذا كان عنصري راح يتعامل معاك بعنصرية اذا مافيكش فايدة ديراكت يعطيك روفي .
