أرح-Arrah

11/10/2022

هنا امدرمان في الإذاعة البريطانية!!!

الليلة حديثنا ح يكون عن شخصية من عباقرة الإذاعة في السودان و بريطانيا كمان، كان مقدم لبرنامج اذاعي في بريطانيا و مفترض افتتاحية البرنامج هي "هنا لندن" لكن لشدة الشوق للوطن و خاصة امدرمان قال"هنا امدرمان" و الخطأ دة كان ح يخسرو الوظيفة لولا ارتجل بيت للشاعر شوقي "وطني لو شغلت بالخلد عنه.. لنازعتني اليه في الخلد نفسي"، و من هنا ارتبط صوتو المميز بعبارة هنا امدرمان و لعلو الصوت المميز و التمكن اللغوي اكتر حاجتين اتميز بيها💙
من أشهر البرامج اللي قدمها في الإذاعة السودانية برنامج "من أرشيف الإذاعة" قبل 5عقود تقريباً و كانت فكرتو لتطوير الإذاعة في السودان عن طريق اختيار شريط اذاعي قديم و التعليق عليه و على الملابسات اللي فيه...
و دي نبذة بسيطة عن العبقري الراحل المذيع أيوب صديق له الرحمة و المغفرة💙.

#أرح

09/10/2022

عاصمة ولاية شمال دارفور و مدينة شهدت أحداث تاريخية عظيمة، و كانت عاصمة لسلطنة الفور.
ارح الليلة نتعرف عليها ك مدينة سياحية..
نسبة لتاريخها الحافل فهي وجهة مناسبة جداً لكل إنسان بحب الثقافة و الآثار و من ابرز المعالم اللي لاااازم تزورها لما تمشي الفاشر هي قصر و مجمع السلطان علي دينار، السوق الكبير و آبار قدو وفي مقولة شهيرة بتقول اللي بشرب من آبار قدو لازم يرجع ليها، و بالنسبة للناس البتحب الفاكهة لااازم تمشو سوق امدفسوا لان هناك ح تلقى كل الفاكهة بتاعة جبل مرة و كمان كل منتجات دارفور الغذائية التقليدية.
و كمان بتقدر تستمتع بكل المناظر الطبيعية بكل سهولة لان في شبكة مواصلات بتربط كل القرى مع بعض.
التنوع القبلي و الثقافات الكتيرة دي اسباب صنعت من الفاشر مدينة مميزة جداً و هناك ما ح تحس انك سائح و بعيد من أهلك 💜ح تتفاجأ من الإلفة اللي ح تلقاها بس شنو انت اتوكل و امش شوف الفاشر و ما تنسى تدي جبل مرة طلة😎

في التعليقات ح تلقوا ليه الفاشر اسمها الفاشر و شوية مقولات اشتهرو بيها سكان المنطقة هناك
ما تنسوا اللايك و الشير
#أرح
#الفاشر

29/09/2022

💜

مبارك النجاح لطلاب الشهادة السودانية 💜

و نحب نقول لكل طالب و طالبة ما نجحوا او ما وصلوا للنسبة العايزنها it's okay عبر عن حزنك بس ما تطول لان لازم تصل لهدفك و ما تستلم ابداً ولا تسمع للمحبطين، جهزوا للعام الدراسي بكل حماس و أمل و ربنا اكيد ما ح يضيع تعبكم و كلو لخير 💜، و يا ريت اولياء الامر يكونو ملاذ امن و أمل لأطفالهم في اللحظات ادعموهم و شجعوهم و اغمروهم بالدعوات السمحة💜

#أرح

25/09/2022

مدينة موجودة من 4000 عام ق. م!!!

ايوة ما تستغرب لان الحضارة في السودان قديمة و عريقة جداً أرح الليلة نتعرف على مدينة عريقة جداً و هي
#الكوة
معنى الاسم هو انحناءة النهر، و الموقع المميز للمدينة صنع منها مركز حضاري مهم و نسبةً لأرضها الخصبة كثرت فيها الحدائق و البساتين و زراعة قصب السكر و عشان كدة بنلقى حولها ثلاثة مصانع لتكرير السكر هي "مصنع عسلاية، كنانة، و النيل الأبيض".
و بسبب قِدم الحضارة في الكوة بنلقى فيها آثار تعود للعصر الحجري، أبرزها أعمدة حجرية و قطع من الأدوات الفخارية ترجع لحضارة قديمة تسمى "حضارة الشهيناب" بالإضافة لمعبد بناه الفراعنة و كمان في آثار لقصر يسمى ب"قصر أُم صبروا".
و كمان من الحجات البتميز مدينة الكوة انها مدينة علم و علماء و فيها تم افتتاح اول مدرسة ابتدائية في عام 1905 و فيها ثاني مدرسة على نطاق السودان بالكامل بعد ٣ سنوات من انشاء كلية غوردون.

و لسة سودانا فيهو اكتر و زي ما كان ماضينا عظيم أرح نصنع حاضر و مستقبل عظيم💜
#أرح
#الكوة

18/09/2022

( الخيل تجقلب والشكر لي حماد)

حماد دا منو وعلاقتو بالخيل شنو؟
حماد دا واحد كان بحب بنت السلطان، وفي ليلة مظلمة كدا اتسلل قصر السلطان عشان يلاقي حبيبتو، لكن حماد انفضح في اليوم داك والسلطان كشفو، فقرر السلطان إنو يهاجم آل حماد الصباح بدري.
حبيبة حماد عرفت الخبر فقامت رسلت سفير لي حماد توريهو إنو السلطان كشفو.
حماد زولنا خواف كان طوالي رسل لي ودعمه وهو من الفرسان الأشاوس وكلمو بقصة السلطان، ود عمه الشجاع رد عليهو 😞 إذا جنا الليل فدقوا النحاس وأعدوا العده) .
فلما جاء الصباح اتجمعوا القوم بقيادة ود عمه وهجموا على القصر ودارت معركة قوية بين السلطان وآل حماد. بنت السلطان كانت مراقبة فتحت الشباك وشافت الخيل (تجقلب) ساي و المعركة حامية بين الفرسان ف طلقت (الزغاريد) وقالت: عيني باردة عليك ياحماد😂
وحماد كان بعيد حتي أنه م هبش ليهو سلاح بي يدو😂.
الروايات كتيرة في الأمثال السودانية فالبعرف رواية تانية يورينا ليها في التعليقات.

#أمثال_سودانية
#أرح

11/09/2022

شخصية أسرت السودانين كلهم و خاصة فئة الشباب و ليه الفضل بعد الله في إصلاح حياة كتير من الناس ..

مين فينا ما بعرف الشيخ محمد سيد حاج رحمه الله واسكنه فسيح جناته...
شيخ وداعية إسلامي معروف بين الشباب خصيصا.. انتشرت محاضراته وخطبه قبل وبعد وفاته.
اتولد في مدينه حلفا الجديدة وعاش معظم حياته في الحاج يوسف وشرق النيل
عندو زوجتين وولدين وبتين ...نسبه من قبيلة الفقراب وهي قبيلة حلفاوية شهيرة.

بداياته الدينية قبل التعليم الأساسي لمن وداه ابوه لي خلوه الحاج يوسف لتحفيظ القرآن
بعدها التحق بكلية الشريعة جامعة امدرمان الإسلامية.
وكان من اكتر الشيوخ علما وفقها في الدين .. بتمتاز محاضراته وخطبه بالسهولة والترغيب في الدين لا التنفير زي ما بعملوا اغلبية الشيوخ حاليا
ومن مؤلفاته الشهيرة (لماذا لا ألتزم؟)،(فقة الائتلاف)،(الحروب الصليبية بين الأمس واليوم).

بجانب الدعوة الاسلامية شغل الشيخ محمد سيد حاج عدة مناصب مثل مساعد الأمين العام للشؤون الخارجية وعضو المجلس الأعلى للدعوة الإسلامية.
حقق الشيخ محمد كتير من الإنجازات في حياته، ورغم صغر سنه لكن حكمه عقله وأيمانه أهدوا لطريق الرشاد .
اتوفى يوم السبت الموافق 24 أبريل 2010 أثر حادث مروري رحمه الله رحمة واسعة .
ح تلقوا في التعليقات روابط لجزء من المحاضرات القدمها.
و اخيراً ما تنسوه من صالح الدعاء 💜
#أرح

09/09/2022

اسمها الكامل إليزابيث أليكساندرا ماري، أشهر ملوك العالم عامة و بريطانيا خاصة و اطولهم جلوساً على عرش المملكة لفترة دامت 70 عاماً..
و كان للملكة الراحلة تاريخ طويل مع السودان إذ كان السودان أحد مستعمرات الإستعمار البريطاني و نال استقلاله عام 1956 للميلاد و في عام 1965 قامت الملكة الراحلة إليزابيث بزيارة للسودان و الهدف منها كان التوجه للدمازين و مشاهدة بناء سد الروصيرص، و أيضاً زيارة أجزاء من مشروع الجزيرة ب ود مدني الذي انشأته الحكومة البريطانية.
آنذاك كانت العلاقة بين السودان و المملكة المتحدة قد قطعت شوطاً كبيراً كما كان السودان يلقب و استمرت بريطانيا بدعمه.
هذه الزيارة أكدت العلاقة الودية بين البلدين بعد الاستقلال.
و بالأمس تلقت المملكة المتحدة خبراً مفجعاً بوفاة الملكة إليزابيث الثانية عن عمر ينهاز ال96 عاماً،وهنا انتهى تاريخ أشهر ملكة بريطانية.

#أرح

07/09/2022

طال الشوق عليكي يا الباوقة ام زهور** جنة العشاق يا السكانا حور✨

أرح الليلة نتعرف على منطقة #الباوقة او كما لُقبت "جنة الشمال" وبالجد هي جنة!
الباوقة مكان خلاب جداً جداً في ولاية نهر النيل وتابعة لمحلية بربر، الباوقة تعتبر من اكتر المناطق الطبيعية الجذابة في السودان كله مش في منطقة بربر بس، مافي شخص ما زار الباوقة مرة وما ثبتت الزيارة ديه في ذاكرته، سكانا الاصليين بيحبو يسموها باوقة حمد والامين وهم الاجداد الانقرياب وهم معظم السكان هناك وغيرم..
الباوقة فيها تنوع قبلي زي الجعليين والرباطاب. وبغض النظر عن جمال وطيبة اهل الباوقة وتحنانم وكرمم الا انو منظرا ما بيقل جمال لدرجة انو اشهر الشعراء والمغنيين الكبار السودانيين غنوا فيها زي ابن البادية وقيقم واللحو وغيرم؛ الباوقة اكتر حاجة مشهورة وبارزة في معالما الخضرة الكثيفة والنخيل والشجر الكتير والجناين والتمر بأنواعه واشجار المنقة والدوم، الباوقة عامة بتكون مخضرة السنة كلها ودايما في انتاجية للحاجات المشهورة بيها، فلو محتاج تمشي مكان وترفه وتعمل ذكريات بنصحك تتوكل وتمشي الباوقة.
#أرح
#الباوقة

23/08/2022

"يا دُرة حَفَها النيل * وَاِحتَواها البر"
منو فينا ما بعرف البيت الشعري دة و صاحبو بس الليلة أرح
نحكي عن الشخصية السودانية الجميلة والمؤثرة صاحب أبيات قصيدة توتي بزيادة حبتين😉

هو منو وشنو إنجازاتو ...

من مواليد العام 1912 في حى الركابية بأمدرمان مدينة الثقافة، نشأ التجاني يوسف بشير في بيئة ذات ثقافة دينية محافظة، وسموهو بهذا الاسم تيمناً بصاحب الطريقة التجانية الصوفية المعروفة عندنا...

التجاني حفظ القرآن في خلوة عمة الشيخ محمد الكتيابي، واتلقى علوم اللغة العربية والفقه والأدب والفلسفة و دة سبب تميز كلماتو و ظهور الطابع الديني فيها.
عمل بائعاً في محطة وقود و صحفي و ساهم في تحرير صحيفة (ملتقى النهرين).

التجاني له ديوان شعر بعنوان #إشراقة ويحتوي على عدة قصائد منها الصوفي المعذب، الخرطوم، انشودة الجن، اليقظة وقلب الفيلسوف
شعره بمتاز بالروعة والقوة والجزالة وايضاً كان يمتاز شعره بملامح الرومانسية العظيمة...
التجاني الكلام عنه م بنتهي بس اتمنى نكون عكسنا و لو جزو بسيط عنو...
نتلاقى في مساحات جاية ان شاء الله.
الناس العميقة اظهرو لينا بواحد من ابياتو في التعليقات😉
#أرح

21/08/2022

حياك مليط ثوب العارض العادي * وجاد واديك ذا الجنات من واد
كلنا بنكون مرت علينا قصيدة محمد سعيد العباسي عن مليط وبنكون نفسنا نعرف عنها أكتر وأكتر أرح مع بعض نمشي مليط ونستمتع بجمالها.. .

مليط بتقع في شمال دارفور على بعد 65 كلم من مدينة الفاشر، من الشمال بتجاورها محلية المالحة ومن الشرق محلية الكومة وكتم ومن الجنوب محلية الفاشر.
مليط بتتقسم لثلاثة اجزاء الجزء الأكبر منها في شمال الوادي الرئيسي والثاني جنوبا والثالث غربا .
في مليط كمان بنلقى ميناء بري بربطها بالجمهورية الليبية.

يعتمد سكان مليط بشكل رئيسي على الزارعة و90% من سكان المدينة من قبيلة "البرتي" وبما إنو مليط عاصمة المجلس الريفي فالإدارة الأهلية للمجلس تملكها قبيلة "البرتي" .
طيب شنو ؟
مليط فيها معالم سياحية جميلة وخلابة لازم نزورها زي جبل الكلو والكلوبات، جبل كوت، آبار أم قندول وسد مليط بالإضافة للمناظر الطبيعية والخضرة والأشجار اليانعة في المدينة.

فكم جلوت لنا من منظر عجب
يشجئ الخلي ويروي غلة الصادي
حياك مليط💜
تعالوا التعليقات و اعرفوا ليها اسمها مليط تحديداً😉
#أرح
#مليط

18/08/2022

😪 : والله الدنيا دي بقت صعبة وجري شديد الواحد بقي ما قادر يقعد
😉 : دنيا دبنقا دردقي بشيش
😢 : قصدك شنو إنت ؟!
🤗 : طيب طيب دا مثل عند أهلنا في دارفور ، معناه إن أخذ الدنيا بحذر وتأني ، وما تستعجل علي أمورك علشان ما تضيع من يدك .
طيب دبنقا دي شنو ؟
دبنقا دي عبارة عن مجسم أو وعاء كبير مصنوع من الفخار أو الطين ويكون رقيق جدا سهل الكسر يستخدم عوضاً عن الثلاجات ، للحفاظ علي الطعام بجوده جيدة . ولما قالوا درقدقي (دحرجيه)بشيش (بتأن يعني براحة و بحذر ) يعني حرك برفق علشان ما ينكسر منك .
العبرة من المثل :
ما تستعجل الأمور وفوض أمرك لربنا وإتأني في إختياراتك ، وإني العجلة ممكن تخليك تخسر أكثر من إنك تكسب من وراها .
وزي ما في عاداتنا السودانية بنطبخ بالفحم وبنعمل القهوة بالفحم فطعمهم بيطلع أجمل لأنه أخدوا زمنهم علشان يطلعوا لينا بنتيجة ترضينا.
كسرة*
عرفتوا ليه الناس بتفضل إنها تشرب القهوة عند صاحبات الشاي😉
شاركونا في التعليقات بمعلوماتكم عن المقولات السودانية،
و دي كانت محطتنا اليوم معاكم
في أمان الله.
#أرح

16/08/2022

ليمون بارا أصفر كبااراا💃

ماف سوداني الا وسمعها ورقص عليها، بس ليه بارا تحديداً و الليمون خصيصاً؟!
بسيطة يخوانا لانو بارا جميلة شديد و تستاهل يتغنوا بيها و الليمون أشهر حاجة في بارا.
#أرح الليلة نتكلم عن الجميلة #بارا و السياحة في بارا 😌ستفوا الشنط لان بعد البوست دة طوالي ح تكون عايز تركب أقرب باص و يلا على بارا🤘
اول ما تمشي بارا لازم تمر بمدخلها العظيم و الفريد المحفوف بشجر النيم المتداخل و كأنو بستقبل في زوار بارا، و ما ح تحس بالغربة هناك لانو ح تلقى السكان البشوشين و الكريمين يعني ح تطلع من بارا مروق و كمان عندك معارف🤣دة اذا قدرت تخلي الجمال دة و تطلع، و إذا أنت زول بتحب الطبيعة ف بارا خيار مناسب جداً و ح تلقى هناك من أشهر المعالم هي السواقي الطبيعية و كلها عبارة عن أشجار فواكه و خضار و كمان بارا معروفة بتضاريسها الرملية البيضاء.
هل في سبب يمنعك تمش بارا؟!
طبعاً لا فاااشنو ستفو الشنط و أرح و ما تنسوا توثقوا 😎📸

انزلوا الكومنتس و اعرفو اكتر عن بارا َو كمان ملاحظين في البوستر في صورة لشخصية تعالو الكومنتس برضو و اتعرفو على واحدة من أعظم النساء في السودان.

#أرح
#بارا

11/08/2022

#الجار
معروف في السودان عندنا مقولات كتيييرة بتتخصر لينا الكلام الكتير و بتكون بليغة و مفهومة شديد، #أرح الليلة نعرف واحدة من المقولات دي😁.
"جارك القريب ولا دة أمك البعيد"
العبارة دي فيها دلالة واضحة على إنو القرب مهم للحفاظ على المودة بين الناس و الأولية في حياتك للناس القريبة منك من ناحية مكانية حتى و لو ماف رابطة دم بينكم، و تقريباً السودان خاصة مشهور بعلاقات الجيرة الطيبة، لدرجة احياناً الناس بتفتكر انو في رابطة دم بينك و بين جارك .
جارك هو البفزعك اول زول وقت الشدة و يطبطب عليك و وقت الفرح كمان هو أول انسان بشاركك، عشان كدة حبوباتنا في مقولة تانية قالوا"جارك قبل دارك" يعني قبل ما تختار ليك دار اعرف جيرانك لانو هم اللي ممكن يخلو حياتك جنة.
و من هنا نقدم تحية لكل جار هين لين عوضنا عن بُعد الاهل بنحبكم جداً💜
تاق لجيرانكم الظابطين💜
#أرح

09/08/2022

سهرنا الليل و كملنا..
في ظلال عنيك النعسانة..
بعد الكلمات دي اكيد جا في بالك فنان واحد بس😁 أرَّح الليلة نعرف عنو شوية..
واحد من أشهر الفنانين المعاصرين في السودان و متميز بأسلوب خاص في الأداء و اختيار الموسيقى، و بالمناسبة هو من مواليد مدنية الفن و الثقافية #ودمدني.
بداية ظهورو كانت في حفلات الأحياء بالعاصمة، و كان في الوقت داك بغني اغاني الفنانين الكبار بس بأسلوبو الخاص و بعدها انتج أول أغنية هو لسة طالب جامعي😎 و كان اسمها "بوعدك يا ذاتي يا أقرب قريبة".
زي ما قلنا انو هو بتميز بأسلوب غنائي خاص و اللي هو الميل للالحان الخفيفة الميلودي و الإيقاع البطئ و دة بوست بسيط عن واحد من عمالقة الفن السوداني .

و ختاماً
شاركونا في التعليقات بكلمات بتحبوها لابو العركي. 💜
#أرَّح

07/08/2022

ود مدني
منو فينا ما بحبها، مدينة سودانية جميلة شديد و عندها تاريخ إقتصادي عسكري ديني عظيم وكمان تستحق انك تعمل فيها رحلة سياحية و ود مدني طلعت لينا شخصيات سودانية عظيمة جداً في مجالات كتيرة أرّح نتعرف عليها..
بجانب وجود الحدائق و المنتجعات و المرافق السياحية الموجودة على طول كورنيش شارع النيل كمان في فنادق كويسة مختلفة الدرجات زي فندق إمبريال و يوغسلافيا و غيرهم و لعشاق الريف و الخضرة احب اقول ليك ود مدني وجهتك الصح.

طيب متين اتوجدت ود مدني؟
سنة ١٤٨٩ لما حل فيها الفقيه محمد الأمين بن الفقيه مدني اللي نسبو متصل ب ابن أبي طالب بن عبدالمطلب الهاشمي و أقام فيها ضريح و هو الآن خلوة لتحفيظ القرآن و تعلم الفقه.
و من ناحية اقتصادية ود مدني فيها أكبر مشروع زراعي في السودان و دول أفريقيا كان و ما زال اكبر المشاريع الزراعية في السودان.
و ك نصيحة مننا سافر بالقطر و استمتع بالجمال.
و دي كانت وجهتنا لليوم بتمنى نكون قدرنا نوصل و لو جزو من فخامة ود مدني.
#أرَّح

04/08/2022

السلام عليكم و رحمة الله و بركاته 🤍

أرَّحْ
أرح في اللهجة السودانية بتعني تعال نمشي..
صفحة أرَّحْ هي صفحة تم إنشائها من قبل شباب سودانيين ، لتسليط الضوء علي مناطق بلدنا الجميلة و ناسها العظماء اللي حتى نحن ك سودانيين يمكن ما بنعرفهم،و كمان ح نتطرق لجزء من تاريخ السودان العظيم ونوري أنفسنا كشعب سوداني إنو بلدنا فيها مناطق سياحية كثيرة و تاريخ حافل بالعظماء بس اغلبنا ما منتبه ، عشان كدة أرح نعكس لنفسنا و ل الأجيال الجاية قدر شنو السودان جميل و ممكن نخليه أجمل💜
و الحمد لله خلال الفترة الفاتت قدرنا ننجز و نعكس جزو صغير من السودان و شكراً ليكم على ال1K و ان شاء الله الجاي أحلا و أجمل💜
و زي ما بنقول عشان نبنيهو أرَّح نتعرف عليهو💜
نتلاقى في ساعة خير..
#اأرَّح

01/08/2022

القراءة بالنسبة للقُراء اسلوب حياة و صعب جداً يمر يوم من غيرها ،أرَّح الليلة نتعرف على واحدة من الكُتاب المميزين جداً في السودان.
كاتبة ،إعلامية، مُحاضرة، صاحبة دراسات عن التسامح و الإعلام، من أشهر أعمالها "خبز الغجر" و هي رواية بتسلط الضوء على قضايا عديدة زي العلاقات بين المجتمعات المختلفة و أهمية العيش السلمي.
هي الكاتبة آن الصافي💜
#أرَّح

29/07/2022

سياحة، آثار تاريخية،و رفاهية إقامة!!!
الكلام دة كلو ح تعيشوا لما تمشي مروي، هناك ح تلقى قرية مروي السياحية المزودة بكل سبل الراحة من تصاميم و مطاعم ظابطة شديد و كمان بتقدر تمش تزور أبرز معلم فيها "سد مروي" و تستمتع بمنظر الموية المتدفقة من البوابات و كأنها شلالات... و بالنسبة للآثار ف ح تعيش تجربة فريدة في وسط أهرامات نوري و مدافن الكرو التاريخية و دة كلو جنوب السد ب40 كلم و كمان ما تنسى تمش جبل البركل .

اذا مشيتو مروي او عندكم ليها صور ظابطة شاركونا بيها شاركونا
الناس اللي ما مشت منتظرين شنو أرحكم مروي🚶🏾‍♀️

#أرَّح

26/07/2022

السلام عليكم و رحمة الله و بركاته

!!!!
اول ما تسمع كلمة "طبيعة" طوالي خيالنا بعرض لينا صور جميلة بحر رمل أو خضرة و جبال أو حتى شلالات و تلقائياً الواحد ببتسم كأنو قاعد وسط منظر طبيعي 🤤..
طيب هل انتو عارفين انو عندنا في السودان منطقة جميلة شديد و ماف عبارة توصفها، منطقة جامعة لكل الصور الطبيعية اللي ممكن تخطر في بالك ممكن نعتبرها من المناطق الرهيبة المنسية و المُهملة في بلدنا الكبيرة دي و اتشكلت نتيجة لتقسيمات النيل و تبدأ المنطقة دي من بداية سد مروي شرقاً و لحدي مدينة نوري غرباً و اسمها "جزر الكاسنجر" 🤤..
"جزر الكاسنجر" واقعة في شمال السودان بالتحديد في مروي
يعني شلالات بتلقى خضرة بتلقى رمال و نهر و جو لطيف بتلقى،طيب ليه اسمها جزر؟ لان ببساطة هي جزر مرتبطة ببعض عن طريق ممرات مائية في نص النيل الجميل و عددها75 جزيرة بإختصار فيها كل مقومات السياحة و الروقان و أول ما تدخلها من الدهشة بالجمال الخلاب ما ح تكون عايز تطلع منها ..
و بسبب موقعها المتميز في مروي اللي هي تعتبر من أقدم الحضارات بنلقى انو الكاسنجر فيها موارد غير محدودة و كمان في بعض الجزر اخدت طابع ديني بسبب بعض الرموز اللي عاشوا فيها زماان و من أشهر الحكايات عن الكاسنجر فيضان 1988 و بسببوا اندمجت بعض الجزر و من قرابة ال100 جزيرة اصبحو 75جزيرة.
طيب هل كل الجزر دي قابلة للسكن؟!
طبعاً لا في جزو منها قابل للسكن و جزو بس للحياة البرية.
و كنصيحة اذا عايز تستمع بكل تفاصيل جمال الكاسنجر انسب زمن هو من شهر أكتوبر و لحدي شهر أبريل..

بالنسبة للناس العايزة تمش اكيد عندهم سؤال هل الكاسنجر فيها منتجعات؟!
ايوة في منتجع واحد و على الطراز السوداني بقدم كل أنواع الاطعمة السودانية و هو بالتحديد في جزيرة عباس و هو المنتجع الوحيد فأول ما تقررو تمشوا الكاسنجر احجزو سرعة 😁.
و اخيراً في مقولة انو كثرة الأسماء دلالة على عظمة المُسمى و دة بعكس عظمة الكاسنجر لأن عندها أسماء كتيرة على سبيل المثال"سودري-اتيميري-اقيري" .
السودان مليان مناطق جميلة بس انتو عاينوا كويس💜.
بتمنى ك سودانيين نشوف بلدنا بنظرة تانية كلها فخر و أمل، و كمان رجال الأعمال و أصحاب الأموال يحاولو يعملو منتجعات في الأماكن الجميلة دي💜منتجعات يعني سياحة يعني سُياح يعني عملة صعبة يعني وظائف و فرص للشباب😌.

تابعوا التعليقات و استمتعوا بالجمال دة💜
#أرَّح

25/07/2022

الأُبيض"عروس الرمال"

كلنا سمعنا عنها بس هل كلنا بنعرفها؟!
اول شي أرّح نعرف موقعها بالضبط، بتقع الأبيض في وسط شمال كردفان و تبعد حوالي 588 كلم جنوب غرب العاصمة الخرطوم.
و انت في طريقك ليها ما ح تحس بتعب السفر خاصة إذا كنت من النوع البستمتع بمنظر الجبال و المراعي اللي ح تلقاها ممتدة على جوانب الطريق🤤.
هل تعلم عزيزي القارئ انو الأبيض فيها اكبر سوق محاصيل نقدية في السودان؟؟
و هل تعلم أيضاً انو فيها أكبر بورصة للصمغ العربي على مستوى العالم؟؟!
لسة ما خلصنا، و كمان الأبيض عبارة عن ملتقى طرق مهمة و مركز تجاري و زراعي بارز و فيها بنلقى خط النفط الممتد من الجنوب نحو الشرق إلى ميناء بورتسودان.
و تعتبر كنيسة الأبيض العريقة من اشهر المعالم و محط انتباه الزوار و تعتبر الكنيسة دي ملتقى لطوائف المسيحية المختلفة.

طيب أرح نعرف أشهر الأسواق التجارية في الأبيض، سوق ابو جهل أو ما يعرف بسوق بن مسعود هو من أقدم الأسواق الشعبية التي توجد في السودان.
ويعتبر من أكبر الأسواق السودانية والعربية في مجال بيع المحاصيل البلدية مثل التبلدي والقضيم و الكركديه والشطة وغيرها من المحاصيل، يوجد في وسط مدينة الأبيض ويجاوره أكبر سوق للصمغ العربي وهو سوق محصولات الأبيض... كان في السابق يعرف بسوق (العوين) يعنى النساء لان أغلب من عمل بالتجارة فيه من النساء من هن في أعمار متقدمة.
اذا كنت من عشاق الحضاره والتاريخ لن تجد أعرق من الابيض.
شفتو خيرات البلد دي كبيرة كيف؟؟!
اول طريق للاستفادة من خيرات بلادنا هو انو نعرفها 💜عشان كدة أرّح نتعرف عليها.

تابعوا التعليقات عشان تعرفو ليه اسمها الابيض😁😁
#أرَّح

17/07/2022

الرهد أبو دكنة
أغلبنا يمكن سمع بمقولة "الرهد أبو دكنة مسكين ما سكنا"
يعني عمرك نصه ضايع لو ما سكنتها
بس مكانها وين ؟
هي مدينة موجوده في ولاية شمال كردفال والمميزه بإسم ابو دكنه لأن في أكثر من منطقة اسمها الرهد وجهتنا الليله الرهد الموجوده في ولاية شمال كردفان (لأن في محلية ثانيه أسمها الرهد موجوده في ولاية القضارف ) . الميزها بإسم ابو دكنه انه شجرها كثيف ولونه داكن واسم الرهد بيرجع للمنطقة الفيها مرقد الماء ( أي أن المنطقة مميزه باللأشجار و مجري ماء ).
هل هي بعيده من الخرطوم ؟
أيوه بعيده شويه لكن تستحق الرحله بتبعد من العاصمة مسافة 379 كيلو متر مربع .
كيف أقدر أمشيها ؟
ممكن تمشي ليها براً بطريقين طريق كوستي أو طريق بارا . طريق بارا؟؟ أيوة بارا لأنها بتقع بعد الأبيض بمسافة 30 كيلو متر يعني ممكن من الأبيض مسافة ساعه بالعربيه أو أقل . طيب ممكن امشي ليها طيران ؟
أيوه ممكن نسبيا لأن ممكن تاخد طيران لحدي مطار الأبيض ومن الابيض تبدي رحلتك القصيرة بالبر للمنطقة .
حشوف شنو في الرهد؟
حتشوف مناطق مخضرة و بساتين زراعية بتتميز بمحاصيل فواكة مختلفه منها الجوافه والمنقة والبرتقال والليمون وحتي محاصيل بلدية زي الكركدي والقونقليز واللسته لسه طويله .
ما بس كدا برضو حتشوف بحيرة الرهد المعروفة بالتردة و في إطلالة بلدية بمنحني عصري حتقلي منتجع الرهد السياحي، اللي بيطل علي البحيرة وبيتميز بفندق وصالة مناسبات وحتي قعدات قهوة (جبنة ) بتصميم القطاطي . ما تنسي أنك حتقدر تاكل أنواع مختلفه من الأسماك المتوفرة في البحيرة . ولو بتحب اللغاوييس ما تخاف عندك بلد المنقة والتبش بالشطة والليمون .
طيب طيب امشي ليها في أي فصل ؟
الخريف ياخوانا الخريف لو مشيت متأكد أنك حتقول مقولتنا الشهيرة كسودانيين" الجو أوروبي" . بمناخ غائم كليا وجزئيا وأمطار شبه دائمة وأجواء منعشة .
والله علي العصيده الحارة في الجو داك يا جماعه شكلي سرحت . نرجع لي موضوعنا الخريف علي ووصول والرحلة تستحق .
#أرَّح

14/07/2022

أرَّح نواصل في سلسلة أشخاص سودانيوون...

اليوم ح نتحدث عن واحدة من أشهر وأبرز الشخصيات السودانية، منو بتكون وشنو إنجازاتها..
أولاً هي زينب البدوي من مواليد العام 1959 يوم 24 نوفمبر ولدت في السودان و بعد سنتين من ميلادها انتقلت مع اسرتها لبريطانيا والتحق والدها محمد خير البدوي للعمل في قناة البي بي سي BBC وجدها كان بابكر بدري من أنصار محمد احمد المهدي اللي كان مهتم بتعليم المرأة في السودان، و أنشأ جامعة الأحفاد للبنات...

اتخرجت زينب البدوي من جامعة أكسفورد البريطانية في مجال الفلسفة والسياسة..
وهي أول مذيعة سودانية التحقت بالعمل في قناة البي بي سي BBC، أرَّح نتعرف على إنجازاتها ك إعلامية :
- زينب البدوي اول مذيعة سودانية تظهر علي القنوات الفضائية البريطانية في العام 1998.
- اشتغلت في مختلف محطات الإذاعة البريطانية واشتغلت أيضاً ك مذيعة ومُعدة ومُنتجة للبرامج.
- قدمت نشرات وبرامج اخبارية عدة وقامت بالعديد من الحوارات والاستضافات مع وزراء بريطانيين في شأن السياسة.
- وايضاً ألقت حوار مع الرئيس المخلوع عمر حسن احمد البشير وصلاح غازي ومحمد حمدان (دقلو)

- فازت زينب البدوي بجائزة الشخصية التلفزيونية للعام 2009 المنظمة من الاتحاد التليفزيوني الدولي الذي تنافست عليها أكثر من 200 محطة فضائية عالمية.
- وهي أول مزيعة لبرنامج the world في قناة البي بي سي BBC "وهو اول برنامج في بريطانيا للأخبار العالمية".
- وعلمت مقدمة لبرنامج عقول نوبل السنوي.

زينب البدوي خلقت بصمة واضحة للاعلام العالمي وحققت إنجازات تعتبر فخر للمرأة الإفريقية والعربية عموما
ويعتبر قاسم البدري مدير جامعة الأحفاد ابن عم لها، ومن الحاجات الملفتة اللي أنجزتها زينب البدوي وهي زيارتها للسودان قبل عدة من السنوات لصناعة فيلم وثائقي يتحدث عن التاريخ الإفريقي وتم تدشين هذا الفيلم عبر فضائية البي بي سي BBC، زينب البدوي متخصصة فى فلسفة الاقتصاد وباحثة مهتمة جدا بالتاريخ السوداني ومن ضمن إنجازاتها كتبت كتاب سمته "الفراعنة السود" وايضاً كتاب "الحضارة الكوشية" وأثبتت في كتاباتها بأن الفراعنة السود حكمو فراعنة مصر قبل 800 سنة قبل الميلاد ومن ضمن أقوالها أثناء استضافتها في احدي القنوات السودانية قالت بأن العالم ينظر لإفريقيا بأنها ليس لها تاريخ و يجب ان نثبت ذالك بأن السودان بلد يمتلك الاهرامات والحضارات

زينب هي شخصية مختلفة تماماً كانت تمتلك روح المثابرة والكفاح وحبها العظيم لوطنها كلنا زينب ✌🏻وكلنا بنحب المرأة السودانية المثابرة المكافحة العظيمة جداً في كل ما تفعله.

قوة الإعلام قادرة تغير مصير أمم فخلونا نكون إعلام يعكس كل شي بخص ثقافتنا و جمالنا و أشخاصنا و عاداتنا السمحة 💜
و اخيراً زي ما بنقول دايماً السودان جميل مليان أشخاص عظيمة💜

#أرَّح

10/07/2022

عروس النيم
أول مرة تسمع بالإسم دا صح؟
دي ياها أم روابة
بنركب الكركابة الله ودينا لي أم روابة 💃 بسسك ياها زاتها
الليلة وجهتنا أم روابة
أم روابة دي عباره عن مدينة عريقة وقديمة شديد وموجودة في شمال كردفان وتبعد عن الخرطوم بمسافة 301 كيلو متر وأقرب طريق ليها عن طريق كوستي والسفر ليها براً ، (ممكن تسافر ليها عن طريق بارا برضو لكن الرحلتين نفس الزمن ).
سمّوها أم روابة لأن كان الرحاله بيعملوا من الروب أو الحليب ، السمن وببيعوهو ولما يفضل الرائب من الحليب بيصرفوهوا في مجاري وعلشان كدا سميت بأم روابة يعني اللبن الرائب (الزبادي البلدي) ، وكمان في رواية ثانية انه في مرأة كان عندها مقهي صغير وبعد تقدم للناس بتعزف علي الربابة فعلشان كدا سميت أم ربابة وحرف الإسم لي أم روابة .
طيب فيها شنو ؟
نبدي بالمهم اللي هو الأكل 😋😁
لو بتحب الأقاشي ممكن تقول إن أم روابة هي البلد الأعرق ليهو بتتميز بي تجربة أنه عنده مكان محدد في السوق المحلي ( أو سوق فلاته )فيه ساحة كبيرة بيتحضر فيها الاقاشي ، وتشتهر كل المطاعم هناك بيهو.
غير انه معروف عن أم روابة عن انتاجها لي الزيوت زي زيت السمسم والفول وهو من أجود الأنواع، وبرضة ما ننسي الفواكة ومنها الجوافة والليمون والبرتقال .
من الحاجات المميزة أم روابة عن المدن المجاورة ليها
المياه العذبة تعتبر مياة أم روابة الجوفية من أنقي المياة ومن أقدم شبكات المياة في السودان .
أم روابة عندها حاجات قديمة كانت مميزاها زي دار السينما والأندية الرياضية ، زمان لما كان التلفزيون نادر الإستخدام في المنازل كانت أم روابة بتمتلك دار سينما في حين إن كل المدينه في آخر الإسبوع بتكون متجمعه وبتحضر الأفلام (الهندية طبعا 🙂 🤦‍♀️) .
أم روابة مدينة مليئة بالثقافات والطرق الدينية و بإختلاف القبائل وحتي الجنسيات . أجمل شعور حسيتة في أم روابه وشوارعها لما تمشي علي الرمل بليل وانت حافي القدمين وفوقك القمر مكتمل البدور .
ونرجع لي أسم اللقب عروس النيم
لأن يكثر فيها شجر النيم المحيط بأغلب المنازل والطرقات . ويا سلام علي الجبنة الفي تحت النيم و هواها نسيم وفراقها أليم .
نلقاكم في محطة ثانية

#أرَّح

09/07/2022

سلطان سوداني
كسى الكعبة المشرفة لمدة 20 سنة و حفر آبار للحجاج في المدينة،جدد مسجد الحُليفة و كمان عمل متحف و المتحف دة حالياً بإسمو..
عرفتوه؟!
ما مشكلة اذا ما عرفتوه كملو البوست و ح تعرفو السلطان الرهيب و استمتعو بتاريخ سلاطين السودان القدماء...

كلنا سمعنا بإسمو بس ما كلنا عارفين هو منو و سلطان ياتو منطقة أو حتى إنجازاتو العظيمة أرَّح نعرف عنو شوية..
-هو السلطان "علي بن السلطان زكريا محمد الفضل" و المعروف بالسلطان "علي دينار" ، اتولد في منطقة الشاوية غرب مدينة نيالا.
-كان سلطان إقليم دارفور و واحد من السلاطين الدعموا الثورة المهدية و كان عندو دور فعال جداً جداً في نشر الدعوى المهدية...
-نتكلم شوية عن قصر أو متحف السلطان علي دينار،اتبنى تحت إشراف المهندس بوك من أصل تركي و استمر العمل عليه من 1871 إلى 1912 و يُعتبر دة تاني متحف في السودان بعد المتحف القومي من حيث الغنائم، حالياً القصر بشمل المتحف و وزارة المالية و وزارة الصحة و قصر الضيافة.
-من ضمن الحجات اللطيفة في المتحف و اللي كانوا بستخدموها قديماً هي الطبول و في منها نوعين، الأول اسمو "دار الآخرة" و بيستخدم في حالة الحرب و الثاني اسمو "عطاء الموالي" دة بستخدم للافراح و المناسبات و المهرجانات الوطنية.
-في عام 1916 توفي السلطان علي دينار أعظم سلاطين الفور..
اخيراً و ليس آخراً السودان عندو تاريخ جميل جداً صنعوه رجال ونساء عظماء و بالرغم من كل الظروف الحالية في السودان ح نرجع لسابق عهدنا لأن السودان جميل و لسة فيه عظماء، و ما تنسوا تدعوا للوطن في اليوم المبارك دة،
كل عام و انتو بخير و عسى كل أمانينا محققة💙
#أرَّح

07/07/2022

«كل يا كُمّي قبل فُمّي»،
بمعنى( انو نظافتك و جمال طلتك بتقييمك و ترفعك ف احسنو مظاهركم) ممكن كتتير مننا سمع المقوله دي بس أغلبنا ماعارفين
سبب المقوله وصاحبها ؟هو شخصية الدرويش السوداني الشهير فرح ود تكتوك يعتقد البعض انها شخصية أسطوريه ومن مخيلة البعض لكثرة ما روي عن هذا الفيلسوف الشعبي من عجائب وأقاصيص عميقة المعنى، تتراوح ما بين الطرفة والحكمة، ولذلك عمد بعض المحققين إلي اعتباره من المتصوفه المستنيرين ف وقت مبكر.
سر تسميته «تكتوك» لقب يحمله الشيخ فرح، بسبب طقطقة مسبحته في جوف الليل «تُك تُك تُك»، أما اسمه الحقيقي، فهو فرح بن محمد الأبطح، من قبيلة البطاحين، وقد ولد وذاع صيته في القرن السابع عشر، إبان ازدهار مملكة سِنّار،. توفي عن مائة وبضع سنين، وتم دفنه "بمشرع" – مرسى – الحجيرات. ويقع الآن قرب خزان سنار. عرف أيضاً بكنية «حلّال المشبوك»، وقصة ذلك أن سلطاناً في زمانه ألزمه بتعليم بعيره العزيز القراءة والكتابة كالبشر، وفي أربعة أعوام، حتى يثبت كرامته وقدرته الخارقة كمتصوف، وإلا فالويل والثبور، فقبل الشيخ التحدي دون أن تهتز له قناة، وكان يضمر أمراً.
فطلب كمية من التمر وحبوب العيش والسمن والطحين والسكر والعسل، لأن بعير الملك يجب أن يأكل كالبشر أيضاً، ما دام يراد له أن يتعلم مثلهم، فكان له ما أراد، وحينما سأله أصحابه عما يضمره قال: تمضي السنوات الأربع، وينفذ القدر، إما في الأمير، أو في البعير، أو في الفقير، ويقصد نفسه. وفعلاً مات البعير ومات الأمير وبقي الفقير، وهذا دليل شخصيته العظيمه ورغم إكثار الشيخ فرح من استعمال العامية السودانية إلا أنه فصيح اللسان نظم الشعر بالفصحى الرصينة موجهًا خطابه إلى من يفهم معناها مثل الفقهاء والمعلمين .. ولديه قصيده نونيه شهيره يشجب فيها اندفاع الفقهاء إلى خطب ود السلاطين والأمراء، واستخدم أسلوب السجع ببراعه وطوع فيها العامية التي كانت منتشره نسبة لارتفاع الامية وضعف اللغه العربيه ف مجتمعه، كما استخدم اسلوب التمثيل "الدراما" لتوصيل المعاني، ولعل من أشهر القصص المأثورة عنه : أن ابنته عادت إليه مغاضبة لزوجها وعازمة عليه أن يطلقها منه.. فعمد الشيخ إلى إبريق وضوئه فكسره، وجلس يبكي فجاءت ابنته ووجدته وهو يبكي على إبريقه المكسور .. فاستخفت ببكائه على إبريق.. عندئذ قال لها إن الإبريق كان رفيقًا رأى عورتي وسترني أزمان فكيف لا أقدره وأبكيه... في إشارة منه إلى زوجها.. فارعوت البنت وثابت إلى رشدها.
ويروى أيضا أن مزارعاً يدعى البدري، قليل الرزق، فذهب إلى الشيخ فرح يطلب رقية تزيد رزقه، فأمسك فرح ود تكتوك كف الرجل، وقال بسم الله، يا إيد البدري، قومي بدري، ازرعي بدري، احصدي بدري، وشوفي لو كان تنقدري هذه النصوص تأكد أن الشيخ فرح كان يدعم قيمه العمل والكسب ومناهضه البطاله كان حريصاً على ان يعمل ويعمل تلاميذه واتباعه،
واقواله متنوعه احدها عن النساء وآخرى عن العفاف عزه النفس وبعضها في تعاليمه للدين.

#أرَّح

03/07/2022

أرّح
المرة دي ح نسافر لمنطقة خلابة جداً جداً و قادرة انها تبقى وجهة سياحية بس للأسف هي منسية..
الجميلة المنسية"نيرتتي" :
الاسم"نيرتتي" بلغة الفور معناه الشئ النقي و النظيف و بالجد اسم على مسماه..
بتقع الجميلة دي ولاية وسط دارفور بالضبط شرق مدينة زالنجي على بُعد 60 كلم و بنلقى فيها الطريق القومي اللي بربط كل ولايات دارفور بباقي السودان...

في نيرتتي بنلقى اكبر استراحة للسياح في حتة اسمها قلول و مرتجلو، فيها شلالات و مساقط منحدرة من أعالي الجبال و زيادة على المنظر دة ح تلقى في تنوع حيوي كبير جداً ح تشوف الغزلان و انواع نادرة من الطيور بألوانها الزاهية و الخضرة و اشجار الفواكه منتشرة بصورة كبيرة و مبدعة سبحان الله الخالق..
و اكتر منظر ممكن ياخد عقلك هو لما تصل قمة الجبل و تكون فوق السحاب و شايف الناس تحت تجري من المطر، اتخيلتوا كمية الرهابة دي؟!
و لما تمشوا نيرتتي ما تنسوا تمشو سوق نيرتتي الكبير و كمان أعرق الأحياء فيها زي حي العمدة و قعر الجبل💙
اهم شي امشو و اتصورا كتير و عرفوا الناس على الجنان المنسية في السودان..

#أرح

29/06/2022

"الجفلن خلهن أقرع الواقفات👋🏻"
المثل بيوحي بالبساطة الا انو جواه في معنى دقيق و حيلة لطيفة نقدر نمشي بيها كويس في الحياة.✨
اول شي المثل طبعاً سوداني بحت و قيل انو قصتو كالاتي"كان في راعي أثناء ما برعى في الماشية صدر صوت من بعيد ارعب الماشية فهرب جزو منها و حاول بجري وراها يلحقها🏃🏽‍♂️ و كان جنب الراعي دة في زول حكيم قال ليهو الجفلن خلهن أقرع الواقفات"
المعنى انو بدل تهدر طاقتك في حجات راحت خلاص ركز و اجتهد في الحاجات القدامك، صح نحنا كبشر دايماً بعد كل خسارة بنقعد نفكر فيها بطريقة ما بتحسن من حالنا ابداً بنقضيها جلد ذات و تأنيب ضمير و ننسى الجانب التاني يعني بنركز مع الجفلن و ما بنقرع الواقفات 😂و في حاجات سمحة بتفوت علينا في الوقت دة😭.
عشان كدة خلو شعاركم "الجفلن خلهن أقرع الواقفات" 😁
#أرَّحْ

15/06/2022