29/12/2023
Transit Flight လေယာဉ်အဆင့်ဆင့် စီးရာမှာသတိထားရမယ့်အချက်များ
နိုင်ငံခြား သွားတဲ့အခါ ကိုယ်သွားမယ့်မြို့ကို တန်းရောက်မယ့် လေယာဉ် Direct Flight မရှိပါက လေယာဉ်ကို နှစ်ဆင့် (သို့) သုံးဆင့် စိးပြီးသွားရပါတယ်။ အဲဒါကို Transit Flight (သို့) Connecting Flight လို့ ခေါ်ပါတယ်။ ဥပမာအားဖြင့် - ရန်ကုန်ကနေ ပဲရစ်ကို တိုက်ရိုက်လေကြောင်းမရှိပါဘူး။ ကြားထဲမှာ ဘန်ကောက်ဖြစ်ဖြစ်၊ ဘန်ကောက်နဲ့ ဒိုဟာဖြစ်ဖြစ် ဝင်ရပြီး လေယာဉ် နှစ်ဆင့်/ သုံးဆင့်စီးမှ ရောက်ပါတယ်။
Transit Flight တွေစီးတဲ့အခါ ကြားလေဆိပ်မှာ ဒုက္ခမရောက်အောင်
လေယာဉ်အဆင့်ဆင့်ကို အဆင်ပြေချောမွေ့စွာ စီးနိုင်အောင်
သတိထားရမယ့် အချက်တွေကို ပြောပြလိုက်ပါတယ်။
(ဒီထဲမှာ လေယာဉ်နဲ့ လေဆိပ် English အသုံးအနှုန်းတွေပါပါတယ်။ ဒီစာလုံးတွေကို ရှင်းရှင်းလင်းလင်းနားလည်ချင်ရင် လေဆိပ်မှာသုံးတတ်တဲ့ English စကားလုံးတွေကို Video ရော ပို့စ်ပါ အရင်က တင်ပေးထားလို့ Comment မှာ ဝင်ကြည့်နိုင်ပါတယ်။)
-------------------------------------
လေယာဉ်လက်မှတ်ဝယ်တဲ့အခါ
-------------------------------------
လေယာဉ်လက်မှတ်ဝယ်တဲ့အခါ Transit Flight တွေဆိုရင် ဒါတွေကို သိထားမှ ရပါမယ်။ ကိုယ်လက်မှတ် ဝယ်မယ့် Travel Agent ဆီမှာ သေချာမေးထားရပါမယ်။ ကိုယ့်ဟာကိုယ်ဝယ်မယ်ဆိုရင်လည်း သေချာစုံစမ်းပြီးမှ ဝယ်ရပါမယ်။ ဒါတွေ မသိထားရင် ကြားလေဆိပ်မှာ ဒုက္ခရောက်နိုင်ပါတယ်။
Checked through လား Self-Transfer လား သိထားရပါမယ်။
Checked through ဆိုတာ ကြားထဲကလေဆိပ်မှာ Immigration ဖြတ်စရာမလို၊ အိတ်ပြန်ရွေးမစရာမလိုဘဲ လေဆိပ်ထဲမှာတင် နောက်လေယာဉ်ဆီကိုကူးလို့ရတဲ့ အခြေအနေပါ။ Airline Protected Transfer လို့လည်း ခေါ်ပါတယ်။ ကိုယ်အပ်ထားတဲ့ Luggage တွေကို Airline က တာဝန်ယူပြီး နောက်လေယာဉ်ပေါ်တင်ပေးတာပါ။
Self-transfer ကတော့ ကိုယ့်အိတ်ကိုယ်တာဝန်ယူပြီး နောက်လေယာဉ်ပေါ် ပြန်အပ်ရတာပါ။ ကြားထဲကလေဆိပ်မှာ နိုင်ငံထဲဝင်ပြီးမှ ပြန်ထွက်ရမှာပါ။ ကိုယ်က လေဆိပ်ကနေ အပြင်မထွက်ဘူး။ နိုင်ငံထဲဝင်ဖို့ စိတ်ကူးမရှိဘူး။ အချိန်မရှိဘူးဆိုရင်တောင်မှ Immigration ဖြတ်ကိုဖြတ်ရမှာပါ။ အိတ်တွေကိုလည်း ရွေးရမှာပါ။ ပြီးတော့မှ လေဆိပ်ရဲ့ Departure အပိုင်းကနေ တစ်ခါ အဲဒီနိုင်ငံထဲကနေပြန်ထွက်ရမှာပါ။ Check-in ကောင်တာမှာအိတ်ပြန်အပ်ပြီး Immigration တစ်ခါပြန်ဝင်ရပါမယ်။ တချို့နိုင်ငံတွေမှာ Self Transfer လုပ်တဲ့အခါ Immigration ဝင်ဖို့ Visa ကလည်း လိုပြန်ပါတယ်။ အရမ်းကိုအလုပ်ရှုပ်ပါတယ်။
ဒါကြောင့် လေယာဉ်လက်မှတ်ဝယ်တဲ့အခါ Checked through ဖြစ်တာကို ဝယ်သင့်ပါတယ်။ မဟုတ်ရင် အလုပ်တအားရှုပ်ပါတယ်။ ကြားနိုင်ငံထဲ တစ်ခါဝင်ပြီး တစ်ခါပြန်ထွက်ရတဲ့ အဆင့်တွေ အများကြီး ဖြတ်ကျော်ရမယ့်အပြင် အချိန်ကုန်ပါတယ်။
ကိုယ်စီးရမယ့် လေယာဉ်အဆင့်ဆင့်က လေကြောင်းလိုင်းတူရင် Checked through ဖြစ်တာများပါတယ်။ လေကြောင်းလိုင်း မတူရင်လည်း Code sharing လုပ်ထားတဲ့ လေကြောင်းလိုင်းတွေဆိုရင် Checked through သွားလို့ရပါတယ်။ လေယာဉ်လက်မှတ်ဝယ်တဲ့ Agent တွေမှာ ကိုယ်စီးမယ့်လေယာဉ်တွေက Checked Through ဟုတ်မဟုတ် တစ်ခါထဲမေးထားပါ။ အရမ်းကို အရေးကြီးပါတယ်။ ကိုယ့်ဟာကိုယ်ဝယ်မယ်ဆိုရင်လည်း Code Sharing လုပ်ထားမထားကို လေကြောင်းလိုင်းရဲ့ Website ထဲ ဝင်ကြည့်လို့ရပါတယ်။
လေကြောင်းလိုင်းမတူပေမဲ့ Code sharing လုပ်ထားတဲ့ လေကြောင်းလိုင်းတွေရဲ့ လေယာဉ်လက်မှတ်တွေဝယ်တဲ့အခါ လေယာဉ်လက်မှတ်တွေကို တစ်ခါထဲတူတူဖြတ်ရပါမယ်။ ခွဲဖြတ်ရင် Checked through မဖြစ်ဘဲ နေနေပါမယ်။
Transit Visa လို/မလို ကြည့်ပါ။
တချို့လေဆိပ်တွေ၊ နိုင်ငံတွေက Transit ဖြတ်ရုံပဲဆိုရင် Visa မလိုပေမဲ့ တချို့နိုင်ငံတွေကတော့ Visa လိုအပ်ပါတယ်။ ဥပမာ- တောင်ကိုရီးယားနိုင်ငံဆိုရင် Transit ဖြတ်ရုံလေးကိုတောင် Visa လိုတဲ့အတွက် တောင်ကိုရီးယား Transit ဆိုရင် Visa ကြိုလျှောက်သွားမှ ရမှာပါ။ တချို့က Transit Visa ဆိုတာလျှောက်ရုံနဲ့ရပေမဲ့ တချို့ကတော့ တကယ့် Visit Visa ရမှ Transit ဝင်လို့ရမှာပါ။ နုမြတ်တို့ဆိုရင်တော့ Transit ကို အဲဒီလိုနိုင်ငံတွေရှောင်ပြီးမှ လေယာဉ်လက်မှတ်ဝယ်ပါတယ်။ Checked through ရတဲ့ လေကြောင်းလိုင်းတွေဆိုရင်တော့ အများစုက Immigration ဖြတ်စရာမလိုတဲ့အတွက် Visa မလိုပါဘူး။
Layover/Stopover Time
လေယာဉ်အဆင့်ဆင့်စီးတဲ့အခါ ကြားထဲရပ်နားမယ့် မြို့ရဲ့လေဆိပ်မှာ အချိန်ဘယ်လောက်ရလဲဆိုတာ ကြည့်ရပါမယ်။ International Flight တွေဆို အနည်းဆုံး ၂ နာရီလောက်ရှိမှ အဆင်ပြေမှာပါ။ Transit လေဆိပ်တွေက အကျယ်ကြီးလား၊ ပထမလေယာဉ်ရဲ့ လေယာဉ်ထွက်ချိန် နောက်ကျမလား၊ Transit လေဆိပ်မှာ အိတ်ပြန်ရွေးစရာလိုလား စတာတွေလည်း ထည့်တွက်ရပါမယ်။ လေယာဉ်တွေက Checked through မဟုတ်ဘဲ အိတ်ပြန်ရွေးရမယ်။ Immigration ဝင်ရမယ် Check-in ပြန်ဝင်ရမယ်ဆိုရင်တော့ Layover Time က ၃ နာရီ အနည်းဆုံး ရှိမှရပါမယ်။
ဒါက ခရီးသွားလေ့ရှိသူတွေအတွက် အနည်းဆုံးလိုအပ်တဲ့အချိန်ပါ။ ကိုယ်က သွားလေ့မရှိသူ၊ စမ်းတဝါးဝါးနဲ့ သွားရမယ့်သူတွေဆိုရင်တော့ ဒီထက်အချိန်ပိုလိုပါမယ်။ ဖြစ်နိုင်ရင် Layover Time ကို ၄-၅ နာရီလောက် ခြားထားသင့်ပါတယ်။ Risk မယူသင့်ပါဘူး။
----------------------------------
လေဆိပ်မှာ Check-in ဝင်တဲ့အခါ
----------------------------------
ခုံနံပါတ်ကို ရှေ့နားတောင်းထိုင်ပါ။
ကိုယ်စတင်ထွက်ခွါမယ့် လေဆိပ်မှာ Check-in ဝင်တဲ့အခါ စောစောဝင်ပါ။ လေယာဉ်ထပ်စီးရမှာမလို့၊ Transit Flight မလို့ ရှေ့နားက ခုံကိုပေးဖို့ တောင်းဆိုပါ။ ဒါမှသာ ကြားထဲနားတဲ့လေဆိပ်မှာ အချိန်များများရပြီး Rush မဖြစ်တော့မှာပါ။
Luggage ကို ကြားလေဆိပ်မှာ ရွေးဖို့လိုမလိုမေးပါ။
ကိုယ့်လေယာဉ်လက်မှတ်တွေက Checked through ဟုတ်ခဲ့ရင်တောင် Check-In ကောင်တာမှာ အိတ်တွေအပ်တဲ့အခါ ကိုယ့်အိတ်တွေက ကိုယ်သွားမယ့်မြို့ဆီ တန်းပို့ပေးမှာလား။ ကြားထဲက Transit လေဆိပ်တွေမှာ ရွေးစရာလိုသေးလားကို သေချာ Confirm ရပါမယ်။ မေးရပါမယ်။ အိတ်တွေရွေးစရာမလိုဘူး။ တစ်ခါထဲ နောက်လေယာဉ်ပေါ် တန်းတင်ပေးမယ်ဆိုရင် အိတ်မှာကပ်ပေးလိုက်တဲ့ Luggage tag မှာ ကိုယ်သွားမယ့်မြို့အထိ ရောက်မယ်ဆိုတာ ပါရပါမယ်။
Boarding Pass ထပ်ထုတ်စရာလိုမလိုမေးပါ။
Boarding Pass ဆိုတာ လေယာဉ်ပေါ်တက်ရမယ့် လက်မှတ်ပါ။ လေယာဉ်လက်မှတ်ရှိရုံနဲ့ လေယာဉ်ပေါ်တက်လို့မရသေးပါဘူး။ Check-in ကောင်တာမှာ လေယာဉ်လက်မှတ်ပြပြီး Boarding Pass ထုတ်ပေးမှ တက်လို့ရမှာပါ။ Boarding Pass တစ်ခုက လေယာဉ်တစ်ခုကိုပဲ ကိုယ်စားပြုပါတယ်။ လေယာဉ်ကို နှစ်ဆင့်စီးရမယ်ဆိုရင် Boarding Pass နှစ်ခုလိုပါတယ်။ လေယာဉ် သုံးဆင့် စီးရမယ်ဆိုရင် Boarding Pass သုံးခုလိုပါတယ်။
တစ်ခါတလေ ကိုယ်စတင်ထွက်ခွါမယ့်လေဆိပ်ရဲ့ Check-in ကောင်တာကနေ လိုအပ်တဲ့ Boarding Pass အကုန်ထုတ်ပေးလိုက်တာမျိုးရှိပါတယ်။ Boarding Pass တစ်ခုပဲ ထုတ်ပေးလိုက်ရင်တော့ ကြားက Transit လေဆိပ်မှာ ကိုယ့်ဟာကိုယ် Boarding Pass ထပ်ထုတ်ရပါမယ်။
အိတ်တွေကို သေချာထည့်ပါ။
လေယာဉ်အဆင့်ဆင့်စီးတဲ့အခါ အိတ်တွေ ကြားထဲမှာပျောက်နိုင်လို့ Check-in မှာ အပ်မယ့် Luggage ကို သေချာ သော့ခတ်ထားပါ။ အိတ်ပေါ်မှာ အိတ်ကျန်ခဲ့တဲ့အခါ ဆက်သွယ်ရမယ့် နာမည်၊ ဖုန်းနံပါတ်၊ လိပ်စာ၊ Email address တွေကို အင်္ဂလိပ်လို ရေးထားရပါမယ်။ ကိုယ့်အိတ်ကိုလည်း ဓာတ်ပုံရိုက်ထားပါ။
အရေးကြီးတဲ့ပစ္စည်းတွေ၊ တန်ဖိုးရှိတဲ့ ပစ္စည်းတွေ၊ ကိုယ်သောက်ရမယ့်ဆေးဝါးတွေ၊ တစ်ကိုယ်ရည်အသုံးပစ္စည်းတွေကို ကိုယ်နဲ့တစ်ပါထဲဆောင်သွားပါ။ Layover Time ကြာတဲ့အချိန်တွေ၊ လေဆိပ်မှာ ညအိပ်ရမယ့် အခြေအနေတွေမှာ အဝတ်အစားအပိုနဲ့ ကိုယ်လက်သန့်စင်ဖို့ ပစ္စည်းတွေ၊ Skin Care တွေကို ဆောင်ထားပါ။ Hand-carry တွေမှာ အရည်တွေကို 100 ml အထက်ပိုယူလို့မရတော့ ဘူးသေးလေးတွေနဲ့သာ ခွဲသယ်ရမှာပါ။ လေဆိပ်တွေမှာ အရမ်းအေးတတ်တော့ အနွေးထည် Hoodie တွေလည်း ဆောင်သွားပါ။ သက်သောင့်သက်သာဖြစ်မယ့်အဝတ်အစားတွေ ဖိနပ်တွေပဲ ဝတ်ပါ။
---------------------------------
Transit လေဆိပ်ရောက်တဲ့အခါ
---------------------------------
ကိုယ်ရောက်တဲ့နိုင်ငံရဲ့ အချိန်ပြောင်းရပါမယ်။
တစ်နိုင်ငံနဲ့တစ်နိုင်ငံ အချိန်မတူပါဘူး။ တချို့ဖုန်းတွေက Location ပြောင်းတာနဲ့ ရောက်တဲ့နေရာရဲ့ ဒေသစံတော်ချိန်ကို အလိုလိုပြောင်းပေးပါတယ်။ ကိုယ့်ဖုန်းက အဲဒီလို မပြောင်းပေးဘူးဆိုရင် ရောက်တဲ့ဒေသရဲ့ စံတော်ချိန်ကို ကိုယ်တိုင်ပြောင်းရပါမယ်။ ကိုယ့်နာရီတွေကိုလည်း အချိန်ပြောင်းရပါမယ်။ လေဆိပ်တွေမှာ နာရီတွေရှိပြီး ဒေသစံတော်ချိန်ကို ဖော်ပြနေပါတယ်။ မပြောင်းမိဘူးဆိုရင် အချိန်မှားကြည့်ပြီး လေယာဉ်ထွက်ချိန်မမှီတာတို့ ဖြစ်တတ်ပါတယ်။
Transfer ဆိုတဲ့ ဆိုင်းဘုတ်နောက်ကိုလိုက်ပါ။
ကြားလေဆိပ်ကို လေယာဉ်ဆိုက်ကပ်တာနဲ့ ဘယ်မှမသွားဘဲ Transfer လို့ရေးထားတဲ့ ဆိုင်းဘုတ်နောက်ကိုသာလိုက်ပါ။ တချို့ Boarding Pass တွေမှာ ဂိတ်တွေကို ကြိုရေးပေးထားတော့ တချို့က အဲဒီဂိတ်တွေဆီကို တန်းသွားရမယ်ထင်နေကြတာပါ။ တချို့လေဆိပ်တွေမှာလည်း လေယာဉ်ပေါ်ကဆင်းတာနဲ့ ဂိတ်တွေကို တန်းမြင်နေရပေမဲ့ အဲဒီလို တန်းသွားလို့မရပါဘူး။ သွားရမယ့်အပေါက်လည်း မရှိပါဘူး။ ကြားထဲမှာ Security Check မှာ Hand Carry တွေကို စစ်ရပါဦးမယ်။ ဒါကြောင့် Transfer (သို့) Connecting Flight လို့ လမ်းညွှန်ထားတဲ့အတိုင်းသာ သွားရပါမယ်။
Transfer Desk ကို သွားရမယ်။
ကိုယ်စထွက်တဲ့ လေဆိပ်ရဲ့ Check-in ကောင်တာမှာ ကိုယ်နောက်ထပ်ပြောင်းစီးရမယ့် လေယာဉ်အတွက် Boarding Pass တစ်ခါထဲ ထုတ်မပေးထားရင် ကြားလေဆိပ်မှာ Boarding Pass ထုတ်ဖို့ Transfer Desk ဆိုတာကို သွားရပါမယ်။ Transfer Desk (သို့) Transit Desk လို့ လမ်းညွှန်ထားတဲ့အတိုင်း သွားပြီး Boarding Pass ထပ်ထုတ်လိုက်ရုံပါပဲ။ ကိုယ်ထပ်စီးမယ့် လေကြောင်းလိုင်းရဲ့ Transfer Desk မှာ ထုတ်ရမှာပါ။ ရှာမတွေ့ရင် လေဆိပ်ဝန်ထမ်းတွေကို လေယာဉ်လက်မှတ်ပြပြီး မေးကြည့်ပါ။
ဘယ် Gate လဲဆိုတာ ကြည့်ရမယ်။
Boarding Pass ကို ရလာပြီဆိုရင် ကိုယ်သွားရမယ့် Boarding Gate နံပါတ်ဘယ်လောက်လဲ ကြည့်ရပါမယ်။ ဒါက အရေးကြီးပါတယ်။ တချို့ Boarding pass ထုတ်ပေးထားတဲ့ အချိန်စောတဲ့အခါ Boarding Gate မသိသေးတဲ့အတွက် Boarding Pass မှာ Gate နံပါတ်ကို မရေးထားဘဲ အလွတ်ကြီး ဖြစ်နေတတ်ပါတယ်။ အဲဒီအခါ ဂိတ်ကြေငြာတဲ့ LED ဘုတ်တွေမှာ ကိုယ့်လေယာဉ်နံပါတ်၊ ကိုယ်သွားမယ့်မြို့၊ Boarding Time နဲ့တိုက်ကြည့်ပြီး ကိုယ်သွားရမယ့် Boarding Gate က ဘယ်လောက်လဲဆိုတာ ရှာရပါမယ်။ Boarding Pass မှာရေးထားတဲ့ Boarding Time အချိန်အတိုင်း Boarding Gate ကို အမှီ သွားရပါမယ်။
-----------------------------------------
Self-Transfer မှာ ဖြတ်ကျော်ရမယ့်အဆင့်များ
------------------------------------------
အပေါ်မှာ ဖော်ပြထားတာတွေက ကိုယ်စီးရမယ့် လေယာဉ်တွေက Checked through ဖြစ်တဲ့အခါ ဖြတ်ကျော်ရမယ့် အချက်တွေပါ။ များသောအားဖြင့် Travel agent တွေမှာ လေယာဉ်လက်မှတ်ဝယ်တဲ့အခါ Checked through ဖြစ်တာကို ဝယ်ပေးတတ်ကြပါတယ်။ လေယာဉ်လက်မှတ်တွေက ဈေးပိုသက်သာလို့ပဲဖြစ်ဖြစ်၊ ကိုယ်သွားမယ့်မြို့ကို ရောက်မယ့် လေယာဉ်တွေက Checked Through မရရင်ဘဲဖြစ်ဖြစ်၊ Checked through ရမယ့် လေကြောင်းလိုင်းရဲ့ Layover Time က တအားကြာတာပဲဖြစ်ဖြစ် Self Transfer နဲ့ သွားရမယ့် အခြေအနေတွေလည်း ကြုံရတတ်ပါတယ်။
Self-Transfer ကတော့ အလုပ်ရှုပ်ပါတယ်။ လေယာဉ်တစ်ခါစီးရင်လုပ်ရတဲ့ Process တွေအတိုင်း အစအဆုံး ပြန်လုပ်ရမှာပါ။ ကြားထဲကလေဆိပ်ရဲ့ နိုင်ငံထဲဝင်ပြီးမှ အဲဒီနိုင်ငံထဲကနေ ပြန်ထွက်ရမှာပါ။ ကိုယ်က လေဆိပ်ကနေ အပြင်ထွက်ဖို့၊ အဲဒီနိုင်ငံထဲဝင်ဖို့ စိတ်ကူးမရှိဘူး ဆိုရင်တောင်မှ Immigration ဖြတ်ကိုဖြတ်ရမှာပါ။ အိတ်တွေကိုလည်း ရွေးရမှာပါ။ ပြီးတော့မှ Departure အပိုင်းကနေ တစ်ခါ အဲဒီနိုင်ငံထဲကနေ ပြန်ထွက်ရမှာပါ။
အဲဒီတော့ Self-Transfer ဆိုရင် Transit ဝင်ရမယ့် လေဆိပ်ထဲ လေယာဉ်ဆိုက်ကပ်တာနဲ့ အရင်ဆုံး Immigration ကောင်တာကိုရှာပြီး Immigration ဖြတ်ရပါမယ်။ Visa ပြစရာလိုရင် Visa ပြရပါမယ်။ ကိုယ်တည်းမယ့်ဟိုတယ်နာမည်မေးရင် လေယာဉ်လက်မှတ်ပြပြီး Transit ခဏဝင်တာဖြစ်ကြောင်း၊ ညအိပ်မှာ မဟုတ်ကြောင်း၊ အိတ်ရွေးပြီးရင် နိုင်ငံထဲက ပြန်ထွက်မှာဖြစ်တဲ့အကြောင်း ရှင်းပြရပါမယ်။ ပြီးရင် ကိုယ့်အိတ်တွေရွေးပြီး Custom ဖြတ်ပြီး Exit ကနေ ထွက်ပါ။
ပြီးတဲ့အခါ လေဆိပ်ရဲ့ Departure အပိုင်းကို ရောက်အောင်သွားပြီး နောက်ထပ်စီးရမယ့်လေယာဉ်ရဲ့ Check-in ကောင်တာမှာ Check-in ထပ်ဝင်ရပါမယ်။ လေယာဉ်ထွက်ချိန်ထက် အချိန်အရမ်းစောလွန်းရင် Check-in ကောင်တာ မဖွင့်သေးပါဘူး။ အဲဒီအခါ လေဆိပ်ထဲမှာ စောင့်နေရပါမယ်။
ကြားထဲအချိန်အများကြီးရှိနေရင် မြို့ထဲခဏ ဝင်လည်လို့ရပါတယ်။ လေဆိပ်တွေမှာ ကိုယ့်ရဲ့ Luggage တွေ အိတ်တွေ အပ်ထားလို့ရတဲ့ Luggage Storage ဆိုတဲ့နေရာရှိပါတယ်။ အဲဒီမှာ ကျသင့်ငွေပေးပြီး အိတ်တွေအပ်ကာ မြို့ထဲဝင်လည်လို့ရပါတယ်။
ကိုယ်စီးမယ့် လေယာဉ်ရဲ့ကောင်တာမှာ Check-in လုပ်ပြီးလို့ အိတ်အပ်ပြီးလို့ရှိရင် ပြည်ပထွက်ခွါရဲ့ Immigration ကောင်တာကို ဝင်ပြီး Security Pass တွေမှာ အစစ်အဆေးခံရပါမယ်။ Boarding pass မှာပါတဲ့ Gate အတိုင်း၊ အချိန်အတိုင်းအရောက်သွားပြီး နောက်လေယာဉ်စီးရမှာပဲ ဖြစ်ပါတယ်။
အချိန်နီးနေရင် Boarding pass ပြပြီး လိုင်းတွေကျော်လို့ရပါတယ်။
တစ်ခါတလေ ကြားလေဆိပ်က Security Pass ပစ္စည်းစစ်တဲ့နေရာတွေမှာ လူတွေအများကြီးတန်းစီနေတတ်ပါတယ်။ အကယ်လို့ ကိုယ့်ရဲ့ Layover Time က အရမ်းကို ကြပ်နေတယ်။ နောက်လေယာဉ်မမှီမှာ စိုးရင် Boarding Pass တွေ လေယာဉ်လက်မှတ်တွေ ပြကာ လေဆိပ်ဝန်ထမ်းတွေကို အကူအညီတောင်းပြီး တန်းစီနေသူတွေကို ကျော်သွားလို့ရပါတယ်။
တစ်ခုခုမသိပါက မရှာတွေ့ပါက Information မှာမေးပါ။
လေဆိပ်မှာ မျက်စိလည်နေတာပဲဖြစ်ဖြစ် တစ်ခုခုရှာမတွေ့တာဘဲဖြစ်ဖြစ် Airport Information ကောင်တာမှာ မေးလို့ရပါတယ်။ i လို့ ရေးထားတဲ့ကောင်တာတွေပါ။
အားလုံးပဲ ရည်ရွယ်ထားတဲ့နေရာဆီကို အဆင်ပြေချောမွေ့စွာ သွားလာနိုင်ပါစေ
Video လည်း ရိုက်ထားသေးလို့ Edit လုပ်ပြီးတာနဲ့ တင်ပေးမယ်နော်
to
Nu Myat
