30/08/2021
#دهب بقت الـTrend رقم 1 فى اماكن السفر داخل مصر الفترة الاخيرة خاصة للشباب!😲
بما إننا روحنا دهب كتير فدول 10 نصائح عشان تتبسط فى دهب :
1️⃣ متحاولش تقارن فنادق #دهب بفنادق #شرم و #الغردقة .. ده لمصلحتك انت والله 😁 ده مش معناه ان فنادق دهب وحشة بالعكس انت مش هتلاقى فنادق 3 نجوم على البحر مثلاً الا فى دهب
2️⃣ لو رايح دهب عشان تقعد فى الفندق .. تبقى دهب مش ليك ياابراهيم 😎
3️⃣ اهم حاجة فى الفندق ان الغرف تبقى مكيفة ونضيفة ولو اكل الفندق حلو يبقى ربنا كرم من وسع 😁
4️⃣ اخر حاجة تفكر فيها فى دهب الاكل لأن دهب مليانة مطاعم من الفول والطعمية للسمك والجمبرى .. والأسعار حلوه جدا فعلا ماتشيلش هم
5️⃣ دهب فيها حاجات كتير تعملها اهمهم الغطس تجربة لازم تعيشها فى دهب بالذات وعندك اكتر من مكان حلو للغطس لايت هاوس ، مورى جاردن ، الكانيون .. وطبعا طبعا السنوركلينج فى البلوهول وابوجالوم والثرى بولز مش عاوزة كلام 😄
6️⃣ لو مالكش فى المياه عندك السفارى .. سهرة الجبل فى الطويلات والقعدة تحت النجوم على قمة الجبل .. ..
القعدة فى اي كافيه علي البحر everyday و Nubian و Sam sam و downtown وغيرهم كتير بحفلاتهم بالليل ❤️
7️⃣ لو مالكش فى الغطس والسنوركلينج اطلع رحلة الغواصة او رحلة جلاس بوت حاول ماتفوتش منظر الشعاب المرجانية والاسماك الملونة هناك .. تحت البحر فى عالم تانى خالص ❤
8️⃣ دهب معظم شواطئها صخرية بس فيها اجمل شاطئ رملى فى مصر " بلولاجون " لما تروح دهب متفوتش المكان ده 😉
9️⃣ أجرلك عجلة وخدلك بيها جولة فى دهب .. ده شغل اجانب على فكرة 😄
بتاخدها اليوم كله ب١٠٠ جنيه بس تقريباً
🔟 دهب Handmade Town كل حاجة هناك بسيطة وده بيعمل مود مختلف جدا حاول تكون على نفس المود ده على قد ماتقدر 😍
1️⃣1️⃣ دهب رايقة جدا مفيهاش الزحمة اللى فى شرم او فى مصر عموما ودى لوحدها بفلوس والله ❤
2️⃣1️⃣ جهز Playlist على موبايلك فيها اروق اغانى بتحب تسمعها وبتخلى مزاجك حلو .. لو من ضمنها المهرجانات انسى النصيحة دى 😁
3️⃣1️⃣ جهز موبايلك عشان هتستخدمه فى التصوير اكتر من اى حاجة تانية وياسلام لو معاك كاميرا .. الصور فى دهب حاجة تانية 🙈📷
4️⃣1️⃣ سيب مشاكلك وهمومك على بوابة دهب ومتخافش هترجع تلاقيها بحطة ايدك 😂
كل اللى راحوا دهب بيرجعوا مسيطر عليهم فكرة " انا عاوز اعيش فى دهب " عشان دهب فيها كل مقومات الانبساط والاستجمام والروقان والطبيعة اللى بتاخد العقل عشان كده بيقولوا
" من جاء دهب عقله ذهب "
ايا كانت شخصيتك هتتبسط فى دهب .. جدا
