30/10/2015
“МАЙДАР” ЭКО ХОТОД 200 МЯНГАН ХҮН ОРШИН СУУНА.
Өнөөдөр УБ хот байгуулагдсаны 376 жилийн ойн өдөр. Хотынхоо түүхийг өгүүлэх нь илүүц биз ээ. Харин дэлхийд хамгийн их нүүсэн “Нүүдлийн хот”, дэлхийд цорын ганц үлдсэн “Эсгий туургатны хот”-ын иргэн болсон Та бүхэнд ТҮҮХЭН ӨДРИЙН БАЯРЫН МЭНД ХҮРГЭЕ!
Энэ удаа нийслэл хотын үргэлжлэл болох “Майдар” эко хотын төслийн тухай товч танилцуулъя. Тус хот нь “Их Майдар цогцолбор” төслийн хүрээнд байгуулагдах бөгөөд Германы архитектурын компани ерөнхий төлөвлөгөөг гаргажээ. Байгаль орчинд ээлтэй, нүүрсхүчлийн хийг хамгийн бага хэмжээгээр ялгаруулдаг, сэргээгдэх эрчим хүчний нөөц ашиглах, тогтвортой хөгжлийн хот болох үндсэн чиглэлийг зорих тус хотыг Майдар хөшөөт цогцолбор дууссаны дараагаас эхлэн хэрэгжүүлж 50 жилийн хугацаанд бүтээж дуусгах ажээ.
Монголчуудын оюун санааны дархлааг соёлоор дамжуулан бий болгох, аялал жуулчлалыг хөгжүүлэх үүднээс Их Майдар төсөл 2009 оноос хэрэгжиж эхэлсэн бөгөөд одоогоор 15 сая орчим ам.доллар зарцуулаад байгаа аж. Өндөр гэгээн Занабазарын урласан Майдар бурханы дүрийг 54м өндөр, түүний ард 108м өндөр суваргыг хамтад нь бүтээх их ажил амжилттай урагшилж байна. Майдар бурхан бол эв нэгдэл, сэргэн мандалт, амар амгалан, хөгжил дэвшлийн бэлгэ тэмдэг болдог.
Сонирхуулахад, Америкийн Эрх чөлөөний хөшөө 46м бөгөөд тус хөшөөг үзэж сонирхохоор жилд 3 сая жуулчин очиж 75 сая ам.долларын ашиг оруулдаг байна. Тэгэхээр Их Майдар цогцолбор нь гадны жуулчдыг татах бүтээн байгуулалт төдийгүй уран барилгын маш том ажил юм. Энэхүү цогцолборыг бүтээх ажилд Монгол хүн бүрийн оролцоо чухал бөгөөд үүнд таны шашин шүтдэг, үгүй нь хамаагүй билээ. Манай оронд ирэх жуулчдын 70% нь бурхны шашнаас өөр шашин шүтдэг. Тэд Монголын сүм хийдээр зочлохдоо “монголчуудын соёлын, оюун санааны нэгэн чухал үнэт зүйл” гэж харж чаддаг учраас сонирхон үзэж, үүх түүхийг нь сонсох дуртай байдаг.
Дэлгэрэнгүй мэдээллийг дараах линкээр орж үзээрэй. http://www.touristinfocenter.mn/cate1_more.aspx?ItemID=423
