مدينة كابادوكيا في تركيا .. استخدموا الطبيعه الجبليه و الكهوف المنتشره فيها و عملوا فنادق في الكهوف دي.
ايوه فنادق في الكهوف
#سافر #تركيا
17/10/2017
متهيألي مفيش اجمل من انك تقعد في المكان ده و تفضي دماغك من اي حاجة غير انك تقعد تحسب في كام سحابة او كام لمبة في الفنار ده
اللي هو شغل اكل و مرعي و قلة صنعه 😂
02/10/2017
قبل اي سفريه لازم يبقى في تلفيات كتير
موبايل يبوظ .. كاوتش عربيه يفرقع ..... اي حاجه و السلام
كل ده بيحصل سواء كنت قايل او مخبي ... كاتب على الفيسبوك او بتداري
الخلاصه .. انها مش فارقه كتير
اعمل اللي بتحبه و مقتنع بيه و مرتاحله و ملكش دعوه بأي حد
و #سافر
18/05/2017
عايزين ناكول بقى Europa Park
حتى الاكل لازم يبقى هو كمان تجربة خاصه.
عشان كده قررنا ناكول في Roller coaster restaurant .. انت بتبقى قاعد على الترابيزه بتاعتك و قدامك شاشه فيها كل الأصناف اللي بتتطلب منها و هي مش كتيره اوي .. بيكون معاك كارت بتستخدمه عشان تأكد طلبك و يحسب الفلوس.
بعد وقت قصير الاكل بيجيلك اوتوماتيك و هو بيتحرك على القضبان اللي في الصوره لحد ما ييجي قدامك.
مفيش اي بني ادم بتتعامل معاه ... و انت خارج بتدفع زي ما الكارت اللي استخدمته حسب.
الاكل كان كويس او عادي بس التجربه مش عاديه خالص.
#سافر
16/05/2017
اللي بيخاف يروح Europa Park
الاوربيين ملهمش في جو الصويت و ال اووووو و ال اه ه ه ه بتاعنا ده ... فلما تلاقيهم بيصرخوا و يصوتوا يبقى الموضوع كبير.
المكان متقسم من جوا لبلاد .. كل بلد فيها مجموعة العاب.
اقوى و اخطر الالعاب:
* ال Blue Fire السرعة بتوصل ١٠٠ بعد ثانيتين و نص و بتقعد اكتر من دقيقتين و بتتقلب ٣٦٠ درجه كذا مره.
* ال Euro-Mir بيوصل طولها ل ٢٨ متر و بتفضل اللعبه تلف بيك جوا الاسطوانه الكبيره و براها شويه بوشك و شوية بضهرك.
* ال Wodan هتحس بالامان ازاي و انت راكب لعبه كلها خشب في خشب و في قلب مبنى خشبي مفتوح طوله ٤٠ متر و شايف و سامع الهزه بتاع الخشب.
* ال Silver Star ده بقى اكبر و اخطر رولو كوستر .. طوله ٧٣ متر و بينزل بزاويه حاده جدا بسرعة ١٣٠ كم و مدة اللعبه بتوصل ل ٣ دقايق ... "في ناس نزلت من اللعبه دي معيطه".
مش معنى كده ان الالعاب التانيه مش كويسه ... اي لعبه تانيه احلى و اقوى و اخطر من اي حاجه جربناها قبل كده.
#سافر
12/05/2017
الطريق الي Europa Park
اول حاجه بنفكر فيها و احنا بنرتب لأي سفر هي البحث عن الحاجه الجديده و المختلفه اللي عاوزين نعملها.
بعد تجربة ديزني لاند الرائعه في باريس كان لازم ندور على حاجه تانيه مثيره و ممتعه.
بعد بحث طويل اتفقنا على Europa Park واحده من اهم ملاهي الالعاب في أوروبا و اللي بتتميز بال Rolo coasters و مكانها في المانيا على الحدود مع فرنسا.
كان عندنا مشكله ان المكان بعيد عن المدن اللي عاوزين نروحها في المانيا و عشان كده غيرنا الخطه بتاعتنا و روحنا ستراسبورج مخصوص في فرنسا عشان نروح منها على يوروبا بارك.
و فعلا كان قرار سليم نزلنا من البيت من الفجر عشان كان فارق معانا نبتدي اليوم من اوله و ركبنا القطر من ستراسبورج متجهين إلى مدينة Rust في المانيا و نزلنا من القطر ركبنا اتوبيس لالملاهي.
ده تقريبا كان اكتر يوم حسينا فيه بالبرد في حياتنا سواء في الطريق أو في الالعاب في الملاهي نفسها ... ده الهوت شوكلت بمجرد نزولها من المكنه بتبرد بعد ثواني.
بمجرد ما تقرب من الملاهي و تشوف منظر الرولو كوسترز اللي انت المفروض تركبها كمان شوية بيبتدي قلب يتخطف و عنيك تلمع.
لازم تجرب بنفسك.
#سافر
06/05/2017
03/05/2017
كان أول يوم لينا في اسطنبول و بنتمشى شوية في الشوارع بعشوائية عشان نتفرج على البلد.
طب احنا جعانين بقى .. عاوزين ناكول اي حاجه .. اي سندوتشات او اي وجبه.
خلاص تمام اول ما نلاقي مطعم شكله كويس ناكول فيه .. اتفقنا.
اتمشينا شوية كمان في الشوارع الداخلية اللي ما بين البحر و ميدان تقسيم و فجأة لقينا محل حلويات وقفنا تنحنا قدامه كلنا.
يا جدعان احنا عاوزين نتغدى مش نحلي .. بس دي فرصه .. طب نروح و نرجع تاني .. طب حاجه خفيفه على السريع.
و فعلا كانت حاجه خفيفه على السريع 😁😁😁
دي كانت البداية و كملنا كده في اسطنبول .. اي حاجه تعجبنا نقعد و ناكولها مهما كان الوقت مناسب ولا لأ.
#سافر
#اسطنبول
20/01/2017
١٠ حاجات تعمل حسابهم و انت بتستخدم الباص في اوروبا.
🚌🚌🚌🚍🚍🚍🚌🚌🚌🚍🚍🚍
الباص من اهم و افضل طرق النقل ما بين المدن الاوروبية ... بس في شوية حاجات لازم تاخد بالك منها و انت بتحجز اي اتوبيس.
١. حاول تركب من اول محطه عشان اغلب الشركات مفيهاش حجز برقم الكرسي .. يعني اطلع و اقعد في اي مكان و لو انتوا مجموعة هيبقى الموضوع معقد اكتر.
٢. المفروض ان الباص يكون فيه WiFi بس دي كمان حاجة مش مضمونه.
٣. لو في استراحه متاخدش راحتك اوي و لو انتوا مجموعة متنزلوش كلكوا او حد يستنى جنب الباص .. لو الباص اتحرك هينفضلك و يمشي و مفيش جو التكافل الاجتماعي اللي عندنا بتاع أستنى يا اسطى محسن مجاش.
٤. حاول تركز ان السكن بتاعك ميكونش بعيد عن محطة الاوتوبيس عشان الشنط بتاعتك خصوصا لو قاعد مده قليله في المدينه اللي انت فيها.
٥. لو معاك اطفال بيبقى غالبا بيبقى ليهم سعر مختلف.
٦. ممكن يخنقوا على عدد الشنط و تدفع فلوس ازيد لو معاك شنط اكتر.
٧. مفيش الجو بتاع مساء الفل و اكراميه للراجل اللي بيحط الشنط .. بس ممكن يبقى في مبلغ صغير على كل شنطه "نادر لما بيحصل".
٨. اسعار التذاكر بتختلف من شركه للتانيه .. بس الجوده مش مختلفه جامد .. احجز الارخص.
٩. اللي بيفرق بجد في السعر لو حجزت باص بيتحرك بالليل جامد.
١٠. احسن باصات ركبناها كانت Mega Bus و Regio Jet .. لكن الاكثر انتشارا Flix Bus .. الباقيين مش مختلفين جامد عن بعض.
#سافر
15/01/2017
بوابات تحصيل الرسوم
* احنا ليه بندفع فلوس عشان نروح من مكان ل مكان تاني جوا بلدنا
- ايه المشكله يعني هو احنا اللي اخترعناها .. اكيد بلاد كتير بتعمل كده
* احنا اصلا مبنخترعش حاجه بس مبناخدش غير الحاجات دي و بننفض للحاجات اللي تخدم الناس
- يا عم العالم كله كده اشمعنى احنا
في امثله مختلفه لبوابات الرسوم "الكارتا":
دول الاتحاد الأوروبي مثلا مفيش مابينها حدود اصلا .. يعني مش بس انت مش بتدفع رسوم جوا نفس الدوله .. انت كمان مش بتدفع فلوس و انت بتتحرك من دوله للتانيه ..... اصلا اصلا و انت راكب قطر او اوتوبيس مش بتاخد بالك انك خرجت من دوله و دخلت دوله تانيه و تالته و رابعه كمان.
في مثال تاني بيتحصل فيه رسوم مرور ... في كوبري عملاق مسافته كبيره بيربط شمال و جنوب مومباي ببعضهم ... الحكومه في الهند بقى قالت ايه .. هيتم تحصيل رسوم لعدد سنين محدده من البدايه عشان يسددوا تكلفة الكوبري و بعد كده يبقى مفيش رسوم.
احنا بقى بعون الله لو حد ساكن في اكتوبر و رايح القريه الذكيه في اكتوبر برضه و قرر يستخدم البوابات بعيد عن الزحمه هيدفع ١٠ جنيه كل مرة .. ده غير ان الرسوم كل شوية بتزيد.
لو معاك بقى كارنيه جيش او شرطة انسى كل اللي اتقال ده عشان انت كده بتعدي بوابات الكومبوند مش اكتر.
#سافر
28/11/2016
افضل ما أنجبته الحضارات هو الأكل 😂😂😂
لما تروح اي مدينة لازم تدور على الأكل المميز بتاع المدينة دي و تجربه لأن بجد هو ده المعنى الحقيقي للسفر.
في حاجه كده احنا لقيناها في براج و بودابست بس منعرفش اسمها ... هي حلويات عباره عن عجينه عليها سكر و سينابون بسيط من برا و بتستوي على الفحم.
بتتاكل ساده او جواها نوتيلا او ايس كريم او اي افتكاسات ... طعمها لوحدها تحفه انما بقى بالاضافات سواء النوتيلا او الايس كريم ف ده حوار تاني خالص ... حاجه كده بتصحصح هرمونات السعاده لسنتين قدام.
#سافر
17/11/2016
حديقة حيوانات برلين .. المانيا
من افضل و اشهر حدائق الحيوان في اوروبا.
زي ما قلنا قبل كده الاثار و المزارات السياحية مش كل حاجه .. طبعا مهم انك تروح اهم الاماكن السياحيه و تتعرف على معالم كل مدينة .. بس مهم جدا كمان انك تعمل حاجه مختلفه.
حديقة حيوانات و اكواريوم برلين اكيد من ضمن الحاجات الجميله و المختلفه لأنك هتشوف كمية حيوانات و طيور و اسماك عمرك ما شفتها قبل كده.
توزيع و تصميم المكان رائع و اكتر حاجه كانت جامده جدا ان كل الحيوانات تقدر تشوفها من مكانين مختلفين .. من برا و انت بتتمشى و كمان من داخل المباني عشان لو الحيوان دخل البيت بتاعه.
الجو كان برد جدا جدا في الوقت ده و من اكتر الحاجات اللي لاحظناها ان حيوانات كتير بتبقى متضايقه ان الناس بتتفرج عليها خصوصا الغوريلا اللي كانت عدوانيه جدا و بتخبط في الفاصل الزجاجي.
#سافر
#المانيا
#برلين
24/10/2016
Europa park جمد قلبك
الملاهي
اجمد حاجة ممكن تروحها التذكرة ب 45€ وتخش تلعب اي حاجة وكل حاجة(لو قدرت) بجد ابداع في اقل التفاصيل بتحس بجو اللعبة قبل ما تلعبها كل لعبة ليها تصميم فريد وواقعي اللعب كلها متاخدة من الواقع اجمد تصميم شوفته لعبة wooden coaster كأنك في منجم وبتحاول تطلع منه بسرعة ورجرجرة خيالية اللعبة كلها خشب بجد حاجة شكلها كدا مش حقيقي
المدينة شكلها رهييييب متقسمة دول اوروبا بس طبعا كل دولة بالمشهورة بي علي شكل لعب
الاكل بقي في مطعم بردو الاكل بيجيلك لوحده كانه راكب coaster بردو ادامك شاشة بتطلب منها الاكل والشرب اللي انت عايزه وفجأة كدا تلاقي الاكل جايلك من بعيد من فوق وينزل ادامك (تحفة)
لو روحت اوروبا لازم تروح europa park بجد هتنبسط ليها مواصلات من كل حتة بتفتح من 9-7 تكون هناك من 8.30 عشان تلحق عشان كبيرة اوي
جمد قلبك
09/10/2016
لوكسمبورج
كل المواصلات العامه الداخلية ببلاش يوم السبت و الحد يعني انزل انت بس من بيتك و ملكش دعوه بالباقي.
ده غير ان البلد كلها متغطيه ب free Wi-Fi و لما تدخل اي مكان و ال WiFi العمومي ميكونش شغال هتلاقي ال WiFi بتاع المكان.
هو في كده !!!!
#سافر
05/10/2016
Cycling in Luxembourg 🚲🚲🚲
02/09/2016
American Visa
الفيزا بتاعة امريكا زيها زي اي فيزا في قصة الاوراق بتاعة كشف الحساب و ال HR Letter و حجوزات الطيران و الفنادق.
اكبر ميزه لل US Visa ان مدتها ٥ سنين multi entry و تقدر تقعد هناك ٦ شهور متواصله او متقطعه كمان الفيزا دي بتسهلك دخول دول تانيه كتير غير امريكا سواء في امريكا الشماليه و الوسطى و كمان دول تانيه كتير في اوروبا.
بس فيها اختلافات تانية كتير:
* الاجراءات بتبتدي بأنك بتملى application و تدفع فلوس الفيزا و انت بتحجز الميعاد و طبعا كل ده online.
* لازم تاخد معاك كل الاوراق اللي قلنا عليها في الاول بالاضافه ل ايصال المصاريف و الورق الخاص بحجز الميعاد.
* صور ٥ X ٥ و الاحسن انك تتصور هناك جنب السفاره عشان اغلب الاستديوهات مش بيعرفوا يظبطوا الصورة دي.
* لازم تروح بدري جدا قبل ميعادك .. طوابير كتير و اجراءات كتير هتاخد على الاقل ساعتين.
* متاخدش معاك اي حاجه فيها سلك او flash memory او ولاعه او اي حاجه فيها بطاريه غير الموبايل .. عشان هتضطر ترمي الحاجات دي في الشارع.
* بتعرف و انت واقف اذا كنت اتقبلت او اترفضت .. لو اتقبلت بتستلم الباسبور في خلال اسبوع.
* غالبا في ال interview مش هيشوفوا اي ورق معاك الا لو احتاجوا يتاكدوا من حاجه .. كلها اساله و انت بتجاوب.
* الاسئله بتبقى هدفها زي اي سفاره انهم يطمنوا انك هترجع و كمان ان معاك فلوس تصرفها هناك.
* مسافر ليه .. بتشتغل فين .. بتقبض كام .. عندك اولاد .. واخدهم معاك ولا لأ .. تعرف حد هناك .. لو تعرف حد هناك هتتسأل عنه كتير و ممكن في اسئله تانيه على حسب الحوار.
#سافر
21/08/2016
لما تسافر اي مدينة لازم تجرب اكلها.
حاول تنسى شوية انت بتحب ايه و مبتحبش ايه .. لازم تغير و تجرب .... اصلا هي دي فكرة السفر "الخروج عن المألوف".
في برشلونة وانت نازل من محطة Sagrada Familia على ايدك الشمال اول مطعم تقابله اطلب Pailla و استمتع بأشهر اكله محليه في برشلونة و يا سلام لو معاها مكرونة اسباجيتي spicy انت كده خلاص زي الفل.
#سافر
#برشلونة
12/08/2016
ارينا مول .. برشلونة
ازاي المكان ده ممكن يكون مول و مزار سياحي في نفس الوقت !!!!!
المكان ده اتبنى سنة ١٩٠٠ و فضل اكتر من ١٠٠ سنة يتعمل فيه عروض مصارعة الثيران و كمان كان بيتعمل فيه حفلات غنائيه.
و لما مصارعة الثيران اتمنتعت في كتالونيا كلها سنة ٢٠١٢ كان لازم يتم اعادة استغلال المكان خصوصا ان مكانه مميز جدا في وسط برشلونة و جنب قلعة المونجويك و النافوره السحرية.
حلبة مصارعة الثيران اتحولت ل مول
حصل استفاده من مكان موقعه مميز و معطل
تم الحفاظ على السور الاصلي لحلبة المصارعة للحفاظ على الشكل التاريخي للمكان
المول شكله رائع و من فوق المبنى تقدر تتفرج على برشلونة كلها
#سافر
#برشلونة
31/07/2016
تجربة ال Airbnb
كل اما بتسافر بتفكر ازاي اقدر أقلل المصاريف الثابته على قد ما اقدر عشان يبقى في فرصه انك تسافر تاني و ميبقاش السفر حاجه غاليه جدا.
اول مره سافرنا فيها كنا نازلين في فنادق و حاولنا نكون مسيطرين على الميزانيه و حطينا متوسط ٥٠٠ جنيه للغرفة المزدوجه في اليوم .. السفريه اللي بعدها كان لازم نقلل المصاريف و كمان نخوض تجربة جديده.
ايه ال Airbnb ده ؟؟؟!!!
ده website و application بتأجر شقق من خلاله زي كل ال websites و ال applications بتاعة الفنادق .. بتختار كل الحاجات اللي بتدور عليها زي المدينة و المنطقة و الامكانيات و متوسط الاسعار و بتشوف صور و اراء الناس و كل حاجه بتخص الشقه اللي عاوز تحجزها و في الاخر بتحجز اونلاين و بتقدر تتواصل مع صاحب الشقه.
الموضوع سهل و بسيط و يستحق التجربه .... و الاهم بقى من ده كله انه ارخص بكتيررررر من الفنادق و كمان منتشر جدا في اوروبا و موجود في قلب المناطق الحيوية كلها.
الحوار ده وفرلنا اكتر من ٥٠٪ من تكاليف السكن.
ميزة الموضوع ده بتظهر اكتر مع الاعداد الاكتر اللي مسافرين مع بعض ... يعني لو انتوا مجموعة ٤ فما فوق ف ال Airbnb هيكون مثالي ليكوا.
احنا جربنا الحوار ده في اسطنبول و كان تحفه في اننا متجمعين مع بعض علطول و ساكنين في قلب المدينه و موفرين فلوس كتير.
#سافر
#جرب
15/07/2016
الكلام عن الاكل في تركيا لا يمكن يخلص 🍽🍽
دي بقى احلى اكله اكلناها في اسطنبول"كباب اسكندر" .. احنا كنا سامعين عنها انها اكله حلوه .. بس عادي احنا عارفين ان اكل كتير في اسطنبول حلو.
المهم كنا في مول و عاوزين ناكل الاول .. طلعنا الفوود كورت لقينا المحل ده فاتح محلين جنب بعض واحد منهم بيقدم شاورمة و مشويات و التاني بيقدم أكلة كباب اسكندر بس .. محل كبير بيقدم حاجه واحده بس اخرك تجيب معاها شوية سلاطات.
احنا كالعاده قررنا نجرب .. الطبق بقى عباره عن طبق كبير مفروش عيش رائع مخبوز و متغطي كله بشرايح لحمه رقيقه و من فوق شوية طماطم و فلفل و على الجنب سلطة زبادي.
بما اننا كنا جعانين جدا اول ما الطبق نزل كنا خلاص هنبتدي ناكل لقينا راجل محترم جي عند الطرابيزه بتاعتنا و ماسك حله في ايده و راح مغرق الطبق كله سمنه مولعه من فوق .. احنا طبعا اتسبتنا في مكانا و مكناش فاهمين حاجه بس واضح ان ده النظام و اكتشفنا انه بيعمل كده لكل الناس.
الطعم بقى حاجه خرااااااافيه .. منتهى منتهى اللذه
#سافر
#تركيا
#اسطنبول
29/06/2016
الأفكار البسيطه تصنع فوارق كبيره
و انت داخل مسجد السلطان احمد في اسطنبول هتلاقي رول اكياس قدامك تشد منه كيس و تحط فيه جزمتك و لما تخرج هتلاقي باسكت جنب الباب عشان ترمي الكيس ده.
حاجه بسيطه جدا بس تأثيرها كبير و مهم جدا جدا و واضح قد ايه المكان نضيف من غير ما تلاقي شركة نضافه و مليون عامل.
نفس الفكره بيطبقوها في بعض القصور و المتاحف بتلبس كيس في رجلك و انت داخل و ترميه في الباسكت و انت خارج للحفاظ على نظافة و أثرية المكان.
#سافر
#تركيا
#اسطنبول
24/06/2016
محلات الحلويات الشرقية في اسطنبول زي محلات الدهب عندنا .. حاجه كده ليها قيمه عاليه و ليها البريق الخاص بيها.
مبدأيا كده تقريبا دي هتكون المره الوحيده اللي هنقول على حاجه غاليه.
الحلويات الشرقية في اسطنبول غاليه .. تقريبا ده عشان كل قطعة حلويات بتبقى ملياااااانه مكسرات.
Be the first to know and let us send you an email when Couple Travel posts news and promotions. Your email address will not be used for any other purpose, and you can unsubscribe at any time.
