මේපල් සිහින ගවේෂණය Maple Dream Exploration

02/04/2024

මේක ලිව්වේ ෆ්බී ගෘප් එකකට. මෙතනත් ලියල තියන්ඩ ඕනේ කියල හිතුන...................
---------------------------

මට හිතුණා ඕගොල්ලන්ට පොඩි කාරණයක් ලියලා තියන්න.

මේ ගෘප් එකේ දැන් වැඩි හරියක් ඉන්නේ බිස්නස් කරන කට්ටිය. කැනඩාවට එන්න හදන කට්ටියවත් එහෙම කට්ටියට උදව් කරන අයවත් මේකේ හරිම අඩුයි. එහෙම කැනඩාවට එන්න හදන කෙනෙකුට උදව් කරන බිස්නස් නම් තියෙන්නේ ඒත් කමක් නෑ. හැබැයි වැඩිපුරම තියෙන්නේ ඉඩම් විකුණන ඒවා ගෙවල් විකුණන ඒවා යන්තර මන්තර බලි හූනියම් කරන ඒවා එක්කො තමුන් කියපු සින්දුවක් ප්‍රසිද්ධ කරගන්න හදන ඒවා වගේ දේවල්. මම ගෘප් කීපයකටම ඇඩ් වෙලා බැලුවා. මේ කට්ටිය ඒ හැම ගෘප් එකකටම එයාලගේ ඇඩ් දානවා.

ගොඩක් දෙනා කතා කරන්නේ නම් රට හදන්න, හැබැයි ඊට කලින් තමුන් හැදිලා ඉන්න ඕනේ කියලා හිතන්නේ නෑ. එපා එකයි ඕන එකයි හැම මඟුලම ගිහිල්ලා අනිත් එකාගේ මූනේ උල උල යනවා. සමාජ මාධ්‍ය තුළත් නිකන් තියෙන ෆේස්බුක් එකනේ, ඔන්න ඔහෙ තියෙන ගෲප් ඔක්කොටම ඇඩ් වෙලා මට ඕන දේවල් දාගෙන දාගෙන දාගෙන යනවා කියල හිතනවා ඇති. ඒකෙන් ලොකු තෘප්තියකුත් ලබනවා ඇති මං හිතන්නේ.

තවත් සමහරු ඉන්නවා ඒගොල්ලෝ කැනඩාවට ගියා කියලා කියන්න පුදුම ආසාවක් තියෙන්නේ. හැබැයි එන්නේ ෆේක් ප්‍රොෆයිල් වලින් එහෙම නැත්නම් ප්‍රොෆයිල් ලොක් කරල නැත්නම් දාන්නේ ඇනොනිමස් පෝස්ට්. පොඩ්ඩක් හොයලා බලපුවම මේගොල්ලෝ කැනඩාවෙ නෙමෙයි ඉන්නේ. එහෙම කියන එකෙන් මොනවා බලාපොරොත්තු වෙනවද දෙයියෝ තමයි දන්නේ.

ඒ අතර තවත් කට්ටියක් ඉන්නවා ඕගොල්ලන්ට ජොබ් හොයලා දෙන්න full time, part time ඕන එකක් ඒගොල්ලෝ ලඟ තියෙනවා. හැබැයි එයාලා ෆෝන් නම්බර් එකක් දෙන්න කැමති නෑ. කෝල් එකක් ගන්නවට කැමති නෑ. ඇඩ්රස් එකක් ඇහැව්වොත් බොරු ඇඩ්රස් එකක් දෙන්නේ. වැඩි විස්තර කියන්න ටෙලිග්‍රෑම් කියන ඇප් එකෙන් එන්න කියනවා. ඔය වගේ නැටුම් ගැයුම් වැයුම් කෝටියයි.

මට කියන්න ඕන වුනේ මේකයි. මේ සමාජ මාධ්‍ය ඇතුලේ ඕන තරම් පට්ට හොරු ඉන්නවා. මේක ඇතුලේ එක එක විදිහේ ස්කෑම් තියෙනවා. සයිබර් සිකුරිටි ගැන ලෙක්‌චර් එකක් දෙන්න මගේ බලාපොරොත්තුවක් නෑ මෙතන. හැබැයි හැමතිස්සෙම ඕගොල්ලෝ පරිස්සම් වෙන්න. කවුරුවත් එවන ලින්ක් ක්ලික් කරන්න යන්න එපා. If something is fishy, it probably is!

කියමනක් තියනවා there is no such thing as a free lunch! කියලා. මේ කවුරුත් ඔයාලට ආදරේට කිසිම දෙයක් නොමිලේ කරලා දෙන්න එන්නෙ නෑ. අහුවෙන්න කලින් හොඳට හොයලා බලන්ඩ. පස්සේ දුක් වෙන්ඩ එපා.

28/01/2024

ගොඩක් දෙනාට තියෙන ප්‍රශ්නයක් තමයි විසිට් ඇවිත් ජොබ් එකක් කරන්ඩ පුළුවන්ද කියන එක. කෙටියෙන් කිව්වොත් එහෙම කරන්ඩ බෑ.

එහෙම කිව්වම සමහරු මට බැනගෙන එනවා. එයාල දන්න යාළුවො බර ගානක් එහෙම ඉන්නවලු. මම කියන්නේ නෙගටිව් දේවල්ලු. ගිහින් ගේමක් ගහන්ඩ පුළුවන්ලු. අපේ මිනිස්සු අපේ අයට උදව් කරන්නෙ නැහැල්ලු. දෙමළ මිනිස්සු නම් උදව් කරනවලු. ඔය වගේ අවලාද ගොඩයි. මම එහෙම කියන්නෙ මම මෙහෙ ෆොරින් මිනිස්ට්‍රි එකේද වැඩ කරන්නෙ කියලත් අහනවා 😀

ඒ අස්සේ සමහරු කියනවා විසිට් ඇවිත් LMIA එකක් හොයා ගන්ඩ පුළුවන්ලු. මම ඒක නොදන්න කෙනෙක්ද කියල අහනවා.

මම විසිට් ගැනයි LMIA ගැනයි ලියල තියෙනවා. මේ පේජ් එක හැදුවේ ඒ ලියපු ඒව එක තැනක බලගන්ඩ ඕන නිසා. කැමති කෙනෙක්ට ඒව කියවල බලන්ඩ පුළුවන්.

එහෙම විසිට් ඇවිත් පොඩි පොඩි කෑෂ් ජොබ් කරල වැඩිම උනොත් මාසයක් දෙකක් survive වෙන්ඩ පුළුවන්. ඊට පස්සේ අනාතයි. මෙහෙ සිස්ටම් නොදන්න අය ඔය වගේ දේවල් කරන්ඩ පුළුවන් කියල කියයි. නොදන්න කම නෙමෙයි නම් පට්ට හොරු වෙන්ඩ ඕන. බොරු සුරංගනා ලෝකයක් මවල එන්ඩ බලාගෙන ඉන්න මිනිස්සුගෙ සල්ලි ටික හූර ගන්ඩ ඇහැ ගහගෙන ඉන්න අය.

විසිට් ඇවිත් LMIA හරහා ජොබ් ගත්ත අයත් ඉන්නවා. එහෙම බැරුව ගිහින් අනාථ වෙච්ච අයත් ඉන්නවා. ඒක තමුන්ගේ ලක්‌ එක සහ වියදම් කරන්ඩ පුළුවන් මුදල් ප්‍රමාණය මත කරගන්ඩ ඕන දෙයක්. අනික තමුන්ට කැමති ජොබ් එකක් ලැබෙන්නේ නැති වෙන්ඩ පුළුවන්. ඒ වගේම ෆැමිලි ගෙන්න ගන්ඩ බැරි වෙන්ඩ පුළුවන්. එහෙම පුළුවන් උනත් අවුරුදු දෙකකින් work permit එක ඉවර උනාම මොකද කරන්නේ. PR ගන්නේ කොහොමද. ඕව ගැන කව්රුත් කියන්නේ නැහැනේ. අන්න ඒකයි නොදන්නා කම හෝ පට්ට හොරු කියල මම කියන්නෙ.

කැමති කෙනෙක් තේරුම් ගත්තදෙන්.

24/12/2023

Navigating the Path to Canada: An Essential Guide to Immigration Steps!

While I can provide some general steps, it's important to note that immigration processes can change, and it's always advisable to check the official website of the Government of Canada or consult with an immigration professional for the most up-to-date and accurate information. Here is a general guide to the steps to come to Canada:

1. Determine Your Eligibility:

Check the eligibility criteria for the immigration program you are interested in. Common pathways include Express Entry, Provincial Nominee Programs (PNPs), family sponsorship, and work permits.

2. Choose the Right Immigration Program:

Depending on your qualifications, skills, and personal situation, you may be eligible for different immigration programs. Research and choose the one that best suits your circumstances.

3. Express Entry System (if applicable):

If you are eligible for Express Entry, create an online profile with your credentials. This system manages applications for permanent residence under economic immigration programs.

4. Provincial Nominee Program (if applicable):

If you have a specific province or territory in mind, you can apply through their Provincial Nominee Program (PNP). Each province has its own streams and criteria.

5. Gather Required Documents:

Collect all necessary documents, such as identification, educational credentials, proof of work experience, language proficiency test results (usually IELTS or CELPIP for English, or TEF for French), and any other documents required for your specific immigration stream.

6. Create an Online Account:

Create an online account on the official Immigration, Refugees, and Citizenship Canada (IRCC) website.

7. Submit Your Application:

Submit your application along with the required documents through the online system or by mail, depending on the immigration program.

8. Pay Fees:

Pay the required application fees online. Fees vary depending on the type of application and the number of family members included.

9. Wait for Processing:

The processing time varies depending on the type of application and the program. You can check the current processing times on the official website.

10. Medical Examination and Police Clearance:

Depending on the program, you may need to undergo a medical examination and provide police clearance certificates.

11. Receive Confirmation and Travel to Canada:

Once your application is approved, you will receive confirmation and instructions on what to do next. You may receive a Permanent Resident Visa (if applicable) and can then make plans to travel to Canada.

Remember, immigration policies and procedures may change, so always refer to the official government website or consult with an immigration professional for the latest and most accurate information.

24/12/2023

කැනඩාවට එන්න කොහොමද - පසු වදනක්‌..

මම ලියපු දේවල් වලින් අඩුමගානේ එක්කෙනෙකුට දෙන්නෙකුට හරි ඒකෙන් ප්‍රයෝජනයක් වුනා නම් මට ඒ ඇති.

පෝස්ට් දාන්ඩ පටන් ගත්තට පස්සෙ මට ගොඩක් දෙනා මැසේජ් දාලා විස්තර අහන්න පටන් ගත්තා. ඒ හැමෝටම මම පුළු පුළුවන් විදිහට උත්තර දීලා ඇති. එහෙම කරන්න පුලුවන් උනේ මට මේ දවස් ටිකේ වෙලාව තිබුණ නිසා. මින් ඉදිරියට නම් මට එහෙම කරන්න අමාරු වෙයි. වෙලාව තියෙන හැටියට උත්තර දෙන්නම්. හැබැයි ලියන දෙයක් සිංහලෙන් හරි ඉංග්‍රීසියෙන් හරි ලියන්ඩ. සිග්ලිෂ් කියවන්ඩ අමාරුයි. ඒක මට එපාම කරපු දෙයක්.

එක්කෙනෙකුට දෙන්නෙකුට හැර මං හිතන්නේ බහුතරයකට මම ලියපු දේවල්වලින් පොඩි හරි ප්‍රයෝජනයක් තියෙන්න ඇති. සමහරු ස්තූති කරලත් එවලා තිබුණා. ඒ හැමෝටම ස්තූතියි.
තවත් සමහරු එක එක විදිහේ ලොකු ටෝක් දෙනවා. හැබැයි ඉන්නේ එයාලගේ ප්‍රොෆයිල් ලොක් කරගෙන 😀😀

මගෙන් අහල තිබුන ප්‍රශ්ණ වලින් හැමෝටම පොදු දේවල් ටිකකට මෙතන උත්තර තියෙනවා.

✅️ මම ඉන්නෙ කැනඩාවේ ද? ඔව්
✅️ මම ඒජන්ට් කෙනෙක් ද? නෑ
✅️ මට ජොබ් හොයල දෙන්න පුලුවන්ද? බෑ
✅️ විසිට් එකක් ගහලා කාවහරි අරගන්න පුලුවන්ද? බෑ
✅️ ලේබර් ජොබ් එකක් හොයාගන්නේ කොහොමද? මම දන්නේ නෑ
✅️ LMIA එකක් ඇත්තද බොරුද කියල දැනගන්නෙ කොහොමද? දන්නේ නෑ
✅️ Care Giver job එකක් හොයාගන්නෙ කොහොමද? දන්නේ නෑ
✅️ අපි අහවල් රටේ ඉන්නෙ. එහෙ ඉඳලා කැනඩා එන්නෙ කොහොමද? ලංකාවේ ඉඳලා යන විදිහටම තමයි
✅️ IELTS නැතුව බැරිද? බෑ
✅️ IELTS කොච්චර ගන්ඩ ඕනද? ඒක තමුන් යන පාත් එක අනුව තමා

මම ලිව්වේ මම දන්න දේවල්. මම හැමදේම දන්නෙ නෑ. මේ පහල තියෙන ලින්ක් එක තමයි කැනඩා රජයෙන් තියෙන official link එක. ඕනම කෙනෙකුට මේකෙ තියන විස්තර කියවලා බලලා යන්න පුලුවන්ද බැරිද, යනවනං මොන විදියේ දේවල් ද කරන්ඩ ඕනේ වගේ හැම විස්තරයක්ම සවිස්තරාත්මකව තියෙනවා.
www.canada.ca/en/immigration-refugees-citizenship/services/immigrate-canada/express-entry.html
මේක කියවල තේරුම් ගන්න බැරි කෙනෙකුට තමයි ඒජන්ට් කෙනෙක් හරහා යන්ඩ වෙන්නේ. අන්න ඒ නොදැනුවත්කම තමයි ගොඩක් වෙලාවට ඒජන්ට්ල පාවිච්චි කරන්නේ මිනිස්සුන්ව ගසා කන්ඩ.

අධ්‍යාපන සුදුසුකම් නැතිව, ඉංග්‍රීසි දැනුමත් නැතිව, ඔය ලින්ක් එකේ දාල තියෙන විදියට කැනඩාවට අවශ්‍ය කරන skill සෙට් එකක් නැතිව කැනඩාවට එන්න ක්‍රමයක් නෑ. එහෙම එන්ඩ නම් ඉතින් සරණාගතයන් වගේ එන්ඩ ඕන. දැනට එහෙම ගන්නෙ ඇෆ්ගනිස්ථානය, යුක්රේන් වගේ යුද්ධයට මැදි වෙලා ඉන්න රටවල් වලින් විතරයි.

තවත් කාරණාවක් තමයි කැනඩාවට එන්ඩ තියෙන නීතිරීති සමහර දේවල් එක එක කාල සීමාවන් වලදී වෙනස් වෙනවා. අද අපි දන්න දේ හෙට වෙනස් වෙලා තියෙන්න පුළුවන්. ඒක නිසා හොඳම දේ තමයි හැමතිස්සෙම යාවත්කාලීන වෙන අර official link එකේ තියෙන විස්තර කියවලා බලන එක.

ගොඩක් දෙනා හිතාගෙන ඉන්නවා කැනඩාවට යන එක මැදපෙරදිග රටවල් වලට යන එක හරි යුරෝප් රටවල් වලට යන එක වගේ යන්න පුළුවන් ක්‍රමයක් කියලා. ඒක එහෙම නෙමෙයි. ඕනම රටකට යන්න කලින් ඒ රටේ විස්තර හොඳට හොයලා බලන්න. යන්නම් වාලේ යන්න එපා.

Student යනවනම් මොනවගේ cost එකක් යනවද කියලා එහෙම නිකංම කියන්න බෑ. ඒක තීරණය කරන්න වෙන්නේ තෝරගන්න කෝස් එක, තෝරගන්න institute එක, ඒක තියෙන නගරය වගේ දේවල් අනුව.

PR යන කෙනෙක්ට දරන්න වෙන වියදම අර official site එකේ හරියටම කියලා තියෙනවා.

මේ ක්‍රම දෙක හරහා කැනඩාවට එන්න හිතාගෙන ඉන්න කෙනෙක්ට නං අපිට උදව් කරන්න පුළුවන්.

එක එක ඒජන්සි වලින් ඔයාලට කියන දේවල් ඇත්තද බොරුද කියල හොයල බලන්න ක්‍රමයක් මා ලඟ නෑ. ඒක නිසා ඒවා අහන එක ඇත්තටම බොරු වැඩක්.

සමහරු අහල තිබුන ලංකාවේ ඉඳලා කොහොමද කැනඩාවේ ජොබ් එකකට ඇප්ලයි කරන්නෙ කියලා. මෙහෙම කරන්න බෑ. කැනඩාවේ සිස්ටම් එක හදලා තියෙන්නේ කැනඩාව ඇතුලේ ඉන්න මිනිස්සුන්ව විතරක් ජොබ් වලට ගන්න. මම කලින් විස්තර කරලා තිබුන වගේ කම්පැනි එකක් එහෙම පිටින් කාවහරි ගන්නවනං ඇයි එයාලට කැනඩාව ඇතුලෙන් ඒ වගේ කෙනෙක්ව හොයාගන්න බැරි කියලා කැනඩා රජයට ඔප්පු කරන්ඩ ඕනේ. ඒක තමයි LMIA කියල කියන්නේ.

තාම තරුණ වයසේ ඉන්න අයට පුළුවන් උනන්දු වෙලා ඉගෙන ගෙන අවශ්‍ය කරන එක්ස්පීරියන්ස් හදාගෙන ඒ අවශ්‍ය කරන මාර්ගය හදා ගන්නවා කියන ටාගට් එක ඔළුවේ තියාගෙන වැඩ කරගන්ඩ.

ටිකක් යහමින් සල්ලි තියෙන කෙනෙකුට පුළුවන් student visa එකක් හරහා එන්ඩ.

වයස ප්‍රශ්නයක් වෙන අයට තියෙන එකම option එක ඉතිං තමන්ගේ දූ දරුවන්ට හොඳට උගන්නලා ඉස්සෙල්ලම එයාලව යවන එක.

හොඳ විශ්වාසවන්ත ඒජන්සි එකක් හරහා රැකියාවකට එන්න පුළුවන් නම් ඒකත් හොඳයි. හැබැයි මගෙන් ඒ ගැන අහන එක තේරුමක් නැහැ මොකද මම ඒක ගැන දන්නේ නැහැ. වෙන වෙන ක්‍රමත් ඇති හැබැයි මම ඒව දන්නෙත් නෑ.

හැමෝටම ජය...

Canada has a great job market and plenty of opportunities. If you come as a skilled immigrant, you and your family will benefit from our high quality of life.

24/12/2023

කැනඩාවට එන්නේ කොහොමද -- 9 (අවසාන කොටස)

ඔව් මේක අවසාන කොටස. කියන්ඩ හිතේ තිබුන ප්‍රදානම දේවල් ටික තමයි මෙහෙම ලියල තියන්ඩ හිතුනේ.

මේ ලියපු ටික කියවල අධෛර්යමත් වෙන්ඩ අවශ්‍ය නැහැ. එකම දේ, මේ ලෝකේ අනිත් එකාට හෙන ගහල ගියත් තමුන්ගේ වැඩේ කෙරෙනවනම් කියල හිතන මිනිස්සු ඉන්නවා කියල දැනගෙන වැඩේට බැස්සනම් හොඳයි. නැත්නම් වෙන්නේ තමුන් දුක් මහන්සියෙන් හම්බ කරගත්ත දේවල් නිරපරාදේ කාට හරි පූජා කරන්ඩ වෙන එක විතරයි.

ක්‍රමය මොකක් උනත්, වැඩේ කරයි කියල ශුවර් කෙනෙක් හරහා යන්ඩ පුළුවන් රටකට යන්ඩ මාර්ගය හදා ගන්ඩ. මොනාට හරි යනවා කියල හිතාගෙන රට ගිහින්, රස්සාවල් නැතුව, කන්ඩ බොන්ඩ නැතුව, අසනීපයකට බෙහෙතක් නැතුව, පාරවල් ගානේ දුක් විඳින මිනිස්සුන්ව ඇස් දෙකෙන් දැකල තියෙනවා. ඒ වගේ දේවල් වලට රැවටෙන්ඩ එපා. ලංකාවෙන් ගිය ගමන් දිව්‍ය ලෝකයක් පහල වෙන්නේ නැහැ. සමහර මිනිස්සු දුක් අමාරුකම් එනකොට කොහොම හරි මොකකට හරි කොහෙට හරි යනව කියල යන්ඩ හැදුවට ඒ යන තැන ගැන පොඩි හරි අදහසක් නැහැ. යන රටේ දේශගුණය, මිනිස්සු, කන බොන දේවල්, සංස්කෘතිය වගේ දේවල් ගැන දල අදහසක්වත් නැහැ. ඉතින් ගියාට පස්සේ හොඳ විදිහට වැඩේ කෙරුනේ නැත්නම් අනේ ලංකාවේ ඉඳගෙන ලුණුයි බතුයි කෑවනම් මීට වඩා හොඳයි කියල කියන අය ඕන තරම්.

ඔය එෆ්බී හරි යුටියුබ් එකේ හරි එක එක දේවල් දාන අය දාන්ඩ පුළුවන් හොඳම දේවල්, ලස්සනම දේවල්නේ දාන්නේ. අපි උනත් කැත ෆොටෝ එකක් දානවද නෑනේ. හැබැයි ඒ පෙන්නන සුන්දර ලෝකෙන් එහාට ගිය යථාර්තයක් තියෙනවා කියල අමතක කරන්ඩ නරකයි. කොහෙට ගියත් ජීවත් වෙන්ඩ අපි හැමෝම කරන්නේ අරගලයක්.

මෙහෙට එන්ඩ අමාරුයි තමයි. ඒකට ගොඩක් ලොකු වැඩ කොටසක් තියෙනවා තමයි. හැබැයි ඒ පලවෙනි පියවර විතරයි. හරිම කතන්දරේ පටන් ගන්නේ රටට පය ගහපු දවසේ ඉඳල. මෙහෙ උනත් ප්‍රශ්ණ නැතිව නෙමෙයි. උදාහරණයකට දැන් මෙහෙත් තෙල් මිල උපරිමයි. හැමදාම නිව්ස් වලට මේක ගැන කියනවා. ඔව්, පෝලිම් නැහැ තමයි. නමුත් මේ වැඩිවෙන තෙල් මිල හැමෝටම බලපානවා. පාස්පෝර්ට් ගන්ඩ මෙහෙත් මිනිස්සු පෝලිම් වල ඉන්නවා. සමහර ආණ්ඩුවේ වැඩ කරගන්ඩ ගියාම මාස ගණන් බලාගෙන ඉන්ඩ වෙන්නේ. උද්ධමනය එන්ඩ එන්ඩම වැඩි වෙනවා. දේශපාලන ප්‍රශ්ණ ඕන තරම් තියෙනවා. විදේශ සංක්‍රමනිකයන්ගෙන් හැදුන රටක් නිසා විවිධාකාර මිනිස්සු ඉන්න රටක්. ඒ නිසා ප්‍රශ්ණත් අනන්තයි අප්‍රමාණයි. ලංකාවේ පාරවල් වල වෙඩි තියන ඒවා තියෙනවා වගේම මෙහෙත් තියෙනවා. ඒක නිසා, ඔය ෆොටෝ එකක් බලල වෙනම මානසිකත්වයකින් එන්ඩ එපා. අවබෝධයකින් එන්ඩ. හැබැයි ඒ ඔක්කොමත් එක්ක ඊට වඩා හොඳ දේවලුත් ගොඩාක් තියෙනවා. හොඳ දේවල් ගැන හැමෝම කියන නිසා ඒ ගැන වැඩිදුර ලියන්ඩ ඕන නැහැනේ.

අවසාන වශයෙන් කියන්නේ, විශේෂයෙන් දරුවෝ ඉන්න අය ඒ දරුවන්ගේ අනාගතය ගැන හිතනවානම් කොහොම හරි කොහෙට හරි යන්ඩ බලන්ඩ. සමහරුන්ට එහෙම යන්ඩ බැරි ප්‍රශ්ණ ඇති. පුළුවන් අය එහෙම යන්ඩ බලන්ඩ. තවදුරටත් අපේ රට දිහා බලාගෙන ඉන්න එක තේරුමක් නැහැ. අපිට අපේ රට දැනටමත් නැතිවෙලා ඉවරයි. ඒක තාම තේරුනේ නැති අය ඇති. ලොකු දුකක් ඒ ගැන තිබුනත් ඇත්ත කතාව ඒකයි.

හැමෝටම ඔයාලගේ අරමුණු වලට යන්ඩ අවශ්‍ය ශක්තිය ධෛර්යය නොඅඩුව ලැබේවා❤️

24/12/2023

කැනඩාවට එන්නේ කොහොමද -- 8

කැනඩාවට එන්ඩ හදල තියෙන තවත් ක්‍රමයක් තමයි වැඩකිරීමේ බලපත්‍රයක් හරහා එන එක. සිංහලෙන් කියනවනම් වර්ක් පර්මිට් එකක්.

මේකත් ජාවාරම්කරුවන්ගේ ප්‍රධාන ඉලක්කයක්. මේකට සමහරු අති විශාල මුදලක් අය කරනවා. හැබැයි එහෙම අය කරලත් වැඩේ කෙරෙයිද කියල ෂුවර් නැහැ.

මේක හිතන තරම් ලේසි දෙයක් නෙමෙයි. නීති රීති වලට පිටින් ගිහින් හොර පාරෙන් වැඩේ කරන අයත් ඇති. එහෙම ආවයි කියන කීප දෙනෙක් ඉන්නවා. ඇත්ත කතාව එයාලම තමයි දන්නේ.

ලේසි නොවෙන්ඩ හේතුව මේකයි. වෙන රටක කෙනෙක්ව වර්ක් පර්මිට් එකක් දීල ගෙන්න ගන්ඩ නම්, එහෙම කරන කොම්පැනි එක ගොඩක් ලොකු ප්‍රොසෙස් එකක් කරන්ඩ ඕනේ. ඒකට කියන්නේ LMIA කියල (Labour Market Impact Assessment). මේක හරහා අර කොම්පැනිය මෙහෙ රජයට කියන්ඩ ඕනේ එයාලට එයාලගේ ජොබ් එකට අවශ්‍ය සුදුසුකම් තියෙන කෙනා කැනඩාව ඇතුලේ හොයාගන්ඩ බැහැ කියල. මොන කොම්පැනියද ඔච්චර නැහෙන්නේ.

ඔන්න ඉතින් විශේෂ කෙනෙක් නම්, උදාහරණයකට විශේෂඥ වයිද්යවරෙයෙක් හරි නියුක්ලියර් සයන්ටිස්ට් කෙනෙක් වගේ නම් ඕක ෂුවර් එකටම කරගන්ඩ පුළුවන්. එහෙම නැතුව සාමාන්‍ය රැකියා වලට ඕන තරම් මිනිස්සු රට ඇතුලෙම ඉන්නවනේ.

මම දන්න එක්කෙනෙක්, ඩුබායි වල, මේ වගේ වර්ක් පර්මිට් එකක් දෙනවා කියපු කෙකෙන්ට ඩිරාම් හතලිස්දාහක් ගෙව්වා මීට අවුරුදු එකහමාරකට විතර කලින්. තාමත් කියන්නේ දෙනවා කියල. කාලෙන් කාලෙට එක එක දේවල් කියනවා. එකකාලයක් කිව්වා ඇෆ්ගන් සරණාගතයන් ගන්න නිසා කැනඩාවේ අනිත් වැඩ කටයුතු ප්‍රමාද වෙනවා කියල. දැන් කියනවා යුක්රේන් සරණාගතයන් ගන්න නිසා පරක්කු වෙනවා කියල. මේ කතා වල ඇත්තක් තියෙනවා. නිව්ස් බැලුවොත් හොයාගන්ඩ පුළුවන් එහෙම ප්‍රමාදවීම් මෙහෙ තියෙනවා කියල. අද වෙනකොට මෙහෙත් පාස්පෝර්ට් ගන්ඩ ලංකාවට වඩා දිග පෝලිමක් තියෙනවා. මිනිස්සු උදේ පාන්දර තුනට නැගිටල පෝලිම් වලට යන්නේ. හැබැයි මේ ඇත්ත කතා අර ඒජන්සි කාරයෝ යොදා ගන්නේ එයාලගේ බොරුව වහගන්ඩ.

නිකමට හිතල බලන්ඩ ඩිරාම් 40,000ක් කියන්නේ ලංකාවේ මුදලින් මේ වෙනකොට රුපියල් මිලියන 4ක්. ඒ වගේ 10 දෙනෙකුගෙන් සල්ලි ගත්තනම් රුපියල් මිලියන 40ක්. ඒ වගේ මුදලක් කිසිම පොලියක් නොගෙවා අවුරුදු ගානක් වෙන බිස්නස් එකකට ආයෝජනය කරලා තිබ්බම අර ඒජන්සි කාරයට කොච්චර ලාබ ලබන්ඩ පුලුවන්ද. මගේ යාළුවට දැන් එපා වෙලා සල්ලි ඉල්ලලා තියෙන්නේ. තව දවස් දෙකකින් දෙනවා කිව්වලු. කොහොම වෙයිද දන්නේ නැහැ.

වෙන ක්‍රම වලින් එන අයත් ඉන්නවා. එහෙම ඇවිත් හරි පිළිවෙලට ඔක්කොම දේවල් හදාගෙන හොඳට ඉන්න අයත් ඉන්නවා. මීට දශක දෙකකට විතර උඩදී ඒ වගේ ක්‍රමයකින් ඇවිත් මෙහෙ කටිටියක් එක්ක එකතු වෙලා විවිද හොර වැඩ වලින් කෝටි ගණන් හම්බකරගෙන ලංකාවට ඇවිත් කිංග්ල වගේ හිටපු අයත් මම දැකල තියෙනවා. එහෙම හම්බ කරපු හැටි, ඔයාට විතරයි මේවා කියන්නේ කියල මට විස්තර කෙරුව. විශ්වාස කරල කියපු දේවල් එහෙමම තිබුනාවේ.

24/12/2023

කැනඩාවට එන්නේ කොහොමද -- 7

සමහර අද්දැකීම් ලබා ගන්න ඒව තමුන්ම කරන්න ඕනේ නෑ අනිත් අයගේ අත්දැකීම්වලින් වුණත් ඉගෙන ගන්න පුළුවන්. ප්‍රශ්නෙකට තියෙන්නේ ගොඩක් අය තමුන් ලබා ගත්ත අත්දැකීම් බෙදා හදා ගන්න කැමති නෑ විශේෂයෙන්ම තමුන්ට අවාසියක් වෙච්ච දේවල් හරි තමුන්ට වැරදිච්ච දේවල් හරි එහෙම විවුර්තව කතා කරන්ඩ කැමති වෙන්නේ නැහැනේ. එතකොට වාසිය තියෙන්නේ අර වගේ බොරු කාරයන්ට.

දෙයක් කරනකොට ඒක කළ යුත්තේ කොහොමද කියන විදිය දැනගෙන ඉන්නවා වගේම නොකළ යුත්තේ මොන වගේ දේවල්ද කියලා දැනගෙන ඉන්න එක ඉතාමත් වැදගත්. මේ ටික ලියන්නේ ඒ වගේ ඇත්තටම සිදු උන දේවල් අනිත් අයටත් දැනගෙන සිටීම ප්‍රයෝජනවත් කියල හිතන නිසා.

මේ සිදුවීම් ඔක්කොම මගේ යාළුවන්ට සිදු උන දේවල්. නම් ගම වලින් තොරව විස්තර කියන්නම්.

උණු උණුවෙම සිදු උන දෙයක් මේක. ගිය සතියේ මගේ යාලුවෙක් එයාගේ තවත් යාලුවෙක් එක්ක ඩුබායි වල තියෙන කැනඩාවට මිනිස්සු යවන ඒජන්සි එකකට ගියා. යන්ඩ කලින් මට කිව්වා මෙහෙම තැනක් තියෙනවා කියල. තියෙන්නේ ඩුබායි වල බිස්නස් වලට හාර්ට් එක වගේ තියෙන තැනක සුපිරි බිල්ඩින් එකක. ආරංචි වෙලා තිබුනේ 20% ගෙවන්ඩ තියෙන්නේ, ජොබ් වීසා එකක් දෙනවා, අනිත් ගාන ගියාට පස්සේ දෙන්ඩ තියෙන්නේ කියල.

ඒ කියන්නේ මුළු මුදල ඩිරාම් 22500 නේ. ඒ කියන්නේ කැනේඩියන් ඩොලර් නම් 8000කටත් අඩුයි. මම කිව්වා හරි එහෙනම් ගිහින් ඇවිත් විස්තරේ කියන්ඩකෝ කියල.

මගේ යාළුවා කොහොම හරි එතන වෙච්ච සංවාදය ෆෝන් එකෙන් රෙකොර්ඩ් කරගෙන ඇවිත් මට එව්වා. මගේ අම්මෝ ඒක අහල සල්ලි නොගෙවන කෙනෙක් හිටියොත් තමයි පුදුමේ. ඒ කතා කරන කෙල්ල සුපිරි මාර්කටින් පොරක්. කැනඩාවට යන එක හෙට හරියන එකක් වගේ කතාව. මේ මාසේ අන්තිම වෙන්ඩ කලින් එයාලත් එක්ක රෙජිස්ටර් උනොත් තව ඩිස්කවුන්ට් එකකුත් දෙනවලු ඩිරාම් 4000ක.

මගේ යාළුවත් හිත හිත හිටියේ රෙජිස්ටර් උනොත් හොඳයි කියල. මට පුළුවන් තරමින් පැහැදිලි කෙරුව ඕක බොරුවක් කියල. තේරුම් ගත්තද නැද්ද කියල දෙයියෝ තමයි දන්නේ. යන්නේ නැහැ කිව්වා හැබැයි හොරෙන් ගියාද දන්නේ නැහැ.

මීට කලින්, මාස හය හතකට කලින් විතර වගේ තව යාළුවෙක් ඔය වගේම තැනකට ගියා. එතන අයකරන ගාන අර උඩින් කිව්ව තැනටත් අඩුයි. හොඳම සීන් එක කියන්නේ එතන ලංකාවේ ගෑනු කෙනෙකුත් වැඩ කෙරුවා. "අපේ" කෙනෙක්නෙ ඉන්නේ. බොරුවක් කරන්නේ නැතුව ඇති කියල මගේ යාළුවා ගිහින් සල්ලි ගෙව්වා. ආ මේකත් ඩුබායි වල හරි.

ටික දවසකට පස්සේ කිව්වා ඒක හරි ගියේ නැහැ කියල. අර කොම්පැණියවත් ලංකාවේ ගෑනු කෙනාවත් හොයාගන්ඩ නැහැලු.

ඔතනටම ගිහින් සල්ලි නොගෙවා බේරුණු යාලුවෙකුත් හිටියා. එයාට ටිකක් තේරුම් ගන්ඩ පුළුවන් වෙන්ඩ ඇති.

තවත් එක්කෙනෙක් ගිය තැනක හොඳ ඔෆර් එකක් දීල තිබුන. ඒ තමයි සම්පුර්ණ මුදල එක පාර ගෙවනවනම් ලොකු ඩිස්කවුන්ට් එකක් දෙන එක. එතකොට ගෙවන්ඩ තිබුනේ ඩිරාම් 8000ක් විතරයි. කොටස් වශයෙන් නම් ඩිරාම් 2000 ගානේ 5ස් සැරයකට ගෙවන්ඩ වෙනවලු. මෙතනට ගිය මගේ යාළුවට ටිකක් සල්ලි තියෙනවා. නැතිඋනොත් 8000නේ මචං, මං මේක ගෙවල බලන්නම් කියල කිව්වේ. මම නොවදිනා වැඳුම් වැන්ඳ එපා කියල. බැරිම තැන මං කිව්වා උඹට ඕක කරන්ඩම ඕනනම් කොටස් වශයෙන් ගෙවන එකට පලයන්. 2000ක් ගෙවල බලපන් මොකද වෙන්නේ කියල කිව්වා. පොර ඉතින් අන්තිමට ඒ කියපු දේ ඇහැව්වා. 2000ක් ගෙවල සති දෙකයි ගියේ අර ආයතනය හොයා ගන්ඩත් නැහැ.

අදට මේ ඇති...

24/12/2023

කැනඩාවට එන්නේ කොහොමද -- 6

කලින් ලියපු එක දැකල එක්කෙනෙක් මට කතා කරලා ඇහුවා කැනඩාවට එන එක ගැන ලියනකොට මොකද මේ වෙන වෙන කතා ලියන්නේ කියල. සමහරුන්ට එහෙම හිතෙන්ඩ ඇති. හොරෙන් කියවන අයත් ඉන්නවනේ 😀😀

ඒක කිව්වේ ගොඩක් තැන්වල වැඩ කෙරෙන හැටි කියන්ඩ ඕන නිසා. ඒ වගේ උදාහරණයක් දුන්නම තේරුම්ගන්ඩ ලේසියිනෙ.
හරි, දැන් රටේ ප්‍රශ්ණ හරි මොනා හරි හේතු නිසා රටින් පිට වෙලා යනවා කියල හිතන කෙනෙක් එහෙම කරන්ඩ පුළුවන් ක්‍රම සහ විධි හොයනවනේ. සමහරු නම් මේක කරන්නේ හොරෙන්. ඒවටත් හේතු ඇති. කොහොම හරි මේවා ගැන හොයනකොට එක එක දේවල් දැනගන්ඩ ලැබෙනවා.

මම දැක්ක සෑහෙන්ඩ ෆේස්බුක් පේජස් හදල තියෙනවා කැනඩාවට ලේසියෙන්ම එන්ඩ පුළුවන් කියල. ඒ වගේම සමහරු යුටියුබ් චැනල් එහෙම හදාගෙන නොයෙක් දේවල් කියනවා. එයාලගේ යටි අරමුණු මොනවද කියල මම දන්නේ නැහැ. හැබැයි යම්කිසි හැංගුන අරමුණක් තියෙන බවනම් බැලූ බැල්මට පේනවා.

ඉතින් ඔහොම හොයාගත්ත තැනක් හරි, වෙන කවුරු හරි කියපු තැනක් හරි ගැන දැනගත්තම එතනට ගිහින් හරි කතා කරලා හරි විස්තර හොයන්ඩ ගන්නවා නේ. ඔය කියන ගොඩක් තැන්වලින් කරන්නේ ඉස්සෙල්ලම එයාලත් එක්ක රෙජිස්ටර් වෙන්ඩ කියන එක. ඒකට පොඩි ගානක් තමයි ගෙවන්ඩ වෙන්නේ. මේක හරියට අර මම කලින් කියපු අතුරු කතාව වගේ. අනිත් ඒවා කොටස් වශයෙන් ගෙවන්ඩත් දෙනවා සමහර තැන් වල. ඊට පස්සේ තමයි හරි සතා එලියට එන්නේ.

රෙජිස්ටර් වෙන්ඩ ඕනේ කියන දේ ඇතුලේ දෙපැත්තක් තියෙනවා. එකක් තමයි එහෙම නොකරත් බැහැ. මොකද ගොඩක් දෙනා ඇවිත් විස්තර අහගෙන යයි. ඒක අත්දැකීමෙන් කියන්නේ. කව්රුවත් සල්ලි වියදම් කරල ආයතනයක් පවත්වාගෙන යන්නේ නැහැනේ නොමිලේ සේවාවක් සපයන්ඩ.
නමුත් ඒකෙ අනිත් පැත්ත මෙයාල ලඟට එන ඕනෑම කෙනෙකුට යන්ඩ පුළුවන් කියල තමයි කියන්නේ. අනේ මට ඩිග්රියක් නැහැනේ කිව්වොත්, අපෝ ඩිග්රි ඕන නැහැ ඔය ඩිප්ලෝමා එකක් හරි සෙටිෆිකෙට් එකක් හරි තිබුනම ඇති කියනවා. වයස වැඩි උනාට අවුලක් නැද්ද අහපුවම, නෑ නෑ එහෙම නැහැ අවුරුදු හතලිහ පනහ උන අයත් ගිහින් තියෙනවා කියනවා. ඔය වගේ ලස්සන බලාපොරොත්තුවක් හිතේ ඇතිකරලා, කරන ක්‍රමය ගැන කියල දෙන්ඩ, එයාලගේ සේවය අරගන්ඩ රෙජිස්ටර් වෙන්ඩ කියනවා. ඊට පස්සේ එයාල කියන ඒවා ඔක්කොම කරන්ඩ තියෙන්නේ තම තමුන්ටම තමයි.

එතකොට අර කියන ඒවා ඔක්කොම බොරුද. නැහැ, බොරුමත් නෙමෙයි. උදාහරණයකට වයස වැඩි කෙනෙක්ට අවශ්‍ය ලකුණු ප්‍රමාණය ගන්ඩ නම් සමහර විට ප්‍රධාන අයදුම්කරුට IELTS එක්සෑම් එකෙන් හැම කොටසකටම ලකුණු 8ක් හෝ 9ක් ගන්ඩ ඕන වෙන්ඩ පුළුවන්. එයාගේ සහකරුවට හරි සහකාරියට හරි ඒ එක්සෑම් එකෙන්ම ඉහල ලකුණු ප්‍රමාණයක් ගන්ඩ ඕන වෙන්ඩ පුළුවන්. එහෙම කරන එක සමහර අයට අමාරු දෙයක් නෙමෙයි බැරි දෙයක් වෙන්ඩත් පුළුවන්. හැබැයි ඕව රෙජිස්ටර් වෙන්ඩ කලින් කියන්නේ නැහැ. අන්න එතන තමයි කපටිකම තියන්නේ.

ඒ වගේ සිදුවීම් ගොඩක් උනා මගේ යාළුවන්ට.

24/12/2023

කැනඩාවට එන්නේ කොහොමද -- 5

දැන් බලමු මේ කැනඩාවට එන කතාව ඇතුලේ තියෙන හොඳම ටික ගැන. හැබැයි මේක තමයි ඉතාමත් නරක ටික සහ කනගාටුදායකම දේවල් ටික.

මේ ගැන වැඩි විස්තර කියන්ඩ කලින් ප්‍රවේශයක් විදිහට පොඩි අතුරු කතාවක් කියන්නම්.

මීට දශක කීපයකට කලින් ලංකාවේ තිබුන කොම්පියුටර් විෂය ගැන ප්‍රසිද්ධ ආයතනයක්. ඒ දවස් වල ප්‍රධාන පුවත්පත් වල මැද පිටු දෙකක් පුරාවටම තියෙන්නේ මෙයාලගේ වෙළඳ දැන්වීම්. මේකේ කියල තිබුනේ තෝරාගත් 10,000කට (මට හරියටම ගාන මතක නැහැ) හෝ ඊට වඩා වැඩි ප්‍රමාණයකට සම්පුර්ණ ශිෂ්‍යත්ව ලබා දෙනවා කියල. ඊට අමතරව තවත් 50,000කට අර්ධ ශිෂ්‍යත්ව ලබා දෙනවා කියල. ඒක ලබාගන්ඩ කරන්ඩ තිබුනේ අයදුම්පතක් පුරවල, සූටිම සූටි රුපියල් 100ක් ගෙවල එයාලත් එක්ක රෙජිස්ටර් වෙන එක. ඒ කාලේ ඔන්ලයින් රෙජිස්ටර් කතා නැහැ වගේම රුපියල් සීයක් කියන්නෙත් ලොකු මුදලක්.

ඇත්තටම එයාල අර කිව්ව ශිෂ්‍යත්ව 10,000හ දුන්නා, අර්ධ ශිෂ්‍යත්ව 50,000ත් දුන්නා. බැලූ බැල්මට මේකේ කිසිම වරදක් නැහැ නේ. කිසිම වංචාවක් වෙලත් නැහැ වගේ නේ. ඔව් එහෙම තමයි පේන්නේ. මම හැමදාම කියනව වගේ උගත් මිනිස්සුන්ගෙන් තරම් නූගත් මිනිස්සුන්ගෙන් මේ ලෝකෙට, රටකට වංචාවල් වෙන්නේ නැහැ. මේ තමයි වයිට් කොලර් ක්‍රයිම් කියල කියන්නේ.

මෙතන වෙන්නේ මේකයි. ඔය කියන ශිෂ්‍යත්වයට තියෙන පාඨමාලාවට දාල තියෙන්නේ පරිඝනක සම්බන්දව ඉතාමත් සුළු (බේසික්) කරුණු කීපයක් විතරයි. ඒවා ඕනනම් දවසකින් කෙනෙකුට කියල දෙන්ඩ පුළුවන්. නමුත් මෙයාල ඒකට සති කීපයක් අර ගන්නවා. ඊට පස්සේ අර ළමයින්ට කියනව වැඩිදුර ඉගෙන ගන්ඩ ඕනනම් එයාලගේ උසස් පාඨමාලාව (advanced course) එක කරන්ඩ කියල. ඒකට ඉතා ලොකු මුදලක් අය කරනවා.

ඒ කාලේ සමකාලීන අයට මේ ගැන මතක ඇති.
දැන් පොඩ්ඩක් හිතල බලන්ඩ සම්පුර්ණ ශිෂ්‍යත්ව 10,000ක් සහ අර්ධ ශිෂ්‍යත්ව 50,000ක් දෙනවා කිව්වම ලංකාවේම ඉන්න කී දෙනෙක් මේකට රෙජිස්ටර් වෙයිද. අපි හිතමු ලක්ෂයක් අයදුම්පත් දැම්ම කියල. එතකොට රෙජිස්ටර් එකෙන් විතරක් මෙයාල ලක්ෂ සීයක් හොයල. 90ව දශකයේ මුල් කාලේ මේ මුදලේ වටිනාකම තේරෙනවා නේ. හැබැයි අර කලින් කිව්ව වගේ මේ ක්‍රියා දාමය ඇතුලේ කිසිම නීතිමය වැරැද්දක් නැහැ.එයාල කරන්නේ ඉතාමත් හොඳ වැඩක් කියල ප්‍රසිද්ධ වෙන්ඩත් නම්බු නාම ලබා ගන්ඩත් පුළුවන්.

ඒජන්සි වලින් සහ වෙනත් අය කරන වංචාවල් ගැන ඊළඟ කොටසින් ලියන්නම්.

24/12/2023

කැනඩාවට එන්නේ කොහොමද -- 4

ෆෙඩරල් එක්ස්ප්‍රස් එන්ට්‍රි කියන ප්‍රෝග්‍රෑම් එකට අමතරව තවත් ප්‍රෝග්‍රෑම් ගොඩක් තියෙනවා. එක එක්කෙනාගේ තියෙන සුදුසුකම් අනුව මොකද්ද හොඳම එක කියල තෝරගෙන ඒකට අවශ්‍ය කරන දේවල් ඉක්මනට සූදානම් කරගන්න එක තමයි හොඳම විදිහ.

හැබැයි මම අර කලින් කිව්ව වගේ ගොඩක් දෙනා නිකං ඔහේ අහල කිසිම දෙයක් නොකර ඉන්නවා. තවත් අය එක එක දේවල් කියල වැඩේ පස්සට දානවා. ඇයි කියල එයාලම තමයි දන්නේ. සමහර අය වෙනුවෙන් ගොඩක් කාලය වය කරල, වැඩිපුර විස්තර හොයාගෙන, එයාලට එන්ඩ පුළුවන් මාර්ගය හොයල දීල, IELTS එක්සෑම් එක ඉක්මනින් කරල කියන්ඩ කියපුවම මාස ගානක් යනකල් ආයෙත් කිසිම තොරතුරක් නැහැ. අපිම කතා කරල හොයල බලපුවම අරක පැත්තකින් තියල වෙන වැඩ. පස්සේ බලමුලු . එක්ස්කියුසස් දාහක් තියෙනවා.ඇත්තටම අපේ කාලෙත් අපරාදේ ඒ වගේ අයට විස්තර හොයල කියන්ඩ යනකොට.

සමහර අයට හොඳම විදිහ තමයි ස්ටුඩන්ට් විදිහට එන එක. ඇත්තටම අඩු වයසකදී. ඒ කියන්නේ A/L වලින් පස්සේ වගේ, වැඩිදුර අධ්‍යාපනය සඳහා එන්ඩ පුලුවන්නම් ඉතාම හොඳයි. නමුත් මේ ක්‍රමය ඉතාමත් මිල අධිකයි. සල්ලි තියෙන කෙනෙකුට තමයි හොඳ.

තරුණ කාලේ එන එකේ තව හොඳක් තමයි මෙහෙ තියෙන පහසුකම් වලින් උපරිම ප්‍රයෝජනයක් ගන්ඩ පුළුවන් වෙන එක. ඒවා ගැන නම් ගොඩක් දේවල් කියන්ඩ තියෙනවා.

තව අය අහන එකක් තමයි අපිට බැරිද කියල එයාලට විසිට් වීසා එකක් අරගෙන දෙන්ඩ. ගොඩක් අයට එහෙම හිතෙන්නේ ඔය ඩුබායි වගේ මැදපෙරදිග රටවල් වලට එහෙම කරන්ඩ පුළුවන් නිසා වෙන්ඩ ඇති. නමුත් මෙහේ එහෙම කරන්ඩ බැහැ.

විසිට් වීසා එකක් ගන්ඩ අමාරුම රටවල් වලින් එකක් තමයි කැනඩාව. ඇයි ඉතිං ආවොත් යන්නේ නැහැ කියල ෂුවර්නේ. එහෙම ඇවිත් නතර උන අයත් ගොඩක් ඉන්නවා. ඒ වගේ ක්‍රම වලින් තාමත් සමහරු එනවා. ඒ වගේම ලක්ෂ ගණන් වියදම් කරගෙන වෙන වෙන ක්‍රම වලින් එන අයත් ඉන්නවා. එහෙම ආපු අය හැබැයි කියන්නේ නැහැ ආවේ කොහොමද කියල මොකද එයාලට ප්‍රශ්ණයක් වෙයි කියල.

තව එකක් තමයි work permit එකක් හරහා එන එක. මේකටත් බොරු කාරයෝ ගොඩක් ඉන්නවා. ඒ ගැන අනිත් කොටසින්...

24/12/2023

කැනඩාවට එන්නේ කොහොමද -- 3

ෆෙඩරල් එක්ස්ප්‍රස් එන්ට්‍රි කියන ප්‍රෝග්‍රෑම් එකට තියෙන පොයින්ට් සිස්ටම් එක ගැන දල වශයෙන් අදහසක් අරගන්ඩ මේ දාල තියෙන ටික ඇතිවෙයි දැනට.

උදාහරණයක් විදිහට A කියන පුද්ගලයා වගේ කෙනෙක් නම් එයාට මේ ප්‍රෝග්‍රෑම් එක හරහා එන්ඩ පුළුවන්.

එතකොට මේ ඉන්න B කියන පුද්ගලයා කල්පනා කර කර, පස්සේ බලමු කිය කිය හරි කම්මැලි කමට හිටියනම් හරි, අර පලවෙනි කෙනාට තියෙන සුදුසුකම් තිබිලත් එයාට අයදුම් කරන්ඩ බැහැ. එතකොට එයාට වෙනත් දේවල් වලින් ලකුණු ප්‍රමාණය වැඩි කරගන්ඩ උත්සහ කරන්ඩ ඕනේ. උදාහරණයකට අර ඉංග්‍රීසි ටෙස්ට් එකේ උපරිම ලකුණු අරගන්ඩ ඕනේ.
පැහැදිලියිද? ප්‍රශ්ණ තියෙනවද ප්‍රශ්ණ 😀😀

ඕනෑම ප්‍රශ්ණයක් අහන්ඩ පුළුවන්. දන්න දෙයක් නම් කියල දෙන්නම්. හැබැයි අර ලොයිඩ් ඕපාත රස සරණියට ඇවිත් ඔන්න අද අපි බීෆ් ස්ටීක් එකක් හදන විදිහ බලමු කිව්වම ටීවී එකේ දාන ටෙලිෆෝන් අංකයට කට්ට කාගෙන ට්‍රයි කරලා කෝල් එකක් අරන් අනේ ඕකට බීෆ් වෙනුවට පෝර්ක් දාන්ඩ බැරිද වගේ ප්‍රශ්ණ නම් අහන්ඩ එපා හරි. 😀😀

24/12/2023

කැනඩාවට එන්නෙ කොහොමද -- 2

හරි, අද පොඩ්ඩක් බලමු අර කිව්ව ප්‍රධාන කාරණා වල පලවෙනි එක ගැන. ඒ කියන්නේ අවශ්‍ය සුදුසුකම් මොනවද කියන එක.
මේක ටිකක් සංකීර්ණ දෙයක් කියලත් හිතෙන්ඩ පුළුවන්. ඒ වගේම කොච්චර සංකීර්ණ උනත් අවශ්‍ය හැම දෙයක්ම තමුන්ටම හොයා ගන්ඩ පුළුවන් විදිහට ඉතාමත් පිළිවෙලට සවිස්තරාත්මකව සඳහන් කරල තියෙනවා එයාලගේ පහත දීල තියෙන නිල වෙබ් අඩවියේ.
www.canada.ca/en/immigration-refugees-citizenship/services/immigrate-canada.html

භාෂාව ගැන ප්‍රශ්ණයක් නැත්නම් ඕනෑම කෙනෙකුට තමුන්ගේ වැඩ ටික තනියම කර ගන්ඩ පුළුවන් මේක බලල. ආයේ වෙන කව්රුවත් උදව් කරනකල් බලාගෙන ඉන්ඩ ඕනේ නැහැ. කාටවත් සල්ලි දෙන්ඩ ඕනෙත් නැහැ.

සුදුසුකම් ගැන කතා කරනකොට ගොඩක් ලොකු වපසරියක් ගැන කතා කරන්ඩ වෙනවා. මොකද කැනඩාවට එන්ඩ ක්‍රම (ප්‍රෝග්‍රෑම්) කීපයක් තියෙනවා සහ ඒ ඒ ප්‍රෝග්‍රෑම් වලට අවශ්‍ය කරන දේවල් වෙනස් වෙනවා. ඒ වගේම එකම ප්‍රෝග්‍රෑම් එකට උනත් සමහර දේවල් වෙනස් වෙන්ඩ පුළුවන් එක එක කාල සීමාවන් වලදී. ඒක නිසා අවුරුදු 5කට 10කට කලින් ආපු කෙනෙක් ආපු විදිහටම එන්ඩ හදන්ඩ හොඳ නැහැ. ඒ ආපු කෙනාගෙන් විතරක් උපදෙස් අරගන්ඩත් හොඳ නැහැ. හැම තිස්සෙම යාවත්කාලීන උන් තොරතුරු මේ ලින්ක් එක හරහාම ලබා ගන්න එක තමයි සුදුසුම.

අපි එක ප්‍රෝග්‍රෑම් එකක් ගැන, වැඩියෙන්ම ප්‍රසිද්ධ එක ගැන බලමු. ඒ තමයි "ෆෙඩරල් සීඝ්රගාමී ඇතුල්වීම" නැත්නම් සිංහලෙන් කියනවනම් ෆෙඩරල් එක්ස්ප්‍රස් එන්ට්‍රි කියන එක.
මෙම වැඩසටහන සඳහා සුදුසුකම් :
✅ වයස
✅ අධ්යාපනය
✅ වැඩ පළපුරුද්ද
✅ වලංගු රැකියා අවස්ථාවක් (job offer) තිබේද යන්න
✅ ඉංග්‍රීසි සහ/හෝ ප්‍රංශ භාෂා කුසලතා
✅ අනුවර්තනය වීමේ හැකියාව (ඔබ මෙහි පදිංචි වීමට කොතරම් දුරට ඉඩ තිබේද)

මේ තියෙන කරුණු 6ට අදාලව මුළු ලකුණු 100ක ජාලයක් තියෙනවා. එක එක කරුණක් වෙනුවෙන් තමුන්ට ලබාගන්ඩ පුළුවන් ලකුණු ප්‍රමාණයට අනුව තමයි වැඩේ කරන්ඩ පුලුවන්ද බැරිද කියල තීරණය වෙන්නේ. අවම වශයෙන් ලකුණු 67ක් අවශ්‍ය වෙනවා අද වෙනකොට (2023 වසර) තියෙන සීමාව ඇතුලත.
වැඩිපුර විස්තර බලාගන්ඩ පුළුවන් මේ ලින්ක් එකෙන්
www.canada.ca/en/immigration-refugees-citizenship/services/immigrate-canada/express-entry/eligibility/federal-skilled-workers.html

මෙතනින් එහාට විස්තර ගොඩක් තියෙනවා. ඒවා ඔක්කොම ලියන්ඩ ගියොත් මගේ ඇඟිලි ගෙවෙයි 😄

ගොඩක් දෙනා මේවා කියවල බලල විස්තර හොයන්ඩ කම්මැලියි. ඒක නිසා කොහේ හරි තියෙන ඒජන්සි එකකට යනවා. එතකොට මොකද වෙන්නේ කියල උදාහරණ කීපයක් එක්කම කියන්නම්. එතකොට තේරුම් ගන්ඩ ලේසි වෙයි කොහොමද සමහරු මේකෙන් හම්බකරන්නේ කියල.

නැවත හමුවෙමු....

Immigrate by graduating from a school or working in New Brunswick, Prince Edward Island, Nova Scotia, or Newfoundland and Labrador

24/12/2023

කැනඩාවට එන්නේ කොහොමද? -- 1

මම මෙහෙට ආපු දවසෙ ඉඳල දන්න කියන ගොඩක් අය, හිතවත් අය මගෙන් අහනවා කොහොමද කැනඩාවට එන්නෙ කියලා. හැබැයි දැන් එහෙම අහන ප්‍රමාණය ගොඩක් වැඩිවෙලා. ලංකාවේ දැන් තියෙන ප්‍රශ්නත් එක්ක කවදාවත් ලංකාවෙන් යන්ඩ කියලා නොහිතපු අයත් මගෙන් එහෙම අහනව දැන්.

මම ඉතින් මම දන්න දේවල් අවංකව අහපු අයට කියලා දුන්නා. ඒ ගැන ලියන්න කියල නං හිතුනෙ නෑ. ඒකට ප්‍රධාන වශයෙන් කරුණු දෙකක් හේතු සාධක වෙනවා. එකක් තමයි සමහරු අපි කියන දේවල් විශ්වාස නොකරන එක. කොහොමත් ඇත්ත තත්ත්වෙ විශ්වාස කරන්න මිනිස්සු කැමති නෑ. ලස්සනට උල් කරල රවුම් කරලා හෙන බොරුවක් අත හැරියා නම් ඒක විශ්වාස කරනවා. දෙවැනි කාරණාව තමයි ලොකුම එක. ඒ තමයි මට තියෙන කම්මැලි කම. ලියන්න කම්මැලියි අප්පා.

කොහොම වුණත් මේ ලඟකදි වෙච්ච සිදුවීම් කිහිපයක් හින්දා හිත හදාගත්තා කම්මැලිකම පැත්තකට දාලා කොහොමහරි පොඩ්ඩක් හරි ලියන්නං කියලා. එක්කෙනෙක් දෙන්නෙක් හරි කියවලා ඔලුවට ගත්තොත් එහෙම එක්කෙනෙකුට දෙන්නෙකුට හරි ප්‍රයෝජනවත් වුණොත් ඒකත් ලොකු දෙයක් නේ.
ගොඩක් දෙනාට නිකං ලැබෙන දේ කිසිම අගයක් නෑ වගේ නිකංම හම්බෙන information වලටත් කිසිම අගයක් නෑ.

මම දීපු information වලට advices වලට සල්ලි ගත්ත නං මමත් අද කෝටිපතියෙක්😀

සමහරු නිකං රැල්ලට වගේ ඔහේ අහනවා විතරයි කිසිම උනන්දුවක් නෑ ඇත්තටම මහන්සි වෙලා තමුන්ගේ අරමුණ කරා ගමන් කරන්න.

ප්‍රධාන කාරණා දෙකක් කියන්නම්...

🥇පළවෙනි එක මෙහෙට එන්ඩ සුදුසුකම් සපුරලා තියෙනවා නම් ඔය කාගෙවත් පස්සේ යන්ඩ ඕනෙ නෑ තමුන්ටම ඒ වැඩේ කරගන්න පුලුවන්.

🥈 දෙවෙනි කාරණාව ඔය ඒජන්සි වලින් කරන්නෙ ගොඩක්ම බොරුවක්.

අර කියන සුදුසුකම් මොනවද කියලා වැඩිදුර කතා කරමු.
ඒ වගේම ඔය ඒජන්සි වලින් කරන බොරු මොනවද කියලත් කතා කරමු.

ඇහැක් විදිහට පොඩ්ඩ පොඩ්ඩ හරි ලියන්නම්....