打工仔去旅行

04/11/2024

緊急試埋twins brother，120台幣，都好食，不過有啲甜，面頭係焦糖醬同杏仁，入面都有杏仁碎，都真正做到卷，熱食幾正。呢間都係一間cafe，好多人，內用低消一杯野飲。

02/11/2024

玉桂控推薦！台北車站附近的玉桂先生。

出發前見睇下台北有咩好食玉桂卷，見到有間要等三年，有間要抽籤，食個玉桂卷姐，我究竟睇左啲咩。

呢間玉桂先生google評分好高，收夜晚7點，6點幾黎都仲有剩3個原味，其實全部都係原味，要咩唔同味再係上面加醬。店員俾我試下個焦糖蘋果醬，我即刻講左句：好吃，有點辣的感覺。店員話係玉桂的辛味，呢隻醬係最重玉桂味。

我覺得呢個醬好驚喜，粒粒蘋果配上濃到辛的玉桂味，唔會係想像的超甜焦糖味，個醬可以分開上或者即時幫你加上去。今日啲卷整細左，仲有8折，零頭飛尾無計，佛心。至於原味個卷，係我鍾意的口感，唔會舖曬糖粉糖漿，可以撕開一層層個隻，中間係玉桂粉，又唔會變左玉桂包，好味。聽講最出名係最邪惡的焦糖加乳酪，太邪惡了。

今日又scone又鳳梨酥又玉桂卷……

22/09/2024

琴晚去左下環街街市停車場對面食郎郎泰國菜，唔貴又好食，坐無虛席，最好訂枱，全部本地人黎食，我同朋友都覺得，係澳門北上呢個浪潮都可以咁多客真係唔簡單，好多應該都係熟客，免加一，暖香茅水免費任飲，送蝦片同糖水，唔會趕人走，不過啲叔叔飲酒太大聲，好難傾計。
椰青焗海鮮飯，78蚊，大蝦都幾隻，足料，刮返啲椰青肉黎食，嫩嫩的。
燒豬頸肉，63蚊，最欣賞啲配菜都咁多，底下勁多椰菜絲，我將豬頸肉、汁、芫荽、蘿蔔絲、椰菜絲混合食。
塔拋菜牛肉碎走辣，68蚊。
今日中午就去左林茂塘仁王食38蚊定食慶祝結婚週年，粒粒魚生丼睇隔離枱食覺得好細碗，點知係魚生多過飯。牛舌定食原價98，38蚊真係佛心，熟食要等比較耐，免加一，熱茶免費，中午唔可以訂位，我踏正12點開門去，12點幾黎都有位。

09/09/2024

法式小餐館-葡國領事館對面le pic

今晚又食威靈頓，不過係威靈頓三文魚，$288，要訂。三文魚生熟度剛好，配白酒魚香醬，無牛咁heavy，但個菇醬無黑松露味。

法式鴨鍋，$168，油封鴨腿皮脆肉嫩，好味。

黑松露薯條，$78，好多黑松露，好大份。

另外仲食左洋蔥湯，68蚊同開心果醬西多士，$78蚊。

每樣都好食，之前有蝸牛包，而家無左，可惜。水唔使錢，無加一，坐得舒服，服務好，可以同朋友瘋狂講是非。

08/09/2024

係好食，值得推薦- Aria by chef d

位於新馬路小巷入面，舖頭好細，一定要訂位！主廚chef d (中文名叫阿鬼）係南非人，佢個女叫Aria。

威靈頓牛柳，必食！要提前訂，落訂200蚊，主廚話用4種菇同黑松露整，當然個酥皮都係自家制啦。4個人食都食唔曬（本身諗住2個女仔黎食，咪癲），個蒜蓉同串茄都好味，茄好鮮甜。

傳統手工南非腸，店家自制香腸，配埋上面的洋蔥，旁邊的特調辣汁（唔係好辣）好夾。

帕瑪森柑橘脆皮鱸魚，個皮我麻麻，但入面檸檬汁魚就唔錯。

開心果tart係軟tart，好易切個隻，都食到開心果味，但唔係太大驚喜，雪糕係movenpick tirimisu味😋

水要錢，暖水都要，佢用返34蚊支的水整暖俾我地，中銀app單點有95折，威靈頓牛無折。

精美照片由“是金子哪裡都發亮”的朋友提供，我真係唔識寫食評，總之就一致好食啦。

無加一。

05/09/2024

打風無野做最好就係睇旅遊片，經過今年坦桑尼亞之旅，真心覺得非洲唔止去一次。睇山地大猩猩呢單野又係要後生去。

我諗我會俾15美金請porter，主要係推我一把上山......

這是我繼EP2後，第2段最喜歡的一集🦍🦍Gorilla 表情包超多😆我想1小時我hiking已經是我的極限了😂.....(廢)*This is NOT a sponsored video* ••••••••••••••••••••••••••••••••••••••••••....

15/08/2024

外賣飯堂口袋名單-正湯寶寶

而家做特價，38蚊1個飯加支自家製野飲或糖水，再加5蚊有小食，檸檬雞腳好食，5蚊黎講份量唔錯。肉餅飯就普通，可試其他餸，但我次次食肉餅……如果飯加燉湯就68，湯係一包真空包裝。

平時我wechat留定，講定幾點攞，佢會預好時間整，另外青糰都幾好食。

近日優惠做到咁，驚佢做唔掂……btw，有間之前去開的瑜伽中心執笠，呢個市道，應該會越黎越多

10/08/2024

Rala姊妹店：澳門文學館入面的日rise。

室內有少量座位，秋天可坐室外幾有feel，咖啡、輕食為主，仲有啲澳門文創，當然有以不變應萬變的何小涌，我最愛的布朗尼tart就要返rala先有。

口袋名單+1

04/08/2024

澳門買女裝
呢2間都推薦，第1間係盧九公園隔離的beige，返工衫出街衫都有，好多熟客，可試。入面啲貨多到雜亂，要有心機搵，有啲衫望落無咩特別咁，但試上身又覺得幾好，質量唔錯的，重點係店員nice唔係咩都話你著得好個種hard sell，可以任試，價錢相宜，衫特價99都有，長褲一般約299，無分vip價，大碼真係大碼🤣🤣

另一間係百興商場入面的bubu，好多朋友仔都唔知有呢個商場，入面都有啲女裝小店，bubu而家全場半價，韓裝長褲折左唔使150蚊，可試，好抵！韓國襪10蚊對，買10送1，衫就t shirt為主，普通。

老實講，我自己唔係好鐘意淘衫，一定要睇過實物試過，特別係褲！好羡慕瘦子，可以慳好多錢。

04/08/2024

鏡湖附近的和灃日式料理，午餐套餐性價比高，58蚊三文魚丼，88蚊鰻魚左口魚邊丼，包面豉湯、隨機小食、沙律，免加一，可預約。星期六日都有套餐，上次試左78蚊鰻魚飯，我老公話今次個鰻魚左口魚丼的鰻魚好食啲，香啲。
本身諗住去埋過幾間舖位的wheat and water 買包（近期我的最愛，性價比高），可惜今日無開……

06/07/2024

坦桑尼亞總花費:

1. 機票: qatar 由香港來回JRO，MOP 13029，轉機時間唔靚，如果時間好D 再貴D，但機票應該可以唔使咁貴。埃塞俄比亞航空平D，時間又短D，但好多差評，唔敢搏。

2. local tour：最貴的項目，但因為包團包晒好多野，所以去到基本上洗唔到錢，我地個團8日7夜每人大約3萬(每人USD 3160, 1人1間房就每人加多USD 470)，2人包團，出發前俾一半訂，用visa卡要多3%手續費，去到再用美金現金俾尾數，如果用visa卡都係收多3%手續費。
我地係跟base camp tazania ，開左超過20年，好多好評，適合經濟型旅人，又唔會太辛苦。其實我都無咩點比較過其他旅行社，基本上報左價就搵佢，老闆Achmed係英國人，email係超快覆，每個客人都同佢來回過幾十個電郵，好多都讚佢覆得快、有耐性。價錢已經包左來回接機、導遊、所有住宿、一日三餐、所有樽裝水、8日的吉普車包車和油費、1人1個望遠鏡租借，簡單講，係可以1蚊都唔使再出，不過我地回程係晏機，所以個日午餐唔包，自費，但出面餐廳都係MOP 幾十蚊個主菜，勁大碟。
我地個團其實都算好，住宿都唔錯，帳蓬1人1個，有床有抽水馬桶有燈有熱水沖涼，一日三餐食都好好，唔係咩高級食材，但係新鮮好食多樣化。車就老爺車，但無死過火或換過肽。個人認為真係唔好報太平的團，住黑沙帳篷、水都要俾錢買.......其實包團可以唔使咁貴，我地因為得2個人，又分房，仲去最貴的serengeti國家公園去足2個全日加2個半日先咁貴，因為serengeti的入場費、過夜費好貴，我地多1日就多幾百美金，所以成個團係可以平D的。另外，報團記得問清楚係咪包無限飲用水、無限里程(即係唔會一日行夠里數就早早歸隊)、1人1個望遠鏡租借。

3. 導遊小費：我地每人俾左USD 100，旅程完結俾。至於酒店，唔使俾個別員工，check out時可放入小費箱，全部員工分。

4. 當地洗費：酒店按摩USD 60/小時，明信片景點區賣USD 1/張，郵票景點區賣USD2。街坊士多賣的明信片 1000先令/張，市區郵局的郵票就3500 先令，當日1USD =2600先令，賣郵票的窗口隔離窗就係換錢。手信最平1USD，看你的蓮花路資歷。

5. 疫苗及藥物: 約MOP 1400(其實唔使咁多針)。預防瘧疾藥買左2000 幾，可以食返四環素免費。詳細參考返之前疫苗及藥物篇。

6. 保險: MOP 160

總括：大約用左5萬，貴，但值得。我都係窮L打工仔，要平D一定得，只不過凡事都係取捨。我唔想半夜出去帳蓬外疴尿、唔想搭埃航可能delay(得不償失，個團咁貴)，唔想食1個月四環素，所以係我負擔到的範圍都盡量舒服D。

#先想風險後想回報

05/07/2024

Amazing！

兩張postcard都收到！個張小鄉村郵局寄的，唔夠郵資的都收到！（雖然我係俾足錢買郵票的），職員仲幫手用脷lam郵票貼上去個張呀！

不過放心，大家收到個張係城市郵局用膠水的。

我真係好鐘意斑馬……個pat pat。

坦桑尼亞真係一個好地方，我兩張postcard第一句都係咁寫！

強烈推薦！治安、衞生、好玩度都比大家想像好！

稍後再分享下旅程花費吧！如果有朋友仔想知，想知的可留言。否則懶得打，我仲要諗點搵錢😆😆

18/06/2024

一張postcard背後，到底發生過甚麼事？！

係serengeti買左2張好靚的postcard，要1美金張（最後張相），導遊帶我地去小鄉村的郵局寄，我地一早知要大約2美金郵票先寄到澳門，店員就收我地2美金1張郵票（郵票面值當地貨幣2300），我問有無膠水，佢仲好好人講： I help you。
以為佢入辦公室幫我貼，點之係用脷lam張郵票貼落去，anyway，thanks!
返到城市阿魯沙的郵局，先發現原來2300面值的郵票係寄唔到澳門，只寄到非洲本土！職員講寄澳門要3500面值，歐洲就3000面值，仲叫我地去隔離窗口直接換錢就得（1美金等於當地2600），即係小鄉村郵局收我地2蚊美金的郵票係寄唔到架！貴唔係問題，最慘係寄唔到！好彩當初只寄了2張，於是係呢度就買齊郵票，隔離的雜貨店買postcard(1000當地錢1張），今次係市區郵局寄的應該無問題了，今次我用膠水的，所以如果收到唔使驚，唔係用脷lam貼上去，個啲應該收唔到架啦……不過，相信小鄉村的職員唔係呃我地，只係佢地都唔識，呢度啲職員都好好人，就算小販都唔會死纏爛打，絕對唔係要請保鏢先可黎旅行的地方。

17/06/2024

出發前諗住去非洲可以瘋狂講是非，因為平時係歐洲講是非都要好小心，周圍好多人識廣東話。今次黎非洲講，除非獅子報寸姐。

點知唔得閒講，瘋狂搵動物影動物。夜晚連靜修時間都無，掛住上網po相……

15/06/2024

久違的珠海蓮花路講價技巧派上用場了。

返到黎城市阿魯沙，去左市集買手信，一落車即刻叫我地come come come, one dollar，見我地遊客即刻開天殺價，我地：嘩！貴呀！佢地就話： What is your price?太貴的都唔想講價了。

睇左中動物頭磁鐵，問幾錢，佢叫我開價，我叫返佢開價，佢話： Don't worry， how much do you want?
我： 1 US dollar for 2。
佢應該覺得我好過份，話呢啲係木，本身翻貨貴，唔係膠，唔係大陸啲平野，佢話知我地國家賣到好平，叫我再開價，我又話：1 dollar，我話朋友買緊啲碟先2 dollar。佢又話質地唔同，話3 dollar 可以嗎？我話10蚊5個，佢就話問下老闆，我知道即係可以了，後來老闆黎到話ok，咁我就買左5個頭。
老闆叫佢朋友間店（1個阿姨）幫我包起，佢又好笑，話：你幫襯我朋友，唔幫襯我。我話： but you are friends, hahaha.......呢個時候，我朋友係幫襯緊呢個阿姨的，阿姨扮無錢找，呢啲招數我細細個就見識過了，我覺得簡直係以前蓮花路的低階版。

個啲好激動，走左叫你返轉頭話：返黎啦靚女，你想幾錢姐！唉，俾你啦！唔好話俾人聽……呢啲都未上演。後來去左有個年輕人的店，開價合理，動物鉛筆1美金1支，我話2蚊3支，講左幾次都唔得，所以我只買左1支。好好寫的pilot原子筆只5蚊1支，所以呢支咁珍貴的筆我會送俾1個幫我web check in的人（酒店買5美金1支）。

14/06/2024

今次旅程主要有三大景點：Tangaire National Park ，大象天堂，近距離睇到大象同長頸鹿。
Serengeti National Park，黎坦桑尼亞必黎，公園大部份位置位於坦桑尼亞，小部分位於肯亞，一年365日動物都順時針遷徙緊，只係大約8月就去到馬賽馬拉河，呢度入園費一日百幾美金，我地留左3晚，睇到勁多動物。
最後就係Ngorongoro Conservation Area，呢度係馬賽人同動物一齊生活的地方，所以叫保護區，唔係國家公園。3個景點之中我最鐘意呢個，由於無serengeti 咁激烈，呢度啲動物平靜啲，反應無咁快，配埋個背景，好靚好治癒。

14/06/2024

我最喜愛動物選舉，由我1人獨立委員會投票選出。

第三位：各種各樣的羚（排名不分先後，我都分唔到佢地）
第二位：長頸鹿，坦桑尼亞代表，本身最鐘意佢，可惜被第一位迷惑左。
第一位：斑馬個pat pat。動物大遷徙主要成員，具良好視力，又唔會只跟角馬過河，有獨立思考，會行一條更好的路，重點係有可愛圓渾的pat pat，班馬超易見，周圍都係。

可能我個人比較peace，所以都係鐘意呢d咁peace的動物。