28/12/2022
IKA-APAT NGA BANTUGAN SA PANULATAN KINARAY-A
MEKANIKS
1. Ang paindis-indis bukas sa tanan magluwas sa mga katapo kang sekretaryat kag mga hurado kang Bantugan sa Panulatan Kinaray-a (BPK);
2. Ang mga pasakup dapat orihinal, nakasulat sa Kinaray-a, eksklusibo nga huwad-tarung (copyright) kang manunulat, kag dapat wara nakadaug sa ibang paindis-indis. Ang pagpasakup sa dyang paindis-indis deklarasyon ang mga pasakup / entri, nagasunod sa dyang Probisyon 2 kang Mekaniks;
3. Ang mga kategorya kang paindis-indis amo ang sugidanun pangbata (children’s story); bugu nga sugidanun (short story); binalaybay (poetry); kag nobela pangbata (novel for children);
4. Ang paindis-indis opisyal nga nakatalana halin sa 20 Nobyembre 2022 kutub sa 31 Enero 2023;
5. Ang sang ka pasakup sa sugidanun pangbata koleksyon kang lima ka bilog nga sugidanun pangbata nga kada sara may mabaskug kag masinaw nga leksyon nga makabulig sa pagpasad kang mayad nga kabilinggan ukon kaaram. Ang koleksyon dapat may pangkabilogan nga titulo. Ang kada sugidanun sa koleksyon dapat indi magsobra sa 1,000 ka tinaga ang gamit, kag nagakaigo para sa Grade 3 – 5.
6. Ang sang ka pasakup sa bugu nga sugidanun koleksyon kang tatlo ka bilog nga bugu nga sugidanun. Ang koleksyon dapat may pangkabilogan nga titulo. Ang kada sugidanun sa koleksyon dapat indi magkubus sa 2,000 ka tinaga ukon magkapin sa 10,000 ka tinaga ang gamit.
7. Ang sang ka pasakup sa binalaybay dapat koleksyon kang 10 ka bilog nga binalaybay nga ang kada sara indi magkubus sa pulo ka linya. Ang koleksyon dapat may pangkabilogan nga titulo. Ginapakamayad nga ang bilog nga koleksyon may ginasunod nga tema.
8. Ang sang ka pasakup sa nobela pangbata dapat sang ka bug-os / tapos nga nobela nga dapat indi magkubus sa 13,000 ka tinaga ukon magkapin sa 20,000 ka tinaga kon ginatuyo para sa mga manogbasa sa Grades 3 - 5; ukon dapat indi magkubus sa 20,000 ka tinaga ukon magkapin sa 55,000 ka tinaga kon ginatuyo para sa mga manogbasa sa Grades 6 - 8.
9. Ang mga pasakup dapat i-email sa [email protected] bilang editable Word file attachment kaimaw kang sang ka high resolution nga laragway kang manunulat. Ang mismong kopya kang pasakup (attachment) dapat wara it pagkilalhan kang manunulat magluwas sa header nga titulo kang koleksyon/pasakup sa kada pahina. Sa mismong e-mail, ibutang bilang subject ang “Bantugan” dayon ang kategorya nga ginapasakupan. Hal: “Bantugan – Binalaybay”. Ibutang man sa lawas kang email ang tig-ulo kang koleksyon nga ginapasakup; ang bug-os kag matuod nga ngaran kang manunulat; ang postal mailing address kag contact number kang manunulat; ang eskwelahan kag kurso kang manunulat kon tana estudyante pa lamang; kag ginaobrahan kon ang manunulat nagaobra dun. Sa pagpasakup sa dyang paindis-indis, ang manogpasakup nagapasugot ang anang laragway kag nasambit nga personal nga data magluwas sa contact number kag kumpleto nga address, sarang magamit sa promosyon kang manunulat kon matabo nga tana magdaug.
10. Ang pang-encode kang sugidanun pangbata, bugu nga sugidanun kag nobela pangbata dapat naka 1.5 nga espasyo; ang binalaybay naka 1 espasyo, ukon suno sa porma nga ginatuyo kang manunulat. Dya dapat sa A4 size nga papel kag dapat gamit ang Calibri font size 12.
11. Ang mga pamangkot bahin sa paindis-indis sarang idirekta sa 0927 038 59 64 ukon sa [email protected].
12. Ang premyo sa mga magdaug sa Sugidanun Pangbata, Bugu nga Sugidanun, kag Binalaybay: P7,000.00 kag sertipiko sa Una nga Kabántugán; P5,000 kag sertipiko sa Pangarwa nga Kabántugán; P3,000 kag sertipiko sa Pangatlo nga Kabántugán. Sang ka premyo lang ang itugro sa Nobela Pangbata: P10,000 kag sertipiko sa Una nga Kabántugán.
13. Sa pagpasakup sa dyang paindis-indis, ginatugruan kang manunulat ang mga tag-organisa nga ibalhag (pisikal ukon e-format) ang anang sinulatan. Ang huwad-tarung (copyright) sa sinulatan nagapabilin sa manogsulat pero kon ang sinulatan igabalhag, ang manogsulat nagasugot nga mangin co-owner kang huwad-tarung (copyright) ang tagbalhag para sa proteksyon kang interes sa negosyo ukon komersyo kang tagbalhag.
14. Ang tag-organisa nagareserba kang kinamatarung nga magdiskwalipika kang mga materyales nga subersibo; pornograpiya; ukon nagasakdag kang diskriminasyon ukon pang-abuso; kag historical revisionism.
15. Ang pamat-od kang mga hurado sa kon sin-o ang nagdaug indi run maligwat.
Ang ika-apat nga Bantugan sa Panulatan Kinaray-a kabuylogan kang St. Anthony’s College, Literature Department kang De La Salle University, Kasingkasing Press, Balay Sugidanun, Pandan Bay Institute, Iloilo State College of Fisheries, kag SOX Writers Collective.
Send a message to learn more
