我鐘意訓草地多過訓屋企張床

01/01/2017

Happy New Year! 🎆🎊
有冇人去郊外倒數呢？🌿🌼🎉

20/07/2016

July 2016
行山
龍脊行至石澳郊野公園, 約兩小時 (以我比較快ge步伐, 一般女仔可能行得慢d)
交通: 撘地鐵到筲箕灣, 巴士總站撘9號巴士到石澳土地灣站

行後感:
1. 落巴士就有個流動廁所, 可以先去, 因為中途都唔見有廁所。
個流動廁所係乾淨, 只係當時有隻唔動的蜘蛛, 我好快屙完, 就即刻
衝出黎。
由於行都流哂汗, 飲左好多水都唔洗去廁所。
2. 雖然我成4點先開始行, 但途中都見到好多外國人特登行山兼影相。
3. 途中有好多樹蔭, 未至於暴曬, 仲有時幾涼爽。
不過, 唔可以作準, 始終我行個陣已經黃昏。
4. 要小心, 有d 位係溪澗, 少行山ge 女仔最好扶住朋友行。
頗多沙石路, 建議着唔跣ge 鞋。

作為港女, 龍脊好岩女仔結伴去行山!
影相就未至於好呃到like!

19/06/2016

怪獸大廈
介紹影相地方
交通: 太古地鐵b出口，行5分鐘
1. 夜晚去
2. 有蚊，多積水，好多冷氣機滴水
作為港女，當然推薦去影相！

13/03/2016

13 Mar 2016
灣仔西營地 兩日一夜
-- 第一次去 --

交通: 旺角廣華附近撘小巴去西貢, 終站落再撘94號巴士去黃石碼頭, 再撘船
紮營地方: 雖然都係政府指定露營地點之一, 但有別於貝澳, 唔洗登記都可以自己揾位紮。
*落船就會見到灣仔南營地, 有海景睇。如果選擇大片草地, 就再行約10分鐘去灣仔西營地。
去後感:
1) 灣仔南營地同西營地都比較多團體搞露營, 見到佢地互串完, 又同心合力煮餐飯, 再一齊洗碗, 就諗返以前去露營的日子, 我真的老了……
有時d團體會有夜晚task, 所以有機會比較嘈。個晚就有一家人頂唔上, 叫佢地靜d。
2) 去灣仔西營地的路係沙石路, 唔係石屎路, 好正! 感覺大自然d, 其實沙石路只佔約5分鐘, 唔會好難行。
li度都有牛, 同行的朋友話見到d 牛行得好快, 好似馬甘快, 可能行慣沙石路係唔同d!
3) 好多bbq 爐, 有石檯石椅。本來想bbq, 但驚太晏入去冇爐, 所以取消。點知原來5點入到去都仲有好多吉的bbq 爐。下次約朋友去, 真係要試下露營bbq先。
4) 有廁所同沖身設施, 但沖身設施個位好窄。廁所有好多格, 好乾淨, 但全部mau廁。
5) 周圍都有水供應, 喺廁所附近有幾行洗手盤, 可以用黎洗菜洗碗。不過, d人洗碗前可唔可以扔走哂碗入面d 餘下食物先呢? 洗碗見到d 食剩的食物, 真係岩岩食完的晚餐都嘔番出黎。
6) 可能甘岩落雨, 個天完全冇星睇。天氣又灰又大風又落雨, 甘ge 天氣露營的確有d 辛苦。

作為港女, 灣仔西營地好岩露營初學者!
即日來回淨影相就不太適合, 冇咩好影!
不過, 去附近行下山就唔錯!

踩完好濕ge泥, 對鞋污糟哂, 等我去洗鞋先! Bye Bye!

09/02/2016

09 Feb 2016
貝澳 兩日一夜

-- 第一次去 --
交通: 撘地鐵去東涌, 再撘3M巴士去羅屋村, 再行10分鐘

紮營地方: 入到去貝澳營地, 左手邊有個reception, 要先登記, 工作人員會再安排位置。有時, 會full booking, 所以可以預先book 左先。
*如果知道自己第二日11點前走唔到, 就可以揀草地位置, 一樣有枱有檯。

去後感:
1) 有沙灘有草地, 好外國feel, 好relax! 日落好靚, 再配埋d 海浪聲, 好似電影入面的情境甘。夜晚好多星星, 本身想影, 奈何我只帶左手機……
2) 除左有廁所外, 仲有沖身設施同更衣室。去完沙灘玩, 都仲可以沖埋個涼先入tent 訓。
3) 水方面, 好充足! 周圍都有水供應, 洗手洗碗洗菜洗埋腳都得! 不過, 喺洗手盤洗腳就講笑je。尋晚, 我真係見到有個大媽喺洗手盤洗腳, 唔明點解唔去沖身個度洗, 佢地的思維真係不能理解!
4) li度煮野食, 好方便! 有檯有椅, 仲有bbq 爐, 點煮都得! 附近有個小食部, 唔肯定係唔係24小時, 只見到好夜都仲開緊。有野食賣, 有bbq炭賣, 仲有得充電tim! 價錢頗貴, 但就半夜肯定唔驚餓死!
5) li 度d 牛好過塔門個d , 佢地唔會衝埋去人堆搶野食。
6) 講到好正甘, 唯一唔好就係設施太過完善! (下?! 甘都投訴?!)
對於我黎講, 露營就係要體驗大自然, 學識點樣喺乜設施都無的環境下渡過。
li 度連沖身設施同充電服務都有, 甘同喺我屋企訓一晚有乜分別, 不如我喺個廳度撘個tent 算la!

作為港女, 貝澳好岩露營初學者!
即日來回淨影相都好適合, 仲可以去埋個沙灘玩!

各位新年快樂!

27/12/2015

張圖係我平時帶ge煮食用具連洗潔用品

本身對食冇咩要求，好又一餐，唔好又一餐😁
雖然未至於hea到露營三文治杯麵當晚餐，但開始覺得牛丸出前一丁都算hea。
成日聞到隔離營早餐有腸仔煙肉炒蛋，晚餐有雞煲食紅蘿蔔湯飲，宵夜仲有湯丸食!
媽呀😭淨聞冇得食好慘ga
決定買新煮食裝備，至少帶枝油買返個pan！💪

26/12/2015

好耐無update, 代表我真係好耐無去露營
除左要實習外, 香港天氣一直太熱。
好多女仔都擔心露營無得沖涼, 我都頂唔順頭又油身又臭, 所以我只會揀冬天去露營。

25 Dec 2015
塔門 兩日一夜
-- 第五次去 --

交通: 旺角廣華附近撘小巴去西貢, 終站落再撘94號巴士去黃石碼頭, 再撘船
紮營地方: 落船後, 大約行10分鐘, 就會見到涼亭, 附近有好多平坦位可以紮營。
*盡量揀喺近涼亭的位置, 上網收得好d。

去後感:
1) 日出日落靚, 早上個境都好靚, 好多人黎影畢業相同結婚相。
不過, 夜境我就覺得麻麻。去左5次, 都唔覺好多星星睇, 可能甘岩次次都多雲。
今次去, 真係多雲! 個景麻麻。
2) 廁所係我最滿意的地方, 有男廁女廁。雖然係踎廁, 但好乾淨。而且, 廁所入面有鏡, 方便我刷牙。有乜關係? 我無鏡刷牙, 會成面牙膏都唔知ga!
3) 水方面, 好充足! 洗碗要用水, 可以去廁所洗手位, 或者廁所外面都有條水喉。
4) 煮野食, 可以去涼亭, 有枱有椅, 好方便! 好多人行山行都攰, 都可以去個度坐低飲啖茶食個包。有次, 大風到完全開唔到爐。有個男人行過黎, 同我地講話今晚吹正東風, 好難開爐ga! 之後, 甘岩天文台話吹東北風的日子, 都好易開到爐。所以我每次去塔門, 都睇下天文台話吹咩風先。
5) 塔門最煩就係d 牛, 去行山的人可能覺得佢地好得意, 特登同佢地影相。不過，去露營的人就唔會想見到佢地。唔係因為佢地ｄ牛屎，係因為佢地成日搶野食,明目張膽甘搶。不論食物定垃圾，照衝埋去搶。見到佢地成日流哂口水，個身仲要有幾隻烏蠅，真係有ｄ嘔心!

作為港女, 塔門好岩露營! 見我去甘多次, 就知極力推薦!
即日來回淨影相或行山都好適合!

Merry Christmas!

07/07/2015

返學和返工時, chur到盡。
放假時, 去行山露營旅行。
每日將自己的時間表鋪排得滿滿的, 才感覺充實!
畢業前, 仲去左兩次外國交流。
人生就要無悔ma!
不過, 而家每日天氣30度以上, 點行山露營
沒有上課, 沒有工作的日子,
只好過着廢青般的生活。
暫時沒有合適的天氣去實地考察行山和露營地方, 我就嘗試介紹下交流期間去過的地方。

15/03/2015

有去過露營的，一定有同感！

點擊題目下來點旅遊攻略，一鍵快速關注來點旅遊攻略「 露 營 」是指徒步或者駕駛車輛到達露營地點，通常在山谷、湖畔、海邊，露營者可以生篝火...

05/03/2015

原本諗住新年去露營，但天氣一直差，差到今日
想去郊外睇下深藍色夜空，睇下星星都甘難😭

大家估下張相邊度影？

11/02/2015

17 Jan 2015
蒲台島 兩日一夜
-- 第一次去 --

交通: 搭地鐵去中環, 轉6號城巴, 到赤柱卜公碼頭, 再撘船
紮營地方: 落碼頭後, 行大約半小時, 喺燈塔附近, 就會有比較平坦的地, 可以用黎紮營。
*盡量揀喺大石後紮, 可以擋下風。否則, 相信你成晚都會俾風聲嘈到訓唔着。
去後感:
1) 行去燈塔揾地方紮營途中, 風非常大, 頭髮亂了唔緊要, 但頭都差d吹甩, 完全係俾風推住黎行。有一刻, 真係幻想自己玩緊paragliding!
2) 廁所只有一個, 離燈塔約三分鐘路程, 係流動廁所。對於女仔黎講, 完全唔方便。如果你係一個完全不拘少節, 非常瀟灑的女仔, 可以考慮下去離燈塔約一分鐘路程的涼亭就地解決。不過, 大風到甘, 一定成褲濕哂。
3) 水方面, 可以話係零供應。洗手都只可以用自己帶黎的食水。刷牙點算? 咪喺草地同食水刷lor!
4) 環境唔適合露營, 但點解仲有人紮營? 當日, 見到有約另外五個營。
簡單黎講, 因為夜境靚, 日落靚, 日出靚!
夜晚的確有好多星星, 日落日出都好靚, 睇得非常清楚!
5) 第二日走個陣, 如常d風吹到頭都甩, 但d景好靚! 睇相就知!

作為港女, 蒲台島絕對唔岩露營, 但即日來回淨影相或行山就係唔錯的選擇!

11/02/2015

關於這個90後港女:

1. 細細個已經開始住旺角, 住了差不多十幾年, 算是真正的mk 妹吧!

2. 由於旺角, 銅鑼灣已經行到爛哂, 而且假日想揾一些唔洗聽到普通話的地方靜靜渡過, 所以就選擇去郊外!

3. 自從去年第一次露營, 便就愛上了! 決定每個月去一次 :)