10/11/2023
كي نقولو القيروان ما نجموش نحكيو عليها في ستاتي وإلا دقيقتين كهو .. على خاطر القيروان يتحكى عليها صباح وعشية ..
في كل ثانية وكل ثنية
والعيشة فيها موش عادية
خاصة في المناسبات الدينية إحتفالاتنا عالمية
في المدينة العربي تشم ريحة البخور والماكلة القروية ...
خلي عاد من بنة المقروض وزينة الزربية
وبلي باش نحكي ونحكي على القيروان
وزينها مانوصلش نعطيها حقها في الوصف
منين تحب نبدالك من التاريخ وأنا جاي وإلا من توا وإحنا راجعين نبداو من المناسبات الدينية وأجوائنا العالمية والمليون بشر إللي يزورونا من كل مكان من بنزرت لبنقردان
تحب نحكيلك على جامع عقبة وفسقية الأغالبة ومقام أبي زمعة البلوي وماغير ماننسى بروطة وإللي يزورها يقول محلاها القيروان كنت غالط فيها يعطيها حوتة
يزيد ياكل الكفتاجي والمقروض ويشري زربية ويهبط تصويرته في الفسقية
القيروان إللي تسمات أم المدائن ورابعة الثلاث ..
القيروان عاصمة الأغالبة ومدينة 3000 سنة حضارة ..
هذا شوي من برشا حاجات على القيروان ..
كيف نقولو القيروان نقولوا أيا بيكش، خبز كوشة شيحة وبوفندار والعراك والقرقابية، المقروض والسهرية، والصلاة في الجامع الكبير، وبعد نختموها بقهوة في طقطق شي يعمل الكيف .. ! هيا نعملوا طلة على جو المولد النبوي الشريف فيها كيفاه مالا 💙🌙
موش فخرة أما القيروان دنيا أخرى🐝🍪🥰🥰
