25/06/2024
ကားမပျက်ခင် ကားတွေက သတိပေးတဲ့ အချက်တွေ
(၁) ကားအင်ဂျင်ကနေ စက်စစနှိုးလိုက်ချိန် ရွှီရွှီ လိုအော်သံတွေ ကြားနေရတယ် ။
အဖြစ်နိုင်ဆုံးက ကားအင်ဂျင်မှာ တပ်ဆင်ထားတဲ့ Belt ကြိုးတွေ ချောင်နေတာ လျော့နေတာ ၊ ဒါမှမဟုတ် တင်းလွန်းနေတာတွေ ဖြစ်နိုင်ပါတယ် ။ သတိထားရမယ့်အချက်က အဲ့ Belt ကြိုးတွေ သက်တမ်းလွန်နေပြီး ဆွေးမြေ့ ပြတ်တောက်နိုင်တာပါပဲ ။
(၂) ကားအင်ဂျင်ခန်းထဲက တဂွီးဂွီး နဲ့ အော်သံတွေကြားရတယ် ။
အဖြစ်နိုင်ဆုံး ပြစ်ချက်က ကားမှာ တပ်ဆင်ထားတဲ့ Ball and Bearing တွေ ပျက်ဆီးချို့ယွင်းနေတာမျိုးတွေ ဖြစ်နိုင်ပါတယ် ။ ဘောတွေ ဂျမ်းဖြစ်ချင်တာကြောင့် ဒီလို အော်သံတွေ ထွက်လာရတာဖြစ်ပါတယ် ။ ရေလည်အုံဘော ၊ Tensioner ဘော ၊ ဒိုင်နမိုဘောတွေ ၊ Free Ball စတာတွေ ကြောင့်ဖြစ်တတ်ပါတယ် ။
(၃) ကားအဲကွန်း မအေးတော့ဘူး ၊ အဲကွန်း Magnet တွေ ကပ်လိုက် ကွာလိုက်ဖြစ်တယ် ။
အဖြစ်နိုင်ဆုံးက ကားမှာတပ်ဆင်ထားတဲ့ Fan Motor တွေ အလည်မမှန်တော့တာ ၊ မလည်တာတွေကြောင့် အဖြစ်များပါတယ် ။ အဲကွန်းအပူကွိုင်တွေနဲ့ လိုင်းတွေပိတ်ရင်လည်း ဖြစ်တတ်ပါတယ် ။
(၄) ကားဘီးတွေဆီကနေ တဝီဝီ အော်သံတွေကြားနေရတယ် ။
အဖြစ်နိုင်ဆုံးက ကားဘီးတွေမှာ တပ်ဆင်ထားတဲ့ Hub Ball တွေ ကနေ အသံထွက်နေတာဖြစ်နိုင်ပါတယ် ။
(၅) ကားဂီယာထိုးလိုက်ရင် ဒုတ်ခနဲဖြစ်သွားတယ် ။
အဖြစ်နိုင်ဆုံးကတော့ ဂီယာဘောက် မောင်းတိန်းတွေ မကောင်းတာ ၊ ပျက်နေတာတွေ ဖြစ်နိုင်ပါတယ် ။ နောက် ဂီယာဘောက်ကနေ ဆောင့်နေတာတွေလည်း ဖြစ်နိုင်ပါတယ် ။ ဂီယာဆီ အမြန်စစ်ဆေးသင့်ပါတယ် ။
(၆) အင်ဂျင်၀ိုင် အချက်ပြ မီးတချက် တချက်လင်းလာတယ် ။
အင်ဂျင်၀ိုင် နည်းနေတာ ၊ အင်ဂျင်၀ိုင် မရှိတာ ၊ အင်ဂျင်၀ိုင် မတက်တာ ၊ Oil Pump တွေ ပျက်စီးတာ တွေကြောင့် ဖြစ်တတ်ပါတယ် ။ အမြန်စစ်ဆေးမှ အင်ဂျင်ပျက်စီးမှု သက်သာပါမယ် ။
(၇) Battery Charging မီး တချက် တချက်လင်းလာတယ် ။
အဖြစ်နိုင်ဆုံးက Alternator ဒိုင်နမိုကနေ ချာချင် မဝင်တာ အဖြစ်များဆုံးပါ ။ အမြန်စစ်ဆေးမှ အဆင်ပြေပါမယ် ။ အားကုန်ပြီး စက်ထိုးရပ်နိုင်ပါတယ် ။
(၈) ကားစက်နှိုးရင် မော်တာက ထစ်ထစ် နေတယ် ။ ကပ်နေတယ် ။ ဝပ်နေတယ် ။
Starter Motor မကောင်းတာကြောင့် ဖြစ်နိုင်သလို ၊ Battery အိုးအားနည်းတာလည်း ဖြစ်နိုင်ပါတယ် ။ အမြန်စစ်ဆေးထားမှ လမ်းမှာ တိုင်မပတ်မှာဖြစ်ပါတယ် ။
(၉) ကားက လီဘာနင်းရင် တုန့်တုန့်တုန့် ဖြစ်နေတယ် ။
ဆီတိုင်ကီထဲက ဆီပန့်တွေ ကြေးပိတ်တာ ၊ ပလက်တွေ မကောင်းတာ ၊ Injector တွေ ကြေးပိတ်တာ တွေကြောင့်ဖြစ်တတ်ပါတယ် ။ အမြန်စစ်ဆေးပြုပြင်ထားမှ အဆင်ပြေပါမယ် ။
(၁၀) ကား ဘရိတ်နင်းလိုက်တိုင်း တဂျီးဂျီးနဲ့ သံပြားချင်း တိုက်တဲ့အသံတွေကြားနေရတယ် ။
အဖြစ်နိုင်ဆုံးက ဘရိတ်ရှုးတွေပါးတာ ၊ ဘရိတ် ဒရမ်တွေ အဆင်းကြောင်းတွေ များလာတာကြောင့် ဖြစ်တတ်ပါတယ် ။ဘရိတ်ပိုင်းတွေ အမြန်ဆုံး စစ်ဆေးသင့်ပါတယ် ။
(၁၁) ဘရိတ်နင်းလိုက်ရင် ဘရိတ်ခြေနင်းက ပျော့ဆင်းသွားတာ ။
အဖြစ်နိုင်ဆုံးက ဘရိတ်လိုင်းတွေ ပေါက်တာ ၊ ဝါရှာတွေကနေ ဆီယိုစိမ့်နေတာ ၊ Master Cylinder ဘရိတ်ဆုံက အ၀ိုင်းဆီးတွေကနေ ဆီယိုစိမ့်နေတာတွေကြောင့်ဖြစ်နိုင်ပါတယ် ။
(၁၂) ကားဘယ်ညာ ကွေ့ရင် တတောက်တောက် အသံထွက်တာ ။
ဖြစ်တတ်တာက ကားမှာရှိတဲ့ ဒူးဆစ်တွေ ပျက်စီးဖို့ အစပြုလာတာဖြစ်ပါတယ် ။
(၁၃) ကားအောက်ခြေမှာ ဆီကွက်တွေ တွေ့တာ ။
ကားအင်ဂျင် တခုခုဆီက အင်ဂျင်၀ိုင် အော်တို၀ိုင်နဲ့ အခြားချောဆီ အမျိုးမျိုးတို့ ယိုစိမ့်ထွက်နေတာ ဖြစ်နိုင်ပါတယ် ။
(၁၄) ကားမှာ မူမမှန်တဲ့ အနံ့တွေ ရနေတာ ။ ဥပမာ ဓာတ်ဆီနံ့ တွေမွှန်နေတာ ၊ ညှော်နံတွေရနေတာ ။
အဖြစ်များဆုံးကတော့ အင်ဂျက်တာ Seal တွေ ယိုစိမ့်ပြီး ဆီနံ့ထွက်တာ ၊ ဆီပိုက်လိုင်းတွေကနေ ယိုစိမ့်နေတာ တွေနဲ့ ၊ ညှော်နံ့တွေကတော့ ဝါယာတွေ ရှော့ဖြစ်တာ ၊ ဖန်မော်တာတွေ လောင်တာ ၊ ဘောတွေ ဂျမ်းဖြစ်ချင်နေတာ ၊ Belt ကြိုးတွေ ဂျမ်းဖြစ်ပြီး လောင်ချင်နေတာတွေဖြစ်တတ်ပါတယ် ။
ဒီအချက်လေးတွေက ကားတွေ ကြီးကြီးမားမား ပျက်စီးမှုတွေ မဖြစ်ခင် ကားတွေကနေ သတိပေးလေ့ရှိတဲ့ အချက်လေးတွေ ဖြစ်ပါတယ် ။ သတိပေးပြောချင်တာကတော့ ကားတွေက မပျက်ခင် မူမမှန်တဲ့ ၊ ပုံမှန်မဟုတ်တဲ့ သတိပေးချက်တွေကို အချက်ပြလေ့ရှိတာပါပဲ ။
အဲ့ဒါလေးတွေကို သတိမူတတ်မယ်ဆိုရင် သတိထားစစ်ဆေးတတ်မယ်ဆိုရင်တော့ ကြီးကြီးမားမား ပျက်စီးဆုံးရှုံးမှုတွေကို ကာကွယ်နိုင်မှာ ဖြစ်ပြီး လူရော ကားရော အန္တရာယ်ကင်း ဘေးရှင်းမှာဖြစ်ပါတယ်ခင်ဗျာ။
Lynn Za Nee ( P.T.U )
