08/04/2019
حنقولكم معلومه عن السفر ممكن تهمك لو حتسافر قريب
انهارده المعلومه عن الطيران
إربط الحزام، إفتح ستارة الشباك، رجع الكرسي للوضع المستقيم، رجع ترابيزة الأكل مكانها…
طول ما إنتا راكب في الطيارة بتسمع تعليمات كتير منها اللي مفهوم ومنها الي مش مفهوم إطلاقاً، لفتت إنتباهي كلها وابتديت أدور شوية ولقيت شوية حاجات لطيفة كده
مبدئياً تصميم الطيارة وقواعد الركوب فيها بتفترض دايماً إفتراض واحد لا يتغير: إن الطيارة بتقع! يعني معظم مكونات التصميم الداخلي للطيارة ملهاش حواف حادة وكلها انسيابية علشان لو الطيارة بتقع والركاب طايرين في الهوا تقلل فرص الإصابات وهكذا..، قيس على كده كل حاجة هتسمعها أو هتشوفها جوه الطيارة.
نبتدي بحزام الأمان
اللي لو أصريت متلبسوش أثناء الإقلاع أو الهبوط أو عامة لما طاقم الطيارة يطلب منك بتدفع غرامة 25 ألف دولار (نص مليون جنيه) وفقاً لقواعد “منظمة الطيران الفيدرالية”؛ حزام الأمان ده فايدته مش بس لو الطيارة بتقع، بس في أوقات “الاضطرابات الجوية والمطبات الهوائية” ممكن يحصل إصابات خطيرة وحقيقية لو الحزام مش مربوط لأن فعلياً الطيارة لو وقعت في مطب هوائي هتقع فوق دماغك 🙂 وفيه مئات من حالات الإصابات سنوياً بتحصل وقت الاضطرابات الجوية للناس اللي بتبقى مش لابسة الحزام.
حاجة تانية لطيفة في تصميم حزام الأمان في الطيارة وليه مش زي حزام أمان العربية بيمسك منطقة الصدر والكتف، وده لأنه ببساطة مشكلتك في الطيارة لما يحصل اضطرابات جوية أو الطيارة تقع مش إنك تتخبط في الدركسيون قدامك أو الإزاز زي العربية، مشكلتك إنك هتطير في الفضاء وتتخبط في كل حاجة جوه الطيارة، وحاجة لطيفة كمان إن الحزام لو على الكتفين والصدر هيحسس الناس بالخطورة وإنها مش وسيلة مواصلات آمنة وده عكس اللي الطيارات بتحاول توصله
للركاب.
إفتح ستارة الشباك وقت الإقلاع والهبوط 🤔
وده ببساطة لتلات أسباب رئيسية: أولهم إن لو حصل حاجة لجسم الطيارة في الوقت الحرج ده يقدر الركاب يشوفوها ويبلغوا بيها طاقم الطيارة في حال أجهزة الطيارة ملقطتهاش، والسبب التاني إن لو حصلت مشكلة والطيارة وقعت أو هبطت هبوط إضطراري يقدر طاقم الطيارة إنه يقيم الوضع بإنه يبقى شايف الدنيا بره عاملة إزاي، وده لأن الزمن في الطيارة بيتقاس بالثواني اللي ممكن تفرق في إنقاذ ركابها أو هلاكهم، وأخيراً علشان لو الطيارة وقعت وفيه محاولات لإنقاذها من الخارج على الأرض أو في البحر يقدر اللي جاي من بره يقيم الوضع من بره
رجع الكرسي للوضع القائم 🙄
وده بردوا بيطلبه طاقم الطيارة من الركاب وقت الإقلاع والهبوط واللي أثبتت الإحصائيات إنه على الرغم من زمنه القصير اللي لا يتجاوز 1% من زمن الرحلة إلا إن 56% من الحوادث القاتلة للطيارات بتقع في الوقت ده، وفكرة وضع الكرسي ليها تلات أسباب.
الأول إنك في وقت الهروب في حال الحوادث متزنقش الراكب اللي وراك علشان يحاول يخرج (زي ما اتفقنا الوقت في الطيارة بيتقاس بالثواني)، وتاني حاجة إن فيه وضع أمان معين بيتم إتخاذه من الركاب “وضع الإستعداد للاصطدام” Brace for impact ، الوضع ده الراكب اللي وراك ميقدرش يعمله صح لو الكرسي مش في وضعه القائم، وأخيراً إن الوضع القائم هوا الوضع اللي الكرسي فيه بيبقى مقفول وغير قابل للحركة بمؤثر خارجي، عكس الوضع المايل اللي الكرسي فيه بيبقى مفتوح وممكن من الخبطة يتمطوح ويرزع في دماغك أو دماغ الراكب اللي وراك
وموضوع الكرسي القائم هوا نفس فكرة إنك تقفل ترابيزة الأكل Tray Table وقت الإقلاع والهبوط، وفيه
حاجة لطيفة أخيرة إن أغلب شركات الطيران بتقفل الأفلام والمزيكا وقت الإقلاع والهبوط علشان سبب عجيب جداً! الإحصائيات أثبتت إنك لو قدرت تخرج من الطيارة في أول دقيقة ونصف من الاصطدام لو هوا متوسط ومدمرش الطيارة ففرصتك في النجاة هتبقى تقريباً 100%، طب ده يحصل إزاي والطيارة فيها متوسط 350 راكب؟ يحصل بإن كل ثانية من التسعين ثانية تفرق، وبالتالي فيه حوالي 1–5 ثواني ممكن تروح لو حضرتك مستغرق في فيلم ولسه بتاخد بالك إن فيه مشكلة بتحصل في الطيارة، الكام ثانية دول مضروبين في عدد ركاب الطيارة ممكن يطيروا فرص النجاة لأربع خمس ركاب معاك😁😁😁
