28/09/2024
INTELEKTUALËT GIZAVESHAS
Një ndër intelektualët gizaveshas, me arsim të lartë të viteve 70, ishte edhe Zyber Koçi.
Ai lindi më 28 shtator të vitit 1947 në lagjen Arrëz të fshatit Gizavesh. Me sakrificë, kryen arsimin fillor në fshat dhe klasën e pestë në Dorëz, mbasi shkolla ndodhej në një largësi të konsiderueshme për moshën e një fëmije. Ashtu me vështirësi duke kaluar nëpër një terren të thyer edhe në dimrat e ashpër me dëborë ai nuk mungonte asnjë ditë në shkollë me dëshirën dhe pasionin për të vazhduar mësimet. Mbasi e mbaron klasën e pestë, i mundësohet një bursë studimi në konviktin e qytetit të Librazhdit ku kreu dhe shkollën e mesme, gjimnaz, të cilën e përfundoi në vitin 1967. Po këtë vit i jepet e drejta e studimit, me bursë, për në Shkollën e Lartë Ushtarake të Bashkuar Tiranë.
Mbas përfundimit të studimeve të larta, ku u diplomua oficer artilier emërohet me shërbim në Repartin ushtarak të Kolonjës, Lushnjë. Më pas transferorehet në qytetin e Gramsh*t. Pas disa vitesh shërbimi, për arsye shëndetsore lirohet nga ushtria dhe punon si punonjës i administratës shtetërore. Edhe në kryerjen e detyrës si nënpunës civil atë e ka karakterizuar sinqeriteti dhe korektësia në punë. Këtu punoi dhe qëndroi bashkë me familjen deri në vitin 1991.
Mbas vendosjes së pluralizmit politik, Zyberi vendos të kthehet në vendlindje në lagjen e tij, Arrëz. Ndërkohë sa vinte, sëmundja i rëndohet. Megjithë kujdesin dhe mjekimet e marra më 1 dhjetor të vitit 2010 ndërroi jetë në moshën 63 vjeç. Kështu u mbyll jeta e njërit prej intelektualëve të gjeneratës së parë që mbaruan arsimin e lartë, ish oficerit të armës së artilerisë nga fshati Gizavesh, Zyber Koçi.
Me rastin e 75 vjetorit të lindjes, urojmë për familjarët e të afërmit, të rrojnë e ta kujtojnë.
Ali Buzra, Gizavesh më 28 shtator 2022.
