楊媽媽陪你移民加拿大 cmmchan immigration inc.

Home
Canada
London, ON
楊媽媽陪你移民加拿大 cmmchan immigration inc.

[Claudia Mei Mei Chan, RCIC-IRB ]

verify my status at https://college-ic.ca/

10/29/2024

【聊勝於無】

記得好似曾經有寫過關於AOR是什麼這個問題，但係懶得搵，不如重新寫過算啦...

可能最近移民界變幻莫測，大家都有啲擔心係咩情況，所以就有唔少人問其實收咗AOR之後係咪即係會喺某段時限之內完成審批？

相信呢個唔使陳小姐講，大家都知道唔係啦，等咗一年甚至以上未有消息嘅，都有人在。

咁點解有啲人有AOR，有啲人又冇呢？

其實有故仔嘅：

話說上年有組織爭取話要比香港人等PR期間可以好好地工作，好好地生活下去，咁政府咪做嘢囉，但係整policy嗰個人冇留意，本身程序係冇AOR 呢個步驟，所以出政策嘅時候就有要求提供證明【圖一】。

到有人發現，組織又出聲啦：「你咁樣叫啲香港人好難做㗎喎！」

OKOK … 唔鍾意咪改囉，指引就變咗【圖二】現時呢一個款式啦。

咦，咁點解依家嘅申請者會收到AOR嘅呢？

大組織左手同右手、左腳同右腳唔會成日溝通㗎嘛，咁做PR嗰邊嘅指引嘈嗰時咪一齊改囉，所以『官員處理手冊』就由【圖三】變成咗現時【圖四】，多咗第六點！

不過可以肯定，收到AOR嘅各位等於已經過咗R10，除非有不能入境(inadmissibility)的原因，否則就係等同埋等囉～

10/25/2024

【可供參考】

有人問，其實尋日公佈呢堆數字有咩價值，有冇「牙齒」，實際跟得貼唔貼？

不如咁講：曾幾何時，當局會以打爆quota為榮；今時今日，風聲緊，就要睇餸食飯，就住就住。

2023 計劃 vs. 實際批出數字，可見【圖一】，整體都算跟住範圍的。

而每年嘅Levels Plan除了第一年數字比較有參考價值之外，另外遠啲嗰兩年變數就會比較大：可見【圖二】，剛剛三年計劃內，2025可有的上落都唔細㗎～

而家政府已是比較移民友善的，若未來政黨有改變，變動應該會更大呢！

10/24/2024

【消息可靠】

網上面嘅小道消息，有時都真係信得過㗎喎：阿🐍唔等到11月1號，今日就搶閘宣布未來三年嘅Levels Plan。

尋日嘅傳聞無呃你，第一個字真係由四變三，仲加送臨時居民都有限額（詳情見留言部份）。

🅰️🅱️用嘅凳仔2025仲保得住，之後就會一直下降。相比之下，SUV跌得「甘」好多，PNP都幾慘烈，未來勢必爭崩頭。

入咗紙嘅，幾時排到你：唔諗會唔會令個人好過啲？！

10/23/2024

【靜觀其變】

今日又有小道消息話聽日移民部有新政策，唔見有press release，所以唔知堅定流。

但係其實下個星期五都已經要出嚟緊嘅levels plan…若當真，唔知阿🐍做乜咁急呢？不過都係嗰句啦，真係大地震嘅話，有咩都係今日申請咗先？

等運到這段時間，不妨先重溫一下上年嘅levels plan，紅色框係蒸🅰️🅱️會用到嘅凳仔。今日嘅傳聞話今年總數字有可能由四字頭減到三字頭，如果屬實，🅰️🅱️呢個數恐怕都要再向下調整一下⋯⋯⋯大家還是有個心理準備好！

［按：三年又三年嗰張嘢可以用到2029🙃］

10/21/2024

【真亦假時】

最近有唔小人同陳小姐傾及那個$48,000年薪的「啤啤傾」經理［圖一］，係真缺人還是假賣工答你唔到，但就可以話你知呢個數點來。

話說這種職位要搞LMIA，可以依高薪或低薪途徑申請，低薪要求好鬼多（例如要比來回機票、住宿等等），所以一般從業者都會可免則免搞高薪就算。

咁咩叫高薪呢？

高過當地中位數就叫高，但因為間中會調整，一般入紙時會寫多少少以免審批途中調整又要成份再做過。

「啤啤傾」經理 - NOC 60030 - 在多倫多的中位數是$22/小時，x40 x52 = $45,760 ［圖二］。

而家個posting $48,000就比夠$23.07啫，都仲比BC中位數 $25 便宜（亞省平均數$26個幾添呀！）

安省同類job posting大概1400份左右，佔全加約3000份約四成多［圖三］。而打此文時同類職位全加有277份玩緊這個LMIA遊戲：安省有5份已成功批出，153份待批。

今日就有小道消息話聽日會宣布高薪項目將會有所調整，改為中位數+20% ［圖四］。

如果當真，這位「啤啤傾」經理嚟緊就唔止要賺$48,000，要賺夠$55,000先得啦！（若在BC要 > $62,000添！）

到咗呢個價位有冇加人會自動請纓去做，就係一個陳小姐答你唔到嘅問題了～

［謎之音：堅賣工嘅話，即使有加人應徵都會話冇啦！😂］

10/20/2024

【需要轉型】

最近學校出咗「能取PGWP清單」（見圖），只得返75科合資格。

由於陳小姐任教那學科不算30.1601，所以無法取得。而商校唯一”有得留低”的科目則為「供應鏈管理」(52.0203)。

除非學校突然可以將其餘學科轉型，否則睇嚟未來會更少海外生問津，但也算是個好機會迫學校檢討現時提供的學科係咪當真有用？

［按：即使合資格，第時申請都建議加多頁證明自己啱CIP…]

10/12/2024

【只欠番薯】

睇嚟一切已經準備就緒，就睇今次啲🍠燒唔燒得成⋯⋯⋯

翻查紀錄：

2017年嗰一次，啲番薯燒咗五個星期，有唔少學生受影響。

但係2022年嗰一次呢，就燒唔成嘅。

蒸餸蒸到最後一秒嘅，記得要好好留意今次嘅事情發展。

10/10/2024

【多元文化】

話說加拿大移民法中其中一個表示本國需要移民嘅原因，就係增加加拿大嘅濃厚多元文化 (按：所用詞語係 social and cultural fabric)。

鑒於最近移民普遍偏向某幾個國家，尋日法語省就投下一枚重量級炸彈，決心將當地其中一個主要移民渠道向每國家設置上限。無講明係咩地方「唔得」，只係話每個地方唔可以過25%，不涉歧視，果然高招。

有花生評論員就話，法語省經常係測試唔同移民政策嘅地方，第時聯邦會唔會跟住一樣咁做，就要等時間俾答案我哋。

咁樣嘅政策，大家係會拍手歡迎？還是覺得做多咗呢？

［谷歌英文翻譯版請見留言］

10/08/2024

【有望轉線】

呢篇想寫咗幾日㗎啦，不過因為要坐定定睇啲資料先寫得，早幾日外遊中實在未有機會，而家趁jet lag就寫啦。

相信有唔小入咗SUV嘅香港人還在呆等中，雖然聽聞最近動作已經比較多，但係都成日會聽到有埋怨嘅聲音，甚至想轉會。

最近當局就SUV申請靜靜地做咗一件事情，就係落實之前某次記者會提及，屬「必需」(essential)的申請者可以攞一張開放式工簽(OWP)的政策，原意係等搞緊生意嘅時候申請者唔會因為拍烏蠅而餓親 [笑]，最長可以攞到三年：三年喎，B都可能行得通啦！

但係，過往曾經有SUV申請者因為本身盤生意冇乜起色而申請被拒絕，所以有一批律師係會唔建議申請者提早過嚟做生意，因此攞呢張嘢諗住轉線都不是絕無風險。同埋，真係咁玩會累全家/艇㗎喎！

各位快艇成員要唔要咁玩請自行決定，陳小姐都係話俾你聽有件咁嘅事發生啫～🙂

10/04/2024

【身體檢查】

相信大家都知道申請PR時指模由2023年起要重打，但體驗一項就間中有爭議。

當局最近就宣佈將原本今日完的「免檢」政策延長五年至2029。

想知道誰合資格可參考留言部分連結，即使唔講錢呢方面，淨係慳返唔洗去醫務所呆坐已經very very good喇！

10/04/2024

【亂世佳人】

即將實行新的PGWP修例詳情正式出台，除咗亂之外，就只有亂。

以後除咗要睇係咪全職、係咪DLI、係咪手持有效SP、係咪90/180日內等等之外，仲要睇幾時申請SP、幾時入PGWP、本身讀咩科、考咗英文試未等等⋯⋯陳小姐個牌仲算新已經歴咗無數次嘅大小改例，唔怪得江湖傳聞三年左近好多行家都會執包伏唔撈！

可幸的是，港人熱門科目如托兒及會計仍在清單上，呢啲行業係咪真缺人陳小姐不太清楚，但估計教職因此未會受預期中咁大影響，應該仲捱到可以貼錢俾公司唔使執笠住⋯⋯⋯🙃

以後有需要申請PGWP務必準備妥妥當當，無啦啦被無辜拒簽out-of-status就唔好啦！（按：這種事情經常發生）

09/18/2024

【日日新鮮】

睇落應該全部唔係即時實行，最尾個點對大家最有可能有影響（如有）。

⭐️預告可見留言部分，PGWP相關的11/1起生效（同日會出下年的Levels Plan）⭐️

09/17/2024

【中秋節快樂】

首先喺度祝大家日日都開開心心，健健康康。

話說聽日阿🐍有公布，暫時未收到風關於乜嘢.... 不過有咩要申請呢，都係今晚做咗佢好！誰知道聽日又會是什麼世界呢？

08/28/2024

【我回來了】

話說陳小姐正在回加的途中。

又會咁啱，當局今日（28號）出通告立即叫停『旅轉工』的特別措施（見圖）。

雖然已經入咗紙嘅不受影響，但相信咁突然嘅消息，某些本來唸住賺到2025的同行們今日會好傷心～💔

而家呢個時勢仲敢去買工嘅，除咗送個『勇』比佢之外唔知仲可以講咩了！

08/08/2024

【抄考無罪】

還記得早排叫大家自行作主決定某男有冇請槍一文，近期另一位讀S校的鍾姓某男好似就得出另一結果。

基本上鍾先生（or 其代表律師）態度就係：「係呀，功課我係抄返嚟，但學校無捉到無話我有問題，所以我張沙紙仍屬有效。你咪踩過界做埋學校嗰瓣！」

聽落同之前嘅論點唔差得遠，但係今次個官看似無佢乎，比佢send返去IRCC重審。嗱嗱嗱，比另一個官員做唔代表一定批㗎！

今次比個官你做，你又會點判呢？

［老老實實，如果陳小姐係嗰位新官員實會玩嘢，拖到2025年8月先處理佢份嘢，等佢得物無所用！（本人乃衰人乙名，我認！）🤣］

07/25/2024

【由你作主】

相信大家可能係其他渠道都有聽聞一位讀（？）咗Qualifi嘅50歲香港男子被拒HKPP OWP之後，希望申請告上法庭的一事。

今日就同大家分享一下原文，由大家自行決定此男是”真金白銀”買咗證書、請咗槍手、還是當真無辜，實屬不幸呢？？？

-在香港吃花生中的陳小姐上
（連結請看留言部份）

06/28/2024

【洗底需時】

相信大家都知某些情況下在移民層面上是有得「洗底」的，例如曾有案底、逾期居留、等等⋯⋯

不過可以還可以，最後得唔得同要幾耐就好難講，官方答案永遠都係個句：『最後結果由官員決定』。

最近「多事律師」就拿到圖中呢份「平均處理時間」的報告，有需要做的可留意一下各路線的預計需時。因為視乎所屬案件，一般情況未批得出要停止讀書、停止工作、不能入境等等啊！

另留意這些都屬「過往業績」，並不代表未來表現，最後多咗少咗都無處投訴㗎～

06/25/2024

【國會日常】

唔知大家有冇跟開國會（ CIMM ）最近關於香港人嘅討論。

老實講，聽佢哋講嘢的確係有啲吃力嘅⋯⋯所以陳小姐通常都等出咗「字體版」先至去追劇。

6月5號嗰一集當真幾有趣，除咗有人提議PR卡做咩唔改咗個code佢之外（見圖），亦有討論移民配額及處理時間的問題。

因為種種原因而攞唔到MPF，或者需要行/行緊🅰️🅱️嘅，呢套連續劇值得追啊！🙂

06/21/2024

【畢業工簽】

最近乃畢業旺季，唔少畢業生都急住申請PGWP而決定跑去邊境解決，其實係境內申請都可以「做住等」，所以都唔明白點解要咁心急。

而家搞到邊境官員不滿，決定一刀切唔比啦（見圖）。

這是繼減少服務時間後，進一步打擊『扯旗杆』（flagpole）的措施，相信之後陸續有嚟，仍然想用呢個方法嘅，就自己衡量風險啦。

唔好話陳小姐無提你，咁樣搞完一輪成功與否亦算係”refused entry”，每次填表都要報上㗎！

06/20/2024

【公眾諮詢】

根據現時法例，港人即使學簽或工簽申請被拒，仍然可以用（原有或新申請的）ETA以遊客身份入境。

這個情況很多時會發生在原本有親朋戚友喺加拿大嘅爸爸媽媽或親友身上（想靠工簽或學簽搞移民，但係又要過嚟探小朋友或者兄弟姊妹、參加婚禮、畢業禮⋯等等）。

最近當局打算為此舉進行修例（如圖），現正做緊公眾諮詢，有興趣發言的人士可使用留言部份的連結。

06/16/2024

【千年女王】

聽到呢四個字大家會唸到咩呢？

陳小姐已一把年紀，想起就是「兩眼發青光」🤣

不過今日要講的重點是最近有人收到傳說中的Hong Kong pathway AOR（如圖）。

收到之後有咩用？

無㗎，繼續等到兩眼發青光囉！不過最少知道過咗R10囉～

暫時申請留多三年WP不用AOR，遲啲可能會改吧！

無嘢陳小姐返去唱歌：
🎤 誰令你眼裏載滿了悲傷🎶

［網上截圖］

06/14/2024

【未來熱賣？】

今朝剛剛同一位薩省嘅同行傾偈，佢表示覺得該省嘅省提名非常之好，有感將會係未來嘅明星（因此搵我睇吓點樣可以幫佢整理好佢公司嘅流程⋯⋯）。

然後咁啱得咁蹺，休息咗三個月之後，薩省今日抽出第一輪（見圖）。

今期揀出嚟嘅工種都多嘅， 12346789都有，只係無5（記者、藝術音樂類）。至於係唔係真係會係明日之星，就要放長雙眼睇落去啦！

06/13/2024

【展望亞省】

一輪混亂之後，原來話只開6/11一天的平台，技術問題6/12短暫再開放，AOS同旅遊業唔使講都知爆咗啦（見圖），但RRS乏人問津，依家都仍然開放申請。

RRS有d似AIP/AINP，要「認證地區」的job offer先有得搞。各位有非港人同學或同事有需要搵方法留在亞省的話，可以研究一下留言部分的「認證地區」清單。

06/11/2024

【學習感恩】

今日是亞省AOS小休後第一次重開的日子，然後，就沒有然後了⋯⋯因為，只有圖中這個畫面啊～

等🅰️🅱️中的請慶幸自己可以坐埋一邊食花生吧～

［按：今日預計收430份一般、130份旅遊，但係想搶首先都要入到去⋯⋯］

06/10/2024

【要學計數】

早兩日先至更新遊戲規則，今日又出咗個新嘅”官員指引” ，叫官員記得出AOR，究竟玩咩呢？(圖一)

另外，亦都更新咗點樣計時嘅指引，唔知究d官唔識計數啊定係啲申請者亂咁嚟呢？(圖二)

點都好啦，需要申請A/B and/or OWP嘅就自己留意啦～

Address

London, ON

Website

https://linktr.ee/ClaudiaRCIC

Alerts

Be the first to know and let us send you an email when 楊媽媽陪你移民加拿大 cmmchan immigration inc. posts news and promotions. Your email address will not be used for any other purpose, and you can unsubscribe at any time.