ALi Explores

09/12/2023

ان شاء الله الكامب بتاعنا فى محمية وادي دجلة جاهز لأستقبالكم يوم حفلة رأس السنة

🔥 تنوية بسيط :
- لو ناوي يكون معاك مشروبات كحولية او أي نوع من أنواع المخدرات و حابب تشربها اليوم ده ياريت تصون كرامتك و ما تحاولش تحجز معايا و فيه كامبات تانية أكيد هاتسمح بده
بس أنا لأ 😉

09/12/2023

ممكن ( ننورماليز ) فكرة الصحيان بدرى يوم الاجازة عشان ننزل نتقابل ؟
عايزين نعمل جولات جوه أسكندرية 😍
نشوف بعض و نفطر ، نركب مركب و نصطاد و نتصور او نركب عجل و نلعب شطرنج على القهاوي القديمة
▪️طب هانروح فين يا علوة ؟

- هانطلع على المكس ⛵⚓
أحسن و أفضل مصدر لليود فى العالم كله

جولتنا هاتبقي يوم الجمعة الصبح ، هنتجمع و نفطر و نحكي تاريخ المنطقة و إحنا بنتمشي
و نشوف مطعم اللول و زفير و نتصور عند الفنار و ممكن نتغدى هناك وقت الجولة الحرة

📍 و أحلي حاجة ان احنا هانزور أقدم بيت للعصابات فى أسكندرية ، لوكاندة قديمة عمرها فوق ال ٢٠٠ سنة.. أسمها اللوكاندة الحمراء ، و هاندخلها من جوه و نصورها

الجولة هاتبقي مناسبة للأطفال فوق سن ٢٥ سنة 😍
و هايتوفر معانا باص نقدر نتحرك بيه و نسيب فيه حاجتنا و نستخدمة كخط دفاع ضد الشتاء لو حصل نوة 😅

أبعتولي رسالة لو حابين تحجزوا مكانكم او لو عندكم اى أستفسار او لو حابين تقترحوا عليا الجولة الجاية تكون فين جوه الأسكندرية

08/12/2023

علي ، ممكن تكلم ماما تقنعها أطلع معاكم رحلة التخييم فى الصحراء ؟ ، هي بتثق فيك
- سيبي الموضوع ده عليا 😂

08/12/2023

طلبت من الذكاء الأصطناعي بتاع شركة Microsoft انه يعملي لوجو بأسمي
و بعد ما سألني على طبيعة الشغل و نوعية الرحلات طلعلي النتيجة دي 😊🔥

07/12/2023

Exploration. Adventure. camping ⛺🔥

07/12/2023

• حـكاية أمـير البـحار ... حـــسن باشا الإســـــكنـدرانـي
.. ماكنش إسمهُ حسن و لا هو كان إسكندراني ... !!

حضر كوباية الشاي او فنجان القهوة بتاعك و ألبس السماعة و شغل موسيقي كلاسيك عشان هتقرأ حكاية حلوة أوي و هاترجعك بالزمن لورا

القصة بتبدأ فى زمن غير زماننا و مكان غير مكاننا .. بعيد شوية ، عند البحر الأسود .. حيث بلاد الشركس ..
" الشركس دول مسلمين عايشين بين روسيا و تركيا على جبال القوقاز بس مواقعهم كان فريد من نوعة فتم احتلالهم من معظم امبراطوريات العالم زى التتار و المغول و الرومان و الأتراك لغاية الروس.. و اتفرقوا و عاشوا فى كل البلاد العربية زى الأردن و سوريا و مصر..."

المهم الشركس كان فيها قبيلة كبيرة ، اسمها قبيلة الشيرويشيين .. و القبيلة دي كبيرها هو الإمام حسن .. اللي كان محل احترام و تقدير من كل أهل القبيلة و رجل متدين و محب لعمل الخير ،

رزقه الله ب ٣ اولاد ذكور ، أصغرهم سناً هو زكــــريا ..
. بطل حكايتنا ،،

المهم ، فى سنة ١٨٠٠ و بعد ما زكريا تم ال ١٠ سنين ، قرر والده الإمام حسن ، أنه يبعت ابنه الصغير زكريا لمــصر ، و بالتحديد للقاهرة ، لوجود الأزهر الشريف .. عشان يدرس هناك و يتعلم و يبقى إمام زي أبوه ..

و قرر أنه يروح يوصل ابنه بنفسه و بعدها يروح يحج ..
( شوفتو الحج كان ازاي اسهل سنة ١٨٠٠ من الحج فى ٢٠٢٣ اللى اصبح شبه مستحيل)

و قد كان ، وصل الإمام حسن وطفله للقــاهرة ، و راح لبيت واحد من أقاربه من السلحدارية ذوي الأصل الشركسي .. و سابه هناك بعد ما وعده أنه مش حيتأخر ..

" السلحدار ده شخص مسئول عن تصنيع و تطوير السلاح للجيش فى مصر"

و انضم الإمام حسن لقوافل الحج المتجهة للحــجاز ..

و بعد ما خلص مناسك الحج فى مكة ، قرر أنه يتجه للمدينة المنـــــورة .. و لكن للأسف يموت الإمام حسن قبل ما يوصل للمدينة ..

و يوصل الخبر للقاهرة ، و يعرف زكريا صاحب العشر سنوات خبر وفاة أبوه .. و حزن عليه حزن شديد أوي
. بعدها لقى نفسه وحيد .. فى بلد غريبة ميعرفش فيها حد و ميعرفش لغة أهلها

لكن من حسن حظه ، أن السلحدار .. صديق أبوه و قريبه فى نفس الوقت ، قرر أنه يرعاه و يربيه زيه زي ولاده .. و بدل ما يدخل زكريا الأزهر و يتعلم هناك زي ما كان أبوه بيجهزه عشان يبقى إمام لقبيلته ..

اتعلم صناعة الأسلحة ، و بقى بارع فيها ..

و تيجي سنة ١٨١١ ، و يتم الشاب زكريا ٢١ سنة ،( أفتكروا التاريخ ده كويس) و فى نفس السنة ، تيجي رسالة من السلطان العثماني لوالي مصر .. بيقوله فيها ، " جهز جيشك عشان تحارب الوهابيين فى الحجاز .. "

يقوم الوالي ، يصدر امره للسلحدار .. و يقوله .. " جهزلي كمية كبيرة من الأسلحة و البنادق و الدروع .. الخ"

و طبعا السلحدار ينفذ ..
و بعد ما انتهى السلحدار و العمال اللي تحت منه من تصنيع الأسلحة اللي حيطلع بيها الجيش المصري و يحارب الوهابيين .. بعت لابنه المتبنى زكريا و يقوله ..

" انت اللي حتيجي معايا عشان نسلم السلاح للوالي .. "

و قد كان ، بعد تجهيز الأسلحة و تحميلها .. يتجه السلحدار و معاه زكريا لقصر الوالي فى الأزبكية ..

هانروح الأزبكية ؟ كان مين والي مصر ساعتها ؟

- محمد علي باشا .. والي مصر ، منشغل بعدة أمور ، و مستعد لما هو قادم ..

قاعد منتظر السلحدار ( مسئول السلاح ) .. عشان يستلم منه دفعات الأسلحة الجديدة اللي تم تصنيعها ..

يوصل السلحدار و معاه زكريا ، ياخدوا الاذن لمقابلة الوالي ، و بعد حديث قصير و مقتضب ، يلتفت انتباه الوالي للشاب اليافع اللي جاي فى صحبة السلحدار .. و يسمع منه حكايته .. فيعجب بيه و بشجاعته و صبره ..

و يقرر انه يضمه للديوان ، و ساعتها يقرر زكريا أنه يغير اسمه .. و يستبدله باسم أبوه .. و من الساعة دي بقى اسمه حـــســـن .. !!!

المهم ، بعد كدة بفترة .. سافر محمد علي السويس عشان يتابع تطورات الأسطول المصري و كان فى صحبته حسن ..

و لما شاف حسن الأسطول و حركة السفن .. دب فى قلبه حنين لوطنه ، و فى الوقت نفسه شعر بميل ناحية الحياة البحرية .. و قرر أنه ينضم ليها ..

و قد كان ، تيجي سنة ١٨١٧ و يقرر الوالي يبعت أول بعثة تعليمية مـــصرية للخارج .. و يقع اختياره على عدد من الشباب من بينهم حسن ..

و تسافر البعثة لباريس ، و تقيم هناك لمدة سنتين ، يتعلم فيها حسن اللغة الفرنسية و يتقنها و كمان يتخصص فى العلوم البحرية ..

و بعدا ما تخرجوا ، سافر حسن مع زملاؤه فى البعثة لبلاد مختلفة ، و سجل فى يومياته وصف لكل البلاد البعيدة اللي زارها .. زي السويد و النرويج و اسبانيا و البرازيل .. و غيرها

و فى سنة ١٨٢٥ ، يرجع حسن لمصر تاني ، و يترقى برتبة ملازم بحري و يشترك مع الأسطول المصري فى حروب المورة .. و الحقيقة أن حـــسن أثبت انه شاطر جداً .. !!

و اثبت كفاءة و مهارة عالية و قدر أنه يستولى على عدة مراكب يونانية و يأسر جنودها و يوصل بيهم لإســكندرية !!

و بناء عليه ، يقرر الوالي أنه يكافئ الملازم حسن .. و أهداه دار كبيرة فى حي رأس الـتـيـن ، و مكافأة مالية ضخمة بالإضافة لشال من الكشمير و ساعة من الدهب .. !!

و بعدها أصبح إسم حسن مقترن بالإسكندرية ، فلقبوه بحسن الاسكندراني .. و فضل يترقى و يشغل مناصب كتير و أشرف على ترميم و إصلاح السفن و القطع البحرية .. و شارك بعد كدة فى معركة نفارين ، و رغم أن المعركة دي اتهزم فيها الجيش .. إلا أن محمد علي أصر على إعادة بناء الأسطول من أول و جديد لغاية ما وصل للترتيب التالت بين أساطيل الدول على مستوى العالم

مش بس كدة ، قرر محمد علي ينشئ دار لصناعة السفن و اختار أمير البحار حسن الإسكندراني عشان يتولى هو ادارتها ..

- و لقب أمير البحار هو ما يوازي حاليا القبطان البحري ⚓

و بكدة نبقى عرفنا مدى ثقة محمد علي فى حسن الاسكندراني و قربه منه ..

بس الموضوع ميقفش لغاية كدة ، ده كمان يقرر محمد علي أنه يختار زوجة لـ حسن .. و بعد تفكير ، ملقاش أفضل من ( التفات بنت الغُز )... اه هي اسمها كدة

و دي بقى لها حكاية طويلة عريضة لوحدها ،،

التفات كانت بنت ناس .. !!
يعني بمعنى أنها بنت عيلة و حسب و نسب .. و كدة ؟؟

- لا أقصد أنها كانت بنت ناس فعلاً ، بالمعنى الحرفي ..دي شتيمة فى الزمن ده

الله ، ايه الحكاية دي ... ؟؟!!

زمان خالص ، لما كان السلاطين يشتروا مماليك و يربوهم و يعلموهم ، كان المملوك من دول ينسب نفسه لمعلمه و سلطانه أو التاجر اللي اشتراه ، و طبعا كان بينسى خالص أصله و فصله و البلد اللي جه منها .. و لما كان المملوك ده يتجوز و يخلف ، يتقال على عياله و أحفاده ..
أنهم ولاد ناس .. يعني ولاد المملوك اللي احنا منعرفش اصله ايه .. !!

كانت شبه إهانة ، مش زي معناها و دلالتها فى العصر بتاعنا حالياً

المهم ، زي ما قولنا من شوية ، إن الست التفات دي كانت من ولاد الناس ، ابوها هو
عبد الرازق الغُز .. وده كان من أسرة مملوكية يرجع نسبهم للسلطان قنصوة الغوري بنفسة

،
،
و فى يوم ١ مارس سنة ١٨١١ ، يشاء الله أن عبد الرزاق الغُز يكون واحد من بين المدعوين للقلعة للإحتفال بخروج الجيش المصري لمحاربة الوهابيين ..

طبعا التاريخ ده مر علينا كلنا و نعرفه كويس اوي و عارفين ايه اللي حصل جوه القلعة لما محمد علي قفل الباب على المدعويين 😉

١ مارس ١٨١١ .. يوم مذبحة المماليك ، يتقتل عبد الرازق الغز هو و حوالي ٤٥٠ مملوك ..

الغريب بقى ان زوجة عبد الرازق تيجي و معاها بنتها للوالي محمد علي عشان تستنجد بيه

أمرك غريب يا ست ، مش ده الراجل اللي قتل جوزك ؟

لأ و الأغرب أن محمد علي ياخدها هي و بنتها و يرعاهم و يكفلهم ،
و بعد موت أم التفات ، ياخد التفات و يضمها لأهل بيته و يجيبلها مدرسين و يعلمها كمان .. !!

ممكن نتسغرب الحكاية هنا شوية ، بس اللي يقرأ عن مذبحة القلعة ،
يعرف إن محمد علي ندم جداً على اليوم ده

المهم ، تتجوز التفات بنت الغز ، أمير البحار حسن الإسكندراني ، و يعيشوا فى بيتهم الكبير فى رأس التين فى الأسكندرية

و يرزقهم ربنا بولد وحيد.. تفتكر سموه ايه ؟
اكيد اسم ليه معنى او دلالة و بيدل على حاجة كبيرة..اصل الأسكندراني و بنت الغُز هيخلفوا ايه ؟

- سموه محمد عبدالمحسن ( اه والله عادي كدة بعد كل الشقاوة اللى فاتت دي)

بعدها يباشر الأمير حسن مهامه لغاية ما يترقى لمنصب نائب قائد الاسطول و بعدها بقى ناظر البحرية المصرية ..

فى الوقت ده ، بدأت تحصل مشاحنات بين محمد علي و السلطان العثماني ، و وصلت إلي نقطة معركة نزيب .. اللي أثبت فيها الجيش المصري كفاءة عالية جدا و كان خلاص قريب اوي من دخول الآستــانة و عزل السلطان العثماني !!

لكن هنا تقلق دول أوروبا و تعرف حجم محمد علي باشا ، و قوة الجيش المصري .. فيجتمعوا مع بعضهم لأول مرة على الوقوف مع العثمانيين ضد محمد علي .. لانه كدة بقى بيهدد نفوذهم بشكل واضح وصريح ..

و قد كان ، و تحصل معاهدة لندن ١٨٤٠ ، اللي حرفيا حتقيد محمد علي و الجيش المصري لفترة طويلة بعد كدة ..

لغاية ما يتم عزل محمد علي و يجي مكانه ابنه إبراهيم ثم حفيده عباس اللي حتحصل فى عهده حروب القرم .. و حينضم الجيش المصري للجيش التركي و يحاربوا الروس سوا .. !!

و تستمر الحروب دي لغاية عهد سعيد باشا ، و الحقيقة أن حسن باشا حيتولى فيها قيادة الأسطول و حيثبت كفاءة عالية و لكن الجيش المصري نفسه رغم قوته إلا أن الظروف المناخية كانت شديدة و قاسية جدا و ده أثر على أدائه بشكل عام ؛ و مات جنود كتير بسبب البرد القارس فى روسيا

، كمان أحوال الأسطول ماكنتش فى افضل حالة ، و أضطر وقتها حسن باشا أنه يرجع الآستانة عشان يصلح السفن بتاعته ، و لكن ،،

حتقابله فى الطريق عاصفة شديدة تشوش عليهم الرؤية و تفقدهم السيطرة على السفينة اللي حتصطدم بدورها بسفينة تانية من نفس الأسطول و للأسف يغرقوا الإتنين سوا ..

لما حسن باشا شعر ان دي نهايته ،حرص على أنه يسلم الخاتم بتاعه لواحد من مساعديه .. و يطلب منه أنه يسلمه لزوجته فى إسكندرية .. فى حالة نجاته طبعاً ..

و من حسن الحظ ، أن المساعد ده قدر ينجو بالفعل و نفذ وصية حسن باشا
و بعد عودة الجيش لمصر .. وصل اسكندرية ، ووصل الأمانة .. لبيت أمير البحـار فى رأس التين ،،

و ده نفسه البيت اللي حتخرج منه السيدة عصمت حفيدة حسن الاسكندراني .. !!

المعروفة باسم بنت بطوطة ، و ده لانها اشتهرت بكثرة سفرياتها و حبها الشديد للبـحرية و تعلقها بتاريخ جدها و إنجازاته ..

لدرجة أنها اتبرعت ببيتها فى رأس التين و كتير من ممتلكاتها لدعم و مساندة البحرية المصرية ..
و كرمها الرئيس عبد الناصر و منحها وسام الكمال الذهبي سنة ١٩٥٥

و أُطلق عليها لقب .. أم الـبحـريـة ..

و مش بس كدة ، كمان أسست جمعية خيرية تحمل إسم أم البحرية ، لخدمة الجنود و ضباط الصف فى البحرية المصرية بالإضافة لخدمة زوجات الجنود و أبنائهم

- إستني ماتمشيش ، عايزك ضروري تحت فى الكومنتات ، سايبلك صور ماشوفتهاش قبل كدة
بص عليها و عرفني انك وصلت لأخر القصة ⚓

- أشكرك لو كملت البوست للأخر و انك اخدت من وقتك عشان تقرأ الحدوتة دي 🙏🏻💛
دي كانت للأسبوع ده ، لو عجبتك اعمل منشن لأصحابك و شير لو حابب ان انا أكمل فى كتابة النوع ده القصص

أنا قررت ان كل خميس انزل قصة قديمة و غريبة من اى مكان فى العالم و تقدرو تقرأو باقي القصص من هاشتاج أو

07/12/2023

جمع أصحابك و روحوا أتصوروا و اطلعوا الجبال فى محمية وادي دجلة فى المعادي
و تقدروا كمان تعملوا شوي على الفحم و تلعبوا ألعاب كتير ده الغير ال DJ اللي معاكم طول اليوم

المكان حلو أوي و مناسب لأعياد الميلاد و انشطة ال team building و خروجة أفضل من الكافبهات بكتير
و الكامب بتاعنا هناك مُجهز بكل حاجة هاتحتجوها سواء حابين تقضوا يوم او تباتو لتاني يوم
لو انتم طلبة او نقابة او شركة هايكون ليكم خصم لو حجزتم معانا خصوصاً شباب الكليات اللي حابه تعمل Funday

مستينكم فى ايام الويك إند ( أربعاء - خميس - جمعة - سبت)
أبعتولي عالى رسائل صفحة الفيسبوك او الأنستجرام
او على الواتساب : 01228351475

07/12/2023

بيت حُسن.. مركز ثقافى ومطعم أتبنى في القرن ال19 الميلادي

تعود ملكيته إلي السيدة حُسن شاه عمر و أتصمم عشان يكون تحفة معمارية بتمزج بين العمارة الشرقية والأوروبية واللي كانت في أرقى صورها في الفترة دي

العنوان : بيت حُسن ، 19 شارع أم الغلام متفرع من شارع الأزهر

06/12/2023

راكية النار 🔥
بنقعد حواليها و بنفتح مواضيع كتير ، و يا سلام لما تحط عليها براد شاي او كنكة قهوة

الكلام قدامها بياخدنا من بليل لغاية شروق الشمس و صوت طقطقة النار فى الحطب بتريحك نفسياً.

ممكن تقعد قدامها لوحدك بس هاتقومو من قدامها اصحاب
اطلعو رحلات تخييم يا جماعة و جربو الأحساس ده بجد ، حاجة ترد فيك الروح

- لو حابب تعيش التجربة دي يبقى لازم تنضم لينا يوم رأس السنة ، عشان هانقضيه بشكل مختلف وسط الجبال و الواديان جوه محمية وادي دجلة

Gather around the campfire and let the stories unfold. Join us for a cozy evening of warmth to celebrate the new year
🌙⛺️🔥

- Hurry up and reserve your spot ⛺️

06/12/2023

مش عارف الناس اللي راكبة معايا قاعدة عادي كدة و انا أول مره أسوق مركب فى حياتي 😂😂😂
من رحلة إستكشاف دمياط و رأس البر

06/12/2023

أريد شراء مزرعة، وأزرع طعامي بنفسي، وأمتلك حيواناتي الخاصة، وأبقى بعيدًا عن البشر لبقية حياتي 🌿🌾

- ولو لسا مش عارف تجيب مزرعة تعالى معانا قضي يوم كامل فى مزرعتنا 😊
بنتعلم نعمل فطير مشلتت و نتغدا رز معمر و بطاطس فرن و نلعب ألعاب كتير و نحصد قطن ونشرب شاي على الحطب

يلا جمع أصحابك و تعالى معانا المزرعة أحسن من خروجة الكافيهات

05/12/2023

قاعدة الشاي على الحطب فى المزرعة بعد يوم كله أنشطة و حصاد و لعب
و أكل فطير مشلتت معمول بأيدك 🌿❤️

أنسى السوشيال ميديا و سيب موبايلك شوية و تعالى معانا قضي يوم وسط الطبيعة فى مكان مريح نفسياً
Event: Rural Experience | A Day in Oriental Farm - يوم فى المزرعة 🌿

🌱

05/12/2023

Citadel of Qaitbay in Alexandria
1799 vs 2016

05/12/2023

يلا بينا على رأس البر ؟

04/12/2023

صاحي متأخر على معاد رحلة مهمة ومسكت التليفون اشوف المنبه مرنش ليه

الألة الحاسبة الي مفتوحه من بليل :

03/12/2023

انا واقف و بشرح ان ده المكان اللي الحملة الفرنسية لقت فيه حجر رشيد فى قلعة قايتباي
- بس من جوايا عايز أخلص شرح عشان أروح أفطر فول و فلافل من عند عم طه و أشرب قصب من عند العمده 😂

تعالو معايا رشيد يا جماعة هاتتبسطو والله 🌴😊

03/12/2023

إحنا ناس رحالة و مغامرين يعني إحتفالنا بيوم رأس السنة بيكون مختلف
يوم مليان إستكشاف و هايكينج و لعب و شوي على الفحم و تسلق جبال و سينما بليل وسط الجبال

فاضل أماكن محدودة ، الحق احجز مكانك معانا 🔥

02/12/2023

تعرف ان الناس فى اليابان عندهم عادة صحية حلوة اوى ،
وهى انهم بيتمشو فى الحدائق او الغابات و يبعدو شوية عن المدينة كل فترة
و بيبقو قاصدين يتنفسو هواء الاماكن الزراعية دى عشان فوائدها

يعنى مثلا المشي نص ساعة فى اى ارض زراعية بيرفع من معدلات هرمون السيراتونين و ده بيزود احساسك بالسعادة ده غير بقى حالتك النفسية و مزاجك اللى هايبقو احسن لما عينك تشوف اللون الاخضر المريح ده فى كل مكان.

و عشان كدة هبدأ سلسلة رحلات بتشجع السياحة الريفية و هاسميها Rural Experience
و فى الرحلات دي هنزور الاماكن الزراعية و نتعلم مهارات جديدة و نأكل اصناف أكل طبيعية و صحية

الأيفنت ده مخصوص للأطفال فوق سن ال 20 سنة 😊❤️

هانتحرك من الأسكندرية يوم الجمعة الصبح و نوصل المزرعة بتاعتنا
المواعيد: الجمعة ٢٩ ديسمبر ٢٠٢٣ - الجمعة ٥ يناير ٢٠٢٤

مكان ريفي بسيط تقدر تفصل فيه عن دوشة المدينة و الروتين و تجرب حياة المزرعة الهادية

- هانشارك فى تحضير الفطار و ممكن كل واحد يعمل فطيرته و ربنا يستر 😅
( فطير مشلتت + عسل اسود +جبنه قديمه + جبنه قريش بالطماطم + طماطم بالجبنه القديمه + فول بالخلطه +طبقه سلطة خضار + مخلل + شاى على الراكيه )

- بعدها هانشارك فى حصاد الأرض و ناخد جولة زراعية
- هانلعب العاب كتير زى كرة الباسكت و الڤولي بول و الراكت

- متاح أنشطة اختيارية تانية بتكلفة إضافية :
ركوب خيل - تعليم صناعة الفخار شامل الأدوات و الخامات

و بعد كدة هانتغدى مع بعض 🍗
( ربع فرخه مشويه على الفحم - رز برام فرن - بطاطس فرن + سلطه )

اليوم بيخلص فى المزرعة حوالي الساعة ٧ مساء

تكلفة اليوم 500 جنية تشمل :
الأنتقالات بباص حديث مريح
دخول المزرعة بالأضافة للأنشطة و الألعاب ما عدا ركوب الخيل و الفخار
وجبة الفطار و الغداء

سعر الأطفال حتى سن ٨ سنوات : 450 جنية

إحجز مكانك عشان الأماكن محدودة جداً
▪️ متاح إمكانية الدفع عن طريق كروت Telda 💳
▪️أو عن طريق ڤودافون كاش
▪️أو شرفونى باتصالكم على:
- 01101808799
▪️أو عن طريق Whatsapp على :
https://wa.me/+0201228351475

يتم الغاء الرحلة فى حالة لم يتم اكتمال العدد او لسوء الأحوال الجوية

" A lot of satisfaction is to be had eating ‘farm to table’ every day."

Join my next trip to the countryside in Alexandria
A new series of farm trips will be started this months called " Rural Experience"

We will go to a visit a very peaceful farm away from the crowded city and try to relax in this big green area

We will help preparing our own breakfast : Feteer, molasses, Kareesh cheese, beans, Salad and Tea

Then we will take part in harvesting crops and take a tour in the farm
After that we will play many games such as Basketball, Volleyball and Raket
Plus some other activities like Hours riding and Making pottery ( extra fees)

Then its time to have lunch

Price per person : 500 egp
Including everything except the extra activities
Transportations is also included

Send me a message to reserve your spot

02/12/2023

Sometimes, we need to feel the distinct taste.🍂

-no Internet / Wifi
-no Social Media

Just Enjoying The Simple Life, the nature 🌾🌿

Be part of the adventure

DM me for more details

02/12/2023

يلا نبدأ 2024 بيوم ريفي جميل 🌿
هانحصد و نعمل فطير و نلعب و نشوي فراخ

و نفرش كليم على الخضرة و نشرب شاي نعناع بالأضافة لركوب الخيل و عمل الفخار
يوم مناسب للأصحاب و العائلة و كله استرخاء و انبساط وسط الطبيعة

01/12/2023

المغامرة الجاية هاتكون عبارة عن سيشن تصوير فى الصحراء البيضاء
معادنا فبراير ٢٠٢٤.. أستنو التفاصيل قريب
My next adventure will be a photo session camping trip 📷
Location : White desert
Date : February 2024

01/12/2023

مواني رأس البر بليل ❤️
ماتنساش تحجز في جولتنا هناكش اللي هانستكشف فيها قلعة حربية مسكونة فى دمياط

باقي أماكن محدودة

01/12/2023

الطفل المصري زمان ❤️
تحس انه ماينفعش يتقاله يا كوكي مثلاً..
ده يتقاله أصحي يا دكروري أفندي عشان ما تتأخرش عن المدرسة 😊

30/11/2023

30/11/2023

شهر فبراير قرب ، ناوي تعمل عيد ميلادك فين يا علي بما انك بتاع مغامرات و فرهدة ؟
- ناوي أعمل أيفنت تخييم و فوتوسيشن فى الصحراء البيضاء
مين جاي معايا ؟ 😊

30/11/2023

إن شاء الله طريق الرحلة مش هياخد اكتر من 3 ساعات
هاتو سناكس بسيطة بس

- البنات اللي طالعين معايا الرحلة 😅

29/11/2023

دمياط و رأس البر ❤️
📷 بعيون آيه عبدالله

من رحلة إستكشاف دمياط

29/11/2023

شوفت روعة العمارة الأسلامية فى بيوت رشيد ؟
ده دولاب المناولة.. عشان يحفظ خصوصية نساء البيت

لو عجبك الفيديو و حابب ان انا أكمل فى نشر محتوى زي ده
ماتنساش تعمل لايك وشير و منشن لصاحبك اللي بيحب المعلومات التاريخية


#سافروا

29/11/2023

A visit to the fortress of Rashid - better known to some as Rosetta - where the famous stone was found.
Qaitbey Fort / Fort Julien was originally built by Qaitbey in the 15th century on the Rosetta branch of the Nile, a little way inland from the point at which the river meets the Mediterranean.

Napoleon’s expedition recognised that it could be useful to them and set about rebuilding it which is when the stone was found and removed for their growing collection of antiquities.
This was later seized by the British which is how the stone eventually found its way to the British Museum.

Other ancient blocks remain embedded within the fabric of the first including three bearing cartouches of Necho II of the Twenty-sixth dynasty, probably from the capital of that period of Sais.

#αρχαιολογία

28/11/2023

دى صورة دولاب المناولة..

ده دولاب دوار و فيه رفين او ٣ ارفف بيفصل بين السلاملك و الحرملك.. الزوجة بتحط الطعام على رف من الرفوف و تخبط على الخشب و صاحب البيت يلف الدولاب عشان يستلم منها الطعام من غير ما حد من الضيوف يكشفها😊

ده غير طبعا المشربيات اللي السيدات كانت تقدر تشوف منها الشارع كله بس ما حدش يقدر يشوفها منه.. و المشربيات دى اتصنعت زمان بشكل يدوي بدون ماكينات.

رشيد فيها أكتر من ٢٥ بيت أثري لسا قائم و موجود و منهم بيت الأمصيلي.
لما دخلت لاقيت حاجات كتير مبهرة جوه البيت.. فى كتاب وصف مصر إتقال :
" ان منازل رشيد مثل القصور ، تجد بها كل شىء "

فى رحلتنا يوم السبت 9 ديسمبر لرشيد هاندخل بيت أثري مفروش و نشوف تفاصيلة بالكامل و نحكي قصتة و نعرف اصحاب البيت كانو عايشين ازاى

هاستناكم 😊
#سافروا

28/11/2023

جولتنا المره دي مختلفة شوية..
عشان هانزور مكان الناس بتخاف منه شوية و بتقول عليه مسكون.. هانزور قلعة دمياط

القلعة دي مهجورة من سنين و اتسمت بطابية عرابي
هانروحها و ندخلها من جوه و نصورها و نعرف قصتها بالتفصيل

▪️هانتحرك من الأسكندرية يوم السبت ١٦ ديسمبر من شارع سوتر

▪️حنوصل الاول مدينة دمياط
- هاننزل من الباص على مرسى المراكب
عشان هانروح من دمياط الى راس البر فى رحلة بالمركب وسط النيل

▪️ حنوصل مدينة راس البر الجميلة
- هانزور طابية عرابي بعزبة البرج ، دى قلعة عسكرية اثرية هانعرف قصتها و ليه اتسمت كدة

- بعدها هانروح ورشة صناعة السفن ونتفرج على صناعة المراكب وكمان حنطلع على سفينة صيد عشان نشوفها من جوه و نتكلم مع الصيادين و يعرفونا طرق الصيد وازاى بيقعدوا فى البحر بالأيام

- هانروح ورشة حميدو ده فنان بيصنع انتيكات تحفة من الخشب وباسعار كويسة جدا

- هانروح منطقة اللسان ونشوف الفنار القديم ونتكلم عنه
وكمان هانشوف المكان اللي بيلتقي فيه البحر الأبيض المتوسط بالنيل و نشوف الغروب من هناك

- هانقعد في المشاية عشان لو حد حابب يجيب ايس كريم

- بعد كدة حنعمل جولة حرة عشان نتعرف علي معالم المدينة وكمان عشان لو حد حابب يتغدى فطير او سمك او بط وكمان نروح نجيب مشبك وحلويات من اللي بتشتهر بيهم راس البر

- هانتجمع على الشاطيء و نقعد مع بعض شوية و لو عشان حد حابب يجيب الغداء بتاعة و ياكل على البحر.

▪️واخر اليوم الساعة 8 مساء هانغادر رأس البر و نتحرك على الأسكندرية

تكلفة الفرد 380 جنية شاملة:
1- الانتقالات من والي الأسكندرية فى باص سياحى مكيف
2- جولة بالمركب في النيل من دمياط الى راس البر
3- الأرشاد و الشرح الأثرى والمزارات

▪️ملحوظة:
- الرحلة لمحبى المغامرة والتصوير اللى بيستمتعوا بالاجواء البسيطة ،
ماتنساش الكاميرا بتاعتك و الباوربانك عشان تشحن تليفونك عشان هاتصور مناظر كتير حلوة
- ملابس مريحة و اى حذاء رياضي قديم عندك لسهولة الحركة.
- الرحلة مناسبة جداً للشباب و العائلات و هواه التصوير ومحبين الأستكشاف.

احجز مكانك دلوقتي من خلال رسائل الصفحة
▪️ متاح إمكانية الدفع عن طريق كروت Telda 💳
▪️أو عن طريق ڤودافون كاش
▪️أو شرفونى باتصالكم على:
- 01101808799
▪️أو عن طريق Whatsapp على :
https://wa.me/+0201228351475

27/11/2023

جولة فى مدينة رشيد ، هانشوف البيوت القديمة و رحلة بمركب فى النيل عشان نعرف عن حياة الصيادين و نشوف قلعة قايتباي اللي تم إكتشاف حجر رشيد فيها
و هاندخل بيت اثري قديم و نشوف أقدم طاحونة هناك.. و لازم نجرب الأكل المعروفة بيه رشيد زي السمك و الفسيخ و الفراخ بالكمون و نحلي بأحلى أيس كريم هناك

🔻 هاسيبلكم تفاصيل الجولة فى الكومنتات
إعمل منشن لصاحبك اللي نفسك تطلع معاه الجولة دي

26/11/2023

جدول شهر ديسمبر مليان مغامرات مختلفة و أنشطة و حواديت قديمة هانسمعها
رتب وقتك و خد أجازة عشان نقضي الأجواء الشتوية دي فى أماكن تستحق الزيارة 🌧️

- هاسيبلك لينك تفاصيل كل رحلة فى الكومنتات ، أختار الرحلة اللى تحب تحجزها و ابعتلي على رسائل الصفحة

▪️الجمعة 1 ديسمبر : هايكينج و تخييم و ألعاب و سينما وسط الجبال فى محمية وادي دجلة
▪️السبت 9 ديسمبر : جولة وسط بيوت قديمة و استكشاف أثري فى مدينة رشيد الجميلة
▪️السبت 16 ديسمبر : هانزور قلعة دمياط المسكونة ، طابية عسكرية مهجورة هانعدي عليها خلال رحلتنا بالمركب وسط النيل لدمياط و رأس البر
▪️الأحد 31 ديسمبر : حفلة رأس السنة وسط جبال و وديان محمية وادي دجلة

بص على الكومنتات و أعمل منشن لصاحبك اللي نفسك تزور الأماكن دي معاه 😊

26/11/2023

ماتنساش تحجز مكانك معانا فى رحلة محمية وادي دجلة يوم 1 ديسمبر
و حفلة رأس السنة

#سافروا

23/11/2023

لو لسا متابع صفحتي من فترة قريبة و ما تعرفش انا مين و بعمل ايه ،
فاخلينى اقولك بأختصار..

أنا اسمى علي ، شاب من أسكندرية بعمل رحلات و جولات آثرية لأماكن قديمة و مهجورة فى مصر و بحكي قصتها و تاريخها ، بلأضافة لأنشطة تانية انا شايف ان احنا كا شباب محتاجينها جدا زى مغامرات الهايكينج و التخييم فى الصحراء و تسلق الجبال.

ده غير المغامرات اللى بيبقى الغرض منها تعليمي بشكل مبسط زى تعليم رصد النجوم و محاضرات الفلك و تعليم الصيد و حصد المحاصيل فى المزارع و كورسات التصوير بالموبيل و غيرها كتير.
و بما ان انا مدرب يوجا فا بحب اركز على الجزء العلاجي فى الرحلة و فى المكان اللى بنزوره و بنعمل سيشن للمهتمين بالمجال ده عشان بيبقى معانا مدربين يوجا و زومبا و دكاترة تغذية معتمدين عشان يساعدوك تعيش حياة صحية بشكل سليم.

رحلات كتير قابلت فيها ناس انا محظوظ بمعرفتهم و مغامرات اكتر جاية فى المستقبل
بأذن الله اقابلكم كلكم على خير فى اقرب مغامرة و تفضل عائلة السفر و الاستكشاف بتاعتنا تكبر اكتر و اكتر.
- أبعتلي على رسايل الصفحة و كلمنى فى اى وقت لو عندك فكرة او اقتراح لمكان نفسك تروحة او مزار نفسك تسافرله.. هاسيبلك اللينكات فى الكومنتات.

22/11/2023

جولتنا الجاية لرشيد مش هاتكون جوله أثرية بس ، إحنا هانتفسح هناك و هانروح عشان نجرب الأكلات المشهورة بيها رشيد
السمك - الفسيخ - الفراخ بالكمون

جولتنا هاتبقى السبت 2 ديسمبر
- إلحق احجز مكانك معايا