23/09/2017
علا عبد المنعم - Ola Abd Elmonem
حكاية قصر مانعرفهاش "قصر عزيزة فهمي "
* في بدايات القرن 19 وتحديدا مع بداية انشاء كورنيش الاسكندرية بدأ الامراء وكبار رجال الدولة والاثرياء أنهم يبنوا قصور علي الكورنيش وتحديدا في المربع من اول زيزينا وجليم لستانلي...
*وعلي الكورنيش وتحديدا في المنظقة اللي بين جليم و
سان ستافنو عند قاصد كريم كدة هنلاقي قصر بنعدي عليه كل يوم وماحناش عارفين ده قصر مين ولا ايه حكايته...
*ده قصر "عزيزة هانم فهمي "....مين بردو عزيزة فهمي ؟ ..
دي واحدة من بنات علي باشا فهمي ..كبير مهندسي القصر المالكي "وفي رواية تانية بتقول انه وزير الحربية لكني اشك في صحتها "
عزيزة دي اتجوزت محمد باشا رفعت الروزنامجي واللي بنا لها القصر ده علشان يكون مصيف لها ....وكان ع شمال القصر ده كانت فيلا محمد عبد الوهاب وعلي اليمين كانت فيلا احمد شوقي ثم قصر الامير محمد علي ابن توفيق ..
*القصر اتبني عام 1905 علي يد المهندس الايطالي
ئ "جرانتوا " وده نفس المهندس اللي بني قصر اختها زينب فهمي اللي موجود في نفس المنطقة واللي اتحول دلوقتي ل"قصر المجوهرات " وفعلا القصرين بيشبهوا بعض لحد كبير جدا.
* القصر بيعتبر تالت أكبر قصر في مساحة الارض بعد قصر المنتزه وقصر رأس التين....
مساحة الارض كلها حوالي "فدان " والقصر اتبني علي" 670" متر من مساحته فقط
القصر انشئ علي الطراز "النيو كلاسيكي" وده طراز معماري اتعرف في اوربا في القرن ال 18 وهو طراز مستوحي من العمارة اليونانية
*القصر بيتكون من بدروم ودورين كل دور فيهم فيه حوالي 4 غرف بيطل علي هول كبير بخلاف التراس والمصعد اللي جوا القصر.....
السؤال بقي هو ليه القصر عامل شبه البيت الوقف كدة وماحدش بيجي ناحيته ؟!
*في الأول كدة علشان نبقي متفقين القصر مش أثر ...ايوة مش اثر ووزارة الاثار رافعة ايدها عنه ومالهاش دعوة بيه..لكنه مدرج في لجنة حفظ التراث....
*تاني حاجة ان القصر عليه نزاع قضائي من يجي حوالي اكتر من 50 سنة بين الدولة متمثلة في الشركة المصرية للسياحة والفنادق اللي هي " ايجوث " وبين ورثة عزيزة فهمي من ناحية تانية واللي هما حوالي 40 وريث
*النزاع ده من سنة 1963 لما تم نزع ملكية القصر من اصحابه بعد التأميم والدولة بتقول انها عوضتهم بحوالي 100 الف جنيه ...وبعد كدة الدولة عملت مزاد رسى علي شركة ايجوث في انها تاخد الارض وتبني فندق ياخد شكل حرف "U" حوالين القصر ......لكن الشركة اتعطلت في انها تبدا في المشروع لان الورثة رفعوا دعاوي قضائية لاثبات حقهم في الارض وكمان رفعوا قضية علشان يشلوا القصر من لجنة حفظ التراث علشان يعرفوا يهدوه لكنهم خسروا القضية دي...وفي 2015 كانت اخر قضية اترفعت من اخر وريث ظهر واللي بيملك 18 قيراط من الارض وفعلا كسب القضية
*وبعد حوالي اكتر من 54 سنة وفي اوائل 2017 تمت التسوية بين الشركة وبين الورثة بأنهم يقسموا الارض ..بأن شركة ايجوث تاخد حوالي نص الارض والقصر ...والورثة ياخدوا النص الباقي ....وادينا مستنين ان الاعمال تبدأ فيه
*نسيت اقولكم ان المقاولون العرب من يجي سنتين كدة صعب عليها القصر فقررت ترممه علشان تحافظ عليه
"في الاخر بس ان حابة اقول ان المشكلة مش في كون القصر يتهد او مايتهدش ....المشكلة في اننا نحول تراثنا وأثرنا وحضارتنا لسلعة ماسخة ملهاش اي لون ولا شكل وننخليها تفقد رونقها وأصالتها يا بالأهمال يا بالبيع والتحويل لفنادق 5 stars "
للاسف مافيش ولا صورة للقصر من جوا غير الابيض واسود دول حتي " المصادر " للاسف بردو مافيش ولا كتاب تقريبا كاتب عن وصف القصر ولا موقع غير :
1- موقع شركة ايجوث ... http://egoth.com.eg/en/aziza-fahmi-
palace-and-land%20in-alexandria-the-ownership-situation
2- ومقالة للدكتور محمود عوض :
https://archnet.org/publications/4507
3- لكم المزاع مكتوب تقريبا في كل الجرايد منها "الوطن واليوم السابع "
4- فيه رواية اسمها "مأساة مدام فهمي " لصلاح عيسي واتذكر فيه القصر
