https://www.facebook.com/107333888373559/

القاهرة التاريخية

Home
Egypt
Cairo
القاهرة التاريخية

من وعي التاريخ أضاف أعماراً الى عمره

13/03/2024

يا عرقسوس كلك وصفات نافع وبرضه اسمك شربات، ولو كنت وحش زي ما قالوا ،ماكنتش نورت واحدة من الحارات🌹❤️.
طابت ليلتكم من رحاب الدرب الأحمر وشفا وخمير يا عرقسوس.
📸omar alrazaz

12/03/2024

بسم الله الرحمن الرحيم أمر بأنشاء هذه المدرسة المباركة من فضل الله وجزيل نعمه طلبا لرضوانه الآدر المصونة تتر خاتون الحجازية " كريمة " المقام الشريف الملكى الناصرى ناصر الدنيا والدين حسن بن السلطان الشهيد المرحوم الملك الناصر محمد بن قلاوون الصالحى تغمدهم الله برحمته ،وكان الفراغ من ذلك فى سلخ شهر رمضان سنة احدى وستين
وسبعمائة للهجرة النبوية عليه أفضل الصلاة والسلامة والرحمة .
النص التأسيسي لمدرسة الأميرة تتر الحجازية والموجودة بدرب المسمط بالجمالية ، هنشوفها ونحكي عنها في تمشيتنا وسهرتنا في القاهرة بالليل بعد صلاة التراويح يوم الخميس القادم ، للحجز والتفاصيل برجاء التواصل على الخاص 🌹.

11/03/2024

القاهرة بالليل ليها سحرها، سحر خاص مش موجود في مكان تاني على الأرض ، سحر اتكون في مدة زادت عن ألف سنة ، وتراث اتكتب بحياة الناس وحكاويهم ، بإذن الله تعالى أول جولاتنا الليلية في رمضان هتكون في رحاب القاهرة المعزية ، هنتمشى سوا في الحسين ودرب ملوخية وقصر الشوق والجمالية .
جولانا يوم الخميس القادم ٣/١٤ هنتجمع بعد صلاة التراويح أمام الجامع الأزهر الشريف في حدود الساعة تسعة ونصف ونبدأ جولتنا بشرح
🖇️ مسجد سيدنا الحسين والميدان .
🖇️درب ملوخية .
🖇️سبيل اسماعيل مغلوي
🖇️سبيل البازدار
🖇️ شارع قصر الشوق
🖇️مدرسة مغلطاي الجمالي
🖇️درب الطبلاوي
🖇️مسجد مرزوق الأحمدي
🖇️قصر المسافر خانه
🖇️درب المسمط
🖇️مسجد محمود محرم
🖇️مدرسة تتر الحجازية
🖇️مدرسة جمال الدين الأستدار
🖇️حارة التمبكشية
🖇️خانقاة سعيد السعداء

وأماكن تانية هنقابلها في جولتنا وهنختم الجولة بجلسة وسحور في رحاب الجمالية .

تكلفة الجولة 100 جنيه وللحجز ومزيد من التفاصيل والاستفسارات على الخاص او التواصل مع رقم 01020169356 ودمتم بخير ودمنا على أمل اللقاء ❤️🌹.

04/03/2024

في قصر المنيل كنا سكرنا بماء العشق والياسمين 🌹❤️.
رحلتنا وجولتنا لقصر البرنس محمد علي توفيق بالمنيل يوم الجمعة الجاية بإذن الله ولمزيد من التفاصيل على الخاص ودمتم بخير ودمنا على أمل اللقاء ❤️🌹.

23/02/2024

من أعلى باب زويلة نلقي نظرة على مدينة القاهرة❤️🌹.

20/02/2024

من أعلى أحد أبواب المدينة التاريخية وقفنا عجباً وتأملنا في حكمة الله كيف تحول أشهر مقلب زبالة تاريخي لحديقة خضراء تعد الأن القلب النابض للقاهرة.
بإذن الله تعالى نصحبكم يوم الجمعة المقبلة في جولة خفيفة في رحاب القاهرة من باب البرقية إلى باب زويلة وأهم الأماكن اللي هنشوفها في جولتنا :
*باب البرقية
*كيمان البرقية وقصة تحولها لحديقة الأزهر
*منزل زينب خاتون
*مدرسة البدر العيني
*مدرسة شاكر بن غنام
*وكالة وسبيل قايتباي
*الجامع الأزهر الشريف
*مسجد وتكية محمد بك أبو الدهب
*مجموعة السلطان الغوري
*جامع الفكهاني
*سبيل محمد علي
*جامع الملك المؤيد شيخ
*زاوية ف*ج بن برقوق
*جامع الصالح طلائع
*باب زويلة

وأماكن تانية كتير بتحكي عن جزء عظيم من تاريخ المدينة الألفية ، التجمع الساعة ٩ ونص أمام مستشفى الحسين والبداية الساعة ١٠ .

الجولة مجانية ونرحب بالجميع ودمتم بخير ودمنا على أمل اللقاء ❤️.

03/01/2024

بحب أسرح في الصور القديمة وأكلم اللي فيها ، كتير بقف قدام الصورة دي واسأل نفسي؟!
هل جوز الستات دول يعرفوا ان المسجد اللي على بعد خطوات منهم دا مدفون فيه أول حاكم لمصر يغتال بالرصاص ، هل يعرفوا سيرته البذيئة ، هل حست الست اللي واقفة بسلام تحت الشجرة دي بالروح الكئيبة اللي في المكان اللي جنبها ،هل كل الناس بتحس بعدم الطمأنينة هناك ولا احنا بس علشان عارفين القصة وأول ما بنروح هناك ما بنستحملش نقف دقيقتين ونمشي ؟!!!

هل يعرف المكاري اللي واقف بيهندم في حمارته دا كم الناس اللي اتقلت مكانه ، كم الخيانات اللي حصلت هنا ، هل يعرف ان في مكانه دا اتكتب نهاية كدبه بأقلام من الدم علشان صاحبها يكون عبرة؟

سيدنا محمد صلى الله عليه وسلم كان خاتم الأنبياء والمرسلين ودي حاجه من المسلمات ، بس دا ما منعش ان في ناس ادعت النبوة كذباً أولهم كان مسيلمة الكذاب وأخرهم كان النبي نشأت ، ما بينهم ناس كتير ادعت دا دا على مر قرون من الزمن كانت اخرتهم مهببة زي صاحبنا دا ......

ما نعرفش اي حاجه عن تاريخه ولا أصله ولا فصله غير انه كان تكروري *مالي* حتى اسمه ما نعرفهوش ويمكن لولا الجبرتي كاتبها مكناش سمعنا عنها اصلا ، الراجل دا دخل الجامع الأزهر في أوائل رمضان سنة ١١٤٧ وقال انا نبي مرسل ، فما كان من الحضور ساعتها الا انهم خدوه للشيخ العماوي شيخ المالكية وقتها اللي أول ما دخل عليه قاله ان الوحي نزل عليه في شربين دقهلية اللي كانت غربية وقتها؟!!

وانه عرج للسماء مع جبريل عليه السلام وقتها وصلى بالملائكه فوق ولما خلص صلاة اخد منه ورقه مكتوب فيها انت نبي مرسل انزل وبلغ رسالتك وأظهر المعجزات.

ما كان من الشيخ العماوي الا انه رماه بره الحامع وبعته للمارستان وبعدها طلبه باشا مصر عثمان الحلبي في القلعة وأمره بالتوبه فمرضاش فقتله وألقى جثته تحت في الميدان لمدة ٣ ايام تاكلها الكلاب علشان يكون عبره للناس .

المهم ان بعدها بأقل من شهرين هيطلع واحد أهبل في نفس السنه هيقول للناس يوم القيامة يوم الأربع الجاي والناس هتصدقه .

وانت بتتمشي في ميدان القلعة افتكر ان مكانك اترمت جثة الاخ دا ، وافتكر ناس كتير اتدبحت واتقلت واتعدمت بحق وبغير وقول سبحان من له الدوام سبحان الحي الذي لا يموت.

14/12/2023

مش كل حاجه موجودة في الكتب والمصادر ، الحارة المصرية كتاب مفتوح تقدر نقدر تقرأ فيه تاريخ بشكل مختلف ، تاريخ اتكون عبر كتير من الأجيال ، تاريخ محفوظ على حوائط الحارات ومنقوش في ذاكرة أهلها الطيبين.

حارة صايمة واحدة من الحارات اللي نقدر نقول فيها انه لما سكتت المصادر التاريخية عن مسمى الحارة أحيت الرواية الشعبية المسمى بكل جدارة.

في 3 اراء عن مسمى الحارة دي الأول انها اتشهرت بكده علشان واحدة ست كانت ساكنة فيها اسمها صايمة فاتعرفت الحارة بيها والرأي التاني انه كانت في ست ساكنه فيها بتصوم الدهر كلها ولا تفكر الا في الأيام المحرم الصيام فيهم زي العيدين مثلاً.

القول التالت بقى وهو أشهرهم وهو انه في سنة من السنين رمضان كان 29 يوم وكل القاهرة فطرت في اليوم 30 الا الحارة دي لأنها ما عرفتش انه ثبت رؤية الهلال خلاص وفضلت الحارة دي هي الوحيدة اللي صايمة فاتشهرت بكده ، ودا شئ ممكن نعتبره منطقي لأن كل حارة في القاهرة كانت عالم مستقل بذاته ، عالم ليه بدايه ونهاية وعنوانه دواماً كان الباب بتاعها لان كل حارة في القاهرة زمان كان ليها باب بيتقفل ويتفتح في أوقات معينة.

ولأن الشعب المصري شعب فكاهي بطبعبه وشعب بيحب يخلد الذكرى خصوصاً على هيئة مثل فطلع عندنا مثل مصري معتق على الحدث دا وهو " حارة فيها عيد وحارة صايمة " وانا سمعت المثل دا كذا مرة لما بيكون فيه فرح وزفاف وحالة وفاة في نفس المنطقة في اشارة جليه بتدل على ان أهل الميت ما عرفوش يشاركوا اهل الفرح ويفرحوا معاهم ومعرفش بيتقال في أحداث تانيه ولا ايه وسبحان من له الدوام.

الصورة للاستاذ حمادة الطاير

12/12/2023

ومساجـد الاسلام خيـر مــدارس قد أشرقت منها مصابيـح الهـدى

مسجد ألطي برمق - عطفة الغندور - سوق السلاح - اادرب الأحمر 🌹.
📸 Omar Alrzzaz

11/12/2023

دايماً لما بتيجي قدامي جملة الحاضر الغائب بنسى الموضوع اللي بتكلم فيه وبييجي في بالي على طول المسجد دا.

على الرغم من وجوده في بين القصرين "شارع المعز" أهم شارع في القاهرة، الشارع اللي تسابق الأمراء والسلاطين علشان يحطوا طوبة فيه تخلد اسمهم وتحيي ذكرهم بين الناس بعد مماتهم ، إلا ان المسجد دا مالهوش حظ ولا نصيب من الشهرة ولا نعرف حتى منشئه الأصلي لأن المسجد شايل إسم تاني.

المسجد دا اسمه مسجد الفجل، المقريزي بيقول انه كان من مساجد الفاطميين وكان بجواره ١١ مسجد تاني هدمهم الأمير بشتاك الناصري وهو بيبني قصره في شارع المعز وماسبش غيره هو وجدده على حالته اللي موجود بيها لحد النهاردة.

وعن مسمى الفجل فالحكاية بتقول ان هنا في الموضع دا كان فيه مجرى من النيل وفي مكانه تحديدا كان المكان اللي كان بيتغسل فيه الفجل فاتعرف المسجد بكده بعد بنائه ، وعلى الرغم من انه سبب مقنع جدا للتسمية الا ان المقريزي كذب القصة دي وقال انه اتسمى بكده لأن خادم المسجد كان اسمه فجل فاتعرف بيه .
وانت في بيت الهدايا في شارع المعز اعرف انك واقف في مسجد الفجل ، المسجد الوحيد اللي كان حظه حلو ونجى من الهدم ، المسجد اللي ما نعرفش عن صاحبه حاجه غير انه بنى بيت من بيوت الله وسبحان من له الدوام.

الصورة للمهندس Khaled Abdalla Sallam

10/12/2023

كعادة كل حاجة جميلة في بلدنا ........
كنا هناك من أسبوعين أخر مرة وحقيقي اللوكاندة دي هي وقبة سيدي محمد العمري كانوا الحاجه الوحيدة اللي بتفكرني بمحطة دمنهور الأثرية اللي تم هدمها من فترة وبيضيع تراث مدينة دمنهور يوم بعد يوم.
وداعاً لوكاندة البحيرة وداعاً للحاج حسن الزوواوي اللي كنت كل ما بشوف إسمه منور الشريط الكتابي اللي على اللوكاندة وانا داخل وخارج من المحطة أتحرم عليه.

08/12/2023

لقطة من سارع التمبكشية أثناء تصوير فيلم كيرة والجن وتظهر في الصورة وكالة بازرعة، شارع التمبكشية يبقى شارع الكيف بتاع زمان كان بيتباع فيه التمباك "التبغ" وكان فيه بيع الجملة، الشارع كن أجمل شوارع القاهرة وتحس فيه بروح زمان واتصور فيه أفلام كتيرة أشهرها كيرة والجن وفاصل زنعود لكريم عبد العزيز. الصورة لابراهيم قاسم

06/12/2023

أمر بإنشاء هذه المدرسة المباركة السعيدة مولانا وسيدنا السلطان الأعظم الملك المنصور سيف الدنيا والدين قلاوون الصالحي قسيم امير المؤمنين أدام الله أيامه و حرس إنعامه و نشر في الخافقين ألويته واعلامه و كان إبتداء عمارتها في صفر سنة أربع و ثمانين و ستمائة و الفراغ منها في جمادى الأول من السنة المذكورة للهجرة المحمدية.

النص التأسيسي لمدرسة المنصور قلاوون وموجود فوق المحراب اللي في الصورة.
📸 Ibrahim kasem

02/12/2023

هذا مزارٌ به الأنوارُ ساطعةً... برحمةِ من الله لم يزل صمدا
وبقعُة شرفتْ بالمؤمنين كما... قد شرفوا بالهدى واستوجبوا رغدا
ومشهد قد حوى من كل ذي رشد ...بالعفو قد فاز من مولاه حين غدا
حفت لطائف مولانا بهم كرماً... حاشا تضاهي وحاشا حضرها عددا
مذ قد أقاموا به ما مهم نصبٌ... ولا اعتراهم على مر الزمان ردا
كأن حوراً من الجنات طفن به... أهدينه الروح والريحان والمددا
وكيف لا وعلى التقوى مؤسسه.. وأجر زواره لا ينتهي أبدا....... بيت مفقود

من كنوز القرافة.

30/11/2023

خوال يرقص في أحد شوارع القاهرة في القرن الماضي.

29/11/2023

أطلال الخانقاة النظامية والتي تسوهت ملامحها في فترة استعمالها كحصن عن طريق الحملة الفرنسية.

الخانقاة تقععلى الجبل خلف القلعة بمنطقة باب الوداع بالحطابة .

28/11/2023

الجمالية وأجمل ليالي المعزية.

28/11/2023

صورة نادرة لنجيب الفكر محفوظ الذكر في المستشفى بعد محاولة اغتياله بالطعن في رقبته سنة 1994م.

الصورة من أرشيف الاستاذ حسام علوان.

27/11/2023

من شوية عدى عليا منشور لواحد من العيال القومجية الكمايتة اللي القومية المصرية ناقحة عليهم قاعد يتريق على بعض نساء غـ.ـزة وهما بيجمعوا ورق علشان يولعوا فيه ويطبخوا عليه ، دي صورة لأهالينا في السويس وهما منتظرين توزيع بعض الأكل أثناء عدوان ٥٦ اللي كان مشترك فيه نفس العدو اللي فوق دا بس انت أعور.
الصورة من تصوير الأمريكي بيرت صامويل جلين.

27/11/2023

هنا مثوى
المغفور له الخديو
عباس حلمي الثاني
المولود بالقاهرة في ٢٨ جماد أول سنة
١٢٩١هـ (١٤يوليو سنة ١٨٧٤)
إنتقل إلى جنات الخلد بجيفرا يوم الأربعاء
٥ محرم سنة ١٣٦٤هـ(٢٠ ديسمبر ١٩٤٤م)
غريباً عن الوطن بعيداً عن مصر العزيزة
التي كان متفانياً في حبها واستقلالها
اللهم ارحمه، على روحه الطاهرة الفاتحة

شاهد قبر الخديو عباس حلمي رحمه الله
بعدسة م: الحسن عبد الحميد رحمه الله

26/11/2023

تعرف إن الفكرة مهما كانت تافهة ممكن تغير حياتك ....
بس يا ترى القطة جاية من العزيمة والإرادة ولا من الحلم؟!

زمان بعد ما ديليسبس والشركة الفرنسية بدأوا الحفر في قناة السويس واجهتهم مشكلة صغيرة بس كبيرة.....

من إمتيازات قناة السويس المجحفة إن العمالة اللي شغالة بتتغير بعد ٣ شهور ، ٣ شهور كانت كفيلة إنها تدمر شاب مصري لسا في مقتبل حياته بسبب الحفر والظلم والضرب والفئران.

العدو اللدود الأول على مر الزمان للإنسان وحضارته هو الفار
منين ما يروح الإنسان ويستوطن مكان الفار فديله على طول .
الفئران كانت بتاكل أكل العمال وبتنقل الأمراض بينهم ووصل الحال انها أكلت فيهم من الجوع وشوفنا السيناريو دا على شكل أكبر بعد كده في الحروب العالمية.

الحل كان في موظف شاب أشار عليهم يجيبوا قطط ويشحنوها من القاهرة للقناة بدون أكل وفعلا حصل وانتهت المشكلة على كده.

الفكرة كانت فتحة خير على صاحبها ومن يومها والزهر لعب معاه الخديوي اسماعيل عرفه شخصيا وأسند ليه شغل كتير أهمه إنشاء الأوبرا الخديوية.
تخيل قطة نقلت الشخص دا من حياة لحياة تانية مش متخيل صراحة كان ممكن يقضي عمره مجرد موظف في الشركة أو ممكن يموت من مرض نقله ليه فار وهو نايم.

وانت بتتمشى في الضاهر هتلاقي القصر دا
قصر حبيب باشا السكاكيني صاحب القصة دي و اللي الحي إتسمى باسمه واتعمل على إسمه فيلم.

26/11/2023

خانقاة بيبرس الجاشنكير بالجمالية.

25/11/2023

مأذن الجامع الأزهر الشريف وسبحان من له الدوام.

24/11/2023

"هو من حسنات الزمان ، وتحتاج اليه الملوك ويفتقر إليه الغني والصعلوك فهو عون الفقير وجبر الكسير"، هكذا أثنى ابن ابي حجلة المتوفي سنة ٧٧٦هـ على بيمارستان المنصور قلاوون .

الصورة ل Hakim Misr

24/11/2023

قبة الأمير أركماس الأشرفي المشهورة عند العامة بقبة سيدي سليمان أبو جاموس رضي الله عنه.

القبة في شارع سكة المحجر أمام زاوية الشيخ حسن بن إلياس الرومي.

23/11/2023

"بسم الله الرحمن الرحيم امرر بانشاء هذا المكان المبارك الفقير إلى الله تعالى صفي الدين جوهر الملكي الناصري تقبل الله عمله وبلغه الدارين امله في مستهل سنة اربع عشر وسبعماية ".
من قبة ومصلى الأمير صفي الدين جوهر وسبحان من له الدوام.
الصورة للاستاذ Omar Alrzzaz

20/11/2023

"فهو الجامع لمحاسن البنيان، الشاهد بفخامة أركانه وضخامة بنيانه، أن منشئه سيد ملوك الزمان، يحتقر الناظر له عند مشاهدته عرش بلقيس وإيوان كسرى أنو شروان، ويستصغر من تأمل بديع أسطوانه الخورنق وقصر غمدان، ويعجب من عرف أوّليته من تبديل الأبدال، وتنقل الأمور من حال إلى حال بينا هو سجن تزهق فيه النفوس ويضام المجهود، إذ صار مدارس آيات وموضع عبادات ومحل سجود، فالله يعمره ببقاء منشئه ويعلي كلمة الأيمان بدوام ملك بانيه".

شيخ المؤرخين تقي الدين المقريزي متحدثاً عن جامع الملك المؤيد شيخ المحمودي.

الصورة للطواجهة الجامع الموجود بجوار باب زويلة ، وهي من أعمال الفنان الفرنسي باسكال زافير كوست عام ١٨١٨م وسبحان من له الدوام.

20/11/2023

صباح الخير من رحاب الجامع الأقمر بشارع المعز لدين الله الفاطمي.

📸Ahmed Abo mariam

19/11/2023

قبة الصالح نجم الدين أيوب ومن أمامها سبيل خسرو باشا.

19/11/2023

(... مقاهي القاهرة ، عالم فريد، متشابك العناصر ، يحوى الملامح الإنسانية العامة، وله أيضا سماته الخاصة جدا . في مقاهي القاهرة يجلس الناس حول المناضد متواجهين ، يتبادلون النجوى ، والأحاديث والأشواق الإنسانية، والمصالح المادية ، وقضاء الحاجات ، وعقد الصفقات ، وثمة من تلفه الوحدة ، يجلس محملقاً في الفراغ ، وقد يحاول قهر وحدته بحديثه إلى جار لا يعرفه ، وربما بدأت بينهما علاقة قوية قد تستمر عمرا، وربما لم تعش أكثر من حدود اللقاء .....

إلى أي عمق................

الغيطاني وملامح القاهرة في الف عام واللوحة للفنان النمساوي أرثر ڤون فيرارس لأحد مقاهي القاهرة عام ١٨٩٢م وسبحان من له الدوام.

Address

Cairo

Telephone

+201020169356

Website

facebook.com

Alerts

Be the first to know and let us send you an email when القاهرة التاريخية posts news and promotions. Your email address will not be used for any other purpose, and you can unsubscribe at any time.

Videos

يا ربَّ العزةِ لَبَّيْك دعواتي ترتفع إليك. فإجعل لي عملي وصلاةي يشفع لي في العرض عليك

ياربَّ العزةِ لَبَّيْك دعواتي ترتفع إليك. فإجعل لي عملي وصلاتي يشفع لي في العرض عليك🌹. صلاة العيد في رحاب ميدان الرميلة أسفل قلعة صلاح الدين 🌹. By:Eslam abd Elrabo #روح_مصر