Sahar Alsherif tour guide

04/04/2024

عمو كيث وطنط شاردها ( ساراسواتي )
هي معني اسمها اسم تاني 😂🙈عشان انا كنت بتلغبط واقولها شيرادها بدل شاردها شرحتلي انها الإله ساراسواتي وانا اصلا عارفة الاسم دا عن اسمها 😂🙈
لما الجست بيلاقيك عارف عن ثقافته دا بيفرق معاه بيحس أنه مبسوط كدا وبيلاقي مواضيع يفتحها معاك ويربط شوية بين تاريخه وتاريخ مصر والقصص ...هما مكانوش هنود بس عندهم أصول هندية وكانوا مبسوطين اني بعرف اتكلم هندي شوية 😂🙈وكل شوية يختبروني 😂🙈ثانكس جاد عرفت كل اللي سالوني فيه 😂والنبي طنط ساراسوتي اصلا كانت عسل ورمينا جوزها في الهرم وفضلنا نتبادل الأحاديث برا 😂🙈
#اثار #ギザ #ピラミッド #مصر

29/03/2024

مصر حلوة وكل حتة فيها ليها طعم مختلف زي اسكندرية كدا 🌸💜🌸
#مصر #اثار #تويا #الاسكندرية

29/03/2024

جولة شارع المعز شمالا 🌸❤️💜لجروب تويا 🌸تحت شعار اعرف مصر 🌸🇪🇬
ناس جميلة 🌸والجولة كانت لطيفة بيكم 🌸
اتمني كل مصري حابب يعرف اكتر عن قيمة اثار مصر ينضم لأسرة تويا 🌸💜😊
تفتكروا المرة الجاية رايحين علي فين ؟
#مصر #المعز #تويا

27/03/2024

عمو آجاي وأروش ابنه 😂
كان عليه ضحكة انما ايه كان كل ما يضحك الهرم كله يتفرج علينا 😂
قولتله بص هسالك سؤال ملوش علاقة بتاريخ مصر
ايه الأغنية الهندية اللي اتصورت هنا في الاهرامات
قالي كتير هنود جم هنا اميتاب باتشان وغيره
لا يا حاج آجاي في أغنية كلها هنا
معرفهاااااااااش 😂
قولتله Suraj hua madam 😂
ودا بقي ماشي يغني في الهرم وفضحني 😂ويقول هووووووووهيييييييهاااااااا
لقيت مفيش حل تاني بقيت أغني معاه بقي 😂 يلا كدا كدا الناس بتضحك 😂
#الأهرامات #اثار

27/03/2024

موقف كوميدي عرفني أن الرجالة كلهم واحد مهما اختلفت الجنسية 😂
هما كان معاهم كاميرا وانا قولتلهم انا بعرف اصور بالكاميرا ..بصورهم صورة لقيت سابين بتقولي ثواني ننضف العدسة عشان الصورة مش حلوة احسن حاجة...وهما بينضفوها
انا لاحظت أن سايبنها من غير الغطا
فقولت افكرهم بقولهم انتوا نسيتوا تحطوا الغطا
قامت سابين قالتلي
We lost it
رد عليها اوليڤر جوزها قالها
We ?? What do you mean by we ?
( اللي هو نييييصلحها ؟ أاااصلحها؟ ) 🤣
ف سابين ضحكت قالتلي الصراحة أنا اللي ضيعته 😂🙈
قام اوليڤر ضحك وقالها ايوا متقوليش احنا
الست اتكسفت اوي يا عيني وبقت عمالة تضحك وتقولي اعمل ايه بقي أم وعندي مليون حاجة اعملها مخي مش معايا
رحت انا بقي قولتله جرا ايه يا اوليفر ..الست شايلالك يا جدع وبتتعب وتطبخ وتغسل وتاخد بالها من العيال فيها ايه يعني لما مراتك أم العيال تضيع الغطا انت تجبلها عشرة 🤣
قام قالي طبعا طبعا 😂 وكنا ميتين ضحك 😂🤣
باشا انت عارف لو مصرية كانت عملت فيك ايه ؟
دي انتي ألمانية كيوت والله العظيم تلاتة 😂
عزيزتي الأجنبي زي المصري ال attitude مش هيتغير حتي لو عدت بلاد وحدود 🤣

#الأهرامات

25/03/2024

Oliver & Sabine's family 💜🌸 Germans 😊
I had a wonderful time with them 😊
So cute and kind ❤️💜
#اثار #مصر #الأهرامات

20/03/2024

اسكندرية 🌸💜🌸 المحروسة 💜🌸🥰
كل حتة في مصر ليها طعم مختلف 🌸
واللي مراحش اسكندرية ومشي في شوارعها واستمع بكل نسمة هوا فيها فاته كتير 💜🌸
#اثار #تاريخ #مصر #اسكندرية #المتحف #بحري

19/03/2024

كتير منكم يسمع عن ( بورتريهات الفيوم ) وميكونش فاهم هي اي دي ..تعالي أقولك بقي ايه القصة
دي عبارة عن رسومات علي ألواح خشب بألوان شمع أو صمغ ..رسومات لأشخاص ( أيوة بني ءادمين زيمبقولك والله )
بدأت في القرن الأول الميلادي كدا ...كانت الألواح دي بتغطي وش المومياء بالملامح الحقيقة للشخص المتوفي وهي اصلا مزج بين حضارتين اللي هما الفرعونية والهلينستية يعني الصور نفسها فن هلينستي اومال المومياء والتحنيط دا فرعوني طبعا ..يعني تقدرو تقولو كدا مثلا كانوا بيروقوا عالموميا 😂🌸الصور كانت مميزة بالطبيعة يعني في حزن كدا ( ماهو منطقي بردو ميحطش وش ملامح بتضحك لواحد مات بردو 😂🙈)
بيترسم الوش كامل مع لفتة كدا يسار ( الاتجاه يعني بتاع البصة ) ناحية الشمال شوية ..
اختفت تدريجيا البورتريهات دي مع اختفاء عادة تحنيط الجسد خصوصا مع انتشار المسيحية في مصر في القرن التالت والرابع كدا
ايوا ايه بقي ليه اسمها بورتريهات الفيوم ؟
عشان لقيوها في الفيوم ..( بس كدا ؟ ) اومال انت فاكر ايه 😂
معظمها موجودة برا مصر زي المتحف البريطاني وغيره في كذا دولة بس ثانكس جاد عندنا هنا
يلا هقولكم فين والثواب عند الله 🌸🙈
في مكتبة الإسكندرية بداخل متحف الاثار في منهم هحطلكم الصورة
صباحكم خير 🌸💜
#اثار #تاريخ #مصر #تويا #الفيوم

18/03/2024

مصر كلها جميلة ❤️ بس هتفضل الاقصر واسوان من أجمل مدن مصر اللي ليها مكانة خاصة في قلبي 🌸💜اللي بيروح بيحس روحه اتعلقت هناك ويفضل يشتاق يروح تاني وتالت ❤️🌸💜
عندنا جنة عالارض ❤️🌸💜
مصرية وكلي فخر 🌸
#اثار #تاريخ #تويا #الاقصر #أسوان #النوبة #مصر

14/03/2024

مسجد سليمان باشا الخادم المعروف باسم *سارية الجبل*
*انشائه سليمان باشا ودا كان أحد الولاة العثمانيين علي مصر عام 1528 م موجود بداخل قلعة صلاح الدين الايوبي 🌸

*المسجد مهم لانه أول مسجد علي الطراز العثماني في مصر 🌸

يقال إنه اتعمل علي أنقاض مسجد قديم لواحد اسمه أبو منصور قسطه كان والي اسكندرية في العصر الفاطمي عام 1141 م 🌸يعني قبل بناء القلعة اصلا خد بالك

*المسجد اتعمل لجنود اسمهم الجنود الإنكشارية ودول طائفة من الجيوش العثمانية اللي دخلوا مصر مع السلطان سليم اللي حكم من 1512 ل 1520

سليمان باشا لما أمر ببناء المسجد اتعمل وفقا لمساجد الآستانة زي جامع السليمانية ف اسطنبول ( هحطلكم صورته ) دا كان طراز مميز أنهم بيغطوا المسجد بقباب وأنصاف قباب وتزويدها بالمآذن القلمية ( شبه القلم الرصاص وكل مآذن العصر العثماني كدا ) ويكسوا الجدران الداخلية ببلاط خزفي

*بدأ ترميم المسجد عام 2018 حوالي خمس سنوات واتكلف حوالي ٥ مليون جنية للترميم اتعمل ترميم لجميع قباب المسجد ( اللي هما ٢٣ قبة ) وتعزيز للنقوش وغيرها ..
تم افتتاحه من وزير الآثار أحمد عيسي في ١٦ سبتمبر 2023

#اثار #تاريخ #مسجد #القلعة #تويا #مسجدسلیمان

12/03/2024

في تاني يوم رمضان 🌙🌸
حابة اشارك معاكو حلم وفكرة من يوم ما قررت ادخل مجال الإرشاد السياحي (يعني من 2019 كدا تقريبا )
لما كنت اجي اروح اي مزار سياحي كنت بلاقي المصريين بيتصورو وخلاص ...أو بياكلوا مثلا ...وفسحة وشكرا علي كدا ..
تيجي تسأله انت فين ( ممكن يقول اسم المكان غلط ) أو اسمه وشكرا ...
يلا نروح الاهرامات وفي زيارات مدرسية مؤخرا لكن هل بيقولو معلومة مفيدة للاطفال ؟ ..الإجابة لا وشوفت بعيني ..هل بيهتموا أن الطفل المصري يبقي عارف ان حضارة بلده ؟ لا طبعا
بعد ما نزلت الشغل يبقي معايا الأجانب وشغالة الاقي مصرية ( شكرا ليها طبعا) جت تقولي ممكن تقوليلي هو دا مسجد اسمه ايه ..أو اتسال عن أهمية المكان ..أو عن معلومه مهمة عنه 🌸
بقي يجيلي شعور حزن ..ازاي الأجنبي جاي يزور بلدنا ودافع تمن برامج سياحية عشان يشوف ويعرف والمصري مش عارف !
مكذبش عليكو حسيت بالغيرة كدا . لا معلش المصريين لازم يعرفوا واكتر من الأجانب كمان ...من هنا جاتلي فكرة جولات للمصريين نتفسح بس واحنا بنتعلم 🌸💜
ولكن كانت في شوية عقبات كدهو أخرتني حبة ( الحمد لله مبقتش موجودة)
كانت دعوتي رمضان اللي فات يارب تحققلي حلمي وفكرتي اللي نفسي تتاخد بيها خطوات فعلية ..ويكون سبحانه سميع عليم مجيب الدعوات 🌸💜 اهو من ٢ رمضان بقولكم الفكرة خرجت للنور 🌙🌸💜💜
كانت أولي جولاتي انطلقت من جروبي TUYA Tours 🌸💜
شكرا لكل اللي دعموني جدا نفسيا ومعنويا 🌸💜شكرا لكل حد قالي انتي تقدري ووثق فيا 🌸شكرا للجروب الجميل دا اللي دايما هيفضلوا مميزين لأنهم كانوا أول جروب في جولات تويا 🌸💜
واول ما قولتلهم الخبر في نهاية الجولة سقفولي كتير 🌸🙈
نورتوني جدا جدا واتشرفت بيكم لان كان في ناس معرفهاش واتشرفت بمعرفتهم 🌸💜🌸
ممتنة جدا جدا لكرم ربنا والله 🌸💜 🌸 وما كان توفيقي الا بالله 🌸

#تويا
#تاريخ #اثار #القلعة

12/03/2024

تجربة لطيفة مع الصينين
والله يا جماعة مخبيش عليكو اول ما قريت الاسامي اللي فضلت مش عارفة انطقها لحد اخر اليوم 🙂وعرفت أنهم من الصين اتوغوشت😂قولت باااس هنطقش في بعض وهقع بلساني واتكلم عن اليابان وانا عارفة أن الأوضاع متوترة بينهم حبتين 😂وفضلت ساكتة وربنا ...قامت البنت الكيوت دي (طلعو من الصيني الطيب الحمد لله 😂❤️) اسمها تونج يو اللي كنت بناديلها (تونة 😂) وكانت منشكحة بيه والاخ ...مكسلة اكتب اسمه كنت بناديله چينجو 😂يقوموا هما يسكتوا ؟نو نيڤر طول اليوم سارة سارة سارة ..عليا الطلاق سحر طب بص قول كوشي 😂طيب بصي يا سارة ...
وبقيت بتعامل اني سارة عادي 😂 المهم يعني نكشتني ..انتي درستي ايه ؟ ..كلية آداب..ايوا تخصص ايه ...لغات 😂ايوا ايه يعني
بصي بقي انا ياباني 😂🙈
لقيتها واو ياباني طب ليه بقي .....وحكينا قصة حياتنا ...وقالت لي بس شاطرة لغة صعبة بردو 😂 (قولي يا ولية اللي في قلبك متخبيش) ومعلقتش بأي سلبية الحقيقة ..وعلمني النهاردة درس أن محكمش علي شعب كامل من كام مليون لازم نشوف بقيت المليار 😂
وكانو محترمين اوي يا خال والله وحبوني وحبيتهم وهنيمك من المغرب يا صين 😂
#اثار #تاريخ #مصري #ذكريات

03/03/2024

معبد هابو 🌸💜
شكر خاص لزميلي هشام المرشد الجامد اللي بيصور صور جامدة 🌸
و بردو في صورة بعدسة الفنان Ahmed Fathy فوتوجرافر موهوب ماشاء الله عليه 🌸
شكرا اوي ليكم والله الصور جميلة 🌸🌸


#ルクソル #مصري #エジプト #تفاؤل #معبد #تاريخ #اثار

19/02/2024

12/02/2024

سعدت جدا اني كنت مرشدة الخاصة بروضة المريخي وصديقاتها المقربين 🌸💜
نادرا ما اقابل كلاينت مميزة زي روضة والله من كتر تواضعها مكنتش اعرف انها من الشخصيات الهامة بدولة الإمارات
انا بس اتقالي معاكي كلاينتس VIP لما قابلتها واتعرفت عليها لقيتها جميلة خالص وما ينشبع من الكلام معاها 💜🌸
تتوقف الإماراتية روضة المريخي عند دراستها وتخصصها الأكاديمي، والمناصب التي شغلتها، بعد تخرجها بنجاح في جامعة السوربون أبوظبي، ونيلها درجة الماجستير في مجال التسويق والإدارة والاتصال والإعلام، سبقها نيلها درجة البكالوريوس في إدارة الأعمال واللغات من الجامعة العريقة ذاتها، وصولاً إلى المحطات المهنية البارزة التي شغلتها، ومنها عملها في دائرة التنمية الاقتصادية في أبوظبي، ومكتب أبوظبي التنفيذي، وصندوق خليفة لتطوير المشاريع، قبل أن تستقر مؤخراً في جامعة محمد بن زايد للذكاء الاصطناعي، لتشغل منصب مدير إدارة.
روضة ماشاء الله تبارك الله 🌸 سيدة فخر لكل ست عربية 🌸
علي الصعيد الشخصي إنسانة متواضعة جدا جدا جدا وطيبة القلب كدا وجميلة خالص خالص 🌸💜
عندها اهداف وخطط مش سايبة حياتها عشوائية. دايما مصدر دعم وطاقة إيجابية للي حواليها ..
تعرف ازاي تنظم لكل شيء هي عايزاه وتعرف تنبسط بكل لحظة بتعدي عليها اتذكر قالتلي كدا بعد موقف سخيف حصل أثناء الشغل
(خدمة معينة متقدمتش ليهم زي ما انا كنت عايزة بسبب تقصير ناس ) كنت زعلانة اوي وقتها ..قالتلي يا سحر انتي عملتي شغلك علي اكمل وجه مش ذنبك أن الآخرين مقصرين ..عادي تجربة ويلا مبسوطين وحلوين وحتي صديقاتها والله قالوا نفس الكلام ..متخيلين أن هما اللي كانوا بيهدوني عشان مقتلش اللي غلطوا 😂🙈
دي اللي يتقال عليها بكل فخر strong independent woman
حتي صديقاتها ماشاء الله تبارك الله 🌸💜 متواضعين وحبيتهم والله نادرا ما اتحمس مع جروب زي ما كنت متحمسة معاهم حسيت مع اصدقائي مش عملاء خالص وعايزة اشوفهم تاني طبعا 🌸💜اتشرفت جداااااا بزهور الامارات العربيه 🌸🌸 وبوجودي معاهم 💜🌸

12/02/2024

Sanjita 💜🌸

05/02/2024

يوم كان من قبل شروق الشمس حتي غروبها 😂🙈
يا لو الشغل سهل زي الفلوج كدا يا 😂🙈
بس بردو بشتغل بكل حب 🌸💜🌸
#مصري

24/01/2024

كان معايا جست عمالة كل شوية تقولي الملكة كليوباترا الملكة كليوباترا..
فبقولها تعرفي الملكة حتشبسوت ؟
قالتلي لا معرفهاش مين دي
قولتلها لا متخاديش في بالك دي ست كومل كدا حكمت مصر يجي عشرين سنة وليها معبد من أعظم المعابد في الأقصر معبد الدير البحري وليها اثار تانية ..
الجست: اومال كليوباترا عملت ايه ؟
دي عملها اسود ومنيل وست قادرة
طب وديني لاحكيلك قصتها 😂
وقعدنا علي جنب حكيت قصتها الست اتصدمت
مصدومة بجد ومش بنطق ولا عارفة أرد*
من بعدها بقولها مين اهم دلوقتي 😂 قالتلي يع كليوباترا دي كانت ست مقززة ومش حلوة شكرا اوي انك حكتيلي قصتها 😂 بدل ما نا زي العبيطة عمالة اقول كليوباترا
ومن ساعتها الست ماشية جت تشتري محفظة دي الفرعوني الراجل بيقولها كوين كليوباترا قالتله لالالا كليوباترا ايه ..معاك حتشبسوت؟ 🤣😂🤣
البياع بقي يضحك بيقولي الست متكهربة من كليوباترا ليه قولتله تعرف تاريخها ؟ قالي ملكة عظيمة ..قولتله اسكت ساكت اسكت ساكت يخربيتكو 😂

😂
معنا ندعم #حتشبسوت

21/01/2024

لوريلاااا جست إيطالية (مش هقول طنط القمر عشان اقسم بالله انا اللي طنط 😂🙈) لما شفتها مع روبينز افتكرته اخوها أو بوي فريند طلع ابنها 🙂😂 اللهم بارك يعني جمر جمر ❤️
قد ايه روحها جميلة وبتحب الكلام كدا ا
المهم أن روبينز من ذوي الاحتياجات الخاصة كان عمل حادثة وأثرت عليه في المشي والكلام عنده جزء من جسمه بيتحرك وجزء لا طبعا كمان جزء في الفهم شوية 🥺💔
هنا بقي عايزة اتكلم عن جدعنة المصريين اللي بجد ❤️احنا كنا في الهرم وطبعا صعب يطلع علي جمل لوحده والله حرفيا شالوه طلعوه وواحد قعد معاه عشان يخلي باله منه ..ولما خاف من الجمل رجعو شالوه نزلوه وركبوه حنطور لانه كان عايز يجربه
في كل حتة كان في رجالة جدعان اوي بيضحكوا ويهزروا معاه ويتكلموا معاه ويساعدونا والله الست كانت هتعيط من كتر ما هي مبسوطة أن عندنا ناس كويسة كدا وقالتلي انا قابلت ناس مكانتش لطيفة معايا بس قابلت ناس اهو اكتر لطيفة اوي ❤️السواق كان منتهي الاخلاق والاحترام ومزهقش من الكلام معاه والضحك ويساعده ❤️وكل دا كان خارج حدود ساعات الشغل بتاعتنا لأن مفروض كان شغلنا ٤ ساعات فقط التور كلها لكن طبعا اخدت وقت أطول عشان ظروف روبينز انا مكنتش متضايقة ولا حد الحمد لله
في ناس لسه جدعان بيساعدو بدون مقابل بالذات في المجال دا
الحمد لله أن لسه مصر بخير ❤️
لوريلا كانت مستغربة انا ليه مسافرتش ولا مرة برا مصر وفضلت تقولي لازم تسافري وتجربي ..وعرضت عليا أنها تبعتلي اسافر ايطاليا وكمان تستضيفني عندها 💜❤️🌸
هي كمان بتغني في الأوبرا في ايطاليا 🌸وست مكافحة جدا 🌸
مبسوطة أنها علي تواصل معايا 🥰💜
#الأهرامات #مصري #تفاؤل #ايطاليا

19/01/2024

Giza pyramids vibes 🌸🇪🇬
#الأهرامات #مصري #تفاؤل

19/01/2024

Aida 💜
بنوتة جميلة من فرنسا 🌸
في الاول كانت قلقانة مني كدا وعمالة تبصلي بصة انتي يا ست يا مرشدة انتي اوعي تخطفيني 😂
المهم بعد التحية والسلام (مش جاي اغني واخلص أوام لا 😂🤣)
بقولها زورتي ايه قالتلي هرم وسقارة وممفيس
بقولها طب مين عمل الهرم المدرج ..قالتلي مين؟ 😂
ست الكل انا بساألك 🤣
قالتلي لا بصي انا مش فاكرة حاجة خالص ...
ازااااااااااي حتي اسم اللي عمل الهرم مش فاكراه حتي
عظيم بيمين لاحفظك المنهج النهاردة 😂🤣
قولتلها بصي انا مرشدة شريرة بعملك امتحان كل خمس دقايق
لو مجاوبتيش وادي التور مش مكملاها 😂
قعدت تضحك قالتلي اتفقنا
قسما بالله مش ببالغ لو قولتلكم بعد الشرح بقيت اشاورلها قوليلي يا عايزة ياختي التمثال دا ملكي ولا فرد تقعد تبص كدا وتقولي الإجابة وتتنطط أنها عرفت 👏😂
كان عندها تور متحف مصري قلعة مجمع الأديان
عايدة بعد ما جت معايا قالتلي سحر انا هشتغل مرشدة بقي 😂 انا فاكرة المعلومات وبجد طريقتك انك بتساليني دي خلتني طول الوقت مركزة
(لا يا ست الكل مبقاش انا بروح محاضرات وأشد في شعري واذاكر واراجع خلط الانساب ومين راح فين عشان متفتكريش اسم صاحب الهرم المدرج ولا صلاية نعرمر 😂)
انا هوريكوو تبقوا جست ازاي كويس 😂
البنت رجعت الفندق تردد اللي سمعته وكانت بتنسي اسم حتحور
بتقولي حاوحور🤣وحتشبسوت تقولي حبشوبوت 😂
(دكتور إيفان لو عتر فيكي هيقتلك 😂)
بس كان يوم لطيف لطيف قدر ولطف
#مصري #الأهرامات

17/01/2024

الخرطوش الملكي
زمان وقت المصريين القدماء كان أسماء الملوك والملكات بس بتتكتب جوا الخرطوش ( مش اي حد معدي كدا يكتب اسمه في خرطوش )
حتي دائما علي جدران المقابر وسط كل الهيروغليفي اللي مكتوب اسم الملك مميز أنه جوا الخرطوش بنقدر نعرفه بسرعه نلقطه يعني
سؤال اليوم
مين يعرف كلمة خرطوش دي جت منين وكان اسمه ايه قبل كلمة خرطوش ؟ 🤔
#هيروغليفي #مصري

17/01/2024

فلان دا له شنة ورنة ..ياتري حد فكر يعني ايه شنه و رنة🤔 (غيري انا كنت فاكراها حاجة كدا زي تنة ورنة 😂🙈)
تعرفوا أن دي جاية من اللغة المصرية القديمة...(الهيروغليفية ) .
رن دي معناها الاسم (يقصد الاسم الملكي )
والاسم الملكي في الوقت دا كان محمي من الاله وكلمة حماية يعني (شن )
فالاسم اللي هو رن محطوط جوا حاجة اسمها شن
فلما اقول (الملك له شن ورن ) له اسم ذو حماية .
عايزة اعرف رأيكم هل حد تعمق في المعني بتاعهم قبل كدا أو كنتوا فاكرين معناها ايه؟
#هيروغليفي

17/01/2024

حضرني موقف 😂
كانت أول مرة اتعرض أن جست يتخانق معايا 🙈اة وربنا 😂
الكسندر والمودام بتاعته من اسبانيا ( كانو طالبين مرشد انجليزي )
الدنيا كانت لطيفة واتعرفنا في الفندق بس من واحنا في الفندق خدت بالي من طريقة الكسندر وتعبيراته الجسدية أنه عصبي حبتين (عنده عرق صعيدي كدا 😂) طلعنا التور بتاعتنا
وكنا في سقارة ( مكان العركة 😂)
المهم انا قايلة مليون مرة ..البرنامج بتاعك مفيهوش دخول الهرم بتاع الحاج زوسر ..جينا جوا عند الهرم ويمين بعظيم لادخل الهرم ..ياابني منا سألتك!
يقولي لا البرنامج بتاعي جواه ادخل الهرم
كلمت الشركة تاني قالولي لا ملوش هرم
ودا بقي راح مزعقلي وازاي مدخلش الهرم وازاي البرنامج بتاعي مفيهوش دخول الهرم ..ويشوحلي
( انا في عالم موزاي متخيلة اني جبت طوبة من الأرض بطحته بيها وزقيته برجلي جوا هرم زوسر دفنته فيه 🙃)
يافندم حضرتك مقرتش البرنامج ومحتواه كويس واهو مبعوت عالميل بتاعك مفيش هرم
لما بدا بعلي صوته اكتر ويشوح تاني
قولتله من فضلك اسلوبك مرفوض تماما مش من حقك تكلمني كدا لو سمحت ..مشكلتك مع الشركة مش معايا دا اولا ثانيا مفيش مشكلة اصلا لان الشركة بعتالك المحتوي مش مشكلتهم أن حضرتك مقرتش البرنامج ثالثا انا سألت مرتين إذا هتدخل الهرم دا بفلوس ذيادة برا حضرتك مهتمش تسمعني دي مشكلتك ...فاسلوبك مرفوض تماما ..
قامت مراته اتدخلت وخدته علي جنب (تقريبا كانت عمالة تقوله مينفعش تكلمها كدا وميصحش )
أصيلة يا طنط والله ❤️
راح راجع اعتذر وقالي انا اسف اوي مكانش ينفع اكلمك كدا فعلا بس انا اتعصبت
قولتله انت عامل مشكلة كبيرة علي ايه علي فكرة الهرم جواه مفيش نقوش ولا اي حاجه خالص ودخوله سهل مش مغامرة
تعالي هنروح أهرامات الجيزة عندي ليك هرم لوز العنب 😂
بجد يا سحر ..طبعا يا ألكساندر يا عسل انت
انا هعرفك تشوحلي ازاي 😂دخلته هرم خوفو 😂🙃
خرج يقولي دا صعب اوي وتعبت وخوفت قولتله ليه دا سهل
(جرا ايه يا عصام ..مش كنت عامل فيها هاورد كارتر مالك )
قفل بوقه باقي اليوم 😂🤣المهم بقينا صحاب بقي 😂 وقعد يهزر معايا ويقولي انا اتكسفت من اسلوبك المحترم حتي لما اتعصبت رديتي عليا بأدب
سيد عيب متقولش كدا احنا اهل 😂🤣
ما محبة الا بعد عداوة يا جدع 😂🙈
وقعدوا يحكولي أن عندهم 7 عيال وكانوا بيكلموهم فيديو يوروهم هما فين وقد ايه العيال يقولو واو وكيوت وحشتونا يلا تعالو بقي 😂
تور الكسندر ومراته بدأت بشوية زعابيب وكنت هدفنه في سقارة 😂 بس الحمد لله قدر ولطف 😂 وطلع جنتل وبقينا حلوين طعمين 😂💜🌸
لاحظوا أن بتحكم في ثباتي الانفعالي 😂لاحظوا أن حافظت علي العلاقات المصرية الاسبانية يا رجالة 😂🙈
#الأهرامات #مصري #تفاؤل #سقارة #ممفيس

15/01/2024

جمال اللغة المصرية القديمة
Mryt ميريت
يعني محبوبة
Mryt.i ميريت إييي
يعني محبوبتي (اقراها تاني كدا ) ميريت إييي اللي جت منها كلمة مراتي (المودام يعني 😂🙈)
شايف المصري القديم كان بيعزز الست بتاعته ازاي ومدلعها شايف
مش اللي بعد الجواز بيسميها الولية (ولولو عليك ساعة وسكتو يا بعيد ) واللي مسميها الحكومة ..وغيرو
ساعات كدا بحب المصريين القدماء يعني 😂🙈💜👏
وروني الدرر وقولولي كل واحدة جوزها مسميها عالفون ايه ولا بيقولها ايه 😂🙆ومعانا أول واحدة ونقول ألو 😂👀
#هيروغليفي #مصري

15/01/2024

عارفين يعني ايه تشوفون اطفال مهوووسييين بالتاريخ المصري ❤️حلا وچوري كانو بيسمعوا ويتناقشوا ويسألوا خصوصا حلا بتعششششق توت عنخ امون 😂والله لو عايش كانت استنته عشان تتجوزه😂موقف مضحك لما رحنا المتحف المصري وطلعنا غرفة توت عنخ امون وقالو ممنوع التصوير زعللتتتتتت وقالت لااااا انا لازم اصور توت 😂من حقي اصور توت 😂 والله ما قدرت امسك نفسي من كتر الضحك 😂❤️انا بحب الاطفال المميزين ربنا يحفظهم يارب العالمين ❤️
#تفاؤل

15/01/2024

اول مرة في حياتي اقابل جست روسي كيوت ❤️طنط ليليا كانت طنطوتة جمر ❤️ الرحلة بدأت بكيف تم بناء الاهرامات وخوفو وخفرع ومنكاورع وانتهت ب
سحر انتي راسمة حواجبك ازاي😂انتو متخيلين مدي تطور علاقتي بالبشر 🤣😂🙈وفجاءة بقينا نحكي نحكي وكانت ماما اوي في نفسها 🥺❤️وقعدت تقولي ازاي قمر ككدا مش متجوزة وتعالي معانا وانا اجوزك شاب كيوت 😂(مش عايزة يا طنط والله كلهم مصطفي ابو حجر أو ابوتورتة )
عمو ستيڤان كان من المانيا وهما الاتنين اتقابلو في اسطنبول واتجوزوا من يومين ومش عارفين هيعيشو فين حرفيا ؟!
انتو متخيلين قد ايه احنا بنصعبها علي نفسنا في مصر ؟!
اتجوزوا ومقضينها فسح لحد ما يقرروا هيقعدوا في انهي بلد ..
ولا قالتلو يا ستيڤان فين القايمة والشبكة ولا هو قالها هشاور أمي وارجعلك 🙃🙂
بعيدا يعني عن أن عمو 62سنة ...ياتري دي إشارة لنضج كينونة الرجل ؟🤔
بسيطة بسيطة كلها 35سنة والاقي فارس احلامي مش كتير
#تفاؤل

14/01/2024

كانت من احسن الصدف اللي حصلتلي اني قابلت بسنت نور الدين 😍❤️قد ايه كيوت ومتواضعة وقمر ❤️❤️😍😍
كنت في دهشور وهي كانت قاعدة عند مدخل الهرم الأحمر فوق بتشرب شاي بنعناع الست كانت خارجة من الهرم بتلتقط أنفاسها تقريبا 😂 انا شفتها وفضلت اقول اييييه دا بسسنننننت بصوت عالي زي العبيطة 🤣🙈 هي فرحت وقالتلي انتوا مرشدين وانتي لغة ايه اتكلمنا شوية كدا قولتلها بصي انا من يوم ما حلمت اكون مرشدة وانتي اول واحدة بتيجي في بالي أنا بحبك جدا 😍❤️
جماعة مهما اوصفلكم هي روحها حلوة ازاي مش هتتخيلوا واتصورت معانا كلنا بحماس كدا وحب 🌸💜
قالتلي هنتقابل تاني وانتي مشهورة في لغتك شايفة فيكي كدا 😍
#تفاؤل #دهشور

13/01/2024

Eric & Rumi 😍💜🌸
ساعات كدا من بين الجست اللي بتعامل معاهم بيكون دائما عندي جست مميزين مش بنساهم 🌸💜
الشغل دا قبل ما انزل لقيت الشركة بتقولي معلش يا استاذة سحر الجست طلب يتواصل مع المرشد ...عشان يحجز البرنامج يعني
قولتلهم تماما يتواصل
بعتلي ايريك عالواتس اب وكنت وقتها شغالة قولتله معلش انا بشتغل ينفع اكلمك بعد الشغل ؟ قالي اوكي
بعتله عادي لقيته بيقولي لا محتاج اكلمك صوت انا وصحبتي
قولتله تمام
كلموني عشان يتأكدو انا بتكلم ياباني كويس ولا لأ 😂❤️
قالي معلش محتاجين نتأكد بتتكلمي ياباني وانجلش بردو 😂
ليه يا عم الحج
ايريك من تايوان بيتكلم صيني وانجلش والياباني بتاعه نص نص ورومي يابانية طبعا عايزة ياباني
كلموني ٣٧ دقيقة 😂 بعدها قالوا تمام مبسوطين اوي أننا كلمناكي ومتحمسين للبرنامج (كان عندهم برنامج يومين )
لما قابلتهم كانو فعلا باين أنهم متحمسين ..ايريك طول الوقت عايز يعرف كل حاجة عن حضارة سبعتلاف سنة في قاعدة عرب 😂
رغي طول الوقت عن التاريخ كانو كيوت جدا جدا ❤️
حسيت أن مع صحابي والله مش مجرد عملا 🌸
كنت بتكلم مع رومي كتير والله في كل حاجة كان عندنا شوية اهتمامات واحدة وايريك كان بيصورنا علي غفلات كتيرة وحلوة 💜🌸وبعدين صورني انا ورومي بكاميرا معاهم واداني الصورة قالي خليها معاكي عشان تفتكرينا 🌸💜
وماشاء الله عليه في التصوير بيعرف يصور حلو جدا 🌸
ايريك ورومي مميزين بالنسبالي مواقفهم الحلوة كانت كتيرة بجد متنفعش في بوست واحد 💜
1/1/2024 🌸


#تفاؤل