https://www.facebook.com/1439204552997174/

حواديت البلدان, المحلة الكبرى, El-Mahalla el-Kubra (2025)

12/02/2025

لو ربنا كرم أي حد منكم وسافر الأردن، وزار قصر البترا، مهم وهو هناك يسأل أي حد من أهل البلد... تعرف إيه عن حدوتة "أيلول الأسود"، وشوف رد فعله بقى.

الحدوتة تبدأ في ٥ يونيو ١٩٦٧، أيوة... التاريخ اللي كلنا نعرفه، إسرائيل نفذت الهجوم وسيطرت على أراضي عربية في كذا دولة، من ضمنها الضفة الغربية في فلسطين.

لما ده حصل فصائل المقاومة الفلسطينية أخدت بعضها وطلعت على الضفة الشرقية في الأردن واتمركزوا هناك علشان يشوفوا هيعملوا إيه، وتبقى فرصة يجمعوا نفسهم وينظموا صفوفهم من تاني.

وزي ما حرب الاستزاف كانت شغالة في مصر، والأبطال عاملين شغل من نار، برضه حرب الاستنزاف شعللت في الأردن، وفي مارس ١٩٦٨ حصلت عركة الكرامة.

إسرائيل حاولت تسيطر على نهر الأردن، وفعلا جيش الاحتلال عبر النهر وسيطر على الأرض، لكن الجيش الأردني أخد الموضوع على صدره ودور فيهم الضرب.

في قرية الكرامة بقى الجيش الأردني والفصائل الفلسطينية أخدوا الجيش الإسرائيلي ورا مصنع الكراسي لمدة ١٥ ساعة، لدرجة إن الإسرائيليين هربوا وسابوا المعدات والأسلحة.

هتقولي طيب فين المشكلة؟! ما الحدوتة حلوة وجميلة
أقولك المشكلة إنه من بعد نكسة ٦٧ والفصائل الفلسطينية كانت بتنفذ هجمات بدون التنسيق مع الجيش الأردني، فاااا ده كان مورط الأردن.

الموضوع بعد معركة الكرامة زاد عن حده، الفصائل الفلسطينية بدأت تتعامل إنها دولة جوة الدولة، والقوانين الأردنية عدم اللامؤاخذة ماتمشيش معانا، وفي بداية عام ١٩٧٠ طالبوا بإقالة الملك حسين 😁

وصلنا بقى لشهر سبتمبر ١٩٧٠، الفصائل الفلسطينية خطفت ٣ طائرات وأجبروها تنزل في مطار جنب مدينة الزرقاء الأردنية، المطار ده أصلا كان مطار عسكري والفصائل الفلسطينية سيطرت عليه.

هنا الملك حسين بقى موقفه وحش جدا، خاصة لما الفصائل الفلسطينية فجرت الطائرات، وبقى الكلام "انت مش مسيطر يا أسطى"، أخدوا منك مطار، وخطفوا طائرات، وعاملين لنفسهم قوانين.

هنا الجيش الأردني اتحرك، وبدأ يهاجم المدن اللي الفصائل الفلسطينية سيطرت عليها، هوووووب الجيش السوري دخل على الخط ووقف مع الفصائل الفلسطينية، فاااا الجيش الأردني دور فيه الضرب هو كمان.

طبعا الدول العربية كلها تدخلت وعيب يا جماعة مايصحش، إحنا هناكل في بعض والعدو الحقيقي احتل الأراضي العربية، اعقلوا كده ربنا يصلح حالكم ده مصارين البطن بتتعارك.

في أكتوبر ١٩٧٠ الملك حسين وياسر عرفات وقعوا اتفاق ينظم وجود الفصائل الفلسطينية في الأردن، بس في يناير ١٩٧١ الجيش الأردني نفذ هجوم تاني وطرد كل الفصائل على لبنان.

بسبب الأحداث دي اتشكلت منظمة اسمها "منظمة أيلول الأسود"، اللي بعد كده اغتالت رئيس الوزراء الأردني عام ١٩٧١ ونفذت عملية ميونخ عام ١٩٧٢، أما الفصائل الفلسطينية اللي طلعت على لبنان فاااا كانت السبب في بداية الحرب الأهلية اللبنانية عام ١٩٧٥.

08/02/2025

بمناسبة الكلام الخايب اللي قاله بلطجي العالم الجديد الأسطى دونالد ترامب، وإنه عاوز يبعت الفلسطينيين لأي دولة عربية مجاورة علشان يفضى الأرض ويرسخ الكذبة القديمة اللي حاولوا يروجوها "أرض بلا شعب لـ شعب بلا أرض"، فااااا تعالوا كده نعرف جزء من الحدوتة الحقيقية.

لو أخدنا ورجعنا لعام 1935، هنلاقي قوات الاحتلال البريطاني محاصرة قرية صغيرة قوي في فلسطين اسمها "نزله الشيخ زيد"، ليه يا جدعان؟! قالك أصل في واحد عامل قلق وبيحارب الاحتلال البريطاني في فلسطين، ومشكل جماعة سرية اسمها "العصبة القسامية"، موريانا النجوم في عز الظهر.

المهم... بعد معركة استمرت تقريبا 6 ساعات، واللي كانت غير متكافئة تماما لأن الأسحلة والمعدات اللي مع الجيش البريطاني أكتر وأحدث بكتير من الأسلحة اللي موجودة مع الجماعة السرية، هوووب مات قائد الجماعة هو واللي معاه، واللي بعد كده بقى اسمه رمز مهم جدا في فلسطين... عز الدين القسام.

بعد وفاة عز الدين القسام الحاج أمين الحسيني مفتي القدس أعلن يوم 16 مايو 1936 إن ده هيبقى "يوم فلسطين" وقامت الثورة في فلسطين في نفس السنة، اللجنة العربية العليا اللي كانت بتدير فلسطين كتبت على الفيسبوك إنه يا جماعة إحنا كلنا هندخل في إضراب عام علشان نعلن رفضنا للاحتلال البريطاني وكمان رفضنا لهجرة اليهود المستمرة من كل خرابة في العالم.

على نهاية عام 1937 الثورة دخلت في سكة تانية، الفلاحين بقى قالوا كفاية كده، جو الإضرابات والاعتصامات وكلام المفاوضات ده مش واكل معانا، إحنا هنقلبوها جحيم على كل، فاااا اتشكلت حركات مقاومة كتير وفين يوجعك، لغاية ما الجيش البريطاني قال جااااي أنا تعبت من اللي بيحصل فيا.

طبعا بريطانيا قالت لا... كده كتير بقى، إحنا نبعت لجنة تروح تحقق في اللي حصل، هووووب اتشكلن لجنة مشهورة جدا اسمها "لجنة بيل"، وفضلت اللجنة تدرس وتحلل وتدعبس وبعدها طلعت باقتراح لحل كل المشكلة دي، إحنا يا جماعة هنقسم دولة فلسطين، جزء صغير تحت الانتداب البريطاني بيضم القدس ويافا، وشمال غرب فلسطين هيبقى دولة يهودية، والباقي من أرض فلسطين مع شرق الأردن يعملوا دولة كبيرة وحلوة كده.

لما نبص على إجمالي الخسائر هنلاقي مات في الثورة دي حوالي 5000 فلسطيني، والجرحى وصل عددهم لـ 15000، ده طبعا غير كتير من الاعتقالات خصوصا الشباب، لكنها فشلت في إلغاء الاحتلال البريطاني عن فلسطين، أو الانتداب البريطاني لـ فلسطين زي ما الجماعة الخواجات بيحبوا يسموه، بس في نفس الوقت فتحت الباب لخطوة جديدة ممكن تكون سبب في إنهاء الاحتلال.

بسبب الثورة دي الجماعة في بريطانيا قالوا تعالوا نعمل مؤتمر في قصر سانت جيمس في مدينة لندن، ونجيب الفلسطنيين والدول العربية والصهاينة ونشوف كده ممكن نوصل لإيه، فاااا الدول العربية قالت له إسكوزمي يا أسطى انت وهو، إحنا مش جايين نتكلم في تقسيم نتكلم عن إلغاء الانتداب ووقف هجرات اليهود ومش هنتكلم ولا هنتفاوض مع الصهاينة

خلص المؤتمر على 3 توصيات، تقليل هجرة اليهود، وتوظيف الفلسطينيين، وإنه في خلال 10 سنوات ينتهي الاحتلال، فاااا طبعا الصهاينة رفضوا الكلام ده، وفي خلال 5 شهور دخل فلسطين حوالي 6000 مهاجر يهودي غصب واقتدار، ده غير أعمال العنف، بس طبعا محدش أخد باله ولا حد ركز في اللي بيحصل لأنه الحرب العالمية التانية بدأت وولعت نار.

04/02/2025

في يوم مغيم كده والشمس مش باينة من السحاب، الملك فاروق الأول كان قاعد في البلكونة بيتفرج على اليوتيوب، هوووووب لقى واحد من الحرس داخل عليه بيصرخ زي علاء زينهم في مسرحية الزعيم، "يا فخامة الملك... يا فخامة الملك... دبابات الجيش البريطاني محاصرة القصر يا كبير".

الحدوتة بتاعتنا حصلت زي النهاردة من 83 سنة، وقت الحرب العالمية الثانية، الدبابات البريطانية حاصرت قصر عابدين، وهوووووب السفير البريطاني مايلز لامبسون بعت رسالة على الواتس للملك فاروق الأول بيقول فيها "شوف يا أسطى... تقيل حسين سري باشا وتعين مصطفى النحاس باشا رئيس للحكومة، منتظر ردك الساعة 6 مساء... باي من غير سلام".

طبعا الدنيا اتقلبت وهنعمل إيه!! وكان الحل الأفضل إنه نستنى جايز تبقى لحظة اصطباحة والمزاج معكر، هوووووب على الساعة 9 بالليل السفير البريطاني ومعاه الجنرال ستون ومجموعة من الجنود دخلوا قصر عابدين، فاااا سعيد باشا ذو الفقار كبير أمناء القصر رفض إن الجنرال ستون يدخل على الملك، لكن السفير البريطاني عمل زي محمد رمضان في مسلسل الأسطورة، خبطه في صدره وقال له "بس يا بابا".

دخل السفير والجنرال على الملك فاروق اللي كان قلبه واقع في ركبه، وقال له "أنا بعت ليك رسالة وطلبت من ترد بـ نعم أو لا، ودلوقتي فات 3 ساعات ومفيش رد وصلني منك، فااا خد يا باشا وقع على الوثيقة دي علشان خلاص هي جابت آخرها، ولو ماوقعتش رد فعلي هيزعلك"، الملك فاروق بص على الوثيقة اكتشف إنها وثيقة تنازل عن العرش، وكان خلاص هيوقع لولا إن حسنين باشا لحقه على آخر لحظة.

حسنين باشا طلب ن السفير البريطاني فرصة أخيرة نصلح بيها سوء الفهم اللي حصل، فاااا السفير البريطاني سأل عاوز فرصة أخيرة تعمل بيها إيه؟! هنا حسنين باشا قال إنه هيتصلوا بـ مصطفى النحاس باشا يحضر في التو واللحظة علشان يحلف اليمين ويبقى هو رئيس الحكومة، هووووب السفير البريطاني قال وماله... بس الكلام ده يحصل حالا وأنا هأبقى حاضر وشايف كل حاجة.

وفعلا... في خلال 30 دقيقة كان مصطفى النحاس باشا موجود في قصر عابدين، والملك فاروق الأول كلفه إنه يشكل الحكومة الجديدة، وطلب منه إنها تبقى حكومة إئتلافية، فاااا النحاس باشا قال إنه إسكوزمي يا جناب الملك، الحكومات الإئتلافية من أيام سعد زغلول وعدلي يكن محكوم عليها بالفشل، إحنا عدم اللامؤاخذة هنشكل الحكومة كلها من حزب الوفد.

ليه كل ده حصل؟!
يبقى نحكي من أول ما حسين سري باشا بقى رئيس الوزراء في 15 نوفمبر 1940، وشكل حكومة إئتلافية من القوى الوطنية اللي موجودة، هووووب مع بداية عام 1941 بقى في أزمة كبيرة في السلع التموينية، لدرجة إن المواطنين كانوا بيهجموا على الأفران ويخطفوا العيش من بعض، وواضح كده إنه الدنيا هتفرط والأمن مش هيعرف يسيطر، وفي وسط كل القلق ده بقى... الألمان وصلوا.

ماهو زي ما قلنا الحرب العالمية الثانية كانت شغالة، وفي الفترة دي كانت ألمانيا محققة انتصارات وواخدة الكل ورا مصنع الكراسي، والأخ روميل ثعلب الصحراء كان واخد شمال أفريقيا غسيل ومكواة لغاية ما وصلت مدينة العلمين، وكان واضح كده إن الجيش الألماني هيدخل مصر، ده حتى المواطنين على القهاوي كانوا مقسومين إتنين، جزء بيشجع بريطانيا من باب اللي نعرفه أحسن من اللي مانعرفوش، وجزء بيشجع ألمانيا لأن الحاج محمد هتلر زعيم ألمانيا يعرف ربنا.

فاااا في يوم 2 فبراير خرجت المظاهرات في شوارع القاهرة تحلف بحياة روميل، وتعلن تأييد ألمانيا في الحرب، هنا بقى السفير البريطاني شاف إنه الدنيا فرطت والأمن في الانفلات منه، وكده ممكن مصر كلها تضيع من بريطانيا، هوووووب ظهر الحل، لازم الملك يشكل حكومة جديدة تكون محبوبة من الشعب وفي نفس الوقت تحافظ على معاهدة 1936، فاااا مين اللي يقدر يحقق المعادلة دي؟! حزب الوفد ومصطفى النحاس باشا.

02/02/2025

"خيري ورشاد وبدوي"... واحدة من الجمل الشهيرة اللي لزقت في العقول بسبب فيلم "حنفي الأبهة"، فااااا بقى خلاص، مجرد ما تقول الـ 3 أسماء لأي حد، شريط أحداث الفيلم بيمر على الدماغ وتعرف على طول حجم البلاوي اللي البهوات عملوها.

على النقيض بقى هتلاقي عندنا برضه "ثلاثي أضواء المسرح"، اللي برضه مجرد ما تقول الاسم هتلاقي شعاع بهجة وضحك بينور المكان، ولوحدك كده هترن في دماغك أغنية "لو كانوا سألونا قبل ما يولدونا عارفين كنا نقول إيه" أو لوحدك كده هتدندن "شالوا ألدو جابوا شاهين.. ألدو قال مانتوش لاعبين".

في التاريخ بقى عندنا "خيري ورشاد وبدوي" وبرضه عندنا "ثلاثي أضواء المسرح"، وعلشان نعرف الحدوتة يبقى لازم ناخد ونرجع سوا سوا لعام 1882، ونهبط كده عند التل الكبير في محافظة الاسماعيلية.

الإنجليز حاولوا يدخلوا مصر من ناحية الإسكندرية، لكن أحمد عرابي ومعاه الجيش حطوا عليهم جامد، فاااا انسحب الإنجليز وطلعوا على دمياط، لقوا برضه الجيش واقف مستني وفين يوجعك، فاااا قالوا مابدهاش بقى إحنا ندخل مصر من ناحية الإسماعيلية، بس لقوا أحمد عرابي والجيش المصري معسكر عند التل الكبير.

هنا الإنجليز عرفوا إنهم بالطريقة دي مش هياخدوا من عرابي حق ولا باطل، الجدع لسانه حلو وتاريخه نظيف ومقطع البطاقة ومش فارق معاه مناصب ولا حياته ذات نفسها، وكمان الرجالة واقفة في ظهره ومن الآخر كده اللي عاوز يجرب يقرب، اللي هيعدي الخط ده هيموت، فااااا الإنجليز شافوا إنه مفيش حل غير الخيانة.

مين بقى اللي خان؟!
الأول كان محمد باشا سلطان، رئيس الحزب الوطني، ده كان بيوزع فلوس على البدو في الصحراء الشرقية علشان محدش منهم يقف مع عرابي وجيشه، التاني سعد الطحاوي، اللي كان المفترض يبقى عين عرابي على جيش الإنجليز، واللي أكد لعرابي إن الإنجليز استحالة يتحركوا بالليل، وده عكس اللي حصل، وعلي بيك يوسف قائد مقدمة الجيش اللي أخد جنب كده وساب الجيش الإنجليزي يمر على الهادي وعلى الرايق.

خيري ورشاد وبدوي أومحمد باشا سلطان وسعد الطحاوي وعلي بيك يوسف، مش بس باعوا أحمد عرابي أو خانوا العيش والملح، دول باعوا البلد كلها، وكانوا السبب الرئيسي إن معركة التل الكبير تبدأ وتخلص قبل ما الجنود يجهزوا وينظموا صفوفهم.

أما "ثلاثي أضواء المسرح" فاااا هنلاقي عندنا اليوزباشي حسن رضوان قائد سلاح الطوبجية أو المدفعية يعني، والأميرالاي محمد بيك عبيد، والبطل عبد القادر عبد الصمد، اللي رغم كل الضرب اللي بيحصل واللي كتير بسببه قال يالا نفسي وإجري يا مجدي وسابوا العركة دايرة، هما فضلوا واقفين وقفة رجالة لحد آخر لحظة.

حسن رضوان اللي في شارع في مدينة طنطا متسمي على اسمه، فضل واقف مكانه وبالمدفعية وفين يوجعك، لغاية ما وقع من طوله من كتر الجراح اللي فيه، وفي الآخر الإنجليز قبضوا عليه، أما الأميرالاي محمد بيك عبيد اللي ظهر في مسلسل "واحة الغروب" فااا قال عنه الشاعر فؤاد حداد "أمهات بحري البلاد تناديه.. دهب الحريم عيط علشان يفديه... كان حي ما له في الشجاعة مثيل.. كان جسم في تراب الوطن مثواه"

18/01/2025

اللي فيكم اتفرج على مسلسل "رأفت الهجان" أكيد فاكر الاجتماع اللي حصل في جهاز أمني إياه وحضره حسن حسني (يوسف الأزرع) والسيد راضي (أنطونيو) وأحمد عبدالهادي (يعقوب سويف) وعادل أمين (عزرا صمويل)، وكانوا بيتكلموا عن عمنا وعم الناس كلها رأفت الهجان

السيد راضي قال في الاجتماع إنه خايف يكون رأفت الهجان لعبة بيعملها المصريين، وإنه مش يهودي ولا حاجة، فاااا حسن حسني رفض الفكرة دي وقال إنه عارف المصريين كويس وإنه المصريين استحالة يكونوا وصلوا للمستوى ده، فاااا السيد راضي بمنتهى المنظرة والفشخرة قال إنه المعلومات اللي عنده بتقول إن المصريين بيحاولوا يوصلوا للمستوى ده.

طيب هو إيه المستوى اللي البهوات عمالين يتكلموا عنه، وإذا كانت أحداث المسلسل وقتها كانت في عام 1954 تقريبا، فاااا إيه الأحداث الل قبل كده تخلي أولاد شحيبر دول يتكلموا بكل الثقة دي إنهم عندهم إمكانيات في تجنيد العملاء والجواسيس محدش لسة في مصر أو الدول العربية يقدر يوصل لها؟!

تعالوا بقى ناخد ونطلع على عام 1882، لما بدأت عمليات تهجير اليهود لأرض فلسطين، وناخد بالنا إنه الكلمة صح، "تهجير اليهود" مش "هجرة اليهود"، لأنه في أوروبا بقى بيتاخد قرارات تلغي المهن اللي شغال فيها اليهود زي السمسرة، فااا تزيد نسبة البطالة بين اليهود، هوووب يتقال لهم إيه رأيكم تروحوا أرض الميعاد هناك هتلاقوا شغل.

بريطانيا وأمريكا بشكل أساسي كانوا بيمولوا عمليات التهجير دي، وأوروبا بشكل عام كانت فرحانة إنه بتخلص من الوباء اللي اسمه اليهود، بدل ما كل شوية عمالين يتنقلوا من هنا لهنا وعاملين صداع، هوووب مع بداية القرن العشرين وتحديدا في في عام 1904 بدأ اليهود العرب هما كمان يهاجروا على فلسطين.

بعد الحرب العالمية الأولى ووعد بلفور، فلسطين دخلت زمام الانتداب البريطاني أو ممكن نقول الاحتلال البريطاني بعد ما الدولة العثمانية خسرت الحرب واتفككت، فااا بريطانيا فتحت الباب على البحري لكل اليهود اللي عاوزين يطلعوا على فلسطين، من أوروبا بقى أو من روسيا أو من الدول العربية، وهنا بقى نوصل لعام 1946 ومحتاجين نقف شوية عند اليهود اللي جايين من الدول العربية.

اليهود العرب اللي راحوا فلسطين كانوا بيتكلموا عربي، وكمان طريقة العبادة بتاعتهم غير يهود أوروبا الشرقية ويهود روسيا، وعندهم عادات وتقاليد مش موجودة عند باقي اليهود، فاااا كانوا مكرفوين في جنب كده ومسئولة عنهم قوة البلماح، وبصراحة محدش في المنظمات الصهيوينة كان عارف يعمل إيه مع اليهود العرب... لغاية ما ظهرت الفكرة الجهنمية، طيب ما نحول اليهود العرب لجواسيس.

هنا بقى بدأت اللعبة اللي قال عليها السيد راضي في مسلسل رأفت الهجان، تجندي اليهود العرب اللي أصلا جايين من دول عربية وبيتكلموا عربي وعارفين العادات والتقاليد، فاااا بدأت قوة البلماح تعلم اليهود تعاليم الدين الإسلامي وحفظ القرآن وتفسيره وتجويده والفقه، وبقى عندنا رجال دين من أصول عربية قاعدين في فلسطين لكن هما أصلا يهود وشغالين مع المنظمات الصهيونية.

من ضمن الشيوخ دول واحد اسمه الشيخ فاضل عبد الله، وده كان واحد من أكبر شيوخ قطاع غزة، وكان إمام مسجد خان يونس فى أواخر الأربعينات، بيشرح للناس قواعد وتعاليم الإسلام، وكان دوما بيشجع الفلسطينيين على الجهاد وإنهم لازم يواجهوا العصابات الصهيوينة، ولما بدأت حرب 1948 كان بيطلع على المنبر يدعو للجيوش العربية وإنه ربنا يهلك اليهود ويشتت شملهم وبتاع.

المهم... نوصل لشهر مايو 1948، الشيخ فاضل عبد الله أو نقول اسمه الحقيقي بقى "فاضل يهوذا"، كان مطلوب منه يتقرب من قيادات الجيش المصري، فاااا كان بيدخل المعسكر ويتعرف على الضباط ويدعو لهم بالنصر، وكمان كان هو اللي بيصلي إمام بالجنود والضباط وبركاتك يا مولانا وبالأحضان بالأحضان يا بلدنا يا حلوة بالأحضان، وشغل يا ابني عمرو دياب وهو بيقول ده حلمنا كلنا.

في وسط كل العواطف دي الأجهزة الأمنية المصرية كانت صاحية ومركزة، الجدع اللي اسمه فاضل ده غريب، منتشر أكتر من اللازم، وبيختفي بالليل ويرجع يظهر تاني، هووووب بدأوا يدوروا وراه فاااا اكتشفوا إنه أصلا جاسوس إسرائيلي واسمه يهوذا، واللي تحسبه موسى يطلع فرعون، فااا مكنش في حل غير إنه يهوذا يعدم في ميدان عام.

14/01/2025

اللي فيكم اتفرج على فيلم "أيام السادات" أكيد فاكر اللقطة بتاع أحمد ذكي وهو واقف فوق سطح البيت يوم 26 يناير 1952 وبيقول للأخت منى زكي "السؤال دلوقتي مابقاش الملك ماشي ولا لأ، السؤال بقى الملك ماشي إمتى؟!" فاااا منى قالت له "خد بالك يا معلم إنت رجعت تاني تتكلم في السياسة وده غلط على الزلط".

في اليوم ده حصلت حريقة كبيرة قوي اسمها "حريق القاهرة"، بس السؤال بقى... هو إيه اللي حصل؟!
علشان نعرف اللي حصل يبقى لازم نقعد كده ومعانا فنجان القهوة المتين ونربط الأحداث والحواديت اللي حصلت ببعض علشان نقدر نفهم إيه اللي حصل.

الحدوتة الأولى 7 أكتوبر 1951
معاهدة 1936 واحدة من أشهر المعاهدات في تاريخ الدولة المصرية، لما اتوقعت كانوا فاكرين إنها معاهدة في الجون وهتجيب التحرير لمصر، بس التطبيق العملي للمعاهدة خلانا نكتشف إنها كانت ضحك على الدقون، أينعم الجيش البريطاني خرج من القاهرة وبقى في منطقة القناة بس، لكن مصر لسة تحت الاحتلال البريطاني.

كما السودان تحولت لمستعمرة بريطانية والجنود المصريين اللي هنك رايحين يحرسوا مستعمرة بريطانية مش رايحين يحرسوا أرضهم، فاااا من بعد الحرب العالمية التانية مصر اتحركت علشان تلغي المعاهدة دي بقى ونبقى دولة حرة مستقلة عندنا إرادة وقرار سياسي، هووووب في أكتوبر 1951 نجح مصطفى النحاس باشا إنه يلغي المعاهدة وده طبعا ماعجبش الإنجليز.

الحدوتة التانية يوم 4 يناير 1952
جماعة الإخوان في السويس شحنوا الناس في الشوارع ضد المسيحيين، وقالوا إن المسيحيين بيضربوا النار على المسلمين من الكنايس، فااا الشارع السويسي ولع والدنيا هاجت، وبدأوا الأهالي يهجموا على المسيحيين ودخلوا على الكنيسة حرقوها وحصلت مذبحة، هووووب طلعت جريدة "السيدات المسلمات" تهاجم المجلس الملي وتولع الدنيا أكتر.

رئيس الوزراء وقتها مصطفى النحاس باشا طلع على البابا يوساب الثاني وقدم اعتذار رسمي وعرض عليه 5000 جنيه تعويض لإعادة بناء كنيسة السويس تاني، لكن البابا رفض واتمنع الاحتفال بعيد الميلاد المجيد وقتها، وده طبعا سخن الدنيا أكتر، لأنه الإنجليز كانوا فاكرين إن اللي حصل ده هيطير النحاس باشا من على الكرسي.

الحدوتة التالتة 25 يناير 1952
لما النحاس باشا ألغى معاهدة 1936، تقريبا 91 ألف عامل مصر سابوا شغلهم في شركة قناة السويس ومعسكرات الإنجليز وانضموا لحركات المقاومة المسلحة في القناة، ماهو خلاص بقى طالما مفيش معاهدة يبقى تطلعوا برة البلد يا أولاد الويك ويك ويك، الفدائيين في مدن القناة كانوا معلمين جامد على الإنجليز والضرب فين يوجعك.

فاااا الجيش البريطاني جاب آخره وطلع على قسم شرطة الإسماعيلية وحاصر المبنى وطلب منهم إن الضباط والعساكر المصريين يسلموا أسلحتهم ويخلوا المبنى ويرجعوا القاهرة، فاااا طبعا الضباط قالوا له "أمك صاحبتي"، فااا بدأت عركة من أعظم المعارك في تاريخ الشرطة المصرية، 850 ضابط وجندي مصري في مواجهة 7000 ضابط وعسكري بريطاني، علشان اليوم ده يبقى خالد في التاريخ.

الحدوتة الرابعة 26 يناير 1952
الساعة 6 صباحا ولسة العصافير بتشقشق والناس لسة بتحاول تفوق من اللي حصل إمبارح في الإسماعيلية، عساكر البلوكات خرجوا في مسيرة رافضين اللي حصل لزمايلاهم في الإسماعيلية، وشوية عمال المطار عملوا إضراب، وخرجت المظاهرات في الشوارع كله رافض اللي حصل ولازم حالا نقطع العلاقات مع بريطانيا.

الملك فاروق الأول اتصل بشوية من ضباط الجيش اللي على مزاجه، وشوية من ضباط الشرطة اللي برضه على مزاجه، على شوية من الضباط الإنجليز على أعضاء من حزب مصر الفتاة، ومجموعة من جمعية إخوان الحرية، سبب الاتصال إنهم كان عازمهم على الغدا، بس في نفس الوقت التعليمات صدرت لكل الموظفين في الشركات والبنوك البريطانية اجمعوا الورق المهم ومحدش يروح النهاردة.

فاكرين الحدوتة بتاع مركز التجارة العالمي في أمريكا، اللي قالوا إنه محدش من الموظفين اليهود راح المركز في اليوم اللي الطيارات لبست في البرجين، أهو في يوم 26 يناير برضه مكنش في بريطاني واحد في الشارع ولا في الشركات الكبيرة أو البنوك، هووووب ظهرت الحرائق اللي أشتهرت بعد كده باسم "حريق القاهرة".

09/01/2025

بمناسبة نظام الثانوية العامة الجديد، تعالوا ناخد ونطلع على عمنا وعم الناس كلها محمد علي باشا، ونقف عند عام 1825، وقتها بدأت تظهر المدارس العليا اللي هي الجامعات دلوقتي، وشافوا إنه لازم الطلبة تبقى مؤهلة تدخل المدارس دي علشان إحنا داخلين على عصر جديد.

فاااا ظهرت مرحلة جديدة من التعليم مدتها 4 سنوات، بس كانت كل مديرية شغالة مع نفسها، تعمل الامتحانات وتظبط الأداء وانت وحظك بقى، لغاية ما وصلنا لعام 1887 وقت حكم الخديوي محمد توفيق، قالك لا بقى... إحنا لازم نعمل امتحان موحد، فاااا ظهر للنور "الشهادة العمومية" وكانت مدة الدراسة برضه 4 سنوات.

نسكت على كده!! لا... لازم نطور ونعدل، هووووب في عام 1891 قالوا نخلي الشهادة العمومية 5 سنوات، وأهو الطالب ياخد فكرة ويشتري لبكرة، وبلاش موضوع "الشهادة العمومية" ده، إحنا نسميها "التعليم التجهيزي"، ولما الخديوي عباس حلمي الثاني قعد على الكرسي لقى إن الدولاب الإداري محتاج موظفين وبسرعة، فااااا في عام 1897 التعليم التجهيزي بقى 3 سنوات بس.

لسة الناس بتقول هاااااا وبتحاول تفهم التطوير اللي حصل، عباس حلمي الثاني عام 1905 قال لهم اسكوزمي يا جماعة التعليم التجهيزي هيبقى 4 سنوات، وهنقسمه لاتنين، أول سنتين هيبقى اسمهم "الكفاءة"، وتاني سنتين هيبقى اسمهم "البكالوريا"، ودي اللي الطالب ممكن يختار يبقى علمي أو أدبي فيها، وإحنا كده بنطور التعليم يا جماعة علشان نبقى قد الدنيا.

في عام 1928 وقت حكم الملك أحمد فؤاد الأول، طلعوا بفكرة جديدة، تعالوا نطور التعليم ونعمل حاجة برة الصندوق، هتعمل إيه يا مولانا؟! هنرجع "البكالوريا" تاني 5 سنوات، بس أول 3 سنوات هتبقى إلزامي على كل الطلبة، وآخر سنتين الطالب فيهم يختار يبقى علمي ولا أدبي.

نسكت على كده!! لا.... نلعب في الإعدادات ونغير برضه، هد بقى كل اللي فات ده يا مولانا، هنعمل نظام جديد خالص، الأولاد الدراسة عندهم 5 سنوات، والبنات الدراسة عندهم 6 سنوات، وهنقسم "البكالوريا" لقسمين "عام" و"توجيهي"، وبكده الشهادة اللي كان اسمها "الشهادة العمومية" واتغير اسمها لـ "التعليم التجهيزي"، وبعدين بقى اسمها "البكالوريا" هيبقى اسمها بعون الله "التوجيهية".

بعد كده الاسم رجع تاني بقى "البكالوريا" لغاية ما وصلنا لعام 1953 ولازم نشيل كل رموز العهد البائد فاااا بقى اسمها "الثانوية العامة"، ورغم إن الاسم فضل ثابت إلا إن النظام نفسه اتغير مرة عام 1977 ومرة عام 1981 ومرة عام 1988 ومرة عام 1991 ومرة عام 1994 ومرة عام 1996 ومرة عام 2012 ومرة عام 2018 وأخيرا عام 2025 وربنا ما يقطع لنا عادة.

05/01/2025

بمناسبة الأحزاب الجديدة اللي ظهرت على الساحة ومشغلين نغمة إحنا لا مؤيدين ولا معارضين، فاااا مش عارف ليه افتكرت خالتي أطاطا في فيلم عوكل لما كانت بتقول "أنا بس عاوزة أعرف، الميت بـ يلبسوا له أسود، والحي بـ يلبسوا له أبيض، الغايب بقى يلبسوا له إيه؟!... أديداس!!"

المهم يعني إن كل ده فرصة علشان ناخد ونعرف مع بعض تاريخ الأحزاب في مصر اللي بدأ من زمان قوي، هنفضل ماشيين لغاية ما نوصل لعام 1879 لما ظهر للنور أول تشكيل ممكن نقول عليه إنه حزب تحت اسم "الحزب الوطني"، هوووب حصل الاحتلال الإنجليزي وقالك فضها سيرة يا جدع انت مفيش أحزاب.

بدأ بقى شغل مقاومة الاحتلال الإنجليزي، وتتبلور فكرة العمل التنظيمي والصحافة على نار هادية أينعم مكنش في رمز أو قيادة الناس كلها تمشي وراها، لكن كله بالحنية بيفك، هووووب رجع عبد الله النديم من المنفى، هووووب بدأوا الوطنيين اللي بيواجهوا الإنجليز يتجمعوا عنده، هووووب ظهر من وسطهم واحد نعرفه كلنا اسمه مصطفى كامل.

بدأ بقى التيار الوطني صوته يعلى من تاني، أصل الفترة قبل ظهور مصطفى كامل كانت بدأت تنتشر حوارات التلزيق، تلاقي كل مجموعة معلقة يافطة مكتوب عليها "في حب مصر" لكنها مش بتعمل أي حاجة غير إنها بتلحس جزمة الخديوي والاحتلال مقابل إنه يترمى لها بواقي الأكل ويتسمح لها تروح تاخد الصورة الكريمة، وفاكرين إن ده عمل سياسي.

مع ظهور مصطفى كامل بدأت الناس دي تاخد جنب، وفي عام 1900 ظهرت صحف اللواء والمؤيد والجريدة اللي نازلين سلخ في الاحتلال، وكل ده كان المؤشر علشان تحصل شرارة البداية، في عام 1907 ظهرت للنور 3 أحزاب مصرية، الحزب الوطني ، وحزب الأمة، وحزب الاصلاح علي المبادئ الدستورية، واللي كل واحد فيها عبر إتجاه فكري وسياسي معين.

فضلنا على كده بقى لغاية ما قامت ثورة 1919 وظهر للنور حزب جديد اسمه حزب الوفد اللي كان له نصيب كبير قوي وشعبية كبيرة قوي بين المصريين، وربنا كرمنا الحمد لله وظهر للنور دستور 1923 اللي يعتبر زهرة الزهرة وواحد من أفضل الدساتير في تاريخ المحروسة، واللي كان مسموح فيه إنه يبقى عندنا أحزاب زي ما إحنا عاوزين.

حزب الوفد نفسه اتفك واتقسم لكذا حزب، زي الحزب السعدي، والكتلة الوفدية، والأحرار الدستوريين، وكلها كانت أحزاب ليبرالية، وظهر برضه أحزاب دينية زي حزب الآخاء، وحزب الإصلاح الإسلامي، وظهرت أحزاب يسارية زي حزب مصر الفتاة، وحزب العمال الاشتراكي الشيوعي، والحزب الشيوعي المصري، وحزب الفلاح المصري، وطبعا ولأنه ربنا ما يقطع لنا عادة ظهرت أحزاب مؤيدة للملك والاحتلال زي حزب الشعب وحزب الاتحاد.

لكن بعد 23 يوليو 1952 القيادة السياسية وقتها قالوا مش عاوزين وجع دماغ، فكك يا ابني كل الأحزاب دي مش هيبقى عندنا غير تنظيم واحد اسمه الاتحاد الاشتراكي، اللي عاوز يلعب سياسة يروح ينضم للاتحاد الاشتراكي وشكرا على كده، وفضلنا بقى على الوضع ده لغاية عام 1976، لما السادات قال إنه مصر حرة والمصريين أحرار وإحنا داخلين على انفتاح اقتصادي وسياسي وهيعلن عودة الأحزاب.

الموضوع بدأ بـ 3 مناير جوة الاتحاد الاشتراكي، يمين ووسط ويسار، بعدها المنابر دي تحولت لأحزاب فااااا ظهر للنور الحزب العربي الاشتراكي اللي بقى اسمه بعد كده الحزب الوطني الديمقراطي، و كمان حزب التجمع اللي بيعبر عن اليسار، وحزب العمل، وحزب الأحرار الاشتراكيين، وكمان اتشكل حزب اسمه الوفد الجديد لكن رجعوا قالوا ده رمز من رموز العهد البائد... جمد يا واد الحزب ده.

في عام 1984 حزب الوفد الجديد أخد حكم قضائي وبقى رسمي، وطوال فترة حكم مبارك الأحزاب كانت إما تاخد موافقة من لجنة شئون الأحزاب زي حزب الغد، أو يروحوا يرفعوا قضية على الحكومة وياخدوا حكم قضائي زي الحزب الناصري وحزب مصر الفتاة، هوووووب وصلنا لـ 25 يناير 2011 والمجلس العسكري قال كلمته، تأسيس الأحزاب بالإخطار بس في شوية شروط كده محتاجين نحققها.

من بعد 2011 عدد الأحزاب المصرية بقى في الليمون، أي اتنين معديين من تحت الشهر العقاري تضرب في دماغهم فكرة يعملوا حزب، بس طبعا صعب إنه تتحقق الاشتراطات لأنه في عدد توكيلات معين وعدد محافظات محدد وحوار كده، بس الفكرة مش في عدد الأحزاب، الفكرة في تأميم الحياة السياسية اللي مخلس دور الأحزاب مهما كان كويس محترم يفضل متحاصر بأحزاب السلطة.

02/01/2025

لو فتحت خريطة سوريا هتلاقي محافظة كبيرة قوي في وسط سوريا اسمها محافظة حمص، لو عملت زوووم على الخريطة وقربت شوية جوة محافظة حمص هتلاقي مدينة اسمها "تدمر"، أهي المدينة الجميلة دي مانت عاصمة لمملكة قديمة اسمها "مملكة تدمر".

علشان نعرف الحدوتة بقى يبقى تعالوا ناخد وتقف عند نقطة وفاة الإسكندر الأكبر، منطقة الشام وشمال أفريقيا اتفتت واتقسمت وكل واحد من رجالته كان عاوز يفوز بحتة من التورتة، نركز على منطقة الشام بقى اللي كان فيها شوية ممالك صغيرة داخلة خناق مع بعض.

هوووب في عام 64 قبل الميلاد الإمبراطور الروماني بومبيوس الكبير كان قاعد يتابع الأخبار على قناة اكسترا نيوز، لقى الدنيا بايظة والعركة شغالة فااااا جمع الرجالة وقال لهم اجهزوا عندنا حملة على الشام، وفي نفس السنة دخل بالجيش وسيطر على دمشق ومقاطعة سوريا دخلت ضمن زمام الإمبراطورية الرومانية ومدينة إنطاكية (اللي النهاردة في تركيا) عاصمة لها.

بدأت بقى تظهر هنا أهمية مدينة تدمر، موقعها الاستراتيجي خلاها في قلب طريق الحرير التجاري اللي كان رابط بين الشرق والغرب، فاااا أي قوافل تجاري جاية من الشرق للغرب أو من الغرب للشرقـ كان لازم تمر على تدمر وتعسكر فيها شوية، وده طبعا حول المدينة لمدينة تجارية كبيرة قوي وبقى لها أهمية اقتصادية كبيرة والقرش بيجري والحياة فلة.

الوضع الاقتصادي ده خلى الرومان يخلعوا إيدهم عن تدمر شوية، ماهو إحنا لو رخمنا وشغلنا القانون عافية وبلطجة التجار والقوافل هيخلعوا من المدينة ويشوفوا مكان تاني، فاااا الحكام الرومان كانوا عاملين للمدينة زي حكم ذاتي كده، يا باشا طالما القرش بيجري معاك ومش عاوز مني حاجة، دور بنفسك جوة نفسك هتلاقي نفسك.

طيب عندنا تجارة والحالة المادية عال العال، وعندنا حكم ذاتي والقرار بتاعنا، يبقى فاضل إيه؟! فاضل بقى شوية مباني وقوانين وقواعد، وطالما قوانين وقواعد يبقى دين، فااااا بدأت تظهر في تدمر المباني اللي لها طابع إغريقي، وبقى عندهم حوالي 30 إله وظهر الشعب المتدين بطبعه فاااا اتبنت المعابد.

نوصل بقى لعام 260 ميلادية، واحد اسمه "أذينة" بقى حاكم مدينة "تدمر"، وربنا كرمه كمان واتجوز واحدة اسمها "زنوبيا" بنت قائد الجيش بتاعه، والاتنين أصلا كانت دماغه ماشية في سكة التوسع، إحنا جامدين قوي ولازم يبقى عندنا المملكة بتاعتنا، هووووب قامت العركة بين الفرس والرومان والإمبراطور الروماني بقى أسير عند الفرس والكل لبس طرحة سودا.

مين بقى اللي شاف إنها فرصة لازم نشتغل عليها؟! المعلم "أذينة" اللي جهز الرجالة وطلع على الفرس علقهم من قفاهم، حاول الفرس معاه مرة واتنين وتلاتة لكنه كان جايب من الآخر ومش سامح لأي مخلوق إنه يسيطر، الرومان من باب الشكرانية سموه ملك الملوك، لكن هو كانت عنده طموج أكبر من كده فااا أعلن على الفيسبوك عن قيام مملكة تدمر، وهنا الرومان بقى حسوا بالقلق.

القلق مش إنه أعلن عن قيام المملكة، القلق إن جيش المملكة كله بقى من أبناء تدمر والمعلم طرد كل الجنود الرومان من الجيش بتاعه، يعني كده المملكة بقى عندها قوة اقتصادية وقوة عسكرية وكمان الشعب بيحب الملك بتاعه، وده غلط على الزلط، فاااا في عام 267 قرر الرومان يخلصوا من الملك "أذينة".

من بعده حكمت زوجته زنوبيا، وفي خلال 5 سنوات ضمت مصر ذات نفسها للمملكة الجديدة، والحدود توسعت علشان تاخد كمان جزء كبير من جنوب تركيا وجزء من شبه الجزيرة العربية، لدرجة إنها بدأت تهدد الإمبراطورية الرومانية نفسها، وهنا بقى الرومان قالوا اقفي عندك... إحنا هنخيب ولا إيه، وقامت العركة وانتهت مملكة تدمر.

أهو الملكة زنوبيا دي وزير التربية في الحكومة السورية الانتقالية قرر إنه يحذفها من المنهج الدراسي لمادة التاريخ، حاجة كده تشبه إنه عندنا يحذفوا الملكة حتشبسوت من التاريخ ويهدوا المعبد بتاعها ويعملوه مول تجاري.

31/12/2024

الجماعة الكاثوليك بيحتفلوا بـ "الكريسماس" يوم 25 ديسمبر، والجماعة الأرثوذكس بيحتفلوا بـ "عيد الميلاد المجيد" يوم 7 يناير، وأصلا التقويم الميلادي معمول أو بدايته من سنة ميلاد سيدنا عيسى،... فاااا إزاي بقى عندنا يومين أو احتفالين لنفس الحدث أو نفس الموقف؟!

علشان نعرف الحدوتة يبقى ناخد ونطير على مدينة روما عام 771 قبل الميلاد، لأنها كانت شغالة بتقويم اسمه "التقويم الروماني القديم"، وده كان الشهر فيه يبدأ مع ظهور الهلال زي التقويم الهجري كده، ومكنش فيه أرقام للسنوات، يعني السنين في التقويم الروماني كانت على اسم القيصر اللي بيحكم، والسنة شاكب راكب 10 شهور واتعشت على كده.

السنة في التقويم الروماني القديم كانت 304 يوم، ومكنش فيه حاجة اسمها يناير ولا فبراير، هوووووب في عام 715 قبل الميلاد القيصر الروماني "نوما" عمل أول تعديل والسنة كبرت وربربت وبقى فيها 355 يوم، وده بعد ما زود شهر يناير وشهر فبراير، وبداية السنة كانت من شهر مارس لأنه لها علاقة بالزراعة، بس برضه التقويم مكنش مظبوط، وكل سنتين تلاتة يضيفوا شهر زيادة ويرجعوا يحذوفه وده كان عامل قلق مع بتوع الضرايب.

بعد فترة مصر دخلت زمام الإمبراطورية الرومانية، فااا في عام 46 قبل الميلاد الأسطى يوليوس قيصر قالهم "بااااااااس يا عم الحاج، المصريين عندهم تقويم شغال من سنين زي السكين في الحلاوة، إحنا ناخده ونحط التاتش بتاعنا"، ومن هنا اتعدل "التقويم الروماني القديم" وبقى اسمه "التقويم اليولياني الروماني" والسنة بقى فيها 365 يوم و6 ساعات، وكل 4 سنوات يضيفوا يوم علشان الدنيا تظبط.

في "التقويم اليولياني الروماني" برضه كانت بداية التقويم محسوبة من تاريخ أو توقيت بناء مدينة روما، ولأن التاتش المصري دخل في الموضوع، فاااا التقويم اليولياني بقى تقويم شمسي، الشهور فيه إما 31 يوم أو 30 يوم، وشهر فبراير يبقى 29 يوم، بس الدنيا ولعت نار، إزاي يا أسطى شهر يوليو اللي على اسم «يوليوس قيصر» يبقى 31 يوم، وشهر أغسطس اللي على اسم الإمبراطور «أوغسطس» يبقى 30 يوم بس!!!

نعمل إيه يا عبد الرحيم؟! نعمل إيه يا عبد المجيد؟!سلقط في ملقط، أيوة... ناخد يوم من شهر فبراير ونحطه في شهر أغسطس وكده كل حاجة تبقى تمام وماشية زي الفل ومفيش قيصر يزعل من التاني، هوووووب فضلنا ماشيين كده لغاية ما وصلنا للقرن الثامن وظهر راهب اسمه إكسيجونوس، وطلع بفكرة جديدة... يا جماعة عيب مايصحش يبقى معقول نسيب ميلاد المسيح ونعمل التقويم على بناء مدينة روما!!!

هوووووب اتعدل "التقويم اليولياني الروماني" وبقى اسمه "التقويم اليولياني الميلادي"، وبدل ما كنا في سنة 753 روماني بقينا في سنة 532 ميلادي، وفضلنا ماشيين على كده 10 قرون والدنيا تمام لغاية ما ظهر فلكي اسمه أليسيوس وطلع يصرخ "حااااااااسب ياجدع انتوا حسبتوا غلط، السنة مش 365 يوم و6 ساعات بالظبط، السنة 365 يوم و5 ساعات و48 دقيقة و46 ثانية"، وده معناه إن التقويم غلط والحسبة غلط والاحتفالات غلط.

طبعا الدنيا اتقلبت واتصلوا بالنجدة، لأنه ده معناه إنه بقى عندنا فرق في الأيام، فااااا بابا الفاتيكان وقتها جريجوريوس التالت عشر طلع في يوم وقال بيان مهم جدا، يا جماعة علشان نصلح التقويم النهاردة 4 أكتوبر 1582 وبكرة بإذن واحد أحد هيبقى 15 أكتوبر 1582، واتعدل "التقويم اليولياني الميلادي" وبقى اسمه "التقويم الجريجوري الميلادي" اللي إحنا شغالين بيه لغاية النهاردة.

الدول الكاثوليكية على طول اعتمدت التقويم الجريجوري عام 1582، لكن الدول البروتستانتية والأرثوذكسية أخدوا وقت عما اقتنعوا إنهم يطبقوه، فااا بدأوا يطبقوا التقويم الجريجوري من عام 1752 وفي ناس دماغها ناشفة زي روسيا كده طبقته عام 1918.

برضه ماعرفناش ليه الاتنين بيحتفلوا في يومين مختلفين‼️ ماهو فضل الخلاف الأزلي بين الكاثوليك والأرثوذكس اللي عمره أكتر من 1000 سنة لسة موجود، فاااا الكاثوليك احتفلوا بالكريسماس يوم 25 ديسمبر على حسب التقويم الجديد والأرثوذكس احتفلوا بعيد الميلاد المجيد يوم 7 يناير على التقويم القديم.

الحدوتة تخلص كده؟! طبعا لا
الفرق بين "التقويم اليولياني الميلادي" و"التقويم الجريجوري الميلادي" حوالي ١١ دقيقة، والفرق دي بيزيد كل سنة، فاااا كل 131 سنة الفرق بيقفل يوم كامل
علشان كده بعون الله عام 2030 هيكون فات 131 سنة، فاااااا الكاثوليك هيحتفلوا يوم 25 ديسمبر والأرثوذكس هيحتفلوا يوم 8 يناير.

حواديت البلدان

12/02/2025

08/02/2025

04/02/2025

02/02/2025

18/01/2025

14/01/2025

09/01/2025

05/01/2025

02/01/2025

31/12/2024

Address

Website

Alerts

Videos

#حواديت_النظار

#حواديت_النظار .. حدوتة نوبار باشا رئيس مجلس النظار

Shortcuts

Share

Category