20/04/2024
٨ خطوات للحصول على فيزا شنجن 😉
في البداية نقدر نقول اني في أوراق عامة بتتكرر في كل سفارة، بس في نفس الوقت في أوراق بتخلي سفارة مختلفة عن الثانية ونشرح ده في المقال ده ان شاء الله.
1️⃣ كشف الحساب البنكي:
- كل السفارات في الشينجن بتطلب كشف حساب بنكي لآخر 6 شهور، ماعدا بلجيكا بتطلبه لآخر 3 شهور بس، المهم في موضوع الحساب البنكي هو حركة الفلوس عليه، وده عشان السفارة عايزة تعرف تفاصيل حياتك وده عشان تشوف إزاي بتصرف فلوسك وهل أنت مستقر ولا عايز تسافر عشان تهرب وكده.
- لو ماعندكش حساب بنكي، تقدر تجيب كاشف حساب والدك أو والدتك أو حد من أخواتك، مع تعهد منهم بتحمل مصاريفك اثناء رحلتك.
- طيب المفروض يكون معايا كام رصيد في البنك!؟ ببساطة، السفارة بتفترض إنك محتاج 50 يورو لكل يوم هتقضيه في بلادهم، يعني لو هتسافر أسبوع، تضرب 50 في 7 وتشوف النتيجة، بس عشان أكون واضح، لو رصيدك أقل من 2000 يورو في أي سفارة شينجن، فرصتك قليلة.
- كشف حساب البريد اللي هو البوسطه مقبول بيه في السفاره عادي جدا .. لكن المهم انه ميكونش حساب راكد لازم يكون عليه حركه سحب وايداع مستمره.
- الودائع او الشيكات البنكيه او السندات مفيده طبعا بس مش بتغني عن الحساب البنكي ولازم الحساب البنكي يكون موجود سواء حساب جاري او توفير.
- كشف الحساب اهم ورقه في اوراق الشنجن لو متظبط كويس وعليه عمليات سحب وايداع كتيره اوي ومشتريات بالفيزا ورصيد نهائي معقول وقتها نسبه قبولك بتزيد.
2️⃣ ال HR Letter من شغلك:
- هتجبلك HR Letter من شغلك، مكتوب فيه إنك شغال في المكان ده من سنة كذا لكذا، ومرتبك شهرياً كذا أو سنوياً كذا، وهتاخد إجازة من يوم كذا ليوم كذا، وإن الشغل وافق على إجازتك، وإنك هترجع تشتغل بعد الإجازة.
- وإذا كان مؤمن عليك في الشغل، اكتب رقم التأميني جوا ال HR Letter. وفي النهاية هتكتب عنوان الشركة والإيميل أو رقم التليفون بتاعهم، وتختمه من الشركة ختم رسمي، ويكون موجه للسفارة اللي عايز تقدم فيها.
- لو بتشتغل شغل خاص، هتجب سجل تجاري وبطاقة ضريبية، وخلي بالك يكون عدي عليهم علي الاقل سنه من تاريخ انشاء الشركة ويكون ليك ملف ضريبي حقيقي مش وهمي.
- لو لسه طالب، هتجب شهادة قيد من شئون الطلبة عندك في الكلية.
- سفارة إيطاليا هي الوحيدة اللي بتطلب برنت تأمينات مختوم من شغلك. يعني لو مش متأمن عليك في شغلك، متفكرش تقدم في إيطاليا أبدًا لأنك هتترفض.
- لو بتشتغل شغل حر، فريلانسر يعني:
- الفريلانس المعتمد والمعروف لدى السفارات هو اللي بيجيله تحويلات وإيداعات منتظمة شهريًا من المؤسسات والشركات اللي بتتعامل معاها أونلاين، أو بيتبعتلك تحويلات بنكية منتظمة بكل المبالغ اللي بتشتغل بيها مع المواقع، أو بيجيلك أرباح من شغلك بإيداعات منتظمة أو بشيكات مقبولة الدفع. وقتها أنت بتاخد الشيكات دي وبتحطها في حسابك، وده إثبات تعاقداتك مع الشركات الأونلاين دي.
- التحويلات على ويسترن يونيون إذا كانت شهرية ومستمرة ينفع تقدم إيصالات التحويل كدليل على شغلك، بس ده لا يُغني عن الحساب البنكي الجاري أو التوفير. ولكن الإيصالات دي مهمة جدًا عشان إثبات شغلك.
- لو أنت متخرج ولكن مبتشتغلش، هتكتب في الأبلكيشن إنك مش بتشتغل، ولكن الاعتمادك كله هيكون على كشف الحساب البنكي بتاعك لازم يكون مظبوط جدًا عشان يوافقوا إن حد مش بيشتغل يسافر اوروبا. فرصتك أقل بكتير طبعًا من اللي بيشتغلوا، لكن مش مستحيلة.
- لو أنت بتاخد معاش يعني لا بتشتغل ولا بتدرس، هتاخد شهادة من التأمينات مع باقي الورق إنك على المعاش بدل ال HR. وبرضو فرصتك أقل بكتير من اللي بيشتغلوا، لكن مش مستحيلة برده.
3️⃣ حجز الفندق:
- كل السفارات في الشنجن بتطلب حجز مبدئي مش مؤكد من Booking ، ماعدا سفارة اليونان بتطلب حجز مؤكد ومدفوع كمان من الفندق نفسه.
- الحجوزات هتعملها من Booking وتكون Free Cancelation ، يعني إلغاء مجاني. وأوعى تلغي الحجز قبل ما تستلم الفيزا لأنهم بيعملوا تشيك على الحجوزات في آخر أيام الفحص بتاع الورق بتاعك عشان يتأكدوا إن الحجز موجود.
- خليك ذكي وانت بتحجز الفندق .. يعني ما تبقاش رصيدك في البنك 3000 يورو مثلاً وتحجز فندق في الفورسيزون ب 1000 يورو في الليلة. اختار الفندق اللي يكون مناسب مع رصيدك اللي في البنك عشان يبقى منطقي إنك فعلاً رايح رحلة ومنظملها ومخططلها مش مجرد حد بيكمل أوراق وخلاص.
- حجز ال Airbnb والهوستلز مقبول بيه في السفارات عادي جدًا، لكن اللي مش مقبول في السفارات أبدًا هو الCouchsurfing
- لو هتقعد مثلاً أسبوع أو 10 أيام أو أسبوعين في بلد معينة، متحجزش كل الحجوزات في فندق واحد أو مدينة واحدة، لأن مفيش سائح في العالم بيقعد في مدينة واحدة أو في فندق واحد بس طول مدة رحلته الطويلة. يعني لو هتروح 10 أيام فرنسا مثلاً، احجز فنادق 3 أيام في باريس و3 أيام في موناكو و2 في ليل و2 في بوردو. يعني خلي السفارة تحس إنك واحد رايح رحلة فعلاً مش مجرد بتعبي أوراق وخلاص.
- يعني مش تقوم تحجز الأسبوع كله في فندق واحد وفي مدينة واحدة، مش منطقي أبدًا.
- لو سمحت بلاش استنصاح واسترخاص .. احجز الفندق بكريديت كارد سليم وفيه رصيد كافي لعدد الأيام اللي هتحجزها، لأن الفندق لو شاف إن الكارت مضروب أو مفيهوش رصيد كافي هيعملك Cancel على الحجز، وبالتالي لما السفارة تدخل تشوف الحجز هتلاقيه متكنسل أصلاً فتقوم مدياك الرفض المتين.
4️⃣ حجز الطيران:
حجز طيران بيكون مبدئي .. مفيش سفارة شنجن بتطلب حجز طيران مؤكد.
5️⃣ التأمين الطبي للسفر
- بيتعمل من اي شركه تأمين، وبيكون بتكلفة بسيطة جدا حوالي ٤٠٠ جنيه .. من شركات زي اليانز او مصر للتأمين أو قناه السويس للتأمين.
- اهم حاجه ان الورقه يتكتب فيها، ان الحد الادنى للتأمين فيها 30 الف يورو وانها صالحه لكل منطقه الشنجن وهتغطي فتره اقامتك بالكامل في منطقه الشنجن، مش تقلق طبعا انت مش هتدفع 30 الف يورو ولا حاجه!
6️⃣ الباسبور:
- باسبور ساري وصورة منه ويكون صالح لمدة 6 شهور فاضلين، والأحسن لو باسبورك قرب ينتهي تجديده قبل ما تقدم على التأشيرة.
- لو باسبورك فيه اختام وفيزا سابقه هتصور كل الاختام والفيز دي وترفقها مع الورق.
- لو الفيزا الشنجن على باسبورك ولسه ساري وباسبورك انتهى هتطلع باسبور جديد وهتسافر بالاتنين. الظابط هيشوف الفيزا على القديم وهيختم في الجديد.
- الصور المطلوبة للشنجن بتبقى صورتين خلفية بيضاء، مقاسها بيختلف حسب السفارة. أغلب السفارات بتطلب إن مقاس الصورة يكون 3.5 في 4.5
7️⃣ شهادة التحركات ( لاول مرة فقط )
- ودي عباره عن شهادة بتطلع من العباسية أو من محافظتك، بتثبت فيها تحركاتك وسفرياتك خارج البلاد خلال اخر 7 سنين.
8️⃣ آخر حاجة ملئ الابلكيشن بتاع التقديم علي السفارات
- بالنسبة للابلكيشن عندك اتنين اوبشن، يا تطبعه وتملاه يدوي وتمضي ف الاخر يأما تملاه الكتروني وبعدين تطبعه.
- حاجة مهمة بردة معظم سفارات الشنجن بطلت تتعامل مع الجمهور بشكل مباشر.. بقوا يتعاملوا معاهم من خلال شركات تانية وهنزل بوست هنتكلم عنهم قريب ان شاء الله.
واخيرا من تنسي تتابعنا عشان لسه في معلومات كتير هنزلها.
▪️احنا مين!؟ 🤔
احنا شركة عايدة للسياحة مهمتنا هي جعل تجربتك في السفر سهلة ومريحة، لذا اختر عايدة للسياحة لضمان أن يكون كل رحلة لك تجربة لا تُنسى. 🤩
