https://www.facebook.com/104793924932013/

محمود فخرى - Mahmoud Fakhry

Name: محمود فخرى - Mahmoud Fakhry
Address: 31 El Imam Ali Street, Heliopolis-Cairo-Egypt Cairo, Cairo Governorate, Heliopolis, EG
Telephone: +201008579164
Rating: 5

Home
Egypt
Heliopolis
محمود فخرى - Mahmoud Fakhry

An Egyptian travel blogger who would explore the whole world
(2)

02/08/2023

فى كيب تاون عادى جدا انك تبقى ماشى وتلاقى فى طريقك مزارع نعام 🤣🥰

23/03/2023

كل سنة وانتوا طيبين ورمضان كريم عليكوا جميعا 🙏❤️🌙

21/03/2023

فى كيب تاون ممكن تبقى ماشى مع الجروب فى آمان الله وتقابل منظر زى ده عادى
You can suddenly find a wonderful sight in Cape Town

07/03/2023

انا رايح المغرب فى العيد يا جماعة 😍🇲🇦
ماخبيش عليكوا كنت بفكر جدياً انى ماعملش المغرب فى العيد الفترة دى تماما لغاية ماشوف وضع الدولار هيوصل لإيه.
بس اتفاجئت بكم ناس طالبة الرحلة فى العيد وبشكل كبير لدرجة انى حسيت انى مقصر فى حقهم انا ازاى ماعملش المغرب فى العيد😂
فقررت اعملها فى العيد واخترت انسب سعر للطيران عشان يكون سعر الرحلة معقول للناس.
عشان كده ميعادها هتكون من يوم 21 ابريل ليوم 30 ابريل لمدة 10 ايام هنزور فيهم 8 مدن مغربية اللى هم :
مراكش – فاس – افران – شفشاون – تطوان – طنجة – الرباط – كازبلانكا.
كمان اللى حابب انه يشترك معانا بالقسط فى عندنا انظمة تقسيط متاحة
ومتاح كمان الدفع بفاليو بالنظام اللى يناسبكوا.
لو مهتمين سيبوا كومنت وهبعتلكوا فايل فيه كل التفاصيل الخاصة بالرحلة.

13/02/2023

حيوان الشيتا من أكبر خمس حيوانات فى افريقيا صورته بعد ما أكل النعام وجبته المفضلة 🫢
The cheetah's mouth is stained with blood by hunting an ostrich.

13/11/2022

هو بعد ارتفاع الدولار ايه اللى هيحصل فى الرحلات والسفر بشكل عام؟
الحقيقة ده سؤال إحنا نفسنا اللى فى المجال لغاية دلوقتى بندور ليه على اجابة وعشان اكون صريح وواقعى مافيش رؤية او حاجة تقدر تبنى عليها أساس للى جاى خاصة ان الوضع مش مستقر.
أكيد الناس مش هتبطل سفر زى ما كتير من الأصدقاء والمقربين بينصحونى إنى أكمل باعتبار ان السفر عند ناس كتير بيكون حاجة أساسية وانا متفق معاهم فعلا بس الموضوع بيكون نسبى.
بمعنى إن الناس اللى السفر عندها بيكون أولوية نسبتهم بالتأكيد بتقل مع الوقت وبتظهر ليهم أولويات أخرى أولها انه يعرف يقضى الشهر بتاعه من غير ما يحصل اى تعثرات مادية ويعرف يمشى أموره.
حل من الحلول اللى الناس نصحتنى بيه برضه إنى اشوف رحلات داخل مصر والحقيقة ده حل مؤقت بس برضه إلى حد ما مش مجزى اوى خاصة وإن الناس جوة مصر أولا يعتبر ناس كتير راحوا كل الأماكن السياحية وفى شريحة كبيرة بيفضلوا انهم يعتمدوا على نفسهم بدون تنظيم .
من وجهة نظرى لو الوضع هيستمر كده هيكون فى أكثر من سيناريو :
1 - التعود مع الوقت على الأسعار الجديدة واستيعاب صدمة ارتفاع الاسعار ورجوع الوضع تدريجيا كمان كان ولكن أكيد مش بنفس القوة.
2 - إنك تضطر تقلل فى عدد أيام الزيارات ولو إن ده مش هو المؤثر أصلا فى سعر الرحلة بشكل كامل لإن عصب الرحلة زى مابيقولوا هو سعر الطيران .
3- التقليل فى جودة الفنادق والحقيقة انا مش بفضل الموضوع ده على الإطلاق لإن ماينفعش تقلل عن جودة معينة وفى نفس الوقت ماينفعش تعلى أوى غير للى عايز يدفع ودى ليا وجهة نظر فيها هبقى اشرحها فى بوست منفصل.
4- إنك تعتمد على الطيران الاقتصادى اللى بيطلع من شرم الشيخ او الغردقة او برج العرب وده برضه مش مناسب لكل الوجهات .. بيكون لوجهات معينة بس من ضمنها تركيا وأوروبا.
دى لغاية دلوقتى الحلول الموضعية اللى تقدر تشوفها لغاية ما الوضع يتسقر اساسا ونشوف الأمور هترسى بينا على إيه وندعى ربنا إنها تعدى على خير لإن بجد السفر ده متعة من متع الحياة اللى خلقها ربنا وحرام إن الناس تتحرم منها .

16/09/2022

فى حاجة اكتشفتها بتحصل مع أغلب الناس اللى بيقدموا فى السفارات.
لو انت مقدم على تأشيرة أى بلد وعندك باسبور قديم عليه تأشيرات وأختام لازم تقدم الباسبور القديم مع الباسبور الجديد .
بتبدبس الاتنين فى بعض ضهر الباسبور الجديد فى وش الباسبور القديم.
لإن اغلب السفارات بتكون محتاجة تعرف لو ليك سفريات قبل كده ده بيكون مصدر قوة ليك وطمأنينة ليهم انهم يدولك التأشيرة بغض النظر عن قوة ورقك إيه بس عندك Travel History كويسة.
لإن بلاقى ناس لسة مجددة الباسبور وبتقدم الباسبور الجديد فقط وهو مش عليه أى تأشيرة فى حين ان عندهم باسبور قديم عليه تأشيرات قوية وده طبعا خطأ لازم تاخدوا بالكوا منه.

25/07/2022

عايز اسافر لبنان بس فى كام حاجة مخوفانى !
دى أول جملة بسمعها من الناس اللى بتكون عايزة تخطط للسفر للبنان بس مش قلقانة من موضوع التصريح الأمنى والألفين دولار والكهرباء فهنبدأ دلوقتى بكل نقطة وهشرحها بالتفصيل.
▪️ التصريح الأمنى:
لبنان مش بتحتاج لتصريح أمنى.. إلا لو حد مش مكتوب فى الباسبور بتاعه وظيفة أو شهادة عليا.

▪️ التأشيرةوالألفين دولار :
كتير من اللى بيكونوا عايزين يسافروا لبنان بيكونوا قلقانين من موضوع وجود 2000 دولار لكل شخص، طيب حل الموضوع إيه؟
مبدئيا لو مسافر مع مجموعة من اصدقائك حاولوا تجمعوا مبلغ الـ 2000 دولار وتوزعوه على بعض بالتناوب بس طبعا يكون فى مسافات بين الشخص والتانى مايكونش وراه على طول عشان يلحق يرجعله الدولارات .
لو اتنين مثلا رايحين شهر عسل الـ 2000 دولار تعديهم هما الاتنين مافيش مشاكل مش شرط يكون كل شخص معاه المبلغ لوحده لإن حتى لو متوافر المبلغين هيكون صعب انك تمشى بـ 4000 دولار كاش.

▪️ الإقامة وقطع الكهرباء:
حل المشكلة دى إنك تختار فنادق تكون 4 نجوم فى الحمراء الكهرباء فيها مابتقطعش لإنهم بيكونوا عندهم مولدات الكهرباء وفى نفس الوقت هتكون نازل فى منطقة حيوية وآمان.

19/07/2022

لما بتسأل على جنوب افريقيا أول حاجة بتسأل عليها هى معدل الآمان :
طيب من وجهة نظرى ان جنوب افريقيا بلد زيها زى اى بلد برا مصر بتاخد احتياطاتك الأمنية العادية اللى هو تتجنب النزول بالليل فى الاماكن المتطرفة مع ان الكلام ده فى مصر برضه سبحان الله ! بس ما علينا .. تتجنب الخروج لوحدك بالليل فى الاماكن المتطرفة دى حاجة ،، الحاجة التانية تخلى بالك من حاجتك عادى جدا زى ما المفروض تاخد بالك منها وانت فى مصر برضه !
بالعكس انا شايف ان جنوب افريقيا بلد متحضرة جدا ومتطورة جدا جدا والشرطة تقريبا متواجدة فى كل مكان وده ماشوفتوش فى دول كتير.

طب ايه اللى يخلينى ازور جنوب افريقيا؟
والله انا شايف انها ليها مميزات كتير جدا هلخص بعضهم فى نقاط

1 – المناظر الطبيعية :
جنوب افريقيا جنة الله على الأرض بجد طول ما انت ماشى بتلاقى جبال وخضرا حواليك يمينك وشمالك كإنك فى اوروبا ويمكن احسن من اوروبا بدون مبالغة .

2- قيمة العملة :
من احسن الحاجات فى جنوب افريقيا ان قيمة العملة بتاعتها هى نفس قيمة الجنيه بالنسبة للدولار ، الدولار بما يعادل تقريبا 17 راند جنوب افريقى ، يعنى لما بتشترى الحاجة من هناك بتشتريها كإنك بتشترى فى مصر بالظبط مش مضطر تقعد تحسب الحاجة دى هتكون عاملة كام بالجنيه المصرى ده غير ان الحاجات هناك اسعارها كويسة جدا .

3 – السفارى :
فى جنوب افريقيا هناك تقدر تعمل سفارى فى المحميات الطبيعية وتشوف اكبر خمس حيوانات فى افريقيا المعروفين بالـ Big Five وده بيكون موجود فى برنامجنا هناك .
4 – الميكس العجيب بين افريقيا واوروبا .
انت هناك فى جنوب افريقيا بتحس انك فى ميكس عجيب اوى بين الحضارة الافريقية سواء فى الناس او اللبس او جو السفارى وما بين الحضارة الاوروبية سواء برضه فى الناس لإن فى نسبة كبيرة من سكان جنوب افريقيا من أصل اوروبيين او سواء فى الشوارع والمبانى لانهم على الطراز الاوروبى .

4 – تغيير الجو .
جنوب افريقيا بما انها فى نص القارة الجنوبى فالجو فيها بيكون عكسنا ،، يعنى لو احنا فى فصل الصيف هما بيكونوا فى فصل الشتا او العكس .
وده المعنى الحقيقى انك تكون عايز تصيف فى مكان جوه حلو واظن مافيش اكتر من كده جو مناسب انك تصيف يعنى فى عز الولعة هنا فى شهر 7 و 8 هناك فى جنوب افريقيا بيكون الجو ربيعى .

5– الأكل الحلال
كتير مننا لما بيسافر اوروبا او اى دولة اخرى غير اسلامية بيدور على الأكل الحلال بصعوبة وبما ان جنوب افريقيا فيها نسبة مسلمين سواء كانوا من البلد نفسها او مقيمين وخصوصا انها بتحتضن ناس من جنسيات كتير فهناك بنلاقى الأكل الحلال بسهولة ومحطوط العلامة الشهيرة اللى عليها جملة ( حلال ) بالعربى .

6 – الادرينالين
جنوب افريقيا من الاماكن اللى فيها العاب الادرينالين كتير للناس اللى بتحب الجو ده بتاع المغامرات والأكشن يعنى فيها abseiling و ziplining و paragliding و غطس مع التماسيح والقروش مافيش اكتر من كده ادرينالين .

15/07/2022

#تأشيرة #المغرب 🇲🇦
البوست ده هتكلم فيه عن تأشيرة المغرب من السفارة وايه الأوراق المطلوبة ومواعيد التقديم والاستلام.
◾️نبدأ بالمواعيد:
التقديم بيكون يومى الأحد والأربعاء من كل اسبوع من الساعة 9 صباحا حتى 2 ظهرا. ويفضل تروح من بدرى جدا عشان تحجز دور فى الطابور خاصة طابور الرجال.
الاستلام بيكون يومى الأثنين والخميس من الساعة 2 حتى الساعة 4 عصرا.

◾️طيب إيه الأوراق المطلوبة؟
- باسبور يكون فيه صلاحية لمدة 6 شهور.
- صورة الباسبور.
- صورة البطاقة الشخصية.
- صورتين شخصيتين 4*6 بتاريخ حديث.
- كشف حساب بنكى مختوم لأخر ست شهور.
- جواب HR Letter مختوم وممضى من المكان اللى بتشتغل فيه.
- حجز فندق مبدئى.
- حجز طيران مبدئى.
- تأمين سفر ( Travel Insurance )
- برنت تأمينات ( بتكون من مكتب التأمينات اللى تابع ليها مكان شغلك)
لو صاحب عمل بتجيب سجل تجارى وبطاقة ضريبية.
◾️حاجات مهمة تاخد بالك منها :
- فى حالة انك طالب هتحتاج إثبات قيد من الجامعة او المدرسة.
- لو معاك اطفال هتحتاج موافقة من الأب بسفر الابناء فى الشهر العقارى.
بالنسبة للأزواج هيحتاجوا عقد زواج ويكون بإصدار حديث تقدر تروح تجدده عادى فى الشهر العقارى.
- خد بالك كشف الحساب لازم يكون عليه حركات سحب وإيداع كتير.

13/07/2022

أخيرا الخبر اللى كنا مستنيين تأكيده بشكل رسمى
تأشيرة المغرب دلوقتى بقت اونلاين بس بشرط لو معاك تأشيرة شنجن او انجلترا او امريكا او استراليا او نيوزلندا او ايرلندا تقدر تاخد تأشيرة المغرب اونلاين.
التأشيرة العادية بتاخد 3 أيام عمل بتكلفة 770 درهم يعنى حوالى 1400 جنيه مصرى.
والتأشيرة المستعجلة بتاخد يوم واحد عمل بتكلفة 1100 درهم يعنى حوالى 2200 جنيه مصرى .

اجراءات التقديم لتأشيرة المغرب العادية فى السفارة هتنزل فى بوست منفصل ان شاء الله.

01/07/2022

خلونى اعترفلكوا بحاجة تبان انها بسيطة بس الحقيقة انها مهمة جدا فى عصر السوشيال ميديا والبلوجلرز والانفلونسرز والترافلرز وكل المسميات الجميلة دى.
قبل الكورونا كنت بروح للمغرب تقريبا ٦ مرات فى السنة ومافيش مرة تقريبا فكرت انى اتصور لنفسى صور شخصية مع مكان تاريخى او حاجة تبان انها فى المغرب .. ولما جت جائحة كورونا ومعاها جائحة البلوجرز والترافلرز لقيت ان عندى محتوى كتير جدا وفقا لتجاربى فى المغرب بس ماعنديش صور كده ابروزها مع البوست سواء وانا ماشى فى الشارع او باكل طاجين او ماسك براد شاى مغربى بصب كوباية شاى او داخل الحمام.
كل ده ماكنتش عامل حساب فى يوم من الأيام انه هيكون فى أحياناً كتير مطلوب فى شغلى.
المهم بقى انا رجعت للمغرب تانى وبعون الله مافيش شارع همشى فيه الا وهصور فيه نفسى وانا ماشى ووانا بضحك مع الناس الغلابة او بلعب مع العيال الصغيرة فى الشارع ده غير الاستوريز والريلز والبوم رانج.
استحملوا بقى

15/06/2022

ناس كتير لما بتشوف برنامج المغرب بتسألنى ليه مش عامل ليلة إقامة فى كازبلانكا ؟
من زمان وانا نفسى اعمل البوست اللى اوضح فيه ليه كازبلانكا مش بناخد فيها اقامة لما بنزور المغرب.
دايما ببقى عند رأيى إن كازبلانكا تعتبر أقل المدن السياحية فى المغرب وهى شبيهة شوية للقاهرة مع العلم إن القاهرة فيها حاجات كتيرة جدا تتعمل.
كازبلانكا مافيهاش مزار غير مسجد الحسن الثانى اللى ممكن يعجب المصريين وهو يعتبر أكبر مسجد فى افريقيا تم بناءه سنة 93.
فطبعا من وجهة نظرى المتواضعة ان مالهاش أى ميزة إنى اقعد ليلة فى كازبلانكا مخصوص فى حين انى ممكن اشوف مدن تانية غير كازبلانكا لو وفرت الوقت اللى هقعده فى كازا.
◾️المهم بقى فى رحلتنا الجاية للمغرب يوم 28 يونيو كان المفروض ان رحلة العودة من المغرب تبقى 7 يوليو مساء ومصر للطيران لغت رحلة العودة وأصبحت 8 يوليو صباحا ، فطبعا هكون مضطر ولأول مرة اننا ناخد اقامة ليلة فى كازبلانكا.
البوست اللى جاى بقى ان شاء الله هوضح مزايا اننا ناخد ليلة فى كازبلانكا

16/04/2022

دلوقتى ميعادنا مع الفقرة اللى بحبها شخصيا وهى فقرة الاسئلة والأجوبة الخاصة برحلة لبنان 😍 🇱🇧

هقولكوا الاسئلة الشائعة اللى قابلتنى الفترة اللى فاتت واجابتها.

◾️الوضع فى لبنان أخباره ايه دلوقتى؟
الوضع مستقر تماما ومافيش أى مشكلة بالنسبة للسياحة بالعكس دى أفضل الفترات اللى نقدر نسافر فيها بسعر كويس جدا وفى نفس الوقت بندعم السياحة عند إخواتنا اللبنانيين.

◾️الرحلة ميعادها امتى؟
من 3 لـ 8 مايو يعنى تانى يوم العيد.

◾️ احنا هنسافر على طيران ايه ؟ ومواعيد الطيران امتى؟ ووزن الشنط؟
طيران الخطوط اللبنانية Middle East والسفر يوم 3 مايو الساعة 10 صباحا وروجوع 8 مايو الساعة 6 مساء ، يعنى من الأخر هنستفيد باليومين بتوع السفر ومش هيضيعوا علينا.

◾️فندق الإقامة ؟
الفندق هو Gems Hotel وهو موقعه فى الحمرا فى مكان مميز جدا ويقرب من صخرة الروشة 5 دقايق مشى.

◾️التأشيرة متطلباتها ايه وتكلفتها كام؟
التأشيرة مالهاش أى متطلبات بس مجرد بتبعتلنا صورة الباسبور نحجز التذكرة وتكلفة التأشيرة 20 دولار فى مطار لبنان.

◾️هل لازم يكون معايا 2000 دولار؟
لا مش لازم ،، ممكن 1000 دولار كفاية ماحدش بيعد الفلوس تماما وطالما تابع جروب بيكون الموضوع سهل ماتقلقوش.

◾️لو مكتوب فى باسبورى حاصل على محتاج تصريح أمنى؟
لا مش محتاج أى تصاريح ، فقط لو فى شباب فى سن التجنيد بيطلعوا تصريح السفر الخاص بالجيش.

◾️هناخد معانا قد ايه يكفينا هناك فترة الرحلة؟
ممكن كل شخص 200 دولار هتكون كفاية اوى ، لإن سعر الوجبة هناك بيتراوح من 60 لـ 120 جنيه مصرى يعنى الأسعار زى مصر تقريبا.

◾️ هنروح أماكن فيها تلج؟
لو جه ميعاد رحلتنا وفى تلج لسة فى منطقة فاريا أكيد هنروحه.

23/03/2022

ملحوظة : هذا البوست غير دعائى 🙄
رحلة المغرب ( 𝐅𝐔𝐋𝐋𝐘 𝐁𝐎𝐎𝐊𝐄𝐃 )

- الحمد لله رحلة المغرب فى عيد الفطر عددها أكتمل ومش بقول كده كنوع من أنواع الدعاية والله لكن بجد انا بعتذر فعلا لكل الناس اللى كانت حابة تحجز ومالحقتش أماكن لكن ممكن ينضموا لينا فى رحلتنا الجاية يوم 24 يونيو.

- أو لو حابين اننا نعمل جروب تانى بعد جروب العيد مباشرة فى أقرب وقت ممكن انتوا اللى هتحددوا ساعتها بحيث ان لو جمعنا عدد أكتر من عشر أفراد خلاص هنحدد ميعاد ونحجز تذاكر الطيران والفنادق ونفس البرنامج بتاعنا العادى .

⚠️رحلات المغرب علي مدار السنة كــلها هتكون جاهزة خلال أيام بسيطة.

فى النهاية بس فى حاجة عايز أقول شكرا أولا لكل العملاء اللى اشتركت معانا فى الرحلة وأول ما حصل الزيادة فى سعر الدولار كلمتهم وبلغتهم ان للأسف هيكون فى فرق بسيط فى تمن الرحلة وكلهم وافقوا وكانوا متفهمين جدا الموقف بالعكس شوفت منهم دعم جامد جدا فى الظروف دى وكان بيتقال بالنص شوف الفرق كام ولا يهمك واحنا معاك (ودي اهم حاجة في اي خدمة انت بتقدمها هي ثقة العملاء فيك وفي شغلك و في تنظميك للسفر) 😍

حابب أقول شكرا برضه لكل الناس اللى كانت واثقة فيا واللى كانت بترشحنى بكل ثقة لأصدقائهم اللى حابين يطلعوا المغرب، انا فعلا ماكنتش متخيل ان مجهود سنين فى المغرب هلاقى نتيجة تعبه أول لما الدنيا ترجع تانى بالشكل ده.

انتظرونا فى رحلة عيد الفطر ان شاء الله من المغرب.

21/03/2022

مين جاهز يقضى معانا رحلة العيد فى 10 مدن مغربية؟ 🇲🇦 🇲🇦
رحلتنا للمغرب مختلفة تماما عن اى مكان تانى ، احنا فى عشر ايام هنزور عشر مدن مغربية ،
📍هنزور مراكش – فاس – مكناس – افران – شفشاون – أقشور – تطوان – طنجة – الرباط – كازبلانكا .
كل مدينة فى المغرب ليها روح وطابع مميز مختلف عن المدينة اللى قبلها بتحس انك فى مزيج بين الاندلسى والامازيغى والعربى والأوروبى فعليا بتشوف كل حاجة فى المغرب .
عشان كده قررنا أول ما المغرب رجعت تانى للسياحة اننا نعمل رحلتنا فى العيد .
🛫 تاريخ الرحلة : 4 - 13 مايو 2022 | وسعر الرحلة يشمل الآتي:
✅تذاكر الطيران (القاهرة-كازبلانكا-القاهرة) .
✅ الإقامة في فنادق 3 نجوم بالأفطار.
✅ جميع الإنتقالات من المطار للفندق والعكس.
✅مشرف متاح طوال ايام الرحلة .
🏄 متاح برنامج سياحي إضافي يشمل جميع الرحلات وتذاكر الدخول المزارات في المغرب🇲🇦
تفدروا تتواصلوا معانا علشان نبعتلكم تفاصيل الرحلة عن طريق أرقامنا:
01008579164
01065520008
او علي طريق الواتسأب : wa.link/gd16ur
أو تزورونا فى مقر شركة (فور دايمنشينز - 4Dimensions حاصلة علي رخصة (أ) سياحية برقم 1845)
العنوان : 31 شارع الامام على – ميدان الاسماعيلية – مصر الجديدة.

11/03/2022

بمناسبة ان المغرب فتحت، دايما بيقابلنى سؤال عن الشوبينج فى المغرب وإيه اللى نقدر نشتريه من هناك بسعر كويس.
طيب هو مبدئيا فى حاجات كتير جدا تقدروا تشتروها من هناك بأسعار حلوة جدا جدا وأرخص بكتير من اللى موجود فى مصر وكل يوم هنزل بوست عن جزء جزء خاص بالشوبينج لإن لو كتبت كل اللى تقدروا تشتروه من المغرب فى بوست واحد مش هيكفى.

◼️ هنبدأ انهردة بمنتجات الجلود الطبيعية واللى بيكون ليها نصيب الأسد من الشوبينج.

◼️ طبعا ماينفعش تروح فاس وماتجيبش منتجات جلود لإن فاس أصلا معروفة بمدابغ الجلود وأكبر مدينة بيصنع فيها منتجات الجلود الطبيعية سواء شنط او احذية او جواكت جلد بأسعار تحفة ،، هناك ممكن تشترى جاكيت جلد طبيعى بما يعادل 900 جنيه اللى بيتباع هنا ب 3000 جنيه حرفيا بدون مبالغة .. ممكن تشترى شنطة جلد طبيعى فيها شغل هاند ميد بما يعادل 400 جنيه بتتباع هنا فى مصر ب 1500 جنيه ،، بتبقى فرصة كويسة جدا ان الواحد يشترى منتجات جلود بأسعار تحفة.

◼️عشان كده مدينة فاس هى واحدة من ضمن عشرة مدن هنزورها فى رحلتنا للمغرب فى عيد الفطر وعشان هى أكتر مدينة مشهورة بالشوبينج عملنا فيها الاقامة 3 ليالى إلى جانب طبعا البرنامج السياحى خصصنا الجولة الحرة من يومنا هناك للشوبينج 😍

08/03/2022

من شهر كنت نزلت البوست ده عن الرياض المغربى وماكنتش أعرف إنى خلاص راجع تانى فى العيد 😍

07/03/2022

الناس بتوع المزاج وكوباية الشاى فين يجمعوا هنا لو سمحتوا😎
تقريبا مافيش حد عرف انى مسافر سريلانكا إلا وقالى هاتلنا شاى معاك.
ماكنتش مدرك أوى الصراحة قيمة الشاى السريلانكى وقد إيه الناس بتطلبه مخصوص لغاية ماروحت هناك ودوقته وكان ليا الحظ انى ادخل جوة مزارع الشاى واقطفه بنفسى واشوف كمان إزاى بيتصنع.
ويومها شربت أجمل كوباية شاى فى حياتى تقريبا والمزاج بقى عالى جدا وفوقت للجروب اللى معايا 😂
مزارع الشاى فى سريلانكا بجد من الأماكن اللى لازم تروحوها وهى منتشرة أكتر فى الطريق بين مدينة كاندى ونوارا إليا احنا على طول شايفين المزارع على الجبال يمين وشمال الطريق فى منظر خيالى.
بجد سيرلانكا من البلاد اللى فعلا ربنا إداها طبيعة ساحرة فى كل حاجة😍

06/03/2022

وأخيراا جه البوست المنتظر بقاله سنتين وانا بحلم أكتبه 😍💃💃
المغرب رجعت تانى يا بشررر 🇲🇦🇲🇦
انهردة رسمياً اول يوم يتم فيه استقبال طلبات التأشيرات السياحية فى سفارة المغرب بالزمالك.
وبما ان ناس كتير جدا كانت بتسألنى الفترة اللى فاتت عن المغرب فحابب أقولكوا خلاص تقدروا دلوقتى تسافروا المغرب.
◾️طيب عنوان السفارة فين؟
10 شارع صلاح الدين فى الزمالك خلف ساقية الصاوى وحديقة الأسماك.
◾️التقديم إمتى؟
التقديم يومى الأحد والأربعاء من كل أسبوع الساعة 9 صباحاً.
◾️ايه الأوراق المطلوبة؟
- طبعا أصل الباسبور وصورتين شخصيتين 4*6 خلفية بيضاء.
- كشف حساب بنكى أخر 3 شهور.
- خطاب مختوم من جهة العمل (Hr Letter).
- برينت تأمينات ودى ورقة بعشرة جنيه بتجيبها من المكان اللى شركتك مأمنة عليك فيه مابتاخدش بالظبط خمس دقايق وانت واقف.
- لو عندك شغلك الخاص بتجيب سجل تجارى وبطاقة ضريبية.
- حجز فندق مبدئى.
- حجز طيران مبدئى.
- وثيقة تأمين على السفر ( Travel Insurance )

دى كل متطلبات التأشيرة الخاصة بالسفر للمغرب 🇲🇦

مين ناوى ييجى معايا طلعة العيد فى عشر مدن مغربية؟ 😍

22/02/2022

دا فيديو لسبوع توأم أفيال اتولودا اول امبارح 😂
رحلتنا في سيرلانكا مليانه انبهارات غير طبيعية 🇱🇰 🇱🇰

20/02/2022

سيجريا
لو هختار إسم لليوم بتاع انهردة هسميه اليوم العالمى للكل حاجة.
اليوم عبارة عن سفر وهايكنج وتسلق جبال وسفارى فى نفس ذات الوقت.
احنا طلعنا من كولومبو لسيجريا وبدأنا يومنا بزيارة صخرة بندرجولا المقابلة لصخرة سيجريا.
بندرجوالا هى نسبياً أسهل من سيجريا وأرخص، التذكرة بحوالى ٥ دولار وفى نفس الوقت بتكون شايف المنظر بتاع صخرة سيجريا اللى هو يعتبر المنظر الأساسى فى سريلانكا.
سيجريا عبارة عن ١٢٠٠ سلمة وتذكرتها ٢٥ دولار وبتاخد وقت أطول .. الفيو اللى بتشوفه من فوق حلو وكل حاجة بس انت كده مش شايف المنظر الأساسى لإنك جواه.
بعد ما بنخلص تسلق الصخرة وبننزل بنطلع نعمل سفارى أفيال وفرق الوقت ما بينهم حوالى ١٠ دقايق بالعربية.
اخدنا عربيات السفارى وعملنا جولة ساعتين جوة محمية الأفيال وطبعا كنا بنقف نتصور قدم كل مجموعة أفيال وفعلا ماكناش عايزين نروح حرفيا بسبب كائن الفيل الجميل ده اللى تحس انه غلبان كده وفى حاله وعاطف السكرى فى نفسه أوى 😂
سيجريا بجد بجد اليوم يستاهل انك تعمله فى برنامجك لسريلانكا.
بكرة بقى هبقى أقولكوا ايه النظام فى كاندى .. ابقوا معنا 😃

19/02/2022

خلونى اعترفلكوا اعتراف مهم بالنسبالى
قبل ما اجى سريلانكا كان عندى رهبة بعض الشئ رغم إن الواحد خلاص اتعود على السفر بس كانت الرهبة دى موجودة لإننى من النوع اللى ممكن اكتئب لو أى حاجة غريبة جربتها وماعجبتنيش لإنها ممكن تسيب بالنسبالى ذكرى سيئة.
لكن اللى حصل فى أول يوم ليا فى سريلانكا كان عكس كل التخوفات اللى عندى والرهبة اللى كانت موجودة من إنى اشوف مجتمع جديد غير مألوف بالنسبالنا مثلا انك تشوف ناس باللبس التقليدى ده او انك تمشى فى شوارع مليانة معابد وتكاتك.
أنا بجد مبسوط جدا من التجربة ومبسوط إن خلاص النفس والروح اتعودوا إنهم يعرفوا ويشوفوا حاجات جديدة سواء مجتمعات أو أماكن وإن بجد بجد من أكتر الحاجات اللى اتعلمتها من السفر هى انك لازم تعرف انك مش عايش لوحدك فى الكون ده ، فى ناس تانية كتير وثقافات مختلفة وديانات غريبة وعادات أغرب من الخيال بس كلنا فى الأخر بشر وكلنا فينا نفس الصفات الإنسانية اللى موجودة فى اى بنى أدم .. الفرح والحزن والحب والكره والهدوء والانفعال والطيبة والتسامح والعفو والمساعدة والعمل والجرى ورا أكل العيش أى كان البيئة اللى عايش فيها.
كلنا بشر وكلنا ولاد آدم وحوا بس ربنا اختار إن كل واحد ينشأ فى بيئة معينة بنفس الصفات اللى عايش بيها كل مخلوق على هذا الكوكب.
المهم اختصار اللى عايز أقوله خليك دايماً فاكر إنك مش عايش فى الكون لوحدك وفى غيرك كتير

01/02/2022

الفترة دى تقريبا عن المغرب أكتر ما بتسأل عن صحتى تقريباً.
بصوا انا مش هرد على أى حاجة دلوقتى غير فى الوقت المناسب، بس كده 😎
انا بس كل اللى هعمله دلوقتى انى هسيبكوا مع العظمة اللى انتوا شايفينها دى، ده بيبقى اسمه الرياض المغربى وهو مبنى على الطراز الأندلسى.
هناك بتحس براحة نفسية رهيبة وخاصة لما يبقى شغال فى المكان موسيقى أندلسى عظيمة بجد والله حاجة فوق الخيال.
الرياض اللى فى الصور ده بيكون مكان اقامتنا فى مدينة فاس المغربية المعروفة بروحانيتها العظيمة.
وبرضه مش هرد على تفاصيل المغرب غير فى الوقت المناسب 😂

31/01/2022

بما ان وجهتى القادمة ان شاء الله هى سيرلانكا
خلينى اقولكوا اكتر الاسئلة اللى بتسألها واجاباتها عشان تكون واضحة للكل.

• الجو أخباره ايه هناك؟
الجو صيفي شوية وأحيانا بيكون فى مطرعشان كده اللبس هيكون صيفى مع وجود جاكيت ووتر بروف.

• الأكل ايه نظامه هناك؟
الاكل السريلانكي عموما شبه الهندي شوية ، بس مش سبايسي و في مدن فيها كنتاكي و بيتزا و دومينوز للعاي
للى عايز ...باقي المدن اكل سياحي international زى الباستا و البيتزا .. وسعر الوجبة بيتراوح من 5 ل 8 دولار

• خطوط الموبايل بكام وهتدينا كام جيجا انترنت؟
الخط فى سيرلانكا ب ١٠ دولار تقريبا وبدينا ١٠ جيجا انترنت.

• ناخد معانا بوكيت مانى قد ايه ؟
ممكن من 200 ل 300 دولار دول هيكفوا الأكل ولو فى خروج فى كافيهات او حاجة كده وعلى حسب برضه هتشترى ايه فى الشوبينج.

• هنشوف الأفيال ولا لأ؟
هنشوف أكيد ودى من أجمل الرحلات فى سيرلانكا وبيكون متوسط 20 فيل فى السفارى وفى كمان نهر بنجوالا اللى بتنزل فيه الافيال عشان تستحمى.

• الشوبينج هناك ايه نظامه؟
الشاى اهم حاجة ومستحضرات التجميل الطبيعية زى الزيوت والكريمات الطبيعية وكمان فى أحجار كريمة وتوابل وبهارات .

ولسه في معلومات كتيرة عن سيرلانكا متقدرش تخلص ولا في 100 بوست.
انتظروا تغطية خاصة جدا من يوم 16 فبراير لـ 2 مارس من سيرلانكا.

28/01/2022

بما ان لبنان من الدول القريبة من مصر والسفر ليها بيكون سهل ومش محتاج تعقيدات على عكس ما الناس متخيلة، بقيت اتسأل اسئلة كتير عن لبنان هحاول انى اوضح اجابتها فى البوست ده.

هنبدأ بأهم سؤال اللى حير ملايين
• هو لازم يكون معايا 2000 دولار عشان اخد الفيزا ؟
بصوا هو رسمى اه ، لكن ليها حلول أولا ماحدش بيعدهم يادوب بس بيسألك رايح تعمل ومعاك الفين دولار ولا لأ، لو معاك بقى حد من صحابك أو حاجة ممكن تكملوا مع بعض الفلوس بحيث يوصلوا لألفين دولار واللى يخلص مع الموظف يدى الفلوس للى معاه وهكذا.
الموضوع بسيط ما تقلقوش

• طيب بالنسبة للعملة التعامل بيها بيكون بالدولار؟
لا خالص مين قال كده؟ انت بتحول دولارات من أى صرافة بسعر السوق السودا وهناك تقريبا أغلب المحلات بتغير عملة وبتتعامل بالليرة اللبنانى عادى جدا.

• ناخد معانا بوكيت مونى قد ايه يكفينا وتمن الوجبات قد ايه؟
طب مبدئيا الوجبة فى لبنان بتتراوح سعرها من 5 لـ 8 دولار يعنى ما يعادل من 60 لـ 120 جنيه مصرى تقريبا وبتبقى وجبة كويسة جدا.
وبخصوص البوكيت مونى ممكن تاخد معاك بقى اكل وشرب ومصاريف شخصية 200 دولار حلوين أوى أوى.

• خطوط الموبايل بكام وهتدينا كام جيجا انترنت؟
الخط فى لبنان بـ 5 دولار وبما يعادل 80 جنيه تقدر تشحن 5 جيجا انترنت ومكالمات 60 دقيقة .

•لسة فى مشكلة كهربا؟
لو نازل فى فنادق أربع نجوم مابتحسش تماما بالمشكلة دى لانهم عندهم مولد الكهرباء ( جينريتور ).

• الشوبينج هناك ايه نظامه؟
فى شارع الحمرا اهم المحلات والبراندات وفى براندات بيكون سعرها أرخص من مصر.

31/12/2021

مع نهاية سنة 2021 لما جيت راجعت أحداث السنة لقيت انها حقيقى كانت سنة مثمرة رغم صعوبتها ومن بداية الكورونا حتى الآن لم نتعافى بشكل كامل ولكن بنحاول.
عشان كده التجربة الأصعب هى الأمتع لما بتجنى ثمارها وبتشوف نتايجها فى الأخر.
بالنسبالى سنة 2021 باختصار هى أكتر سنة عافرت فيها عشان أقدر استمر وأكمل فى الظروف دى ولكن طبعا مافيش طريق بمشى فيه لوحدى .
غشان كده حابب أقول شكرا لكل تجربة جديدة مريت بيها عرفتنى بناس جديدة وشكرا لكل اللى كان بيشجعنى فى خلال السنة دى سواء من خلال المتابعة او من خلال التشجيع الخاص وشكرا لكل زمايلى اللى ساندونى فى خلال الفترة اللى فاتت واللى الحقيقة الواحد من غيرهم مايقدرش يمشى فى طريقه لوحده.
سنة 2021 زرت فيها 3 دول بالترتيب : جنوب افريقيا - كينيا - لبنان.
بتوفيق ربنا شاركت بتننظيم 7 رحلات خارجية على مدار السنة، 3 رحلات فى جنوب افريقيا و4 رحلات فى لبنان.
اتمنى 2022 يكون فيها أماكن جديدة وتجارب مختلفة وان شاء الله هيكون قريب فى بلاد هتعجبكوا.
المهم بقى انى حابب أسمع رأيكوا ومقترحاتكوا سواء فى بلاد جديدة عايزين نعمل ليها رحلات أو اقتراحات للصفحة عامة والمحتويات اللى حابين انها تكون موجودة على الصفحة.
كل سنة وانتوا طيبين جميعا ويارب كل سنة فى صحة وسعادة.

13/12/2021

ليه عاملين رحلة لبنان فى الكريسماس مش فى راس السنة؟ 🤔
الحقيقة السؤال ده بيقابلنا أحياناً وعشان أكون صريح معاكوا خلونى أقولكوا ليه فضلنا اننا نعمل لبنان فى التوقيت ده تحديدا.
🎄 احتفالات الكريسماس.
من المعروف ان العيد الأساسى فى لبنان واللى بيحتفلوا بيه بيكون يوم 24 ديسمبر مساء ( ليلة يوم 25 ) وده الللى بيكون الميعاد الأساسى وليه أجواء احتفالية خاصة جدا عشان كدة عملنا حسابنا اننا نقضى سهرة العيد فى مدينة البترون واللى بيكون ليها اجواء مميزة فى الكريسماس هنعمل ليها بوست مخصوص.
💸 الأسعار : من المعروف ان فترة راس السنة فى أى مكان فى العالم السعر بيعلى بشكل عالى جدا ممكن يوصل للضعف! طيب مانا ممكن احضر نفس الأجواء الاحتفالية وبسعر أقل بكتير بحيث ان سعر الرحلة بالنسبة للناس مايزيدش.
📅 الأجازات : لما جينا فكرنا فى البداية اننا نعمل رحلة فى راس السنة لقينا الناس بتتكلم على انهم عايزين الرحلة تكون فى أخر ديسمبر عشان عندهم رصيد أجازات لسة ماخلصش فى 2021 عايزين يخلصوه وفكرنا فيها لقينا انها فكرة مناسبة جدا ولما قررنا اننا نعملها فى الكريسماس بالفعل الناس اشتركت معانا وكانت فكرة مميزة الحقيقة.
عشان كده فى النهاية طلعت رحلتنا فى فترة الكريسماس من يوم 23 لـ 28 ديسمبر بنفس السعر القديم 😍
🛫 تاريخ الرحلة : 23 - 28 ديسمبر 2021 | وسعر الرحلة 8,500 جنيه ويشمل الآتي:
✅تذاكر الطيران من القاهرة إلى بيروت والعكس .
✅ عمل اختبار الـ PCR فى مطار بيروت .
✅ الإقامة في فندق أربع نجوم بالأفطار.
✅ جميع الإنتقالات من المطار للفندق والعكس.
✅مشرف متاح طوال ايام الرحلة .
🏄 متاح برنامج سياحي إضافي يشمل جميع الرحلات وتذاكر الدخول المزارات وركوب التلفريك ومرشد سياحى لبنانى.
تفدروا تتواصلوا معانا علشان نبعتلكم تفاصيل الرحلة عن طريق أرقامنا:
01008579164
01065520008
او علي طريق الواتسأب : wa.link/gd16ur
أو تزورونا فى مقر شركة (فور دايمنشينز - 4Dimensions حاصلة علي رخصة (أ) سياحية برقم 1845)
العنوان : 31 شارع الامام على – ميدان الاسماعيلية – مصر الجديدة.

06/12/2021

الرحلة دي للناس اللي عندها رصيد أجازات في 2021 😎 هات باسبوك وشنطتك وتعالي معانا.
هتقدر تسافر معانا وتخلص اجازتك براحتك وهتلحق احتفالات راس السنة في لبنان 🇱🇧 🇱🇧
بعد نجاح رحلاتنا علي مدار الشهور الأخيرة فى لبنان قررنا نعمل جروب في نهاية شهر ديسمبر علشان اللي لسه عنده رصيد اجازة يسافر معانا ، هنعمل جروب تانى هنلف فيه لبنان كلها فى 6 أيام ببرنامج هنلف فيه لبنان كلها.
🛫 تاريخ الرحلة : 23 - 28 ديسمبر 2021 | وسعر الرحلة يشمل الآتي:
✅تذاكر الطيران من القاهرة إلى بيروت والعكس .
✅ عمل اختبار الـ PCR فى مطار بيروت .
✅ الإقامة في فندق أربع نجوم بالأفطار.
✅ جميع الإنتقالات من المطار للفندق والعكس.
✅مشرف متاح طوال ايام الرحلة .

🏄 متاح برنامج سياحي إضافي يشمل جميع الرحلات وتذاكر الدخول المزارات وركوب التلفريك ومرشد سياحى لبنانى.
تفدروا تتواصلوا معانا علشان نبعتلكم تفاصيل الرحلة عن طريق أرقامنا:
01008579164
01065520008
او علي طريق الواتسأب : wa.link/gd16ur
أو تزورونا فى مقر شركة (فور دايمنشينز - 4Dimensions حاصلة علي رخصة (أ) سياحية برقم 1845)
العنوان : 31 شارع الامام على – ميدان الاسماعيلية – مصر الجديدة.

19/11/2021

الناس تروح لبنان تفطر تبولة-فتوش- لبنة ، انما كبدة على الصبح دى بقى اللى ماشوفتهاش قبل كده 😂
ودى ميزة بقى ان يكون معاك متابع كويس أوى أماكن الأكل المميزة فى دول كتير زى رانى Rani Soudy
صاحى فى آمان الله عادى ونازل افطر فى الفندق لقيت رانى بيقولى انت رايح فين تعالى اوديك عند مطعم جامد أوى اسمه السوسى.
أخدنا بعضنا ومشينا كيلو ونص تقريبا على الريق كده عشان نوصل للاكتشاف العظيم ده فى منطقة اسمها الزيدانية فى بيروت وفعلا المكان يستاهل أوى.
انت هناك بتاكل أكلة اسمها كبدة سودة بتتشوح قدامك بالبصل وأكلة تانية اسمها بيض قاورما بتكون لحمة مفرومة بالبيض زى البسطرمة بالبيض فى مصر كده والخليع فى المغرب ( أيوة هو اسمه خليع 😂 ) ده غير بقى طبق فتة فيه عيش لبنانى محمر ورز وتوم وعليهم شوربة حاجة كده من الأخر :D
انا يا جدعان عايز افطر تانى عند السوسى 😋

Address

31 El Imam Ali Street, Heliopolis-Cairo-Egypt Cairo, Cairo Governorate
Heliopolis

Telephone

+201008579164

Website

facebook.com

Alerts

Be the first to know and let us send you an email when محمود فخرى - Mahmoud Fakhry posts news and promotions. Your email address will not be used for any other purpose, and you can unsubscribe at any time.

Contact The Business

Send a message to محمود فخرى - Mahmoud Fakhry:

Videos

الحمد لله بعد جولات وصولات كتير فى دول مختلفة قررت أخوض تجربة الرحلات بشكل بروفيشنال أكتر وكواليتى أفضل ومكان فيه جميع الخدمات السياحية اللى تقدر تساعدنى فى شغلى وتنافس فى سوق السياحة بكل أريحية وتميز . قررت انى انفذ التجربة دى مع المكان اللى اتعلمت فيه وليا كل الفخر وهى شركة 4Dimensions وانا متحمس للتجربة دى جدا ومع اول رحلة أعلنت عنها ماكنتش متخيل ردود الفعل الغير طبيعية اللى جت من الاعلانات والرسايل اللى جاتلى على البيدج وعلى الواتس اب بيسألوا على الرحلات اللى جاية فاحنا بشكل مبدئى عندنا برا مصر لبنان وتركيا وروسيا ببرامج مختلفة جدا وجوة مصر عندنا مرسى علم وسيوة والنوبة برضه بشكل مختلف ومميز ده بالنسبة للرحلات الجماعية. اما الحجوزات الاندفيدوال والطيران والتأشيرات والانتقالات بنغطى أى مكان فى العالم حرفياً. تابعونا فى رحلاتنا الجاية وهتشوفوا بنفسكوا ردود الفعل بعد كل رحلة وتحكموا بنفسكوا 😍 #FindNewRoads #SummerTravel #summer2021 #TravelWithFakhry