11/10/2022
O Rosal bota unha ollada ao seu pasado coa celebración das II Xornadas de Patrimonio, unha serie de actividades para todos os públicos que se levarán a cabo durante os meses de outubro e novembro para dar a coñecer e por en valor o patrimonio rosaleiro e do Baixo Miño en todas as súas manifestacións, dende o material ao inmaterial, representado en gran parte polos cabaqueiros do Rosal.
As xornadas comezarán este mesmo martes 11 ás 20 horas no Centro Social Polivalente coa charla de Susana González Amado sobre ‘Cerámica para vivir e vivir da cerámica’. A ceramista, ceramóloga, divulgadora e docente achegará ao público a súa paixón por producir e ensinar, mais tamén por poñer en valor, estudar e investigar todo o referente a esta arte e ciencia, tanto na súa vertente artesanal e artística como na industrial e histórica.
González participa dende 2001 na implantación en Galicia dos primeiros estudos de Formación Profesional de Cerámica Técnica e colabora habitualmente na dinamización de museos como o de Oleiros e Brañas de Valga ou en eventos para poñer en valor os oficios do barro. De feito, será ela a pregoeira das Festas do Outono do Pilar o mércores 12 de outubro ás 18 horas.
Será precisamente dentro das Festas do Outono do Pilar que se celebrarán os días 11 e 12 as dúas primeiras actividades deste ciclo.
📍 Concello do Rosal