24/07/2024
КОНСУЛЫН СЭРЭМЖЛҮҮЛЭГ ‼️
📌Парис-2024 Олимп, паралимпын бэлтгэл ажлыг зохион байгуулагч орон дээд зэргээр хангаж, аюулгүй байдлыг хангах бүхий л арга хэмжээ авч буй боловч бусад олон улсын арга хэмжээтэй нэгэн адил иргэд халаасны хулгай, дээрэм зэрэг гэмт хэргийн хохирогч болох эрсдэл байсаар байна. Иймд олимпын наадмын үеэр иргэд та бүхэндээ хувийн аюулгүй байдлаа хангах үүднээс дараах зөвлөмжийг хүргэж байна:
📌Паспорт, баримт бичиг, их хэмжээний мөнгө, үнэт зүйлс зэргээ гадуур биедээ шаардлагагүй бол авч явахгүй байх. Тэмцээний бүсэд нэвтрэх үед бичиг баримт шаардлагатай. Баримт бичгийнхээ зураг болон унааны билет зэргийг цаасаар болон цахимаар гар утсандаа авах.
📌Эд зүйлсээ зочид буудлын өрөөний сейфэнд үлдээх, тийм сейф байхгүй бол тухайн зочид буудлаас аюулгүй хадгалах газар асуух. Танихгүй хүнтэй өрөө хуваахгүй байх.
📌 Нисэх буудал, вокзал, метроны буудал, дэлгүүр, жуулчид олноор цуглардаг газруудад явахдаа өндөр сонор сэрэмжтэй байх.
📌Жагсаал, цуглаан болж буй газруудаас зайлсхийх.
📌 Тэмцээний стадионд нэвтрэх журам, авч орохыг хориглох зүйлсийн жагсаалттай урьдчилан танилцаж, тэмцээн эхлэхээс 2 цаг орчмын өмнө очих. Тоглолт эхлэхээс 2 цаг 30 минут өмнө, дууссанаас 1 цагийн дараах хугацаанд стадионуудын эргэн тойронд хязгаарлалтын бүс тогтооно.
- Хамгаалалтын ажилтан, цагдаа, эргүүлүүдийн анхааруулга, шаардлагад хүндэтгэлтэй хандах.
📌Хот дээгүүр дрон нисгэх хориотой байдгийг анхаарах.
- Орой үдшийн цагаар ганцаар явахаас зайлсхийх.
- Автомашинаа хүний нүднээс далд тавих, дотор нь анхаарал татах тор, цүнх, ачаа зэргийг ил үлдээх зэргээс зайлсхийх.
Хэрэв гэмт хэргийн хохирогч болсон тохиолдолд ойр буй хамгаалалтын ажилтан, эргүүлд яаралтай мэдэгдэж, хамгийн ойр буй цагдаагийн нэгжид мэдүүлэг гаргах шаардлагатайг онцгой анхаарна уу.
ЭСЯ-ны Консулын хэлтэс Олимпын наадмын үеэр хэвийн хуваариар буюу ажлын өдрүүдэд 14.00-17.00 цагийн хооронд ажиллана.
ЭСЯ-ны онцгой нөхцөл байдалд ашиглах утасны дугаар +33 (0)7 81 22 52 70
