15/06/2021
✨ ყველა სახლს თავისი ისტორია და თავგადასავლები აქვს. დღეს არ ვისაუბრებ სახლის გაქირავების დეტალებზე, რამდენი ადამიანი ეტევა, სად არის, ან რა ღირს.
💥 დღეს მოგიყვებით, როგორ გახდა ეს ადგილი ჩვენთვის ყველაზე ღირებული და მნიშვნელოვანი.
ჯერ კიდევ 17 წლის წინ, მემგონი გრიგოლეთის არსებობა არავინ იცოდა, ან იცოდა, მაგრამ როგორც კურორტი არ არსებობდა. დედაჩემი, ჰაერის, სივრცის და წყლის განსაკუთრებული მოყვარულია.. ამიტომ ყოველთვის ოცნებობდა, ზღვაზე ჰქონოდა სახლი. დიდ სიყვარულს და ადამიანების სურვილს დიდი ძალა აქვს, ამაში მაშინ დავრწმუნდი, როცა ქორწინების 20 წლის თავზე მამამ დედას ზღვაზე სახლი აჩუქა! საკუთარი ხელებით, საკუთარი შრომით, ზღვა ენერგია ჩადო ამ სახლის აშენებაში და კი, დედაჩემს აჩუქა. ❤️
მას მერე, 17 წელიწადია ზაფხულის მთელ დროს ამ სახლში ვატარებთ, მთელ ჩვენს სანათესაოს, სამეგობროს და უამრავ სხვა სტუმარს გაუძლო, რაღაცნაირად, მეგობრული, თბილი, სიკეთით სავსე გარემო შეიქმნა და უკლებლივ ყველასთვის, ერთ - ერთ საუკეთესო მოგონებად იქცა.
მართლაც უცანურია, სახლებს რომ თავისი ისტორია, თავისი აურა აქვს, აურა რომელიც ყოველთვის, პირველივე წამებში იგრძნობა და განცდები, რაც პირველივე დანახვისას თუ შეხებისას გიჩნდება, არასდროს კარგავს ძალას.
დიდი ხანი არ არის, რაც სახლის გაქირავება დავიწყეთ, თავიდან ძალიან რთული აღმოჩნდა, სხვა, სრულიად უცხო ადამიანების დანახვა შენს სახლში, სადაც წლების მანძილზე, მხოლოდ შენთვის საყვარელი ადამიანები იყრიდნენ თავს. მაგრამ, საკმაოდ კარგი და მნიშვნელოვანი გამოცდილებაა ადამიანებთან ურთიერთობა! ხშირად, დამსვენებლების საუკეთესო მეგობრები ვხდებით და რაღაცნაირად, თითქოს ჩვენს კარგ, მზიან, კეთილ ნაწილებს ვუზიარებთ. სხვათაშორის, ამ ყველაფერზე ფიქრი მაშინ დავიწყე, როცა სხვადასხვა გარემოში, მეგობრებთან ერთად დასვენება დავიწყე და სულ ვაკვირდებოდი, როგორი იყო ჩემი ძვირფასი შვებულება, ამა თუ იმ სახლში და მივხვდი, რომ ადამიანების ამოცნობა, სწორედ რომ მათივე სახლებიდანაა შესაძლებელი.
სწორედ ამიტომ, დიდი მნიშვნელობა აქვს იმას, თუ სად მიდიხარ, ვისთან მიდიხარ, როგორი ადამიანების გარემოცვაში ხვდები და როგორია შენი დასვენება მაშინ, როდესაც ქალაქის გადატვირთულ გრაფიკს, სამსახურის ბევრ საქმეს, ყოველდღიურ რუტინას წყდები და სადღაც, შენი კომფორტი უნდა იპოვო, პატარა თავგადასავალი შექმნა, რომ სულ მცირე დასვენებაც კი, ყველაზე მნიშვნელოვან მოგონებად დარჩეს.
