24/12/2024
*** *** ***
სიბნელის კალოზე ცოდვები ეყარა,
დღეა და ბოგინობს ღამე,
აღსდექი ლაზარე, იხრწნება ქვეყანა,
"ლაზარე, გამოვედ გარე!"
წმინდანთა ცრემლები ადიდდა მდინარედ,
ღმერთო შენ მოეცი ძალა,
მიმოდის სატანა პირ–სახე–მცინარედ,
ლაზარე, აღსდექი ჩქარა!
მისხალი აღარ არს კრძალვისა და რიდის,
მიწავ გადიხსენი ბარემ,
სანამდე "ქართველი" ყველაფერს გაყიდის,
"ლაზარე გამოვედ გარე!"
დედა დაგვიღონდა, მადლი იგვიანებს,
ამდენ ტკივილებს რა დასძლევს,
იქნებ უსაშველო ერს ბილწსიტყვიანებს,
დედის მგინებელს და მლანძღველს.
ჰოი, რა ძვირია ახლა გადარჩენა,
გვჯერა უსათუოდ მოხვალ,
აღსდექ ლაზარე და, იყოს განაჩენი,
ქრისტეს მეგობარო ხომ ხარ?!
საით მიგვაქანებს გზები არნათელი,
ღამეს განდგომია მთვარე,
ვსტირით საქართველოს გახრწნილ–გადათელილს,
"ლაზარე გამოვედ გარე!"
კართან გაბრიელი დგას და გელოდება,
წმიდანს გულზე აწევს ლოდი,
ნუთუ ისტორია მართლა მეორდება,
აღსდექ ლაზარე და მოდი!
სიბნელის კალოზე ცოდვები ეყარა,
დღეა და ბოგინობს ღამე,
აღსდექი ლაზარე, იხრწნება ქვეყანა,
"ლაზარე, გამოვედ გარე!" - ნანა მეფარიშვილი
