07/10/2022
#তেজস্বিতা ৰ মৃত্যুৱে শেষ মৃত্যু হওক!
#মেডিকেল কলেজ আৰু উৰণীয়া সেঁতু নিৰ্মাণে উন্নয়ন নহয়৷
মাজুলীৰ তেজস্বিতা বৰুৱা । এটি প্ৰৱল সম্ভাৱনাময় প্ৰতিভাৰ নাম আছিল কণমানিজনী। চিকিৎসাৰ অভাৱত মাত্ৰ ১৪বছৰ বয়সতে কণমানি শিল্পীগৰাকীয়ে অকাল মৃত্যুক আকোঁৱালি ল’লে৷
শিল্পীগৰাকীৰ মৃত্যুৱে শোকাহত কৰিলে ৰাইজক লগতে ক্ষোভিত হোৱাও দেখা গ’ল৷ এই মৃত্যুৱে মাজুলী তথা অসমৰ এখন নগ্ন জীয়া ছবি দাঙি ধৰিলে৷ চৰকাৰৰ বিৰুদ্ধে এটা শব্দ ক’বলৈ ভয় কৰা ৰাইজৰ যেন ধৈৰ্য্যৰ বান্ধ চিঙিল৷ চৰকাৰ তথা স্বাস্থ্য বিভাগৰ বিৰুদ্ধে মুক্তভাৱে প্ৰকাশ কৰিলে নিজৰ বিষোদগাৰ৷
এই মৃত্যুৰ বাবে দায়ী কোন? চৰকাৰেও ৰাইজৰ ৰোষত পৰাৰ ভয়ত খৰখেদাকৈ চাকৰিৰ পৰা নিলম্বন কৰিলে মাজুলীৰ গড়মূৰ চিকিৎসালয়ৰ অধীক্ষক ডা° অমূল্য গোস্বামীক৷
এতিয়া প্ৰশ্ন হ’ল নিলম্বন অধীক্ষককে কিয়? নৈতিক দায়িত্ব স্বীকাৰ কৰি স্বাস্থ্যমন্ত্ৰী কেশৱ মহন্তই পদত্যাগ কিয় নকৰিলে? অসমৰ স্বাস্থ্যক্ষেত্ৰৰ পঁয়ালগা অৱস্থাৰ বাবে দায়ী অকল অধীক্ষকজন নহয় চৰকাৰ তথা স্বাস্থ্যমন্ত্ৰীজনহে৷
অসমৰ স্বাস্থ্যক্ষেত্ৰত উন্নয়ন হৈছে বুলি যি প্ৰচাৰ চলিছে,সেয়াও এক ভূৱা প্ৰচাৰৰহে অংগ,বাস্তৱ কিন্ত ওলোটা৷
অসমৰ ৰোগীয়ে বহিঃৰাজ্যলৈ চিকিৎসাৰ বাবে যাবলগীয়া হয়৷ কিবা টান নৰিয়াত পৰিলেই পৰিয়ালে ঘৰ-মাটি বিক্ৰী কৰি ৰাইজৰ পৰা সাহায্য বিচাৰিবলগীয়া হয়, এয়াই বাস্তৱ সত্য৷
আজিও অসমৰ স্বাস্থ্যক্ষেত্ৰ বিহাৰৰ দৰে অনুন্নত ৰাজ্যৰ দৰে পঁয়ালগা আৰু আন্তঃগাঁথনিশূন্য।
অসমত একেৰাহে প্ৰায় ১৫বছৰ স্বাস্থ্যমন্ত্ৰী আছিল বৰ্তমানৰ মুখ্যমন্ত্ৰী ড° হিমন্ত বিশ্ব শৰ্মা৷ আমি প্ৰশ্ন আচলতে মুখ্যমন্ত্ৰীক কৰিব লাগে,কিয় অসমৰ চৰকাৰী চিকিৎসালয়ত পৰ্যাপ্ত আইচিইউ আৰু বিছনাৰ অভাৱ! আন্তঃগাঁথনি উন্নত কৰাত কিয় ব্যৰ্থ হ’ল ড° হিমন্ত বিশ্ব শৰ্মা৷
অসমত যোৱা কেইটামান বছৰৰ পৰা মেডিকেল কলেজ আৰু হাস্পতাল নিৰ্মাণৰ কাম চলি আছে৷ এই কলেজ চিকিৎসালয়বোৰ নিৰ্মাণত জড়িত হৈ আছে কেইবাটাও বৃহৎ নিৰ্মাণকাৰী সংস্থা৷
যদি মেডিকেল কলেজ আৰু হাস্পতালৰ বিল্ডিংকেইটা আৰু উৰণীয়া সেঁতু নিৰ্মাণ দেখি উন্নয়ন বুলি ভাবিছে তেনেহ’লে ভুল হৈছে৷ অসমত এতিয়াও বহু চৰকাৰী দাতব্য চিকিৎসালয় বা হাস্পতাল আছে য’ত চিকিৎসাৰ কোনো ব্যৱস্থা নাই৷ এই বৃহৎ গৃহবোৰ গৰুৰ গোহালি আৰু অসামাজিক কাম-কাজৰ ঘাটিত পৰিণত হৈছে৷ মফচলীয়া অঞ্চলত থকা বহু চিকিৎসালয়ত চিকিৎসক-নাৰ্ছৰ ব্যৱস্থা নাই৷
মূৰ্খ অশিক্ষিত লোক নহয়,মূৰ্খ আচলতে একাংশ উচ্চ শিক্ষিত আমোলা অভিযন্তাহে৷ মহানগৰীত অবৈজ্ঞানিকভাবে নিৰ্মাণ কৰা হৈছে কেইবাখনো উৰণীয়া সেঁতু আৰু ফুটব্ৰীজ৷ একোখন ফুটব্ৰীজত কেইবাকোটি টকা আৰু উৰণীয়া সেঁতুত শ শ কোটি টকা খৰচ কৰা হৈছে৷ এতিয়া প্ৰশ্ন হ’ল অসম বাদ দিলো, দেশৰ কোনখন মহানগৰত ৭মিটাৰ বহল চিংগল লেণ্ডৰ উৰণীয়া সেঁতু আছে কোনোবাই জনাবনে? মহানগৰীৰ চুপাৰ মাৰ্কেটৰ উৰণীয়া সেঁতুখন আৰু অলপ বেছি দৈৰ্ঘ্যৰ কৰি ডাউনটাউনৰ ব্ৰীজৰ তলেৰে ডিভাইদাৰৰ ব্যৱস্থা কৰিলে যানজঁট কমিলহেঁতেন৷ ৰুক্মিণীগাঁৱৰ পুলিছ পইন্টত ইউটাৰ্ণৰ ব্যৱস্থা কৰা বাবে চুপাৰমাৰ্কেটৰ যানজঁটখিনি আহি ডাউনটাউন,ছয়মাইল পালে৷ গতিকে এইখন উৰণীয়া সেঁতুৰ পৰা কাৰ লাভ হ’ল৷ কোটি কোটি টকাৰ শৰাধ পাতি অবৈজ্ঞানিকভাবে কিয় নিৰ্মাণ কৰা হ’ল এইখন উৰণীয়া সেঁতু? ফুটব্ৰীজ বনাই কিয় পথবোৰ সংকুচিত কৰা হ’ল?
যদি কমিচন সংগ্ৰহ কৰাটোৱেই উদ্দেশ্য আছিল,বেলেগ আঁচনিৰ নামত টকাবোৰ খাব লাগিছিল৷ ৰাইজক যন্ত্ৰণা দি কিয় এইবোৰ নাটক কৰিব লাগে! এটা কথা নিশ্চিত যে অনাগত পাঁচ বছৰৰ ভিতৰত মহানগৰীত জধেমধে নিৰ্মাণ কৰা ফুটব্ৰীজ আৰু উৰণীয়া সেঁতু ভঙাৰ কাৰণে চৰকাৰে আন এখন নতুন আঁচনি গ্ৰহণ কৰিব লাগিব৷
উৰণীয়া সেঁতু নিৰ্মাণ, হাস্পতাল,মেডিকেল কলেজৰ নিৰ্মাণ মানেই উন্নয়ন নহয়৷ মেডিকেল কলেজে চিকিৎসকৰ অভাৱ কমাব পাৰিব কিন্ত আন্তঃগাঁথনি অবিহনে ৰাইজে উপযুক্ত চিকিৎসা কোনোদিনে লাভ নকৰিব৷
বেমাৰআজাৰ হ’লে মন্ত্ৰী-বিধায়ক,আমোলাই বিদেশত চিকিৎসা কৰাবলৈ যাব, চৰকাৰী বিষয়া-প্ৰতিষ্ঠিত ব্যৱসায়ীয়ে বহিঃৰাজ্যত চিকিৎসা কৰাবলৈ যাব আৰু সাধাৰণ মানুহখিনিয়ে অসমতে চিকিৎসা কৰাব লাগিব৷
আজি অলপ গুৰুতৰ ৰোগ হ’লে কিয় আমি চেন্নাই,দিল্লীলৈ যাবলগীয়া হয়? কিয় অসমৰ চিকিৎসক-হাস্পতালে হাত দাঙি দিয়া ৰোগীজন চেন্নাই,হায়দৰাবাদ,দিল্লী,মুম্বাইত আৰোগ্য লাভ কৰে! এই কথাবোৰ চালি জাৰি চোৱাৰ সময়৷ অসমৰ ব্যক্তিগত নাৰ্ছিংহোমত মন্ত্ৰী ,বিধায়কৰ শ্বেয়াৰ থাকিল বুলিয়েই অসমৰ মানুহখিনিক গিনিপিগ নসজাব৷
অসমৰ হাস্পতাল,মেডিকেল কলেজবোৰৰ আন্তঃগাঁথনি উন্নত কৰক,আৰু যাতে কোনো তেজস্বিতাৰ মৃত্যু নহয় তাৰ ব্যৱস্থা গ্ৰহণ কৰক৷
@তফিকউদ্দিন আহমেদ
